Xana u ti dondzre ha hombe tinhlokomhaka ta Xihondzro Xa Ku Zrindzra ta lembe ledzri? Kutani, vona kumbe u nga swi kota ku hlamula swivutiso leswi landzrelaka:

Xana ma tlhamuxela yini mazritu lama liki “txintxani ndlela leyi mi yanakanyaka ha yone”? (Rom. 12:2)

Swi tlhamuxela ku yentxa leswi yengetelekiki, ku nga li ntsena ku titwa na u yentxa leswinene a wuton’wini. Swi tlhela swi tlhamuxela ku kambela wumhunu byezru bya le ndzreni hi va hi yentxa ku txintxa loku vilelekaka akuva hi nyonxisa Xikwembu Nkulukumba.—Xihondzro Xa Ku Zrindzra 01/2023 pp. 8-9.

Ha yini hi fanela ku dzringanisela loko hi hlalela ku txintxa ka xiyimu xa misava?

Swa hi zron’wa ku vona ndlela leyi ku txintxa ka xiyimu lexi xa misava ku byi hetisisaka ha yone wuprofeta bya Bibele. A hi djuli ku kumbexetela akuva swi nga honi wumun’we byezru nakone hi ta va na hi yentxa swone loko mabulu yezru ma ti seketela ka leswi humesiwaka hi nhlengeletanu ya Yehovha. (1 Kor. 1:10)—Xihondzro Xa Ku Zrindzra 02/2023 p. 16.

Ha yini babatiso dzra Yesu dzri hambane ni dzra valandzreli vake?

Leswi a pswaliwiki ka lixaka ledzri tinyiketeliki ka Xikwembu Nkulukumba, a swi nga ha sindzrisi kuva a tinyiketela ka Yehovha hi lani hine hi yentxaka ha kone. Yesu a a li wanuna lwe a hetisekiki, xileswo a swi nga vileli kuva a tisola ka swidoho swake.—Xihondzro Xa Ku Zrindzra 03/2023 p. 5.

Hi nga va pfunisa kuyini vambeni akuva va kuma mukhandlu wa ku hlamula a mintlhanganwini?

Hi nga nyikela tinhlamulo ta ku goma akuva van’wana va ta va ni mukhandlu wa ku hlamula. Nakone hi nga tlhela hi tikazratela akuva hi nga longoloxi tinhla hinkwatu hi nkama wun’we. Leswo swi ta yentxa leswaku van’wana va va ni mukhandlu wa ku hlmaula.—Xihondzro Xa Ku Zrindzra 04/2023 p. 23.

Xana yi tlhamuxela yini ‘ndlela ya wuxwengi’ leyi ku vulavuliwaka ha yone ka Ezaya 35:8?

A xitaratu lexi xa ku fanekisela xi tlhamuxela liyendzro ledzri Vayuda a va ta dzri teka ku suka a Babilona va tlhelela Israyele. Nakone xi tlhamuxela yini a masikwini yezru? Na ku nge si na tlhasa lembe dzra 1919, ku sungule ku lulamiseliwa ntizro wa ku ndzrulutela ni ku gandlisa Bibele kun’we ni swin’wana. Vanhu va Xikwembu Nkulukumba va famba ka ‘ndlela ya wuxwengi’ leyi yisaka a paradeyisini dzra moya ni ku tisa matovoko ya Mfumu wa Xikwembu Nkulukumba.—Xihondzro Xa Ku Zrindzra 05/2023 pp. 15-19.

He wani matsrhamela ya vavasati vabidzri va ku fanekisela lava Amaproverbia ndzrima 9 yi vulavulaka ha vone?

A buku dzra Amaproverbia dzri vulavula hi ‘wansati wa wuphukuphuku’ lweyi a xizrambu xake xi yisanaka ‘Xeyoli’ ni ‘wutlhazri’ bya ntiyiso lebyi fanekiselaka wansati, lweyi xizrambu xake xi yisaka a ‘ndleleni ya ku yingelisisa’ ni le wuton’wini. (Amapr. 9:1, 6, 13, 18)—Xihondzro Xa Ku Zrindzra 06/2023 pp. 22-24.

Xana Yehovha a kombise leswaku awa titsrongohata nakone a ni wunene loko a bulisana na Loti hi ndlela yini?

Yehovha a lelete Loti leswaku a suka a Sodoma a tsrutsrumela tinhaveni. Kambe Loti a nga pfumelanga ku ya ka mbangu wolowo nakone loko a kombele ku tsrutsrumela ka muganga lowu vitaniwaka Zowar, Yehovha a xi yingelile xikombelo xa Loti.—Xihondzro Xa Ku Zrindzra 07/2023 p. 21.

Xana nsati a nga yentxa yini loko nuna wake a hlalela ponografiya?

A fanela ku dzrimuka leswaku a nga na nandzru. A fanela ku tikazratela ku tiyisa wuxaka byake na Yehovha ni ku yanakanyisisa hi wundzrunguli bya le Bibeleni bya vavasati lava viki ni swikazratu nakone va kumiki ntxhavelelo ka Yehovha. A fanela ku mu pfuna kuva a nga vi ka swiyimu leswi swi nga ha dzringaka ku tiyimisela kwake.—Xihondzro Xa Ku Zrindzra 08/2023 pp. 14-17.

I yini lexi taka hi pfuna ku hlamula hi ndlela ya ku zrula ka lava vutisaka hi ta lipfumelo dzrezru?

Hi nga vona xivutiso lexo swanga mukhandlu wa ku vona leswi mhunu lweyo a swi yanakanya ni leswi a zron’wekaka ha swone. Hi dondzrisiwa ku hlamula hi ndlela leyinene.—Xihondzro Xa Ku Zrindzra 09/2023 p. 17.

Hi nga dondzra yini ka xikombiso xa Mariya mayelanu ni kombela mpfunu?

Loko Mariya a tive leswaku a a tava mamana wa Mesiya, a tiyisiwe hi vhanu vambeni. Gabriyele na Elizabeti va tiyise Mariya hi ku tizrisa matsralwa. Na hine hi nga kuma pfunu lowu hi wu vilelaka ka vamakwezru.—Xihondzro Xa Ku Zrindzra 10/2023 p. 15.

Xana Yehovha a swi hlamulisa kuyini swikhongoto swezru?

A dumbisa ku yingiseta swikhongoto swezru ni ku kambela ndlela leyi swi yelanaka ha yone ni nkongometo wake. (Yer. 29:12) A nga ha hlamula xikombelo xo xa xin’we hi tindlela ta ku hambanahambana, kambe minkama hinkwayu Yehovha a ta hi seketela.—Xihondzro Xa Ku Zrindzra 11/2023 pp. 21-22.

Varoma 5:2 yi vulavula hi “dumbo” kutani, ha yini ku tlhela ku vulavuliwa ha dzrone ka dzrimana 4?

Loko mhunu a twa madzrungula lamanene, a nga ha kuma dumbo dzra ku hanya hi lani ku nga helikiki a paradeyisini kola misaveni. Kambe loko a tiyiselela mahlomulo ni ku yamukeliwa hi Xikwembu Nkulukumba dumbo dzrake dzri ya dzri kula.—Xihondzro Xa Ku Zrindzra 12/2023 pp. 12-13.