1. He byini wuyavanyisi lebyi taka yentxeka ku nge khale?

 HI HANYA ka nkama lowu mintxhumu yinyingi yi txintxatxintxaka. Ku nga li khale ku ta va ni ku txintxa lokukulu, lani Yesu a taka yavanyisa mun’wana ni mun’wana lani misaveni. Yesu ha byake a tlhamuxele vadondzrisiwa vake hi leswi a swi ta yentxeka na ku yavanyisiwa loko ku nge si na tlhasa, swanga “xikombiso” xa ku ta kwake “ni xa ku hela ka xiyimu lexi xa misava”. (Mat. 24:3) Xikombiso lexi xa wuprofeta xi kumeka ka Matewu ndzrima 24 ni 25 ni ka wudzrunguli lebyi yelanaka lebyi kumekaka ka Marka ndzrima 13 na Luka ndzrima 21.

2. Hi ta bula ha yini ka nhloko mhaka leyi nakone ha yini leswo swi ta hi pfuna?

² Yesu a nyikele swidzrimuxo swa lisima hi ku tizrisa swifaniso swizrazru. Ku nga swifaniso swa van’hwanyana lava ku phunta ni lava ku tlhazriha, xa tihamba ni timbuti ni xa matalenta. A xifananiso xin’wana ni xin’wana xi ta hi pfuna ku twisisa leswaku Yesu a ta yavanyisa mun’wana ni mun’wana wezru hi ku ya hi mahanyela yake. Nkama lowu hi kambisisaka swifaniso leswi, hi ta vona leswi hi nga swi dondzraka ni ndlela leyi hi nga swi tizrisaka ha yone a wuton’wini byezru. Xifaniso xa ku sungula lexi hi taka bula ha xone i xa tihamba ni timbuti.

TIHAMBA NI TIMBUTI

3. He dzrini lani Yesu a taka yavanyisa vhanu?

³ Ka xifananiso xa tihamba ni timbuti, Yesu a hlaye leswaku a ta yavanyisa vhanu hi ku ya hi ndlela leyi va yanguliki ha yone ka madzrungula lamanene ni ku seketela vamakwavu lava totiwiki. (Mat. 25:31-46) Yesu a ta yavanyisa tihamba ni timbuti hi nkama wa “nhlomulo lowukulu”, kusuhi ni Armagedoni. (Mat. 24:21) Ku fana ni loko mubyisi a hambanisa tihamba xikazri ka timbuti,  Yesu a ta hambanisa vhanu lava seketelaka vamakwavu lava totiwiki ka lava kalaka va nga va seketeli.

4. Hi ku ya hi Ezaya 11:3, 4, ha yini hi nga tiyisekaka leswaku Yesu a ta yavanyisa vhanu hi wululami? (Tlhela u vona ka ka kapa.)

⁴ A wuprofeta bya Bibele byi komba leswaku Yehovha a beke Yesu swanga lweyi a taka yavanyisa hi ku lulama. (Dondzra Ezaya 11:3, 4.) Yesu a xiyisisa leswi vhanu va swi yentxaka, va swi hlayaka kumbe leswi va swi pimisaka, ku patsra ni ndlela va va khomaka ha yone vatotiwa. (Mat. 12:36, 37; 25:40) Hi ku yentxa leswo Yesu a ta kota ku tiva lweyi a seketeliki vamakwavu lava totiwiki ni ntizro lowu va wu yentxaka. a Yin’we ya tindlela leti kombaka leswaku va fana ni tihamba ni leswaku va seketela vamakwavu va Yesu i ku patsreka a ku zrezreni ka madzrungula lamanene. Vhanu lava va yavanyisiwa swanga lava ku “lulama” nakone va ta va ni dumbo dzra ku kuma “wutomi lebyi nga helikiki” a misaveni. (Mat. 25:46; Mpful. 7:16, 17) Ledzro ku tava hakelo ledzrikulu ka lava hlayisiki wudumbeki byavu. Loko va tama va dumbeka hi nkama wa nhlomulo lowukulu ni loko kutani wu khalutile, a mavito yavu ma ta tama ma va kone “a bukwini dzra wutomi”.—Mpful. 20:15.

5. Hi dondzra yini ka xifaniso xa tihamba ni timbuti, nakone i vamani lava fanelaka ku xi tekela nhlokweni?

⁵ Kombisa leswaku wa dumbeka. Xifananiso xa Yesu mayelanu ni tihamba ni timbuti, xi vulavula ngopfu hi lava nga ni dumbo dzra ku hanya la misaveni. Vhanu lavo va kombisa lipfumelo dzravu, ku nga li hi ku seketela vamakwavu va Kriste ka ntizro wa ku zrezra ntsena kambe ni ku va va landzra nkongomiso hi ku dumbeka wa ntlawanyana wutsrongo wa vatotiwa lowu Yesu a wu hlawuliki. (Mat. 24:45) Kambe hi li yini hi lava nga ni dumbo dzra ku ya hanya matilweni? Na vone va fanela ku yingiseta xidzrimuxo lexi hi xi kumaka ka xifaniso lexi, ha yini? Hikusa Yesu a nyika lisima mahanyela, vonela ni leswi va swi hlayaka. Na vone va fanela ku kombisa leswaku va dumbeka. Hi leswi yentxiki Yesu a vulavula hi swifaniso swin’wana swibidzri leswi vulavulaka hi swidzrimuxo leswi kongomaka vatotiwa. Swifaniso leswo hi tlhela hi swi kuma ka Matewu ndzrima 25. Swoswi a hi buleni hi xifananiso xa van’hwanyana va ku phunta ni van’hwanyana va ku tlhazriha.

VAN’HWANYANA VA KU TLHAZRIHA NI VAN’HWANYANA VA KU PHUNTA

6. Xana van’hwanyana lava ntlhanu va swi kombise h ndlela yini leswaku a va tlhazrihile? (Matewu 25:6-10)

⁶ Ka xifananiso xa van’hwanyana, Yesu a vulavule hi hi van’hwanyana va 10 lava humaka va ya tlhangaveta muteki. (Mat. 25:1-4) Hinkwavu a va djula ku heketa muteki ka nkhuvu wa mutxhatu. Yesu a hlaye leswaku 5 wa vone a va tlhazrihile kasi lavan’wana va 5 a a li swiphunta. Van’hwanyana lava ku tlhazriha a va tilulamiselile nakone a va zrindzrile. A va lulamile akuva va yamukela muteki nkama wini na wini nambi loko a hlwela ku tlhasa. Xileswo va teke mimotsre ni mafuzra akuva va ta kota ku vona loko ku mphuma. Va tlhele va teka ni mafuzra man’wana akuva va ya txhela ka mimotsre loko lawayani ma hela na muteki a si tlhasa. Xileswo a va lulamile akuva mimotsre yi nga timeki. (Dondzra Matewu 25:6-10.) Loko muteki a tlhasa van’hwanyana lava ku tlhazriha va fambe na yene ka nkhuvu wa mutxhatu. Hi la ku fanaka loko vakriste lava totiwiki va tsrhama na va lulamile, na va zrindzrile ni ku dumbeka ku ya tlhasa loko Yesu a buya, va ta voniwa na va faneleka va va va titlhanganisa na Yesu swanga Muteki, a Mfun’wini wake wa le matilweni. b  (Mpful. 7:1-3) Kambe ku yentxeke yini hi van’hwanyana lavan’wana va 5 va ku phunta?

7. Ku yentxeke yini hi van’whanyana lava ku phunta, nakone ha yini?

⁷ Ku hambana ni van’hwanyana lava ku tlhazriha, van’hwanyana lava ku phunta a va nga tilulamiselanga loko muteki a tlhasa. A mimotsre yavu a yi li kusuhi ni ku timeka, nakone a va nga buyanga ni mafuzra mambeni. Loko va tive leswaku muteki a ku suhi ni ku tlhasa, swi djule kuva va suka va ya ku xaveni ka mafuzra. Nakone loko muteki a tlhasa vone a va nge si tlhela. Xileswo, “van’hwanyana lava a va tilulamiselile va nghene na yene a nkhubyini wa mutxhatu kutani ku pfaliwa xipfalu”. (Mat. 25:10) Hi wugamu, loko van’hwanyana lavaya ku phunta va tlhasile, va djule ku nghena a nkhubyini kambe a muteki a te: “A ni mi tivi.” (Mat. 25:11, 12) Van’hwanyana lavaya a va nga tilulamiselanga ku yimela muteki ku ko a tlhasa. Xana vatotiwa va nga dondzra yini ka xifaniso lexi?

8-9. I yini leswi vatotiwa va nga swi dondzraka ka xifaniso xa van’hwanyana? (Tlhela u vona ni mufoto.)

⁸ Kombisa leswaku u tilulamiselile nakone u zrindzrile. Yesu a a nga djuli ku hlaya leswaku ku ta va ni mintlawa yibidzri ya vatotiwa, lani wun’we a wu ta tsrhama na wu nga lulamanga ni lowu a wu ta tsrhama na wu lulamile ku ya tlhasa wugamu bya xiyimu lexi xa misava. Ku hambana ni leswo, Yesu a a tlhamuxela leswi a swi ta humelela vatotiwa loko va tsrhama na va nga lulamanga ni ku tiyisela hi ku dumbeka ku ya tlhasa wugamu. Ka xiyimu lexo, a va nge na ku yamukela hakelo dzravu. (Yoh. 14:3, 4) Leyi i mhaka ya lisima. Swi nge na mhaka ni leswaku a dumbo dzrezru i dzra ku hanya lani misaveni kumbe matilweni, hinkwezru hi fanela ku xi tekela nhlokweni xifaniso xa van’hwanyana lava. Mun’wana ni mun’wana wezru a fanela ku tsrhama na a zrindzrile ni ku lulamela ku tiyisela ku ya tlhasa wugan’wini.—Mat. 24:13.

⁹ Ntsrhaku ka loko a vulavule hi xifaniso xa van’hwanyana akuva a kombisa lisima dzra tsrhama na hi lulamile ni ku zrindzra, Yesu a vulavule hi xifaniso xa matalenta. Xifaniso lexo, xi kombisa lisima dzra kuva hi va vatizri ni ku tikazrata hi la hi nga kotaka ha kone.

 MATALENTA

10. Xana vatizri lavabidzri va kombise leswaku va dumbeka hi ndlela yini? (Matewu 25:19-23)

¹⁰ Ka xifaniso xa matalenta, Yesu a vulavule hi vatizri vabidzri lava a va dumbekile ka n’winyi wavu ni mun’we lweyi a a nga dumbekanga. (Mat. 25:14-18) A vatizri vabidzri va kombise leswaku va dumbeka hi ku tizra swi phela akuva va bindzrulela n’winyi wavu mali yinyingi. Na a nga si na yendzra a ya ka tiko dzrin’wana, a siyele vatizri vake matalenta, kumbe mali yinyingi. Vatizri lavabidzri va ku dumbeka va tizre ngopfu, nakone va tizrise mali yavu hi wutlhazri. Ma ve wani mabindzru ya kone? Loko n’winyi wavu a tlhelile vatizri lavabidzri a va bindzrule matalenta lawa va siyeliwiki wone ha kabidzri. Xileswo n’winyi wavu a va kulungelile va va va “yonxa ni n’winyi [wavu]”. (Dondzra Matewu 25:19-23.) Kambe ku yentxeke yini hi mutizri lwe wa wuzrazru? A yentxe yini hi mali leyi n’winyi wake a mu nyikiki yone?

11. Ku yentxeke yini hi mutizri wa “wulolo” nakone ha yini?

¹¹ Mutizri lwe wa wuzrazru, a yamukele talenta dzrin’we, kambe a ve ni “wulolo”. A n’winyi wake a a yimele kuva a tizrisa talenta ledzri a nyikiwiki dzrone hi wutlhazri, kambe a matsrhan’wini ya ku yentxa leswo e dzri yimbela. Loko n’winyi wake a tlhelile, a kume leswaku a nandzra lweyi a a nga bindzrulanga ntxhumu. Leswi mutizri lweyi a swi yentxiki a swi nga li swinene. A matsrhan’wini ya ku kombela ku dzrivaleliwa hi leswi a kalaka a nga mu bindzrulelanga ntxhumu n’winyi wake, mutizri lweyi a yeyise n’winyi wake a va a hlaya leswaku i “mhunu lweyi a kazrataka.” Leswi mutizri lweyi a swi yentxiki a swi mu nyonxisanga n’winyi wake. Xileswo, a tekeliwe talenta ledzri a a nyikiwe dzrone a va a hlongololiwa kaya ka n’winyi wake.—Mat. 25:24, 26-30.

12. Xana vatizri lavabidzri va ku dumbeka va yimela vamani namunhla?

¹² Vatizri lavabidzri va ku dumbeka va fanekisela vakriste va ku dumbeka lava totiwiki. Hosi Yesu a va zramba kuva va “nyonxa ni n’winyi [wavu]”. Kumbe hi mahlayela man’wana, va kuma hakelo dzravu a matilweni, ku nga ku pfuxiwa ka ku sungula. (Mat. 25:21, 23; Mpful.  20:5b) Hi tlhelo dzrin’wana, xikombiso xa ku biha xa mutizri wa wulolo i xidzrimuxo ka vatotiwa. Kambe hi ndlela yini?

13-14. Xana vatotiwa va dondzra yini ka xifaniso xa matalenta? (Tlhela u vona ni mufoto.)

¹³ Kombisa leswaku u tizra hi nkhinkhi nakone yentxa leswi u swi kotaka. Ka xifaniso xa matalenta ni xa van’whanyana, Yesu a a nga profeti leswaku van’we va vatotiwa a va ta lolohwa. A matsrhan’wini ya leswo, a a tlhamuxela leswi a swi ta yentxeka loko a vo txhuka va nga ha tizri hi nkhinkhi. A va ta luza ku “vitaniwa ni ku hlawuliwa koloko” nakone a va nga ti pfumeleliwa ku nghena a Mfun’wini wa matilo.—2 Pet. 1:10.

¹⁴ Xifaniso xa Yesu mayelanu ni van’whanyana ni matalenta, xi swi beka livaleni leswaku vakriste hinkwavu lava nga vatotiwa a va fanela ku tsrhama na va lulamile ni ku tsrhama na va zrindzrile nakone a va fanela ku tizra hi nkhinkhi va yentxa leswi va swi kotaka. Kambe, xana Yesu a hlaye swin’wana swanga xidzrimuxo ka vatotiwa? Ina! Leswi Yesu a swi hlayiki ka Matewu 24:40, 41 naswone swa fambisana ni wuyavanyisi bya wugamu bya vatotiwa.

I MANI LWEYI A TAKA “TEKIWA”?

15-16. Xana Matewu 24:40, 41 yi pfuna vatotiwa ku vona lisima dzra ku tsrhama na va lulamile hi ndlela yini?

¹⁵ Na a nge si na vulavula hi swifaniso leswizrazru, Yesu a vulavule hi wuyavanyisi bya wugamu akuva a tlhamuxela vatotiwa lava a va ta yamukeleka. A vulavule hi vavanuna vabidzri lava a va li ku tizreni masin’wini ni vavasati vabidzri lava a va li ku sileni. Ka xiyimu ha xin’we xin’we, swi tikomba na ha wubidzri byavu a va li ku yentxeni a ntizro lowu fanaka, kambe Yesu a hlaye leswaku “mun’we a ta tekiwa lwemun’wana a siyiwa”. (Dondzra Matewu 24:40, 41.) Hi ku landzrela, Yesu a byele vadondzrisiwa vake a ku: “Tsrhamani na mi zrindzrile, hikusa a mi dzri tivi siku ledzri Hosi yenu yi taka ta ha dzrone.” (Mat. 24:42) Loko Yesu a vulavule hi xifaniso xa van’whanyana, a nyikele ntlhamuxelo lowu yelanaka. (Mat. 25:13) Xana mintlhamuxelo leyi ya yelana? Swi tikomba na yi yelana. Ko va vatotiwa va ku dumbeka ntsena lava taka “tekiwa”, kumbe hi mahlayela man’wana lava Yesu a taka va yamukela a Mfun’wini wa matilo.—Yoh. 14:3.

¹⁶ Kombisa leswaku u zrindzrile. Mutotiwa mun’wana ni mun’wana lweyi a kalaka a nga tsrhami na a lulamile, kumbe ku zrindzra hi tlhelo dzra moya, a nge ti hlengeletiwa ni “vahlawuliwa”. (Mat. 24:31) Kambe ku hlaya ntiyiso, hinkwavu lava tizrelaka Yehovha swi nge na mhaka ni dumbo dzravu, va fanela ku teka mazritu ya Yesu swanga xidzrimuxo akuva va tsrhama na va lulamile ni ku dumbeka.

17. Ha yini hi nga fanelanga hi kazrateka loko Yehovha a hlawula ku tota van’we va vakriste a masikwini yezru?

¹⁷ Hi mu tiva ku yampswa Yehovha, nakone ha swi tiva leswaku ndlela leyi a yavanyisaka ha yone yi lulamile. Loko Yehovha a hlawula vhanu va ku dumbeka akuva va va vatotiwa a masikwini yezru, leswo a swi hi kazrati. c Ha xi dzrimuka xifaniso lexi Yesu a xi hlayiki mayelanu ni vavanuna lava sunguliki ku tizra ka nsimu ya mawuvha hi ma 17 wora. (Mat. 20:1-16) Lava tholiwiki ku tizra ka nsimu ya mawuvha ni madambu, va kume muholo lowu fanaka ni lava sunguliki ku tizra ni mixo. Hi la ku fanaka, swi nge na mhaka ni nkama lowu vatotiwa va hlawuliwaka ha wone, hinkwavu va ta kuma hakelo dzra wutomi a matilweni loko va tama va dumbeka.

YINGISETA SWIDZRIMUXO

18-19. He tini tidondzro ni swidzrimuxo leswi hi swi dondzriki?

¹⁸ Hi dondzre yini? Ka lava nga ni dumbo dzra ku hanya hi la ku nga helikiki la misaveni, xifaniso xa tihamba ni timbuti xi kombisa lisima  dzra ku va hi tama hi dumbeka ka Yehovha, ku sukela swoswi ni hi nkama wa nhlomulo lowukulu lowu nga kusuhi ngopfu swinene. A nkameni lowu taka, Yesu a ta yavanyisa lava a va hanya hi ku dumbeka swanga lava faneliwaka hi “wutomi lebyi nga helikiki”.—Mat. 25:46.

¹⁹ Hi tlhele hi dondzra hi swifananiso swibidzri leswi nyikeliki swidzrimuxo ka vatotiwa. Ka xifaniso xa Yesu xa van’hwanyana va ku tlhazriha ni va ku phunta, ntlhanu wa vone a va tlhazrihile. A va lulamile nakone a va zrindzrile, akuva va yimela muteki hi nkama lowu a a ta tlhasa ha wone. Kambe van’hwanyana lava swiphunta a va nga tiyimiselanga. Xileswo, muteki a nga va pfumelelanga akuva va nghena ka nkhuvu wamutxhatu. Na hine, swi djula kuva hi tsrhama na hi lulamile hi yimela nkama lowu Yesu a taka tisa magamu ya xiyimu lexi xa misava ha wone. Handle ka leswo, ka xifaniso xa Yesu xa matalenta, hi vone leswaku vatizri vabidzri lava ku dumbeka a va ni nkhinkhi nakone a va tlhazrihile. Va tizrele n’winyi wavu hi ku hiseka, xileswo a va yamukelile. Kambe mutizri lwe wa wulolo a hlongoliwile. Hi dondzra yini? Hi fanela ku tama hi va ni swinyingi swa ku swi yentxa a ntizrweni wa Yehovha ku ya tlhasa wugan’wini. Hi wugamu, hi dondzre hi xivileleko xa kuva vatotiwa va tsrhama na va zrindzrile akuva va ta “tekiwa” ha Yesu leswaku va yamukela hakelo dzravu a matilweni. A vatotiwa va lavisele kuva va “hlengeletiwa” na Yesu a matilweni. Ntsrhaku ka yimpi ya Armagedoni, va ta va mutekiwa wa Yesu ka mutxhatu wa Xihambana.—2 Tes. 2:1; Mpful. 19:9.

20. Xana Yehovha a ta yentxa yini hi lava yingisetaka swidzrimuxo?

²⁰ A nkama wa yavanyiso wu le kusuhi ngopfu swinene, kambe hine a hi txhavi. Loko hi tama hi dumbeka, Papayi wezru lwa nga matilweni a ta hi nyika “ntamu lowu tlulaka lowu tolovelekiki” akuva hi kota ku “ku yima a mahlweni ka n’wana wa mhunu”. (2 Kor. 4:7; Luk. 21:36) Swi nge na mhaka ni leswaku a dumbo dzrezru i dzra ku hanya a matilweni kumbe la misaveni, hi ta nyonxisa Papayi wezru Yehovha loko hi yingiseta swidzrimuxo leswi kumekaka ka swifaniso swa Yesu. Hi kola ka timpswalu letikulu ta Yehovha, mavito yezru ma ta va na ma ‘tsraliwe a bukwini’ dzra wutomi.—Dan. 12:1; Mpful. 3:5.