Vambeni va kholwa leswaku Zritu dzra Xikwembu Nkulukumba dzri nga va dzri txintxiwile. Kambe muprofeta Ezaya a hlaye leswaku Zritu dzra Xikwembu Nkulukumba ‘dzri tsrhama hi la ku nga helikiki’. (Ezaya 40:8) I yini lexi nga ku kholwisaka leswaku Zritu dzra Xikwembu Nkulukumba a dzri txintxiwanga?

Xikwembu Nkulukumba a ni wuswikoti bya ku sizrelela Zritu dzrakwe ni ku tiyisekisa leswaku dzri nga txintxiwi. A minkameni ya khale, loko makopiya ya Matsralwa ya ku Xwenga ma tsraliwa hi mavoko, lava a va ma kopiyara a va kontela maletela dzrin’we ha dzrin’we akuva va tiyiseka leswaku a ku yengeteliwanga, a ku txintxiwanga kumbe a ku timiwanga ntxhumu. Nambitanu, a va li vhanu va ku kala ku hetiseka, nakone va yentxi swihoxo swa kukazri.

Ku ni magidigidi ya makopiya ya khale ya Matsralwa ya ku Xwenga lama tsraliwiki hi voko. Loko ka buku dzrin’we ku ni ku hambana ka kukazri, swa koteka ku fananisa buku dzroledzro ni man’wana ku vona leswaku hi dzrini dzrungula dzra ntshima. Akuva u tiva leswi yengetelekiki mayelanu ni dzrungula ledzri, vona nhloko-mhaka leyi liki “Será que a Bíblia foi alterada?”, ka jw.org.

Vona, hi xikombiso, makopiya ya khale lama vitaniwaka Mabuku ya Lwandle dzra Munyu, lama kumiwiki hi va-beduwino kusuhi ni Lwandle dzra Munyu hi 1947. Mabuku wolawo ya khale ma ni swiyenge swa Matsralwa ya ku Xwenga leswi nga ni ku tlula 2.000 wa malembe na swi li kone. Tintlhazri ta kukazri ti fananise makopiya wolawo ni Matsralwa ya ku Xwenga lawa hi nga na wone namunhla. Ti kume yini?

Ti kambisise makopiya ya khale lama tsraliwiki hi voko kutani va tiyiseka leswaku leswi nga ka Zritu dzra Xikwembu Nkulukumba swa fana ni leswi nga ka makopiya lawa ya khale. * Handle ka ku ganaganeka, Xikwembu Nkulukumba a tiyisekise leswaku dzrungula ledzri nga ka Matsralwa ya ku Xwenga dzri ta tama dzri va leswi a dzri li xiswone ku ta tlhasa ni masiku yezru.

Xileswo, hi nga dondzra Zritu dzra Xikwembu Nkulukumba na hi dumba leswaku a dzri txintxiwanga. Na hi yanakanyisisa hi leswo, a hi voneni leswi vaprofeta va nga hi dondzrisaka swone mayelanu na Xikwembu Nkulukumba.