1. I yini leswi vampshwa vanyingi va kotiki ku swi yentxa?

 LEMBE ni lembe, ku babatisiwa vampshwa vanyingi. Loko u li mumpshwa lwa ha ka ku babatisiwa, tiyiseka leswaku vamakwezru ku patsra na Yehovha va nyonxe ngopfu swinene hi xiboho lexi u xi tekiki. (Pr 27:11) Yanakanyisisa hi mintxhumu leyi u kotiki ku yi yentxa. U Tinyike nkama wa ku kambisisa leswi Bibele dzri swi hlayaka nakone swi nga yentxeka u yentxe leswo ku dzringana malembe manyingi. Leswo swi ku yentxe u tiyiseka leswaku Bibele i Zritu dzra Xikwembu Nkulukumba. Xa lisima ngopfu hi leswaku u tive Yehovha u tlhela u mu zrandzra. Kutani lizrandzru ledzro dzri ku susumetele kuva u tinyiketela ka kwake u va u babatisiwa. Ha ku kulungela hi kola ka xiboho lexi u xi tekiki.

2. Hi ta bula ha yini ka xidondzro lexi?

 ² Handle ka ku ganaganeka nkama lowu a wu tilulamisela kuva u babatisiwa, a lipfumelo dzraku dzri dzringiwe hi tindlela tinyingi. Kambe swi nga yentxeka a nkameni lowu taka wa ha ta kumana ni mindzringo yimbeni leyi taka dzringa lipfumelo dzraku. Sathana a ta yentxa hinkwaswu leswi a nga swi kotaka akuva a tsranisa wuxaka byaku na Yehovha ni ku ku tsrhikisa ku mu tizrela. (Ef 4:14) Kambe u nga swi pfumeleli leswo swi ku yentxekela. I yini lexi taka ku pfuna ku tama u dumbeka ka Yehovha ni ku tama u hanya hi ku pfumelelana ni ku tinyiketela kwaku? U fanela ku tama u ‘kongoma’ ku wupfeni, leswi liki u fanela ku tama u yentxa nhluvuku hi tlhelo dzra moya. (Hb 6:1) Xana u nga swi yentxisa kuyini leswo?

3. I yini leswi Vakriste va fanelaka ku tama va swi yentxa ntsrhaku ka babatiso?

³ Ntsrhaku ka loko hi babatisiwile, hinkwezru hi fanela ku landzra xitsratsriyo lexi mupostola Pawulo a xi nyikiki Vakriste va le Efesa. A hlaye leswaku a va fanela kuva Vakriste lava wupfiki. (Ef 4:13) Hi mahlayela mambeni, ‘hi fanela ku tama hi yentxa nhluvuku.’ Swi nga nabyala ku twisisa leswi mupostola Pawulo a a djula ku swi hlaya, loko hi yanakanya hi makulela ya ntsrongwana. Nambi leswi vapswele va nyonxaka hi xibebetana xavu, a va nge nyonxi loko xo kala xi nga kuli, xi tama xiva xibebetana. Hi ku famba ka nkama xi fanela ku tsrhika matsrhamela ya ‘vutsrongawana’. (1Ko 13:11) Ku yentxeka leswi fanaka hi Vakriste. Ntsrhaku ka babatiso, hi fanela ku tama hi yentxa nhluvuku. Kutani a hi voneni swidzringanyeto swi nga li swingani leswi taka hi pfuna ku yentxa leswo.

4. I yini lexi nga ku pfunaka ku yentxa nhluvuku hi tlhelo dzra moya? Tlhamuxela. (Ba-le-Filipi 1:9)

⁴ Yengetela lizrandzru dzraku ha Yehovha. I ntiyiso leswaku u mu zrandzra ngopfu Yehovha. Kambe lizrandzru ledzro dzri nga tama dzri yengeteleka. Hi ndlela yini? Mupostola Pawulo a swi tlhamuxelile leswo ka Ba-le-Filipi 1:9. (Dondzra.) Pawulo a khongotile a kombela leswaku lizrandzru dzra Vakriste va le Filipi ‘dzri yandzrisiwa ngopfungopfu’. Xileswo swa koteka ku yengetela lizrandzru dzrezru ha Yehovha. Kambe hi nga swi yentxisa kuyini leswo? Hi fanela ku va ni ‘vutivi ni ku yingelisisa’. Loko hi ya hi mu tiva ku yampswa Yehovha, hi ta ya hi mu zrandzra nakone hi ta ya hi nyonxela wumhunu byake ni ndlela leyi a yentxaka mintxhumu ha yone. Hi ta tikazratela ku yentxa leswi nyonxisaka Yehovha ni ku tsrhika leswi nga mu nyonxisiki. Leswo swi hi yentxa hi tikazratela ku yentxa ku zrandzra ka Yehovha ni ku yentxa mintxhumu hi ku landzra ku zrandzra kwake.

5-6. Hi nga dzri yengeselisa kuyini lizrandzru dzrezru ha Yehovha? Tlhamuxela.

⁵ Lizrandzru dzrezru ha Yehovha dzri nga ya dzri tiya loko hi tikazratela ku tiva N’wanake ku yampswa, hikusa a a yetisela wumhunu bya Papayi wake hi ku helela. (Hb 1:3) Nakone ndlela ya ku yampswa ya ku tiva Yesu Kriste, i ku dondzra Tiyevhangeli ta mune. Loko u nga si va na xone xihena xa ku dondzra Bibele siku ni siku, swi ngo yini u sungula namunhla? Nkama lowu u dondzraka ha Yesu, tikazratele ku vona matsrhamela yake. A vhanu lavakulu ni vatsrongwana a va swi zrandzra ku bula ni ku heta nkama na yene. (Mr 10:13-16) Yesu a a ni xinghanu ni wunene, nakone vadondzrisiwa vake a va nga txhavi ku mu byela matitwela yavu. (Mt 16:22) Leswi hi swi tivaka leswaku Yesu a yetisela Papayi wake, hi nga tiyiseka leswaku Yehovha na yene a ni matsrhamela lama fanaka. Kutani hi nga khongota ka Yehovha hi mu pfulela mbilu yezru na hi nga txhavi leswaku a ta hi yavanyisa hi kola ka matitwela yezru. Phela, awa hi zrandzra a tlhela a hi hlayisa.—1Pe 5:7.

⁶ Yesu a a kazrateka hi ku vona vhanu na va xaniseka. Mupostola Matewu a li: “Loko a vona switsrhungu, a swi twela wusiwana, hikusa a swi xanisiwa ni ku pepetsekisiwa ku fana ni tihamba leti ngeke na mubyisi.” (Mt 9:36) Kambe xana Yehovha a titwisa kuyini? Twana leswi Yesu a swi hlayiki, a te: “A hi ku zrandzra ka Papayi wanga lweyi a nga matilweni kuva ku lahleka nambi ko va mun’we wa lavatsrongo.” (Mt 18:14) I swa lisima ku tiva ndlela leyi Yehovha a titwaka ha yone. Xileswo, loko hi ya hi mu tiva ku yampswa Yesu, lizrandzru ledzri hi nga na dzrone ha Yehovha dzri ta ya dzri kula.

7. Ha yini swi pfuna ku heta nkama ni vamakwezru lava wupfiki?

⁷ Ntxhumu wumbeni lowu nga ku pfunaka ku yengesela lizrandzru dzraku ha Yehovha ni ku ya u kula hi tlhelo dzra moya, i ku heta nkama  ni vamakwezru lava wupfiki. Xiya ndlela leyi vamakwezru lavo va nyonxiki ha yone. A va tisoli hi ku tizrela Yehovha. Va kombeli va ku dzrungulela mimfambu leyi va yi kumiki nkama lowu va tizrelaka Yehovha. U nga kombela kuva va ku pfuna nkama lowu u djulaka ku teka swiboho swa lisima. Phela ku ni mabindzru lamanene ‘loko vatlhavukanyisi va tele’.—Pr 11:14.

8. U nga yentxa yini loko u ganaganeka mayelana ni leswi Bibele dzri swi dondzrisaka?

⁸ Hlula ku ganaganeka kwaku. Hi lani hi swi voniki ha kone ka  yava 2, Sathana a ta yentxa hinkwaswu leswi a nga swi kotaka akuva a ku sivela ku yentxa nhluvuku hi tlhelo dzra moya. Nakone yin’we ya tindlela leyi a yi tizrisaka i ku beka ku ganaganeka a miyanakanywini yezru mayelana ni leswi Bibele dzri swi dondzrisaka. Hi xikombiso, hi ku famba ka nkama va nga ha zama ku ku kholwisa ka ndondzro ya ku titumbulukela ka mintxhumu. Swi nga yentxeka nkama na wa ha li ntsrongo u nga yi tekelanga nhlokweni ndondzro leyo, kambe swoswi u dondzra ngopfu ha yone a xikole. Nakone swi nga ha yentxeka leswi vaprisori va swi hlayaka akuva va tlhamuxela ndondzro leyo, swi tikomba na a li ntiyiso. Kambe swi nga yentxeka va ngi ngi kambisisa kumbe ku yanakanyisisa hi wumboni bya leswaku ku ni muvumbi. I swinene ku dzrimuka Amaproverbia 18:17, leyi liki: ‘Lwa zrangaka a yangula hubyeni, ingi a lulamile, kambe mun’wana, loko a humelela, a mu dzringa.’ A matsrhan’wini ya ku yanakanya leswaku hinkwaswu leswi u swi dondzraka i ntiyiso, i swa lisima ku tinyika nkama wa ku kambisisa leswi Bibele dzri swi hlayaka. Hamba wusetxhi ka mabuku yezru nakone bulisana ni vamakwezru lava khale a va pfumela ka ndondzro ya ku titumbulukela ka mintxhumu. U nga tlhela u va vutisa leswaku i yini lexi va pfuniki ku kholwa leswaku ku ni Muvumbi lwa zron’wekaka ha hine. Mabulu ya ku fana ni lawo, ma nga ku pfuna kuva u tiyiseka leswaku ku ni Muvumbi.

9. U dondzre yini ka xikombiso xa Melissa?

⁹ Makwezru wa xisati lwa vitaniwaka Melissa a hambe wusetxhi mayelana ni ntumbuluku, nakone leswo swi mu pfune ku tiyisa lipfumelo dzrake ka leswi Bibele dzri swi dondzrisaka. * Ali: “Vaprisori va khanela hi ku titumbulukela ka mintxhumu, hi ndlela leyi nga ha ku yentxaka u yanakanya leswaku leswi va swi hlayaka i ntiyiso. A ku sunguleni a ni txhava ku yentxa xa kukazri akuva ni hlula ku ganaganeka kwanga. A ni nga swi djuli ku kambisisa tinhlamulo ta swivutiso leswi a ni li na swone, hikusa a ni yanakanya  leswaku vaprisori vanga a va tiyisile. Kambe ni game ni dzrimuka leswaku Yehovha a nga swi djuli leswaku hi pfumela kwake na hi nge na wumboni. Xileswo a ni fanela ku hlula ku ganaganeka kwanga. Kolanu ni tihambele kungu dzra ku dondzra buku ledzri liki, Existe um Criador Que Se Importa Com Você? Ni broxura ledzri liki, Xana Swilo Leswi Hanyaka Swi Lo Tumbuluxiwa? ni ledzri liki, A Origem Da Vida—Cinco Perguntas Que Merecem Resposta. Nakone leswi hi leswi a ni swi vilela. Na tisola hi kuva ni hlwele ku yentxa leswo.”

10-11. I yini lexi nga hi pfunaka ku tama hi va lava basiki mahlweni ka Yehovha? (1 Ba-le-Thesalonika 4:3, 4)

¹⁰ Fambela kule ni mahanyela ya ku biha. Loko wa ha sungula wumpswha, a ku navela ka ku yentxa swa tinkuku, ku nga ha kula. Nakone u nga ha hlohloteliwa ku yentxa swa tingana hi tlhelo dzra tinkuku. Nakone hi swoswo Sathana a djulaka kuva u swi yentxa. Kambe i yini lexi nga ku pfunaka kuva u nga weli ka ntlhamu lowo? (Dondzra 1 Ba-le-Thesalonika 4:3, 4.) Loko u khongota ka Yehovha, mu pfuleli mbilu yaku u mu byela leswi u titwisaka xiswone. Loko u mu kombela, u nga djikadjiki nakone mu kombele kuva a ku nyika ntamu. (Mt 6:13) Dzrimuka leswaku Yehovha a djula ku ku pfuna ku nga li ku ku yavanyisa. (Ps 103:13, 14) Xin’wana lexi taka ku pfuna i ku dondzra Bibele. Melissa lweyi hi buliki ha yene ku sunguleni, a hlaya leswi mu pfuniki akuva a hlula mimpimiso leyi nga basangakiki, a li: “Ku dondzra Bibele siku ni siku swi ni pfune kuva ni nga kazrali. Swi tlhele swi ni pfuna ku dzrimuka leswaku ni lumba Yehovha nakone ni djula leswaku a hamba xiyenge a wuton’wini byanga.”—Ps 119:9.

¹¹ U nga lulamisi timhaka wuswaku, bula ni vapswele vaku hi leswi u titwisaka xiswone. I ntiyiso leswaku swi nga ha kazrata ku bula ni vapswele vaku hi leswi u titwisaka xiswone, kambe i swa lisima ku yentxa leswo. Melissa a li: “Ni khongotile kuva ni va ni xixixi. Ntsrhaku ka leswo, ni ye bula na papayi hi xikazratu lexi a ni li na xone. Loko ni yentxe leswo, ni titwe na ni pepile nakone a ni swi tiva leswaku Yehovha a nyonxe ngopfu hi leswi ni swi yentxiki.”

12. I yini lexi nga ku pfunaka ku teka swiboho leswinene?

¹² Hanya hi ku landzra minsinya ya milawu ya Bibele. Loko u ya u kula, vapswele vaku va ta ku ntsrhunxa akuva u tiyentxela swiboho. Kambe ka ha ni swinyingi leswi u fanelaka ku swi dondzra. I yini lexi taka ku pfuna kuva u nga teki swiboho leswi taka hona wuxaka byaku na Yehovha? (Pr 22:3) Makwezru wa xisati Kari, a tlhamuxela leswi mu pfuniki kuva a teka swiboho leswinene. A twisise leswaku loko u li Mukriste lwa wupfiki, u nga ti vilela nawu ka ntxhumu wun’wana ni wun’wana lowu u nga wu yentxaka a wuton’wini. Ali: “Ni xiye leswaku xa lisima, i ku twisisa mavonela ya Yehovha hi mhaka ya kukazri, ku nga li ku va ni nawu ka ntxhumu wun’wana ni wun’wana.” Kutani nkama lowu u dondzraka Bibele tivutise leswi: ‘He wani mayanakanyela ya Yehovha hi ku ya hi dzrungula ledzri? Xana dzri ni nsinya wa nawu wa kukazri lowu nga ni pfunaka ku teka swiboho leswinene? Xana ku landzra leswi Bibele dzri swi dondzrisaka swi ta ni pfuna hi ndlela yini?’ (Ps 19:7; Eza 48:17, 18) Ku dondzra Bibele ni ku yanakanyisisa hi minsinya ya milawu leyi u yi kumaka swi ta ku pfuna nakone swi ta yentxa leswaku swi nabyala ku teka swiboho leswi nyonxisaka Yehovha. Nkama lowu u yaka u kula hi tlhelo dzra moya, u ta swi xiya leswaku a swi vileli kuva u va ni nawu ka ntxhumu wun’wana ni wun’wana, hikusa u ta kota ku twisisa leswi Yehovha a swi yanakanyaka hi mhaka ya kukazri.

13. Xana ku va ni vanghanu lavanene swi nga ku pfuna hi ndlela yini? (Amaproverbia 13:20)

¹³ Hlawula vanghanu lava zrandzraka Yehovha. Hi lani hi swi voniki ha kone ku sunguleni, vanghanu lava u va hlawulaka va nga khumba nhluvuku waku. (Dondzra Amaproverbia 13:20.) Makwezru wa xisati lwa vitaniwaka  Sara, a sungule ku xukuvala. Kambe ku ni ntxhumu lowu mu pfuniki kuva a tlhela a nyonxa. Sara a li: “Ni kume vanghanu lavanene hi nkama lowu faneliki. Ni sungule ku lulamisela dondzro ya Xihondzro Xa Ku Zrindzra ni makwezru wa kukazri wa xisati a bandleni, kasi munghanu mumbeni a ni kutxe kuva ni sungula ku hlamula a mintlhanganwini. Hi kola ka ku pfuniwa hi vanghanu lavanene, ni sungule ku xi bekela lisima xidondzro xanga xa ximhunu ni xikhongoto. Ni sungule kuva ni wuxaka lebyi tiyiki na Yehovha ni tlhela ni nyonxa.”

14. Xana Julien a swi kotise kuyini ku hamba vanghanu lavanene?

¹⁴ Xana u nga yentxa yini akuva u va ni vanghanu lava taka ku kutxa ku yentxa leswinene? Julien, lweyi swoswi a tizraka swanga nkulu wa bandla, a li: “Loko na ha li mumpshwa, ni hambe wunghanu ni vamakwezru lava a ni tizra na vone nsin’wini. Vanghanu lavo a va ni nkhinkhi nakone va ni pfune kuva ni nyonxela ntizro wa ku zrezra. Va tlhele va ni pfuna ku tibekela kungu dzra ku nghenela ntizro wa nkama hinkwawu. Ni tlhele ni xiya leswaku a ni luzi mikhandlu yinyingi ya ku hamba vanghanu lavanene hikusa a ku sunguleni a no hamba vanghanu ntsena ni vhanu va ntanga yanga. Swoswi lani Betele na ha tama ni hamba vanghanu lavanene. A xikombiso xavu lexinene xi ni pfuna ku teka swiboho leswinene ka ndlela leyi ni hungataka ha yone, nakone va ni pfuna kuva ni ya ni tsrhindzrekela ka Yehovha.”

15. Xana Pawulo a mu kutxe yini Timotewu? (2 Timoteo 2:20-22)

¹⁵ Swi li yini loko u xiya leswaku mhunu wa kukazri a bandleni a hi munghanu lwenene? Mupostola Pawulo a a swi tiva leswaku Vakriste va kukazri a dzaneni dzra ku sungula a va nga li vanghanu lavanene. Xileswo a byele Timotewu kuva a fambela kule na vone. (Dondzra 2 Timoteo 2:20-22.) Wuxaka byezru na Yehovha i bya lisima ngopfu swinene, xileswo a hi fanelanga hi pfumelela mhunu ni mun’we a honetela wuxaka lebyi hi tikazratiki akuva hi va na byone ni Papayi wezru wa le matilweni.—Ps 26:4.

16. He wani makungu lawa u nga ha tibekelaka wone?

¹⁶ Tibekele makungu lamanene. U nga tibekela makungu lama taka ku pfuna ku va Mukriste lwa wupfiki. (Ef 3:16) Hi xikombiso, u nga ha vona swi li swinene ku tibekela kungu dzra ku yampswisa dondzro yaku ya ximhunu ni ku dondzra  Bibele. (Ps 1:2, 3) Kumbe u xiya leswaku u fanela ku yampswisa ndlela leyi u khongotaka ha yone. Kumbe u nga ha vona leswaku u fanela ku yampswisa ndlela leyi u hungataka ha yone ni ndlela leyi u wu tizrisaka ha yone nkama waku. (Ef 5:15, 16) Loko Yehovha a vona ku tikazrata kwaku akuva u nhluvuka hi tlhelo dzra moya, a nyonxa ngopfu swinene.

17. U ta titwisa kuyini loko u pfuna vambeni?

¹⁷ Ku pfuna vambeni swi nga ku pfuna kuva Mukriste lwa wupfiki. Yesu a te: ‘A tovoko dzra ku hanana dzri tlula tovoko dzra ku hananiwa.’ (Min 20:35) Nakunene, u ta nyonxa ngopfu swinene hi ku tizrisa nkama ni ntamu waku akuva u pfuna vambeni. Hi xikombiso, u nga ha tibekela kungu dzra ku pfuna lava vabyaka ni lava va duwhaliki a bandleni dzraku. Kumbexana u nga ha va xavela kumbe ku va hakelela swa kukazri leswi va swi vilelaka, kumbe kuva pfuna hi switizro swavu swa eletroniku. Loko u li makwezru wa xinuna, u nga ha tibekela kungu dzra kuva nandzra wa wutizreli akuva u pfuna vamakwezru bandleni. (Flp 2:4) U nga ha kombisa lizrandzru ka vhanu vambeni hi kuva zrezrela madzrungula lamanene. (Mt 9:36, 37) Nakone loko swi koteka, u nga ha nghenela ntizro wa nkama hinkwawu.

18. Xana ku nghenela ntizro wa nkama hinkwawu swi nga ku pfuna hi ndlela yini akuva u yentxa nhluvuku?

¹⁸ Ku nghenela ntizro wa nkama hinkwawu swi nga ku pfuna hi tindlela tinyingi akuva u yentxa nhluvuku. Ku tizra swanga phayona swi nga ku nyika mikhandlu yinyingi ya ku fana ni ku ya a Xikole xa Vazrezri va Mfumu, ku tizrela a Betele, kumbe ka ntizro wa ku yaka tiyindlu ta nhlengeletanu. Kaitlyn, makwezru wa xisati lwa nga phayona a li: “Ntxhumu lowu ni pfuniki ku kula hi tlhelo dzra moya ntsrhaku ka babatiso, ku ve ku heta nkama a ntizrweni wa ku zrezra ni vamakwezru lava wupfiki. Xikombiso xavu xi ni pfune ku yampswisa wutivi byanga hi Bibele ni ku yampswisa wuswikoti byanga bya ku dondzrisa.”

19. He wani matovoko lawa u ta ka ma kuma loko u tama u yentxa nhluvuku?

¹⁹ U ta kuma matovoko manyingi hi ku tama u tikazratela ku yentxa nhluvuku hi tlhelo dzra moya. Hi xikombiso, a wu nga ti heta nkama waku hi mintxhumu leyi kalaka yi nga li ya lisima. (1Yh 2:17) Nakone a wu nga ti wela ntlhan’wini wa ku teka swiboho leswi hoxekiki ni ku kuma mihandzru ya ku biha. U ta va ni ku nyonxa ni ku humelela ka ntiyiso. (Pr 16:3) Xikombiso xaku lexinene xi ta tiyisa vamakwezru, lavampswha ni lava kuliki. (1Tm 4:12) Xa lisima ku tlula hinkwaswu, hi leswaku u ta tikholisa hi ku zrula ni ku nyonxa loku u taka ku kuma hi ku tiva leswaku u nyonxisa Yehovha, lweyi a nga munghanu waku lwenkulu.—Pr 23:15, 16.