Xikwembu Nkulukumba a dumbise muprofeta Abrahamu leswaku a a ta tizrisa mun’we ka lixaka dzrakwe akuva a tisela matovoko ‘matiko hinkwawu ya misava’. (Genesis 22:18) A a tava mani mhunu wa kone?

Kolomu ka 2.000 wa malembe lama khalutiki, Xikwembu Nkulukumba a nyike Yesu ntamu leswaku a yentxa mahlolana ya ku tala lani misaveni. Nakone Yesu a a li wa lixaka dzra Abrahamu. Kutani a mahlolana lawa Yesu Kriste a ma yentxiki ma swi beka livaleni leswaku a xidumbiso lexi Xikwembu Nkulukumba a xi yentxiki ka Abrahamu, xa ku va a tovokisa matiko hinkwawu, a xi ta hetiseka ha Yesu.​—Ba-le-Galatia 3:14.

Vhanu lava voniki mahlolana ya Yesu va ve ni ku dumba ka leswaku yene a a hlawuliwile hi Xikwembu Nkulukumba akuva a tovokisa vhanu. Mahlolana wolawo ma tlhela ma kombisa leswi Yesu a taka swi yentxa akuva a hetisisa swidumbiso swa Xikwembu Nkulukumba. Swoswi a hi voneni wumhunu bya ku xonga bya Yesu lebyi vonekaka ka mahlolana lawa yene a ma yentxiki.

Wunene​—Yesu a hanyise lava a va vabya.

Siku dzrin’wana, wanuna wa kukazri lweyi a a ni nhlokonho a kombeli Yesu leswaku a mu hanyisa. Yesu a mu khumbe kutani a ku: ‘Ndzra swi zrandzra.’ Kolanu, a nhlokonho yi nyamalala.​—Marka 1:40-42.

Ku hanana​—Yesu a phameli switsrhungu.

Yesu a a nga swi zrandzri ku vona vhanu na va ni ndlala. Hi makhambi mabidzri, a yentxi hlolana dzra ku va a teka mapawu ni timhlampfi ti nge ti nga ni a swi yentxa swi tala akuva a phamela switsrhungu. (Mattheo 14:17-21; 15:32-38) Ntsrhaku ka loko va dile, hinkwavu va xuzrile ku tlhela ku sala swakuda.

Ntwelawusiwana​—Yesu a pfuxe vafi.

Yesu a twele wusiwana wansati wa kukazri wa mufelwa lweyi kutani a a sale wuswakwe ntsrhaku ka loko a feliwe hi n’wanakwe wa mun’we. Hi kola ka leswo, Yesu a pfuxe n’wanakwe ku feni.​—Luka 7:12-15.