1. I yini lexi kombisaka leswaku a matsralwa a ma li ya lisima ka Yesu?

 XANA wa yi yanakanya ndlela leyi a wu ta titwa ha yone loko a wo va ni ndjombo ya ku yingiseta Yesu loko a dondzrisa? Minkama hinkwayu a a tsrhaha matsralwa ya ku xwenga na a nga yentxi hi ku dondzra! Leswi liki nambi mazritu lawa a ma tsrhahiki ntsrhaku ka babatiso dzrake, ni mazritu lawa a ma hlayiki hi wugamu na a nga si fa, a ma tsrhahe ka matsralwa. b (Dt 8:3; Ps 31:5; Lk 4:4; 23:46) Nakone ka malembe mazrazru ni hamfu ka ntizro wake wa la misaveni, Yesu a dondzre ni ku tsrhaha matsralwa a livaleni makhambi manyingi.—Mt 5:17, 18, 21, 22, 27, 28; Lk 4:16-20.

2. I yini lexi pfuniki Yesu ku ma tiva ha hombe matsralwa? (Vona xifaniso lexi nga ka kapa.)

² Na a nga si na sungula ntizro wake la misaveni, Yesu a dondzre ni ku tlhela a yingela Zritu dzra Xikwembu Nkulukumba hi makhambi manyingi. Nakone makhambi manyingi a a yingiseta Yosefa na a tsrhaha matsralwa loko va bula a kaya. c (Dt 6:6, 7) Nakone Mugqivela mun’wana ni mun’wana Yesu ni ndangu wake a va ya sinagogeni. (Lk 4:16) A nkama lowu ku dondzriwaka matsralwa Yesu a a yingiseta ha hombe. Hi ku famba ka nkama, Yesu a ye a dondzra ku kuma matsralwa hi wuswake. Xileswo, Yesu a nge tiva matsralwa ha hombe ntsena, kambe a a ma zrandzra ni ku hanya hi leswi a a swi dondzra a wuton’wini byake. Hi xikombiso, dzrimuka leswi mu humeleliki loko a ha ni 12  wa malembe. A vadondzrisi a tempeleni lava a va wu tiva ha hombe nawu wa Moxe, ‘ifa va hlolelwa hi ku yingelisisa kwakwe ni hi ku yangula kwakwe’. —Lk 2:46, 47, 52.

3. Hi ta vona yini ka xidondzro lexi?

³ Loko hi dondzra matsralwa nkama ni nkama, hi ta ma tiva ha hombe nakone hi ta ma nyika lisima. Kambe hi nga dzri susisa kuyini londzrovoto nkama lowu hi dondzraka? Hi nga dondzra swinyingi ka leswi Yesu a swi byeliki lava a va tiva nawu, va ku fana ni Vatsrali, Vafarisi ni Vasaduki. Vazrangeli lava va wukhongoti a va dondzra matsralwa nkama ni nkama, kambe a va nga pfuneki hi ntxhumu ka leswi a va swi dondzra. Yesu a vulavule hi mintxhumu yizrazru leyi vavanuna lavayani a va fanela ku yi yentxa loko a va djula ku pfuneka hi matsralwa. Leswi Yesu a va byeliki swone swi nga hi pfuna ku 1) ku twisisa leswi hi swi dondzraka, 2) ku kuma tindzralama ta moya ni kuva 3) hi pfumelela Zritu dzra Xikwembu Nkulukumba dzri yampswisa wumhunu byezru.

4. Xana Luka 10:25-29 yi hi dondzrisa yini mayelanu ni ndlela leyi Zritu dzra Xikwembu Nkulukumba dzri fanelaka ku dondzriwa ha yone?

⁴ Hi djula ku twisisa leswi swi tsraliwiki a Bibeleni. Matsrhan’wini ya leswo, a hi nge swi koti ku susa londzrovoto ka leswi hi swi dondzraka. Hi xikombiso, vona leswi Yesu a swi hlayiki ka mun’we wa ‘mufundisa wa nawu’. (Dondzra Luka 10:25-29.) Loko wanuna lweyi a vutise Yesu leswi a a fanela ku swi yentxa akuva a kuma wutomi lebyi nga helikiki, Yesu a mu vutise leswi: ‘Ku tsraliwe yini a nawini? Xana u dondzra yini kone?’ wanuna lweyi a nyikele yangulo leyi kongomiki ni ku tsrhaha matsralwa mayelanu ni ku zrandzra Xikwembu Nkulukumba ni wa li kwezru. (Lv 19:18; Dt 6:5) Kambe vona leswi a tlheliki a swi hlaya: ‘A wa le kwezru i mani ke?’ leswi swi kombisi leswaku a a nga swi twisisi ha hombe leswi a a swi dondzra. Xileswo, a swi mu kazratela ku hanya hi leswi a a swi dondzra.

5. Xana xikhongoto ni ku dondzra na u nga tsrutsrumi swi nga ku pfunisa kuyini kuva u twisisa leswi u swi dondzraka?

⁵ Akuva hi dzri twisisa ku yampswa Zritu dzra Xikwembu Nkulukumba, hi fanela ku dzri dondzra hi xitalu. Vona swin’wana leswi swi nga ku pfunaka: Khongota na u nga si na sungula ku dondzra. Hi djula mpfunu wa Yehovha akuva hi kota ku twisisa Bibele. Kombela kuva Yehovha a ku nyika moya lowa ku xwenga akuva u beka miyanakanyu ka leswi u swi dondzraka. Dondzra na u nga tsrutsrumi. Leswo swi ta ku pfuna ku twisisa leswi u swi dondzraka. Swi nga yentxeka u vona swi yampswa ku dondzra hi zritu dzra le henhla kumbe ku yingiseta awudiyu dzra ku dondzra ka Bibele. Hi ku yentxa leswo, a wu nge ti vona ntsena leswi u swi dondzraka kambe u ta tlhela u swi twa, leswo swi ta ku pfuna ku twisisa, ku dzrimuka ni ku dondzra leswi yengetelekiki a Bibeleni. (Yš 1:8) Loko u gama ku dondzra, khongota ka Yehovha u mu tlangela hi xihanano lexo xa lisima ni ku tlela u mu kombela kuva a ku pfuna ku hanya hi leswi wa ha ku swi dondzraka.

6. Ha yini ku hamba swivutiso ni manota ya ku goma swi pfuna nkama lowu u dondzraka Bibele? (Vona xifaniso.)

⁶ Vona swidzringanyeto swibidzri leswi swi taka ku pfuna ku dzri twisisa ha hombe Bibele. Tihambe swivutiso mayelanu ni leswi u swi dondzriki. Loko u dondzra mhaka ya kukazri ka Bibele tivutise leswi: ‘Ku vulavuliwa hi mani ka mhaka leyi? Hi mani a vulavulaka? A vulavula na mani, hi mhaka muni? Kwini nakone dzrini?’  Swivutiso leswo swi ta ku pfuna ku yanakanyisisa hi leswi u swi dondzraka ni ku twisisa tinhla ta lisima. Tsrala manota ya ku goma nkama lowu u dondzraka. Loko u tsrala, u va na u tsrala leswi u swi twisisiki hi mazritu yaku, nakone leswo swi ta ku pfuna ku twisisa ha hombe mhaka leyi u dondzraka ha yone. Loko u tsrala swi ku pfuna kuva u nga dzrivali leswi u swi dondzriki. Manota yaku ma nga ha patsra swivutiso, ku kambisisa, tinhla ta lisima, ndlela ya ku tizrisa leswi u swi dondzriki kumbe leswi u titwisiki xiswone hi leswi u swi dondzriki. Ku yentxa leswo, swi ta ku pfuna ku vona Bibele swanga dzrungula ledzri pfaka ka Xikwembu Nkulukumba na dzri kongome wene.

7. He dzrini tsrhamela ledzri hi fanelaka ku va na dzrone loko hi dondzra Bibele, nakone ha yini? (Matewu 24:15)

⁷ Yesu a vulavule hi tsrhamela dzra lisima ledzri hi faneliki hi va na dzrone loko hi djula ku twisisa Bibele: ku yanakanyisisa. (Dondzra Matewu 24:15.) Kambe i yini ku yanakanyisisa? I wuswikoti bya hambanisa mhaka ya kukazri ka yin’wana. Lweyi a nga ni ku yanakanyisisa awa swi kota ku hambanisa mhaka ya kukazri kumbe ntxhumu wa kukazri. Handle ka leswo, ku yanakanyisisa swi patsra ku twisisa mhaka hi wuyenti. Nakone Yesu a hlaye leswaku hi fanela yanakanyisisa akuva hi kota ku vona swiyentxakalu leswi hetisisaka wuprofeta bya Bibele. Akuva hi susa londzrovoto dzrikulu nkama lowu hi dondzraka Bibele swi djula hi va ni tsrhamela ledzri.

8. Hi nga dondzrisa kuyini hi wunyaminyami?

⁸ Yehovha a nyika malandzra yake ku yanakanyisisa. Xileswo, khongota akuva a ku pfuna ku tama u txutxela tsrhamela ledzro. (Pr 2:6) Kambe na hine hi fanela ku yentxa xa kukazri. Hi ndlela yini? Dondzra hi wunyaminyami, nakone zama ku twisisa leswi u swi dondzraka ni ku swi yelanisa ni leswi u swi tivaka. Ntxhumu lowu nga ku pfunaka i ku kambisisa mabuku ya ku dondzra Bibele ya ku hambanahambana, ya ku fana ni Nkongomiso Wa Ku Hamba Wusetxhi Wa Timboni Ta Yehovha. Switizro leswi swi ta ku pfuna ku twisisa ntlhamuxelo wa leswi u swi dondzraka a Bibeleni ni ndlela leyi u nga swi tizrisaka  ha yone a wuton’wini byaku. (Hb 5:14) Loko u dondzra Bibele hi wunyaminyami u ta dzri twisisa ha hombe.

9. He wini ntiyiso wa lisima wa le matsralweni lowu Vasaduki a va wu beka hi tlhelo?

⁹ A Vasaduki a va ma tiva ha hombe ntlhanu wa mabuku ya ku sungula ya Xiheberu, kambe a va nga yi pfumeli mintiyiso ya lisima leyi nga ka mabuku wolawo. Hi xikombiso, vona leswi Yesu a swi hlayiki loko a dzringiwa hi Vasaduki loko va mu vutisa mayelanu ni ku pfuxiwa ka vafi. yesu a te: ‘Xana a n’wi dondzranga a bukwini dzra Moxe, a mhakeni ya nkunhu, leswi Xikwembu Nkulukumba a nga khanelisa xiswone na yene, a ku. Mine ndzri Xikwembu Nkulukumba wa Abrahamu, ni Xikwembu Nkulukumba wa Yakobe.’ (Mk 12:18, 26) Vasaduki va same va dondzra mhaka leyi hi makhambi manyingi, kambe mazritu ya Yesu ma kombisa leswaku a va wu beka hi tlhelo ntiyiso wa lisima ka mhaka liyani—ndondzro ya ku pfuxiwa ka vafi.—Mr 12:27; Lk 20:38. d

10. I yini leswi hi djulaka ku swi xiyisisa ngopfu nkama lowu hi dondzraka?

¹⁰ Hi dondzra yini ka mhaka leyi? Loko hi dondzra Bibele, hi djula ku xiyisisa leswaku hi dondzra yini ka mhaka yoleyo. A hi djuli ku susa ndondzro ya kukazri ntsena, kambe hi djula ku kelisisa mintiyiso ni minsinya ya milawu.

11. Hi ku ya hi 2 Timoteo 3:16, 17, u nga kuma tindzralama ta moya nkama lowu u dondzraka Bibele hi ndlela yini?

¹¹ Xana u nga ti kumisa kuyini tindzralama ta moya nkama lowu u dondzraka Bibele? Vona leswi 2 Timoteo 3:16, 17 yi swi hlayaka. (Dondzra.) A ndzrimana leyi yi li: ‘A matsralwa hinkwawu ma . . . lulamele’ ku 1) dondzrisa, 2) ku kholwisa, 3) ku busetela ni 4) ku luleka a ku lulameni. Tinhla leta mune ti nga ha tizra ni ka mabuku man’wana ya Bibele lawa hi kalaka hi nga ma dondzri nkama ni nkama. Dondzra hi wunyaminyami, nakone dzringisa ku vona minsinya ya milawu ya Bibele leyi hi yi dondzraka ka mhaka yoleyo ni leswaku yi hi dondzrisa yini ha Yehovha ni hi nkongometo wake. Nakone dzringisa ku vona leswaku mhaka yoleyo yi luleka hi ndlela muni. Ndzrimana yin’we ya Bibele yi nga hi pfuna ku vona mintxhumu ya kukazri kumbe swiyentxo swa kukazri swa ku biha leswi hi nga na swone, yi nga hi pfuna ku swi lulamisa ni ku tama hi dumbeka ka Yehovha. Dzringisa ku vona leswaku mhaka leyo yi nga hi busetela, kumbe ku lulamisa mavonela ya kukazri hi ndlela muni, kumbexana ku nga ha va mavonela ya mhunu wa kukazri lweyi u mu kumiki a nsin’wini. Nakone ka xidondzro xaku djuletela tinhla leti nga ku pfunaka ku vona mintxhumu hi ndlela leyi Yehovha a yi vonaka ha yone. Loko u tsrhama na u ni tinhla leta mune a nhlokweni, u ta kuma tindzralama ta moya leti taka ku pfuna a ku dondzreni kwaku ka Bibele.

12. Ha yini Yesu a vutise Vafarisi a ku ‘Xana a n’wi dondzranga’?

¹² Yesu a hambe Vafarisi xivutiso lexi liki ‘Xana a n’wi dondzranga?’ A hambe xivutiso lexi akuva a kombisa leswaku a vafarisi a va ni vonela ledzri hoxekiki mayelanu ni matsralwa. (Mt 12:1-7) e Ka xiyentxakalo xa kukazri, Vafarisi va lumbete vadondzrisiwa va Yesu ka leswaku va tlule nawu wa savata. Yesu tsrhahe swikombiso swibidzri swa le Bibeleni a va a tsrhaha xikombiso xa muprofeta Hoxeya akuva a kombisa leswaku Vafarisi a va nga wu twisisi nkongometo wa nawu wa savata ni leswaku a va nga kombisi timpswalu. Vavanuna lava a va dondzra Zritu dzra Xikwembu Nkulukumba kambe a va nga dzri pfumeleli dzri va luleka. Ha yini? Hikusa a va dondzra hi nkongometo wa ku solasola va tlhela va tibyela. Leswi a swi va yentxa va nga swi twisisi ha hombe leswi a va swi dondzra.—Mt 23:23; Yh 5:39, 40.

13. Hi fanela ku dondzra Bibele hi nkongometo wini nakone ha yini?

¹³ A mazritu ya Yesu ma hi dondzrisa leswaku hi fanela ku dondzra Bibele na hi ni vonela ledzrinene. A hi djuli ku fana ni Vafarisi. Handle ka leswo hi djula ku titsrongahata ni ku tiyimisela ku dondzra. Hi lani Bibele dzri hlayaka ha kone hi fanela ku ‘yamukela hi ku nabyala zritu ledzri byaliwiki’. (Yk 1:21) Loko hi yentxa leswo, hi ta va na hi pfumelela Zritu dzra Xikwembu Nkulukumba dzri byala timitsru a timbilwini tezru. Tindondzro leti hi ti kumaka a Bibeleni mayelanu ni wunene, timpswalu ni lizrandzru swi ngo hi pfuna ntsena loko hi nge na moya wa ku solasola ni ku tibyela.

14. I yini lexi nga hi pfunaka ku vona leswaku hakunene hi pfumelela Bibele dzri hi luleka? (Vona swifaniso.)

¹⁴ Ndlela leyi hi hanyisanaka ha yone ni van’wana yi kombisa leswaku hakunene hi pfumelela  Zritu dzra Xikwembu Nkulukumba dzri hi luleka. A Vafarisi a va dzri pfumelelanga Zritu dzra Xikwembu Nkulukumba dzri khumba timbilu tavu, xileswo a va ‘yavanyisa lava ngeke na nandzru’. (Mt 12:7) Xileswo, leswi hi swi pimisaka hi vambeni ni ndlela leyi hi hanyisanaka ha yone na vone, swi kombisa leswaku hi pfumelela Zritu dzra Xikwembu Nkulukumba dzri hi luleka kumbe im-him. Hi xikombiso, xana hi tsrhamela ku vulavula hi wumhunu lebyi hi byi vonaka ka vambeni kumbe hi swihoxo swavu? Xana hi kombisa timpswalu ni ku dzrivalela kumbe hi tsrhamela ku solasola ni ku bekelana xiviti? A nhlamulo ya swivutiso leswi yi ta kombisa leswaku leswi hi swi dondzraka swi lulamisa mimpimiso yezru, matitwela yezru ni swiyentxo swezru kumbe im-him.—1Tm 4:12, 15; Hb 4:12.

15. Xana Yesu a a titwisa kuyini hi Zritu dzra Xikwembu Nkulukumba?

¹⁵ Yesu a a zrandzra Zritu dzra Xikwembu Nkulukumba. Ka Amapsalma 40:8 hi kuma wuprofeta lebyi vulavulaka hi ndlela leyi Yesu a a titwa hi yone. A li: ‘Ndzri nyonxile a ku yentxeni ka ku zrandzra kwaku, Xikwembu Nkulukumba wanga; a nawu wu li mbilwini yanga.’ A lizrandzru ledzro dzri yentxe leswaku Yesu a tizrela Yehovha na a nyonxile. Hi lani ku fanaka, loko hi dondzra Zritu dzra Xikwembu Nkulukumba ni ku dondzra ku mu zrandzra na hine hi ta nyonxa.—Ps 1:1-3.

16. U tiyimisele ku yentxa yini akuva u susa londzrovoto ka dondzro yaku ya Bibele? (Vona bokisi ledzri liki ‘ A Mazritu Ya Yesu Ma Nga Ku Pfuna Ku Twisisa Leswi U Swi Dondzraka’.)

¹⁶ Hi ta landzrelela mazritu ni xikombiso xa Yesu, hi ku yentxa leswo hi ta tikazratela ku susa londzrovoto ka dondzro yezru ya Bibele. Hi nga twisisa leswi Bibele dzri swi dondzrisaka loko hi khongota, hi dzri dondzra na hi nga tsrutsrumi, hi tihamba swivutiso ni ku tlhela hi tsrala manota ya ku goma. Hi nga tlhela hi dondzra Bibele hi wunyaminyami, ni ku tlhela hi hamba wusetxhi ka mabuku yezru. Hi nga tlhela hi yampswisa ndlela leyi hi dzri tizrisaka ha yone Bibele, nambi ka mhaka leyi hi kalaka hi nga talisi ku yi dondzra, ni kuva hi djulisisa tindzralama ta moya. Hi ku va ni vonela ledzrinene ka mhaka ya kukazri leyi hi yi dondzraka. Loko hi yentxa hinkwaswu leswi hi nga swi kotaka akuva hi tizrisa hinkwaswu leswi hi swi dondzriki, hi ta susa londzrovoto ledzrikulu ka dondzro yezru ya Bibele.—Ps 119:17, 18; Yk 4:8.