A misaveni hinkwayu ku ni vhanu vanyingi lava va djulaka swakuda ni mbangu wa ku tsrhama ka wone. Na kasi vambeni va vilela dumbo mayelanu ni wumundzruku. Xikwembu Nkulukumba a djula leswaku vhanu va pfunana. Hi wani matovoko lawa hi taka ma kuma ka Xikwembu Nkulukumba loko hi yentxa leswo?

‘Lwa tsretsrelelaka xisiwana a voleka Yehovha, kutani Yehovha a ta hakela ku yentxa kwakwe lokunene.’​—AMAPROVERBIA 19:17.

Yesu a khaneli hi xifananiso xa wanuna lweyi a biwiki hi vayivi va va va mu siya na a li kusuhi ni ku fa. (Luka 10:29-37) Wanuna wa kukazri lweyi a a hundzra hi mbangu lowo a yimile a va a pfuna wanuna lweyi a a vavisiwile. A mu pfunile nambi leswi a a li wa tiko dzrin’wana ni wukhongoti byin’wana.

Handle ka ku mu lamulela ni ku mu hakelela akuva a dahiwa, wanuna lwiyani a tlheli a mu txhavelela ni ku mu zrulisa mbilu.

I yini leswi hi swi dondzraka ka xifananiso lexo? Yesu a hi kombe leswaku ku djuleka hi pfuna van’wana ka xin’wana ni xin’wana lexi hi nga xi kotaka. (Amaproverbia 14:31) Matsralwa ya ku Xwenga ma hi dondzrisa leswaku ku nga li khale Xikwembu Nkulukumba a ta helisa wusiwana ni ku xaniseka. Kambe swi nga yentxeka u tivutisa leswi: ‘Xana Xikwembu Nkulukumba a ta swi yentxisa kuyini?’ Nhloko-mhaka leyi landzrelaka yi ta khanela hi matovoko lawa Muvumbi wezru wa lizrandzru a taka hi nyika wone.