1. I yini leswi Yesu a swi byeliki vadondzrisiwa vake mayelanu ni masiku ya wugamu, nakone he xini xitsratsriyo lexi a xi nyikiki vadondzrisiwa?

 NA YESU a nge si na fa, vadondzrisiwa vake va mu vutise leswi: “Xi tava xini xikombiso xa ku ta kwaku . . . Ni xa ku hela ka xiyimu lexi xa misava?” (Mt 24:3) Swi nga Yentxeka na vadondzrisiwa va mu vutise leswo hi ku djula ku tiva leswaku he wini nkama lowu a muti wa Yerusalema ni Tempele a swi ta helisiwa ha wone. Ka nhlamulo yake, Yesu a nga vulavulanga ntsena hi ndlela leyi muti wa Yerusalema a wu ta helisiwa ha yone, kambe a vulavule ni hi ku hela ka “xiyimu lexi xa misava” lexi hi hanyaka ka xone swoswi. Hi wugamu Yesu a hlayi leswi: ‘Kambe loko dzri siku ledzro ni nkama wa siku, a ku na mhunu lwa swi tivaka, nambi swi swizrun’wa swa tilwini, nambi e N’wana, loko a nge Tatana.’ Ntsrhaku ka loko a hlaye mazritu lawa, Yesu a tsratsriye vadondzrisiwa vake a ku ‘tivonelani’ a tlhela a ku ‘hitekani’.—Mr 13:32-37, BX.

2. Ha yini swi ve swa lisima kuva vakriste va Vayuda va tsrhame na va hitekile?

² A vakriste va Vayuda a dzaneni dzra ku sungula a va fanela ku tsrhama na va hitekile; wutomi byavu a byi ti seketela ka swoleswo. Yesu a va byeli leswi a va fanela ku swi yentxa akuva va tiva loko Yerusalema a li kusuhi ni ku helisiwa. A te: ‘Kambe loko mi vona Yerusalema a tsrandzreliwi hi tiyimpi, lahu swi tivani leswaku a honeko dzrakwe dzri kusuhi.’ Loko vakriste va vona leswo swi humelela, a va fanela ku yingiseta leswi Yesu a va byeliki kuva va swi yentxa ku nga ku ‘tsrutsrumela tinhaveni’. (Lk 21:20, 21) Lava yingisetiki xitsratsriyo xa Yesu va hulukile loko Varoma va hlasela muti wa Yerusalema.

3. Hi ta vona yini ka xidondzro lexi?

³ Ku nge khale, misava leyi ya ku biha yi ta helisiwa. Kambe loko leswo swi nga si na yentxeka, hi fanela ku tama hi tikhoma ni ku hiteka. Ka xidondzro lexi, hi ta vona ndlela leyi hi nga dzringaniselaka ha yone loko hi langusana ni ku txintxa ka xiyimu lexi xa misava, ndlela leyi hi nga nyikelaka yingiso ka hine  vinyi hi ku kongoma ni ndlela leyi hi nga wu tizrisaka ha yone nkama wezru hi ndlela leyinene.

4. Ha yini hi fanela ku zron’weka hi leswi humelelaka ka misava leyi, nakone swi byi hetisisa hi ndlela yini wuprofeta bya Bibele?

⁴ Hi ni swivangelo leswi twalaka swa ku zron’weka hi ku vona ku txintxa ka xiyimu lexi xa misava ni ku vona ndlela leyi swiyimu swoleswo swi byi hetisisaka ha yone wuprofeta bya Bibele. Hi xikombiso, Yesu a vulavule hi swiyimu leswi a swi ta humelela leswi a swi ta hi pfuna ku twisisa leswaku misava leyi ya Sathana yi le kusuhi ni ku helisiwa. (Mt 24:3-14) Mupostola Petro a hlayi leswaku hi fanela ku yi tekela hlokweni ndlela leyi wuprofeta byi hetisekaka ha yone akuva hi tiyisa lipfumelo dzrezru. (2Pe 1:19-21) Buku dzra wugamu dzra Bibele dzri sungula hi mazritu lawa: “Apfuletelo dzra Yesu kriste, ledzri Xikwembu Nkulukumba a n’wi nyikiki dzrone akuva a komba malandzra yakwe leswi fanelaka ku humelela swoswi.” (Mpf 1:1) Kutani i swa ntumbuluku ku va hi zron’wekela leswi humelelaka a misaveni namunhla, ni ku vona ndlela leyi swi byi hetisisaka ha yone wuprofeta bya Bibele. Xileswo hi nga ha hlunyela ku bula ni van’wana hi Bibele mayelana ni mhaka leyi.

5. I yini leswi hi faneleka ku tivonela ka swone? (Vona xifaniso.)

⁵ Loko hi li kazri hi bula ni vhanu mayelanu ni wuprofeta bya le Bibeleni, hi fanela ku tivonela akuva hi nga kumbexeteli leswi taka humelelaka. Ha yini? Hikusa leswi hi swi hlayaka, swi nga ha txhuka swi hona a wumun’we byezru a bandleni. Hi xikombiso, hi nga ha tiva leswaku vazrangeli va kukazri va misava va le ku dokadokisaneni hi nkongometo wa kuva va buyisa ku zrula ni nsizrelelo. Matsrhan’wini ya ku kumbexetela leswaku a nga va ku hetiseka ka wuprofeta bya 1 Ba-le-Thesalonika 5:3, swi nga va swinene ku va hi fambisana ni dzrungula ledzri nga ka mabuku lawa ma ha ka ku humexiwa. Loko mabulo yezru ma ti seketela ka leswi swa ha ku humexiwaka hi nhlengeletanu ya Yehovha, leswo swi ta pfuna bandla akuva dzri vani wumun’we a ku ‘pimiseni kun’we’.—1Ko 1:10; 4:6.

6. Hi nga dondzra yini ka 2 Petros 3:11-13?

⁶ Dondzra 2 Petros 3:11-13. Mupostola Petro a hi pfuna kuva lava dzringaniselaka loko hi dondzra hi wuprofeta bya Bibele. A li hi fanela ‘ku lavisela ni ku hangweyesisa ku tlhasa ka siku dzra Xikwembu Nkulukumba’. Ha yini? Ku nga li leswaku ho djula siku ni nkama leswi Yehovha a taka tisa Armagedoni, kambe mhaka hi leswaku hi djula ku tizrisa nkama lowu saliki akuva hi va vhanu lava ngeke na ‘bati ni sandzru’. (Mt 24:36; Lk 12:40) Hi mazritu man’wana, hi djula ku yentxa mintxhumu hi ndlela leyinene ni ku tiyiseka leswaku hinkwaswu leswi hi swi yentxelaka Yehovha hi swi yentxa hi nkonta ya leswi hi mu zrandzraka. Kambe loko hi djula ku yentxa leswo, swi djula hi nyikela yingiso ka hine vinyi hi ku kongoma.

7. Hi nga swi kombisa hi ndlela yini leswaku hi nyikela yingiso ka hine vinyi? (Luka 21:34)

⁷ Yesu a byele vadondzrisiwa vake leswaku va nga nyikeli yingiso ka leswi humelelaka misaveni ntsena, kambe ni le ka vone vinyi. Leswi swi yelana ni leswi nga ka Luka 21:34. (Dondzra.) Vona leswi Yesu a swi hlayiki: “Tivonelani.” Vhanu lava nyikelaka yingiso ka vone vinyi va tivonela ka ntxhumu wun’wana ni wun’wana lowu wu nga ha honaka  wuxaka bya vone na Yehovha nakone va yentxa hinkwaswu akuva va fambela kule ni mintxhumu yoleyo. Xileswo va tama vava a lizrandzrwini dzra Xikwembu Nkulukumba.—Pr 22:3; Yd 20, 21.

8. He xini xitsratsriyo lexi mupostola Pawulo a xi nyikiki vakriste?

⁸ Mupostola Pawulo a byele vakriste leswaku va nyikela yingiso ka vone vinyi. Hi xikombiso, a byele vakriste va le Efesa a ku: ‘Tivonani kolahu, n’wi famba hi ku lulama swinene, n’wi nga fambi swanga ha masinge, kambe swanga hi lava ku tlhazriha.’ (Ef 5:15, 16) Minkama hinkwayo Sathana a djuletela mikhandlu ya ku va a helisa wuxaka byezru na Yehovha. Xileswo Bibele dzri hi tsratsriya akuva hi ‘yingelisisa ku zrandzra ka Hosi [Yehovha]’, hi ku yentxa leswo hi ta kota ku tisizrelela ka mintlhamu ya Sathana.—Ef 5:17.

9. Hi nga ku twisisisa kuyini ku zrandzra ka Yehovha?

⁹ A Bibele a dzri hlayi ntxhumu wun’wana ni wun’wana lowu wu nga honaka wuxaka byezru na Yehovha. Hakanyingi, hi fanela ku teka swiboho ka mintxhumu leyi Bibele yi kalaka yi nga swi hlayi hi ku kongoma. Akuva hi kota ku teka swiboho leswinene, hi fanela ku tiva ku ‘yanakanya ka hosi [Yehova]’. Hi ngo kota ku yentxa leswo loko hi dondzra Bibele siku ni siku ni ku yanakanyisisa hi leswi hi swi dondzraka. Nambiloko Bibele dzri nga hi nyiki nkongomiso lowu kongomeke ka mhaka ya kukazri, hi nga famba swanga lava ‘tivaka’. Lexi taka hi pfuna ku teka swiboho leswinene i ku tikazratela ku twisisa leswi a nga ku zrandzra ka Yehovha ni ku va ni ‘ku yanakanya ka Kriste’. (1Ko 2:14-16) A mindzringo yin’wana swi nabyalile ku yi vona, kambe leyin’wana swa kazrata.

10. He wani makhombo lawa hi fanelaka ku tivonela ka wone?

¹⁰ Yin’we ya mindzringo leyi hi fanelaka ku tivonela ka yone, i ku gangisana, ku nwa, ku da ku tlula mpimu, ku hlaya mintxhumu leyi yi nga honaka vito dzra mhunu mumbeni, ku hlalela pornografiya, ku hlalela mafilme kun’we ni ku hlalela minongonoko leyi nga ni tihanyi ni swin’wana. (Ps 101:3) Nala wezru Sathana Diyavulosi, a zama ku kuma tindlela ta ku hi tsravukanisa na Yehovha. (1Pe 5:8) Loko hi nga tivoneli Sathana a nga ha byala miyanakanywini ni timbilwini tezru moya wa matsrhoho, ku kala ku dumbeka, ku tibyela, livengo, mona ni xikhomela. (Ga 5:19-21) Swi nga yentxeka ma titwela lawa ma nga tikombi. Kambe loko hi nga tekeli ku dlaya moya lowo na wa ha sungula wu nga ha kula ku fana ni byanyi lebyi kulaka byi dlaya swibewu a masin’wini.—Yk 1:14, 15.

11. He dzrini khombo ledzri nga ha taka hi ku tumbela ledzri hi fanelaka ku tivonela ka dzrone, nakone ha yini?

¹¹ Khombo dzrin’wana ledzri nga ha taka hi ndlela ya ku tumbela i ku va ni vanghanu va nga ni mahanyela ya ku biha. A hi nge u tizra ni mhunu lweyi a ngeke mboni ya Yehovha. U djula leswaku a vani vonela dzrinene hi timboni ta Yehovha, xileswo u mu kombisa malwandla ni wunene. Masiku man’wana mi pfa mi da xikan’we. Kambe na wu nga swi yimelanga mi sungula ku da xikan’we siku ni siku. Hi kutsrongokutsrongo mabulu yenu ma ya ma huma ndleleni. A ku sunguleni a wu nyonxi hi mabulu lawo, hi ku famba ka nkama u ya u ma tolovela u va u nga ha na mhaka. Siku dzrin’wana hi lweyi, a wa ku zramba akuva mi ya tikumela xin’we kumbe swibidzri u va u pfumela. Kutani hi ku famba ka nkama u sungula ku vani mayanakanyela ya ku fana ni yake. Ntsem ntsem ntsem, u sungula ku va ni mahanyela ya ku fana ni yake. I ntiyiso leswaku hi djula ku kombisa malwandla ni wunene ka vhanu hinkwavu, kambe hi fanela ku dzrimuka leswaku lava hi hetaka nkama na vone vani  nkutxetelo wa kukazri a wuton’wini byezru. (1Ko 15:33) Kambe loko hi nyikela nyingiso ka hine vinyi, a hi nge ti vani wunghanu ni vhanu lava kalaka va nga hanyi hi milawu ya Yehovha. (2Ko 6:15) Hi ta vona khombo na dzra ha li kule hi va hi tumbela.

12. I yini leswi vadondzrisiwa va Yesu a va fanela ku swi yentxa na va ha yimele ku helisiwa ka xiyimu lexiyani xa Xiyuda?

¹² Yesu a a nga yimeli kuva vadondzrisiwa vake va khondla mavoko va yimela ku helisiwa ka xiyimu lexiyani xa Xiyuda. Yesu a va nyike ntizro wa ku zrezra madzrungula lamanene a ‘Yerusalema, ni le tikweni hinkwadzru dzra Yudeya ni le Samariya, ni ku ya tlhasa a wugan’wini bya misava’. (Min 1:6-8) Xiyavelo lexi a xi patsra ntizro wunyingi! Ku tikazratela ku zrezra madzrungula lamanene, swi yentxe leswaku va tizrisa nkama wavu hi wutlhazri.

13. Ha yini hi fanela ku wu tizrisa hi wutlhazri nkama wezru? (Ba-le-Kolosa 4:5)

¹³ Dondzra Ba-le-Kolosa 4:5. Akuva hi nyikela yingiso ka hine vinyi, hi fanela ku yi tekela nhlokweni ndlela leyi hi wu tizrisaka ha yone nkama wezru. ‘Swiyentxakalo’ swi nga ha humelela ka mun’wana ni mun’wana wezru. (Ekl 9:11) Xileswo, wutomi byezru byi nga ha hela nkama wini ni wini.

14-15. Xana hi nga wu tizrisisa kuyini nkama wezru hi wutlhazri? (Ba-Heberu 6:11, 12) (Vona xifaniso.)

¹⁴ Hi nga tizrisa nkama wezru hi wutlhazri hi  ku yentxa ku zrandzra ka Yehovha ni ku tiyisa wunghanu byezru na yene. (Yohan 14:21) Hi fanela ku va lava ‘tiyiki, hi nga tsrekatsrekisiwi’, ni kuva ‘lava tekisaka hi masiku hi ku tizrela Hosi’. (1Ko 15:58) Lanu ke, nambi ko tlhasa wugamu bya wutomi byezru kumbe bya xiyimu xa misava leyi—a hi nge ti txhuka hi ti sola.—Mt 24:13; Ro 14:8.

¹⁵ Namunhla wa siku, Yesu a tama a kongomisa valandzreli vake nkama lowu va zrezraka madzrungula lamanene ya Mfumu wa Xikwembu Nkulukumba a misaveni hinkwayu. Yesu a dumbise valandzreli vake leswaku a a ta va na vone ku ya tlhasa a wugan’wini nakone namunhla a ha tama a hetisisa xidumbiso lexo. A kongomisa valandzreli vake nkama lowu va zrezraka madzrungula lamanene a misaveni hinkwayu. Hi ku tizrisa nhlengeletanu ya Yehovha, hi yamukela swileleto swa ndlela leyi hi nga wu hetisisaka ha yone ntizro lowu. (Mt 28:18-20) Hi yentxa leswi Yesu a yimeliki kuva hi swi yentxa. Hi yentxa hinkwaswu leswi hi nga swi kotaka akuva hi zrezra, hi dondzrisa ni ku tama hi hiteka na hi yimela Yehovha a kuva a helisa xiyimu lexi xa misava. Loko hi tizrisa xilayu lexi kumekaka ka Ba-Heberu 6:11, 12, hi ta khomelela ka dumbo dzrezru ku ya ‘tlhasa wugan’wini’. — Dondzra.

16. Hi fanela ku tama hi tiyimisela ku yentxa yini?

¹⁶ Yehovha kutani a tsrimbile leswaku a ta yi helisa dzrini misava leyi ya ku biha ya Sathana. Loko siku ledzro dzri tlhasa, Yehovha a ta hetisisa hinkwaswu leswi a dumbisiki ku swi yentxa. I ntiyiso leswaku minkama yin’wana hi nga ha yanakanya leswaku a siku dzra Yehovha dzra hlwela, kambe a siku dzra Yehovha ‘dzri nga ka dzringa hlweli!’ (Hab 2:3) Xileswo, hi fanela ku tama hi hiteka hi yimela Yehovha. Hi nga kazraleni ku tama hi ‘yimela Xikwembu Nkulukumba wa ku huluka kwezru’.— Mik 7:7.