YOMARA ni vamakwavu ku nga Marcelo na Hiver, va tsrhama ka xidoropana lexitsrongo a Guatemala. Yomara a sungule ku dondzra Bibele ni Timboni Ta Yehovha nakone hi ku famba ka nkama ni vamakwavu va sungule ku dondzra. Kambe a xikazratu hi leswaku hinkwavu va fe matihlo nakone a va nga swi koti ku dondzra hi braile. Xileswo, lweyi a a va dondzrisa Bibele a a va dondzrela mayava ni tindzrimana.

Ku ya mintlhanganwini na swone swi ve xikazratu hikusa a swi nga ti koteka kuva va famba mpfhuka wa 40 wa maminuto wuswavu va ya a Ndlwini ya Wugandzreli. Kambe vamakwezru va le bandleni va hambe malulamiselo ya ku famba na vone ka mintlhanganu hinkwayu. Loko vamakwavu lava va sungule ku nyikiwa swiyenge a mintlhanganwini ya makazri ka vhiki, vamakwezru a va va pfuna kuva va swi tiva hi nhloko leswi a va ta swi hlaya ka swiyenge swavu.

Hi Mayu wa 2019, ku sungule kuva ku hambiwa mintlhanganu ya bandla a mugangeni wavu. Kutani vatekani va kukazri lava nga maphayona, va zruzreli a mugangeni lowo. Vone va tibekeli kungu dzra ku dondzrisa vamakwavu lavo ku dondzra ni ku tsrala hi braile nambi leswi vatekani lavo a va nga swi tivi leswaku va ta swi yentxisa kuyini leswo. Va ye ka bibliyoteka dzra kukazri akuva va ya dondzra ni ku tiva leswaku va nga mu dondzrisisa kuyini mhunu a braile.

Ndzreni ka tiwheti ti nge tingani vamakwavu lava, kutani a swi va nabyalela ku dondzra hi braile nakone va ye va yentxa nhluvuko lowu yengetelekiki. a Swoswi, Yomara, Marcelo, na Hiver i maphayona ya nkama hinkwawu. Marcelo a tlhela a va nandzra wa wutizreni. Hinkwavu va tsrhama na va khomekile hi mintizro ya moya vhiki hinkwadzru. Ku hiseka kwavu ku kutxa vambeni.

Vamakwavu lava, va dzri tlangela ngopfu lizrandzru ni nseketelo wa vamakwezru a bandleni. Yamara a li: “Ku sukela a ku sunguleni, Timboni ta Yehovha ti hi kombe lizrandzru dzra ntiyiso.” Kasi Marcelo a li: “Hi ni vanghanu lavanene a bandleni dzrezru nakone hi hamba xiyenge xa vamakwezru lava zrandzranaka va misava hinkwayu.” Yomara ni vamakwavu va dzri yimele hi manyawu siku ledzri misava hinkwayu yi taka ndzrulutiwa paradeyisi.—Ps 37:10, 11; Eza 35:5.