1-2. a) Xana Vayuda a va li ka xiyimu muni nkama lowu mupostola Pawulo a tsraleliki Vaheberu papela? b) Ha yini hi nga hlayaka leswaku a papela ledzri tsraleliwiki Vaheberu dzri tlhase hi nkama wunene?

 A VAKRISTE va Vaheberu lava a va tsrhama Yerusalema ni lava a va tsrhama Yudeya, va langusane ni swiyimu swa ku kazrata ntsrhakunyana ka loko Yesu a file. Na bandla dzra wukriste dzra ha ku simekiwa, vakriste lavayani va xanisiwe ngopfu swinene. (Mint. 8:1) Kutani kolomu ka 20 wa malembe lama landzreliki, va xaniseke ngopfu hi kola ka ndlala ni wusiwana leswi a swi li kone a tikweni. (Mint. 11:27-30) Nambitanu, kolomu ka 61 N.Y. a vakriste va ve ni ku zrula ka nkamanyana loko ku pimanisiwa ni leswi a swa ha ta. Ndzreni ka nkama wolowo, Yehovha a huhutele mupostola Pawulo kuva a va tsralela papela. Papela dzroledzro a dzri ni swilayu leswi a swi ta va pfuna ku tilulamisela ka leswi a swa ha ta humelela.

² A papela ledzri tsraleliwiki Vaheberu dzri tlhase hi nkama lowunene hikusa a nkama wa ku zrula lowu vakriste a va hanya ka wone a wu nge ti hlwela. Pawulo a nyikele switsratsriyo ka vakriste leswi a swi ta va pfuna loko va kumana ni nhlomulo. Ku helisiwa ka xiyimu xa Xiyuda loku Yesu a ku profetiki a ku li kusuhi. (Luk. 21:20) I ntiyiso leswaku Pawulo kun’we ni vakriste va le Yudeya a va nga swi tivi hi ku kongoma leswaku a ku helisiwa koloko a ku ta yentxeka siku muni. Kambe vakriste lavayani, a va ta londzrovota nkama lowu awa ha va salelile akuva va tilulamisela, va tiyisa lipfumelo dzravu ni ku tiyisela.—Heb. 10:25; 12:1, 2.

3. Ha yini buku dzra Vaheberu dzri li dzra lisima ngopfu ka vakriste namunhla?

³ Ku nga li khale, hi ta lavisana ni nhlomulo lowukulu lowu tlulaka  lowu vakriste va Vaheberu va langusaniki na wone. (Mat. 24:21; Mpful. 16:14, 16) Xileswo, a hi voneni swin’we swa switsratsriyo leswi tizraka leswi Yehovha a swi nyikiki Vakriste volavo leswi nga ha tlhelaka swi pfuna na hine namunhla.

“A HI TIKAZRATELENI KU VA LAVA WUPFIKI”

4. He swini swikazratu leswi vakriste va Vayuda va kumaniki na na swone? (Tlhela u vona ni mufoto.)

⁴ A Vayuda lava viki vakriste a va fanela ku yentxa ku txintxa lokukulu, kambe leswo a swi nga nabyali. A nkameni lowu khalutiki, Vayuda a va li tiko ledzri hlawuliwiki dzra Yehovha. Yerusalema a a li ntsindzra wa Mfumu wa Xikwembu Nkulukumba wa lani misaveni, nakone a tempele a ku li ntsindzra wa wugandzreli bya ku xwenga. Vayuda hinkwavu lava ku dumbeka a va landzra Nawu wa Moxe lowu a wu dondzrisiwa hi vazrangeli va wukhongoti. A ku ni milawu mayelanu ni swakuda, ku soka ni ndlela leyi a va fanela ku hanyisana ha yone ni vamatiko. Kambe ntsrhaku ka lifu dzra Yesu, Yehovha a a nga ha ma yamukeli magandzrelo lawa a ma nyikeliwa tempeleni. Leswo ku ve xikazratu ka Vayuda lava a va ha ku va vakriste, kuva va txintxa ndlela leyi a va tolovele ku gandzrela ha yone. (Heb. 10:1, 4, 10) Nambi vakriste lava a va wupfile ku fana na mupostola Petro va ve ni xikazratu xa ku titwananisa ni ku txintxa koloko. (Mint. 10:9-14; Gal. 2:11-14) Hi kola ka tidondzro letimpshwa, vakriste lavayani va xanisiwile hi vazrangeli va wukhongoti bya Xiyuda.

5. Xana vakriste a va fanela ku tivonela ka yini?

⁵ A vakriste va le Yudeya a va kanetiwa hi mintlawa yibidzri ya vhanu. Wa ku sungula, a ku ni vazrangeli va wukhongoti lava a va va vona swanga madukwa hi leswi a va tsrhike wukhongoti bya Xiyuda. Handle ka leswo, van’we va lava a va ti hlaya vakriste a va tsrhamela ku sindzrisa vakriste van’wana kuva va tama va landzrelela Nawu wa Moxe, swi nga yentxeka ku ve hi leswaku a va djula ku pumba nkaneto. (Gal. 6:12) I yini leswi a swi ta pfuna vakriste akuva va dumbeka ka Yehovha?

6. Xana Pawulo a kutxe vamakwavu akuva va yentxa yini? (Vaheberu 5:14–6:1)

⁶ Ka papela ledzri a dzri tsraleliki Vaheberu, Pawulo a kutxe vamakwavu akuva va dondzra  hi wuyenti a Zritu dzra Xikwembu Nkulukumba. (Dondzra Vaheberu 5:14–6:1.) Pawulo a tsrhahe matsralwa ya xiheberu ni ku tlhamuxela leswaku ha yini ndlela leyi vakriste a va gandzrela ha yone a yi li yinene ngopfu swinene ku tlula ndlela leyi vayuda a va gandzrela Yehovha ha yone khale. a Pawulo a a swi tiva leswaku loko vakriste vo dondzra ni ku twisisa ha hombe ntiyiso, a va ta kota tiva tidondzro ta madzrimi ni ku fambela kule na tone.

7. He swini swikazratu leswi hi langutanaka na swone namunhla?

⁷ Ku fana ni vakriste va Vaheberu, na hine namunhla hi hanya ni vhanu lava hangalasaka madzrungula kumbe lava nga ni miyanakanyu leyi lwisanaka ni leswi Yehovha a liki i swinene. Van’we va hlaya leswaku leswi Timboni ta Yehovha ti swi yentxaka swa ku landzra milawu ya Bibeleni mayelanu ni swa tinkuku swi hoxile. Ndlela leyi misava yi yanakanyaka ha yone yi ya yi va kule ni ndlela leyi Yehovha a yanakanyaka ha yone. (Amapr. 17:15) Xileswo, i swa lisima ngopfu swinene kuva hi tiva miyanakanyu leyo leyi hoxekiki ni ku fambela kule na yone. A hi fanelanga ku pfumelela mhunu ni mun’we a hi godolisa ni ku hi yentxa hi tsrhika ku tizrela Yehovha.—Heb. 13:9.

8. Xana hi nga tama hi wupfa hi tlhelo dzra moya hi ndlela yini?

⁸ Na hine hi fanela ku landzra xitsratsriyo lexi Pawulo a xi nyikiki Vaheberu xa kuva vakriste lava wupfiki. Leswo swi patsra ku va hi dondzra Bibele hi wuyenti akuva hi mu tiva ku yampswa Yehovha ni ndlela leyi a pimisaka ha yone. Nakone hi fanela ku yentxa leswo nambiloko hi tinyiketelile ni ku tlhela hi babatisiwa. Swi nge na mhaka ni leswaku hi ni nkama wa ku gama kwini na hi li Timboni ta Yehovha, hinkwezru hi fanela ku dondzra Bibele siku ni siku. (Amaps. 1:2) Ku va ni xiyimiso lexinene xa ku va ni dondzro ya ximhunu swi ta hi pfuna ku tiyisa lipfumelo dzrezru ku nga tsrhamela ledzri Pawulo a byeliki vakriste va Vaheberu leswaku va fanela ku va na dzrone.—Heb. 11:1, 6.

‘A HI VENENI NI LIPFUMELO AKUVA HI HULUXA WUTOMI BYEZRU’

9. Ha yini a swi li swa lisima ka vakriste va Vaheberu kuva va va ni lipfumelo ledzri tiyiki?

⁹ Vakriste va Vaheberu a va fanela ku va ni lipfumelo ledzri tiyiki hikusa leswo a swi ta va pfuna kuva va huluka loko ku tlhasa nhlomulo lowukulu a Yudeya. (Heb. 10:37-39) Yesu a a byele valandzreli vake leswaku loko va vona Yerusalema na a tsrandzreliwa hi masotxha ya Varoma, a va fanela ku huma Yerusalema va tsrutsruma va ya tinhaveni. Lava a va tsrhama doropeni ni lava a va tsrhama ntlhaveni a va fanela ku landzra xitsratsriyo lexo. (Luk. 21:20-24) A nkameni lowo, loko masotxha ma hlasela muganga wa kukazri, lava a va tsrhama titlhaveni hi ntolovelo a va tsrutsrumela ndzreni ka doropa hikusa a dzri sizrelelekile hi makhumbi. Kutani ku tsrutsrumela tinhaveni a swi tikomba na swi nga twisiseki. Xileswo, a swi djula ku va ni lipfumelo ledzrikulu.

10. I yini leswi vakriste a va ta swi yentxa loko a vo va ni lipfumelo ledzri tiyiki? (Vaheberu 13:17)

¹⁰ A vakriste va Vaheberu a va fanela ku dumba lava Yesu a a va bekile akuva va kongomisa bandla. Lava a va zrangela, swi nga yentxeka a va nyikela minkongomiso ya kukazri mayelanu ni nkama kun’we ni ndlela leyi a va fanela ku tsrutsruma va huma Yerusalema ha yone. (Dondzra Vaheberu 13:17) A zritu dzra Xigriki ledzri tizrisiwiki ka Vaheberu 13:17 ledzri liki “mi tibeka hansi” dzri tlhamuxela leswaku a mhunu lwa yingisetaka awa mu dumba mhunu lweyi a mu kongomisaka. Kumbe hi mahlayela man’wana, a hi ku tibeka hansi ntsena hi leswi mhunu  lweyo a nga ni mfanelo ya ku zrangela. Leswi liki, a vakriste va Vaheberu swi djule kuva va dondzra ku dumba lava a va va zrangela na nhlomulo lowukulu wu nge si na sungula. Loko a li leswaku hi nkama lowu na ka ha zrulile a vakriste a va landzra minkongomiso ya lava a va va zrangela hi ku dumbeka, a swi ta nabyala ngopfu kuva va tibeka hansi hi minkama ya ku kazrata.

11. Ha yini swi li swa lisima kuva vakriste namunhla va va ni lipfumelo ledzri tiyiki?

¹¹ Ku fana ni vakriste va Vaheberu swi djula kuva na hine hi va ni lipfumelo. Hi hanya a nkameni lowu vhanu vanyingi va kalaka va nga pfumeli leswaku a wugamu bya xiyimu xa misava leyi byi le kusuhi. Va patsra ni ku hi hleka hi leswi hi kholwaka leswo. (2 Pet. 3:3, 4) Handle ka leswo, nambileswi Bibele dzri hi tlhamuxelaka swa kukazri mayelanu ni leswi taka yentxeka ka nhlomulo lowukulu, ka ha ni swinyingi leswi hi kalaka hi nga swi tivi. Swi djula kuva hi tiyiseka leswaku a wugamu byi ta tlhasa hi nkama wa kone, nakone loko leswo swi yentxeka, Yehovha a ta hi hlayisa.—Habk. 2:3.

12. I yini leswi taka hi pfuna kuva hi huluka hi nkama wa nhlomulu lowukulu?

¹² Na hine hi fanela ku va ni lipfumelo dzra leswaku Yehovha a tizrisa “nandzra wa ku dumbeka ni ku tlhazriha” akuva a hi kongomisa namunhla. (Mat. 24:45) Loko nhlomulo lowukulu wu sungula, swi nga yentxeka hi ta yamukela minkongomiso ya kukazri leyi taka huluxa wutomi byezru, hi lani vakriste va Vaheberu va yi yamukeliki ha kone loko masotxha ya Varoma ma hlasele Yerusalema. Kutani, lowu i nkama wa kuva hi dondzra ku dumba lava Yehovha a va tizrisaka leswaku va hi zrangela. Loko hi nga va dumbi ni ku tlhela hi nga yingiseti minkongomiso yavu swoswi, ku hlaya ntiyiso, swi ta hi kazratela ku yingiseta minkongomiso leyi va taka hi nyika yone hi nkama wa nhlomulo lowukulu.

13. Ha yini xitsratsriyu xa Pawulo ka Vaheberu 13:5 a xi faneleka?

¹³ Na va ha yimela xikombiso akuva va huma Yerusalema, a vakriste va Vaheberu a va fanela kuva va nga “zrandzri mali” kambe va nabyalisa wutomi byavu ni ku beka miyanakanyu yavu ka ku tizrela Yehovha. (Dondzra Vaheberu 13:5.) Van’we vavu va xaniseke hi ndlala ni wusiwana. (Heb. 10:32-34) Nambileswi a va tiyimisele ku tiyiselela swikazratu hi kola ka ku zrezra madzrungula lamanene, swi nga yentxeka na van’we vavu va sungule ku tinyiketela ka ku djula mali yinyingi akuva va tisizrelela ka timhangu kumbe ka wusiwana. Kambe a mali yoleyo a yi nga ti huluxa wutomi byavu loko Yerusalema a hlaseliwa. (Yak. 5:3) Ku hlaya ntiyiso, hinkwavu lava a va zrandzra mintxhumu ya nyama swi nga yentxeka a swi ta va kazratela ku tsrutsruma va siya miti yavu ni mintxhumu ya lisima.

14. Xana ku va ni lipfumelo ledzri tiyiki swi nga hi pfunisa kuyini kuva hi teka swiboho mayelanu ni mintxhumu ya nyama?

¹⁴ Loko nakunene hi ni lipfumelo dzra leswaku ku nga li khale Yehovha a ta helisa misava leyi, a hi nge ti vona leswaku ku va ni mali yinyingi kumbe mintxhumu ya nyama hi swone swi nga swa lisima. Hi nkama wa nhlomulo lowukulu a mali a yi nge ti va ya ntxhumu. A Bibele, dzri hlaya leswaku vhanu va ta ‘txukumetela silivhela dzravu a mazruweni’ hikusa va ta twisisa leswaku ‘a gole dzravu dzri nge vi na ntamu wa ku va huluxa sikwini dzra ku hlundzruka ka Yehovha’. (Ezek. 7:19) A matsrhan’wini ya ku tikazratela ku tihlengeletelela mali yinyingi, hi fanela ku teka swiboho leswi taka hi pfuna kuva hi tiwundla ni ku wundla mindangu yezru ni ku teka swiboho leswi taka hi pfumelela ku tizrela Yehovha. A ku nge vi wutlhazri ku tizrisa mali ya ku tlula leyi hi nga na yone kumbe ku heta nkama wunyingi na hi landzrelela mintxhumu ya nyama. Nakone hi fanela ku tivonela kuva mintxhumu leyi hi nga na yone  yi nga vi ya lisima ngopfu a wuton’wini byezru. (Mat. 6:19, 24) Loko wugamu byi ya byi tsrhindzrekela, swi ta djula kuva hi hlawula leswaku hi dumba Yehovha kumbe mintxhumu leyi hi nga na yone.

“Swi Djula Mi Tiyisela”

15. Ha yini vakriste va Vaheberu a va fanela ku tiyisela?

¹⁵ A vakriste va Vaheberu a va fanela ku tiyisela a ntizrweni wa Yehovha hikusa ndzreni ka nkamanyana a va ta va ni swikazratu. (Heb. 10:36) Nambileswi van’we a nkameni lowu khalutiki va xanisiwiki, ntalu wavu va ve vakriste hi nkama lowu a ka ha ni ku zrula. Kutani Pawulo a va dzrimuxe leswaku a va fanela ku tilulamiselela nxanisa yin’wana leyi a ya ha ta ni ku tiyimisela ku tama va dumbeka ku ya tlhasa wugamu, ku fana na Yesu. (Heb. 12:4) Loko wukriste byi ya byi yandzra, a Vayuda vanyingi a va ya va hlundzruka ni ku tama va va ni tihanyi hi leswi a ku ni Vayuda lava a va va vakriste. Malembenyana ntsrhaku, xitsrhungu xa kukazri xi hlasele Pawulo na a li ku zrezreni a Yerusalema. Vayuda lava tlulaka 40 ‘va hlambanye va hlaya leswaku a va nge di ntxhumu kumbe ku nwa swa kukazri na va nga si na mu dlaya’. (Mint. 22:22; 23:12-14) Nambileswi a va nyenyiwa va tlhela va xanisiwa, a swi djula kuva vakriste va tama va nhlengeletana akuva va gandzrela Yehovha, va zrezra madzrungula lamanene, ni ku tama va tiyisa lipfumelo dzravu.

16. Xana papela ledzri nga tsraleliwa Vaheberu dzri nga hi pfunisa kuyini ku vona mabindzru lama nga kone loko hi xanisiwa? (Vaheberu 12:7)

¹⁶ I yini lexi a xi ta pfuna vakriste va Vaheberu ku tama va tiyisela nambiloko va kanetiwa? Pawulo a a djula ku va pfuna kuva va vona mabindzru ya ku tiyiselela tinxanisa. Kutani, a va tlhamuxele leswaku loko mukriste a kumana ni swikazratu, swi nga yentxeka na Xikwembu Nkulukumba a pfumelele swikazratu swoleswo akuva a dzringa leswaku lipfumelo dzra muksrite yelweyo dzri tiyile kumbe im-him. (Dondzra Vaheberu 12:7.) Leswo a swi ta va pfuna ku kulisa ni ku yampswisa matsrhamela lama vilelekaka ka vakriste. Loko a ve xiyisisa leswinene  ka swikazratu swavu, vakriste lavayani va Vaheberu a swi ta va nabyalela ku tiyisela.—Heb. 12:11.

17. I yini leswi Pawulo a a swi tiva mayelanu ni ku lwisana ni nxanisa?

¹⁷ Pawulo a kutxe Vakriste va Vaheberu leswaku a va fanela ku va ni xixixi ni kuva va nga godoli loko va kanetiwa. Mupostola Pawulo a a li xiyin’wini lexinene xa ku nyikela switsratsriyo mayelanu ni mhaka leyi ya ku kanetiwa hikusa na a nga si va mukriste a xanise vakriste, xileswo a a swi tiva ku yampswa leswi a swi ta va humelela. Nakone a a yi tiva ndlela ya ku tiyiselela tinxanisa hikusa ntsrhaku ka loko a ve mukriste a kumane ni tinxanisa ta ku siyanasiyana. (2 Kor. 11:23-25) Xileswo, Pawulo a a swi tiva ha hombe leswi djulekaka kuva mhunu a tiyisela. A dzrimuxe vakriste leswaku loko va lwisana ni swikazratu, a va nga fanelanga ku tidumba, kambe a va fanela ku dumba Yehovha. Pawulo a hlaye hi xixixi a ku “Yehovha i mupfuni wanga a ni nge txhavi” ntxhumu.—Heb. 13:6.

18. I yini leswi taka hi pfuna ku lwisana ni tinxanisa?

¹⁸ A masikwini yezru vamakwezru van’wana kutani va xanisiwa. Hi nga va seketela hi ku va patsra ka swikhongoto swezru, ni kuva minkama yin’wana hi va pfuna hi leswi va swi vilelaka. (Heb. 10:33) Kambe Bibele dzri swi beke livaleni leswaku “hinkwavu lava djulaka ku hanya na va gandzrela Xikwembu Nkulukumba swanga vadondzrisiwa va Kriste Yesu, na vone va ta xanisiwa”. (2 Tim. 3:12) Hi ndlela leyo, hinkwezru hi fanela ku tilulamisela ku tiyiselela minkama ya ku kazrata leya ha taka. Xileswo hi fanela ku tama hi dumba Yehovha ni kuva hi tiyiseka leswaku a ta hi pfuna ku lwisana ni nhlomulo wini na wini. Hi nkama lowu nga wone, a ta nyika ntsrhunxeko lava mu gandzrelaka hi ku dumbeka.—2 Tes. 1:7, 8.

19. I yini leswi hi faneliki hi swi yentxa akuva hi tilulamisela ka nhlomulo lowukulu? (Tlhela u vona ni mufoto.)

¹⁹ A papela ledzri Pawulo a dzri tsraleliki Vaheberu, handle ka ku ganaganeka dzri pfune Vakriste va le dzaneni dzra ku sungula akuva va tilulamisela ku lwisana ni nhlomulo lowu awa ha ta. Pawulo a va kutxe kuva va dondzra Zritu dzra Xikwembu Nkulukumba hi wuyenti va tlhela va dzri twisisa ku yampswa. Hi ku yentxa leswo, a va ta kota ku vona tidondzro ta madzrimi ni ku fambela kule na tone, leti a ti ta tsranisa lipfumelo dzravu. A va kutxe ku tiyisa lipfumelo dzravu a kuva va kota ku landzra minkongomiso ya Yesu ni ya lava a va zrangela bandleni na va nga ganaganeki. A pfune vakriste leswaku va kota ku tiyisela hi ku va va vona swikazratu swavu swanga mukhandlu wa ku wupfisiwa hi Papayi wavu lwa nga ni lizrandzru. Na hine swi djula kuva hi landzra switsratsriyo leswo. Hi ku yentxa leswo, hi ta kota ku tama hi dumbeka ku ya tlhasa wugamu.—Heb. 3:14