1-2. Ha yini malandzra ya Xikwembu Nkulukumba ma tsrhama na ma nyonxile? (Yakobe 1:22-25)

 YEHOVHA kun’we ni n’wanake va djula leswaku hi nyonxa. A mutsrali wa Amapsalma 119:2 a te: ‘Va tovokile lava laviselaka milawu [yake], lava va [mu] djulisisaka hi mbilu yavu hinkwayu.’ Nakone Yesu a tlhele a va tiyisekisa a ku: “Ku nyonxa lava twaka zritu dzra Xikwembu Nkulukumba va tlhela va hanya hi dzrone!”—Luk. 11:28.

² Swanga malandzra ya Yehovha, hi tsrhama na hi nyonxile. Ha yini? Hi ni swivangelo swinyingi, kambe xa lisima ngopfu hi leswaku hi dondzra Bibele nkama ni nkama nakone hi tikazratela ku hanya hi leswi hi swi dondzraka.—Dondzra Yakobe 1:22-25.

3. Ha yini swi pfuna ku hanya hi leswi hi swi dondzraka ka Zritu dzra Xikwembu Nkulukumba?

³ Hi pfuneka ngopfu loko hi yentxa “leswi zritu dzra Xikwembu Nkulukumba dzri hlayaka swone”. Xa ku sungula, ha swi tiva leswaku leyi hi yo ndlela ya kuva hi nyonxisa Yehovha. Ntsena hi ku tiva leswo, swi hi yentxa hi nyonxa. (Ekles. 12:13) Loko hi hanya hi leswi hi swi dondzraka a Zritwini dzra Xikwembu Nkulukumba ledzri huhuteliwiki, hi ta va ni wutomi bya ndangu lebyi nyonxisaka nakone hi ta va ni wunghanu lebyi tiyiki ni vamakwezru a bandleni. Swi nga yentxeka u same u swi vona leswo a wuton’wini byaku. Handle ka leswo, a hi nge ti humeleliwa hi swikazratu leswi humelelaka lava kalaka va nga mu tizreli Yehovha. Nakunene, hi pfumelelana ni leswi hosi Davhida a swi hlayiki. Ntsrhaku ka loko a yimbelele mayelanu ni nawu, swileleto ni wuyavanyisi bya Yehovha a gamise hi ku hlaya leswi: ‘A ku bekiseni ka swone ku na ni hakelo ledzrikulu.’—Amaps. 19:7-11.

4. Ha yini swi nga nabyali ku dondzra ni ku tizrisa leswi hi swi dondzriki a Bibeleni?

⁴ Kambe ku hlaya ntiyiso a hi minkama hinkwayu swi nabyalaka  ku dondzra Bibele ni ku hanya hi leswi hi swi dondzraka. Siku ni siku hi ni mintxhumu yinyingi ya ku yi yentxa. Xileswo, swi djula kuva siku ni siku hi tibekela nkama wa ku dondzra Bibele, akuva hi twisisa leswi Yehovha a djulaka leswaku hi swi yentxa. Kutani ka xidondzro lexi, hi ta vona swidzringanyeto leswi taka hi pfuna ku dondzra Bibele siku ni siku, ku yanakanyisisa hi leswi hi swi dondzriki ni ku vona tindlela leti hi nga tizrisaka leswi hi swi dondzriki a wuton’wini byezru.

TIBEKELE NKAMA WA KU DONDZRA ZRITU DZRA XIKWEMBU NKULUKUMBA

5. He yini mintxhumu leyi yi hi yentxaka hi khomeka a wuton’wini byezru?

⁵ Malandzra manyingi ya Yehovha ma tsrhama na ma khomeke ngopfu. Nkama wunyingi ma wu heta na ma hetisisa wutiyanguleli bya ku hambanahambana lebyi Bibele dzri lhayaka leswaku i bya lisima. Hi xikombiso, wunyingi byezru swi djula hi tizra akuva hi tihlayisa ni ku hlayisa mindangu yezru. (1 Tim. 5:8) Vamakwezru vanyingi va fanela ku hlayisa maxaka yavu lama kuliki hi ntanga kumbe lama vabyaka. Nakone swi djula kuva na hine hi hlayisa lihanyu dzrezru. Handle ka ku yentxa mintxhumu leyi, hi ni wutiyanguleli bya lisima lebyi hi fanelaka ku byi hetisisa a bandleni. Byin’we bya kone lebyi nga ni lisima ngopfu i ku hisekela ntizro wa ku zrezra. Kutani, na hi ni wutiyanguleli hinkwabyu lebyi, xana hi nga wu kumisa kuyini nkama wa ku dondzra Bibele siku ni siku, ku yanakanyisisa ni ku hanya hi leswi hi swi dondzriki?

6. U nga yentxa yini akuva ku dondzra kwaku ka Bibele ku va mbangwini wa ku sungula a wuton’wini byaku? (Tlhela u vona ni mufoto.)

⁶ Ku dondzra Bibele i yin’we ya mintxhumu ya “lisima ngopfu” ka vakriste, xileswo, ku dondzra Bibele hi kone ku fanelaka ku va mbangwini wa ku sungula a wuton’wini byezru. (Filp. 1:10) Loko a vulavula hi mhunu lwa nyonxiki, a Mupsalma lwa tsraliki Amapsalma 1:1, 2 a te: ‘A ka ku titsrhavela nawini wa Yehovha, a wu yanakanya nhlikanhi ni wusiku.’ Swi le livaleni leswaku, hi fanela ku tinyika nkama wa ku dondzra Bibele. Kambe he wini nkama lowunene wa ku dondzra Bibele? Leswo swi ya hi mhunu mun’wana ni mun’wana. Kambe hakanyingi a nkama lowunene wa ku dondzra Bibele hi lowu u taka kota ku khomelela ka wone siku ni siku. Makwezru lwa vitaniwaka Victor a li: “Ni zrandzra ku  dondzra Bibele ni mixo. Ku hlaya ntiyiso, a ni swi zrandzri ku pfuka ni mixo, kambe hi nkama lowo a ku na mintxhumu yinyingi ya ku ni hingeleta. A miyanakanyu yanga yi va na ya ha zrulile. Xileswo ni kota ku beka miyanakanyu yanga ka leswi ni swi dondzraka.” Swi nga yentxeka swi li hi ndlela leyi fanaka ni kwaku. Kutani tivutise leswi: ‘He wini nkama lowunene wa kuva ni dondzra Bibele?’

YAKANYISISA HI LESWI U SWI DONDZRIKI

7-8. I yini lexi nga yentxaka leswaku hi nga pfuneki hi ku helela hi leswi hi swi dondzriki? Tlhamuxela.

⁷ Minkama yin’wana hi nga ha dondzra mintxhumu yinyingi kambe hi nga yi twisisi. Xana u sama u dondzra mhaka ya kukazri kambe ntsrhaku ka nkamanyana u nga ha swi dzrimuki leswi u swi dondzriki? Hinkwezru swa hi humelela leswo. Lexi vavisaka hi leswaku, leswo swi nga hi humelela loko hi dondzra Bibele. Swi nga yentxeka u ni nkongometo wa ku dondzra tindzrima ta kukazri ta Bibele siku ni siku. Leswo i swinene. Hinkwezru hi fanela ku va ni nkongometo ni ku tikazratela ku khomelela ka wone. (1 Kor. 9:26) Kambe, hi fanela ku yentxa leswi yengeselekiki akuva hi pfuneka ka leswi hi swi dondzraka.

⁸ Yanakanya hi xikombiso lexi: A mati ya mpfula ma ni lisima ka swivumbiwa hinkwaswu leswi nga misaveni, kambe loko mpfula yo na ku tlula mpimu hi nkamanyana wutsrongo a misava yi nga ha tala hi mati. Loko leswo swi yentxeka, a mpfula leyi ya ha tamaka yi na a ya ha pfuni ntxhumu nakone a swimilana a swa ha pfuneki hi mpfula leyo. I swinene loko mpfula yi na ha kutsrongokutsrongo hikusa a mati ya kone ma ya hansi ka misava nakone ma pfuna swimilana akuva swi kula. Hi la ku fanaka, a hi fanelanga ku dondzra hi ku tsrutsruma lakakuva hi nga swi twisisi kumbe kuva hi nga ha swi dzrimuki leswi hi swi dondzriki.—Yak. 1:24.

9. Xana hi nga yentxa yini loko hi gungula leswaku hi dondzra Bibele hi ku tsrutsruma?

⁹ Xana u ke u dondzra Bibele kambe u gama u gungula leswaku u dondzre hi ku tsrutsruma? Ka xiyimu lexo, i yini lexi u fanelaka ku xi yentxa? Dondzra ha hombe akuva u kota ku yanakanyisisa hi leswi u swi dondzraka kumbe ku tinyika nkama loko u hete ku dondzra akuva u yanakanyisisa hi leswi u swi dondzriki. U nga zi u swi bindzrisa! Loko swi ku kazrateka ku yanakanyisisa,  u nga ha vona ku yanakanyisisa ku fana ni loko u pimisa hi leswi u swi dondzriki. Swi nga va swinene kuva u yengesela nkama lowu u wu hetaka na u dondzra akuva u kuma nkama wa ku yanakanyisisa. Kumbe ku dondzra tindzrimana titsrongo akuva nkama lowu salaka u wu tizrisela ku yanakanyisisa hi leswi u swi dondzriki. Victor a li: “Ka dondzro yanga ya Bibele ya siku ni siku ni tolovela ku dondzra ndzrima yin’we ya Bibele. Leswi ni sungulaka ku dondzra na ka ha li mixo, ni kota ku yanakanyisisa hi leswi ni swi dondzriki siku hinkwadzru.” Swi nge na mhaka ni ndlela leyi u hlawulaka ku dondzra Bibele ha yone, xa lisima i kuva u dondzra na u nga tsrutsrumi akuva u kota ku yanakanyisisa mayelanu ni leswi u swi dondzriki.—Amaps. 119:97; Tlhela u vona ni bokisi ledzri liki “ Swivutiso Swa Ku Yanakanyisa Ha Swone”.

10. Nyikela xikombiso xa ndlela leyi u nga swi tizrisaka ha yone leswi u swi dondzraka. (1 Vatesalonika 5:17, 18)

¹⁰ A swi na mhaka ni nkama lowu u tibekiseliki ku dondzra Bibele ha wone kumbe nkama lowu u wu hetaka na u dondzra, xa lisima i ku yanakanyisisa hi ndlela leyi u nga swi tizrisaka ha yone leswi u swi dondzriki. Nkama lowu u nga ku dondzreni ka mhaka ya kukazri tivutise leswi: ‘Xana ni nga yi tizrisa hi ndlela yini mhaka leyi swoswi kumbe a nkameni lowu taka?’ Hi xikombiso, a hi nge a ku dondzreni kwaku ka Bibele u dondzre 1 Vatesalonika 5:17, 18. (Dondzra.) Ntsrhaku ka loko u dondzre tindzrimana letibidzri, u nga ha yanakanyisisa hi nkama lowu u wu hetaka ni ku yenta ka ndlela leyi u hambaka swikhongoto ha yone. U nga tlhela u yima u yanakanyisisa hi mintxhumu leyi u yi tlangelaka. Kumbexana u nga ha hlawula ku tlangela Yehovha hi mintxhumu yizrazru leyi kongomiki. Nambiloko wo yimanyana kutsrongo u yanakanyisisa hi leswi u swi dondzraka a Bibeleni, swi ta ku pfuna ku twisisa Zritu dzra Xikwembu Nkulukumba ni ku hanya hi leswi dzri swi hlayaka. Loko siku ni siku u tizrisa leswi u swi dondzriki Bibeleni, hi ku famba ka nkama u tava nandzra lwa yamukelekaka ka Xikwembu Nkulukumba. Kambe u nga kuyini loko u vona leswaku ku na swinyingi leswi u fanelaka ku swi yampswisa?

TIBEKELI MAKUNGU LAWA U TAKA MA TLHASELELA

11. Ha yini ku dondzra Bibele minkama yin’wana swi nga ha ku godolisa? Nyikela xikombiso.

¹¹ Nkama lowu u dondzraka Bibele, u nga ha godolanyana loko u xiya leswaku ku na swinyingi leswi u fanelaka ku swi yampswisa. Yanakanya hi leswi: A hi nge namunhla, a ku dondzreni kwaku ka Bibele u dondzra mayelanu ni kuva u nga vi ni xihlawuhlawu. (Yak. 2:1-8) A hi loko u gungula leswaku u fanela ku yampswisa ka ndlela leyi u hanyisanaka ni van’wana ha yone, kutani u vona swi yampswa kuva u yentxa ku txintxa ka kukazri. Leswo i swinene! A hi loko siku ledzri landzrelaka u dondzra mhaka leyi fambisanaka ni ku lawula mazritu yaku. (Yak. 3:1-12)  Kutani u dzrimuka leswaku siku dzrin’wana u ke u vulavula mazritu lama humiki ndleleni. kutani u tibekela kungu dzra leswaku u ta dzringisa ku yampswisa ni ku va u vulavula mazritu lama yakaka. Kutani ka siku dzrin’wana, u ya dondzra mayelanu ni ku tivonela ka ku nga vi na wunghanu ni misava. (Yak. 4:4-12) Kutani swoswi u vona leswaku u fanela ku hlawula ha hombe leswi u swi dondzraka, u swi hlalelaka kumbe leswi u swi yingisetaka. Kutani ka siku dzra wumune, u nga ha gugula leswaku a swi nabyalanga ku hamba ku txintxa hinkwaku loku.

12. Ha yini swi nga fanelanga swi ku godolisa loko u dondzra Bibele kutani u gungula leswaku ku ni swa kukazri leswi u fanelaka ku swi yampswisa? (Tlhela u vona ni ntlhamuxelo wa le hansi.)

¹² Loko u vona leswaku ku na swinyingi leswi u fanelaka ku swi yampswisa, u nga godoli. Leswo swi komba leswaku wa titsrongahata na kone u tiyimisele ku yampswisa. A mhunu lwa titsrongahataka a tlhela a pfumela swihoxo swake, a dondzra Bibele hi nkongometo wa ku vona lomu a nga yampswisaka kone. a Nakone u nga dzrivali leswaku, a ku yambala “wumhunu lebyimpswha” i ntxhumu lowu u fanelaka ku tama u wu yentxa, leswi liki minkama hinkwayu u ni mintxhumu leyi u fanelaka ku yi yampswisa. I yini leswi nga ku pfunaka ku tama u yentxa leswi zritu dzra Xikwembu Nkulukumba dzri swi hlayaka?

13. He yini ndlela leyinene ya ku tizrisa leswi u swi dondzriki? (Tlhela u vona ni mufoto.)

¹³ A matsrhan’wini ya ku dzringisa ku yampswisa hinkwaswu hi nkama wun’we, zama ku yampswisa ntxhumu wun’we kumbe yibidzri ka leyi u yi dondzriki. (Amapr. 11:2) Zama ku yentxa leswi: Tsrala mintxhumu hinkwayu leyi u djulaka ku yi yampswisa, ntsrhaku ka leswo hlawula ntxhumu wun’we kumbe yibidzri leyi u djulaka ku zranga ha yone u yi yampswisa kutani u beka leyin’wana hi tlhelo akuva u yi yampswisa  hi ku famba ka nkama. Kambe loko u tsrale mintxhumu yinyingi, he wini lowu u nga sungulaka ha wone?

14. He wini ntxhumu lowu u nga sungulaka ha wone ku wu yampswisa?

¹⁴ U nga ha hlawula ku sungula hi ntxhumu lowu taka ku nabyalela ku wu yampswisa. Kumbexana u hlawula ku sungula hi ku yampswisa leswi u swi vonaka na swi li swa xihantla kwaku. Ntsrhaku ka loko u hlawule ntxhumu wa kone, hamba wusetxhi ka mabuku yezru. U nga ha tizrisa Índice das Publicações da Torre de Vigia kumbe Nkongomiso Wa Ku Hamba Wusetxhi Wa Timboni Ta Yehovha. Khongota hi ntxhumu lowu u djulaka ku wu yampswisa nakone kombela Yehovha kuva a ku “nyika ku navela ni ntamu wa ku swi yentxa”. (Filp. 2:13) Kutani hi ku landzrela sungula ku tizrisa leswi u swi dondzriki. Loko u tikazratela ku yampswisa ka ntxhumu wa ku sungula, u ta ya u kutxeka ku tikazratela ku yampswisa mintxhumu leyin’wana. Loko u xiya leswaku u kote ku hamba ku txintxa ka kukazri kumbe u kote ku yampswisa tsrhamela dzra kukazri dzra wukriste, swi ta ku nabyalela ku tama u hamba ku txintxa nakone swi ta ku nabyalela ku tlhaselela mintxhumu leyin’wana.

PFUMELELA ZRITU DZRA XIKWEMBU NKULUKUMBA DZRI TIZRA KWAKU

15. Ha yini vhanu va Yehovha va hambana ni vhanu vanyingi lava dondzraka Bibele? (1 Vatesalonika 2:13)

¹⁵ Van’we va hlaya leswaku kutani va dondzre Bibele makhambi manyingi. Kambe xana hakunene va dzri kholwa Bibele? Xana va swi tizrisa leswi va swi dondzraka ni ku hanya hi leswi Bibele dzri swi dondzrisaka? Im-him. Vhanu vanyingi a va swi tizrisi swilayu swa Bibele. Kambe malandzra ya Yehovha ma yentxa hi la ku hambaniki. Ku fana ni vakriste va le dzaneni dzra ku sungula, hine ha dzri pfumela Bibele “swanga zritu dzra Xikwembu Nkulukumba”. Nakone xa lisima ngopfu, hi yentxa hinkwaswu leswi hi nga swi kotaka akuva hi hanya hi milawu ya Bibele a wuton’wini byezru.—Dondzra 1 Vatesalonika 2:13.

16. I yini leswi taka hi pfuna ku yentxa leswi Zritu dzra Xikwembu Nkulukumba dzri hlayaka swone?

¹⁶ A hi minkama hinkwayu swi nabyalaka ku dondzra ni ku hanya hi leswi hi swi dondzraka ka Zritu dzra Xikwembu Nkulukumba. Swi nga yentxeka xikazratu xezru a li ku kuma nkama wa ku dondzra, kumbe a li ku dondzra hi ku tsrutsruma hi va hi nga ha yimi hi yanakanyisisa hi leswi hi swi dondzriki. Kumbe hi nga ha godolisiwa hi ku kuma mintxhumu yinyingi leyi hi fanelaka ku yi yampswisa. Swi nge na mhaka ni leswaku xikazratu xaku he xini, u nga swi kota ku xi hlula hi ku pfuniwa ha Yehovha. A hi tiyimiseleni ku yamukela mpfunu wake, hi nga vi lava yingelaka va gama va dzrivala, kambe hi fanela ku yentxa leswi zritu dzra Xikwembu Nkulukumba dzri hlayaka swone. Handle ka ku ganaganeka, nkama lowu hi yaka hi dondzra Bibele ni ku hanya hi leswi hi swi dondzraka, hi ta va vhanu lava nyonxiki ngopfu swinene.—Yak. 1:25.