1. Ha yini Yesu a kombele leswaku Yehovha a sizrelela valandzreli vake?

 KA WUSIKU lebyi a fiki ha byone, Yesu a hambe xikombelo xa ku hlawuleka ka Yehovha. A kombele Yehovha leswaku a sizrelela valandzreli vake. (Yh 17:15, 20) I ntiyiso leswaku kusukela khale, Yehova a sizrelele ni ku hlayisa vhanu vake. Nambitanu Yesu a a swi tiva leswaku valandzreli vake a va ta xanisiwa ngopfu hi Sathana nakone a a swi tiva leswaku a va ta vilela mpfunu wa Yehovha akuva va lwisana ni minhlaselo ya Sathana.

2. Hi kuya hi Amapsalma 33:18-20, ha yini hinga fanelanga hi txhava swikazratu leswi hi nga ha kumanaka na swone?

² Misava leyi, leyi fumiwaka hi Sathana, yi va vangela swikazratu swinyingi Vakriste va ntiyiso. Hi lavisana ni swikazratu leswi nga ha hi hetaka ntamu, swi tlhela swi dzringa ku dumbeka kwezru ka Yehovha. Kambe hi lani hi taka swi vona hakone ka xidondzro lexi, a hi fanelanga hi txhava. Yehovha awa hi hlayisa, awa swi tiva leswi hi kumanaka na swone, nakone a lulamele ku hi pfuna. Hi ta vona swikombiso swibidzri swa le Bibeleni, leswi hi kombaka leswaku ‘a mahlu ya Yehovha ma le henhla ka lava mu txhavaka’.—Dondzra Amapsalma 33:18-20.

3. I yini leswi nga ha hi yentxaka hi titwa wuswezru?

³ I ntiyiso leswaku hi xiyenge xa ndangu lowukulu wa moya, nambitanu minkama yin’wana hi nga ha titwa hi li wuswezru. Hi xikombiso, vampswha va nga ha titwa va li wuswavu loko va fanela ku yimela lipfumelo dzravu a xikole kumbe loko va zruzrela ka bandla ledzrimpswha. Van’wana va nga ha lavisana ni ku xukuvala ni ku hela ntamu va va va yanakanya leswaku a nga kone lweyi a nga va pfunaka ku lwa ni matitwela wolawo. Minkama yin’wana va nga ha yanakanya leswaku a nga kone lweyi a nga va twisisaka nakone van’wana va nga ha vona swiyampswa kuva va nga buleli mhunu hi mhaka leyo na va tibyela leswaku a nga kone  lwa nga twisisaka xiyimu xavu nakone van’wana va nga ha ti byela leswaku a nga kone lweyi a zron’wekaka ha vone. Swi nge na mhaka leswaku i yini leswi nga hi yentxaka hi titwa wuswezru kumbe hi hlatiyela, Yehovha a nga swi djuli kuva hi titwa hi ndlela leyo. Ha yini hi hlaya leswo?

4. Ha yini muprofeta Eliya a te: ‘Ndzri sale na ndzri swanga?’

⁴ Vona xikombiso xa Eliya nandzra wa ku dumbeka wa Yehovha. Eliya a tsrutsrumile ku dzringana 40 wa masiku hi leswi Jezabele a a djula ku mu dlaya. (1Th 19:1-9) Hi wugamu loko Eliya a tumbele mhakweni a byele Yehovha leswi yentxekiki, a te: ‘Ndzri sale na ndzri swa nga [muprofeta].’ (1Th 19:10) Kambe a ka ha ni vaprofeta van’wana hikusa Obadiya a kote ku sizrelela 100 wa vaprofeta akuva va nga dlayiwi ha Jezabele. (1Th 18:7, 13) Kutani, ha yini Eliya a a titwa wuswake? Swi nga yentxeka a a pimisa leswaku a vaprofeta lava huluxiwiki ha Obadiya kutani va dlayiwile. Swi nga yentxeka a a titwa wuswake hileswi a ku nge na mhunu lweyi a a djula ku tizrela Yehovha nambi leswi Yehovha a kombisiki a nhaveni ya Karmel leswaku hi yene ntsena Xikwembu Nkulukumba. Nakone swi nga ha yentxeka a a tibyela leswaku a ku nga na lweyi a a tiva leswi a a kumana na swone kumbe a a pimisa leswaku a nga kone lweyi a a zron’weka ha yene. A hi swi tivi ha hombe leswaku i yini leswi a swi yentxa Eliya a titwa wuswake. Kambe hi nga tiyiseka leswaku Yehovha a a mu twisisa nakone a a yi tiva ndlela ya ku mu pfuna.

5. Xana Yehovha a mu pfunise kuyini Eliya akuva a vona leswaku a a nga li wuswake?

⁵ Yehovha a yentxe mintxhumu yinyingi kuva a pfuna Eliya. A yentxe Eliya a ntsrunxeka ku hlaya ndlela leyi a a titwa ha yone. Ku dzringana makhambi mabidzri Yehovha a vutise Eliya a ku: ‘U yentxa yini kola, we Eliya?’ (1Th 19:9, 13) Ka makhambi wolawo mabidzri, Yehovha a yingisete ha hombe nkama lowu Eliya a mu byelaka ta le mbilwini. Ntsrhaku ka leswo, Yehovha a hlamule Eliya hi ku mu komba leswaku a a li kusuhi na yene ni leswaku a a li Xikwembu Nkulukumba lweyi a nga ni ntamu swinene a tlhele a byela Eliya leswaku a ka ha ni va-Israyele va ku dumbeka. (1Th 19:11, 12, 18) Nakunene, Eliya a titwe na a zrulile ntsrhaku ka loko a byele Yehovha ta le mbilwini ni loko a yingisetile leswi  Yehovha a a djula ku mu byela swone. Kutani Yehovha a nyike Eliya swiyavelo swa kukazri swa lisima. A kombele leswaku Eliya a ya tota mafuzra Khazayele swanga hosi ya Siriya, Yehu swanga hosi ya Israyele na Elixa swanga muprofeta. (1Th 19:15, 16) Hi kuva Yehovha a nyike Eliya swiyavelo leswo, a mu pfune kuva a beka miyanakanyu yake ka mitxhumu leyinene. Yehovha a tlhele a mu djulela munghanu ku nga muprofeta Elixa. Wene ke? U nga wu yamukela hi ndlela yini mpfunu lowu pfaka ka Yehova loko u titwa wuswaku?

6. U nga khongota ha yini loko u titwa wuswaku? (Amapsalma 62:8)

⁶ Yehovha awa ku zramba akuva u bula na yene hi xikhongoto. Awa swi tiva swikazratu leswi u kumanaka na swone, nakone a dumbisa leswaku a ta yingela swikhongo swaku nkama wini na wini. (1Th 5:17) Yehovha awa nyonxa loko a yingela swikhongoto swa malandzra yake. (Pr 15:8) U nga mu byela yini Yehovha loko u titwa wuswaku? Yetisela Eliya hi ku mu byela ta le mbilwini. (Dondzra Amapsalma 62:8.) Mu byeli leswi ku kazrataka ni ndlela leyi u titwaka ha yone. Mu kombeli kuva a ku pfuna ku lwisana ni matitwela wolawo. Hi xikombiso, loko u txhava kumbe swi ku kazratela ku hlamula lava u dondzraka na vone xikole loko va ku vitisa swa kukazri mayelana ni Bibele kombela Yehovha leswaku a ku nyika xixixi, u nga tlhela u mu kombela kuva a ku nyika wutlhazri akuva u kota ku byela van’wana hi leswi u swi pfumelaka. (Lk 21:14, 15) Loko u lwisana ni matitwela lama hoxekiki kombela Yehovha akuva a ku pfuna leswaku u kota ku bula ni Mukriste lwa wupfiki mayelana ni mhaka leyo. U nga tlhela u mu kombela kuva a pfuna mhunu lweyi u ta ka bula na yene akuva a twisisa matitwela yaku. Pfulela Yehovha xifuva nakone xiyisisa ndlela leyi a taka hlamula ha yone xikhongoto xaku, u va u yamukela mpfunu wa van’wana, loko u yentxa leswo, a wu nge te titwa wuswaku.

7. U dondzre yini ka xikombiso xa Mauricio?

⁷ Yehovha a hi nyike ntizro wa lisima ngopfu akuva hi wu yentxa. Tiyiseka leswaku awa swi vona a tlhela a swi nyika lisima leswi u swi yentxaka a ku zrezreni ni le bandleni. (Ps 110:3) Xana ku hisekela ntizro wa ku zrezra swi nga ku pfunisa ku yini ku hlula ku titwa u li wuswaku? Vona xikombiso xa makwezru lweyi a vitaniwaka Mauricio. * Ntsrhakunyana ka loko a babatisiwile, mun’we wa vanghanu vake lavakulu a sungule ku tsrhika ntiyiso ha katsrongokatsrongo. Mauricio ali: “Ku vona munghanu wanga a titsravuxa na Yehovha swi yentxe lipfumelo dzranga dzri tsrekatsreka, ni sungule ku tivutisa kumbexana a na ha ta swi kota ku tama ni tizrela Yehovha ni ku hamba xiyenge xa ndangu wake. A ni titwa wuswanga nakone a ni pimisa leswaku a nga kone lweyi a a ta twisisa ndlela leyi a ni titwa ha yone.” I yini lexi pfuniki Mauricio? A li: “Ni sungule ku hisekela ntizro wa ku zrezra, leswo swi ni pfune kuva ni tsrhika  ku tiyanakanyela ku tlula mpimu ni miyanakanyu leyi hoxekiki. Nkama lowu ni tizraka ni vamakwezru van’wana a ku zrezreni, a ni titwi wuswanga nakone na nyonxa.” Nambiloko swi nga koteki kuya ku zrezreni ni vamakwezru hi xivizri hi nga swi yentxa hi ku tizrisa telefoni kumbe ku tsrala makarta nakone leswo swi ta hi tiyisa ngopfu. I yini swin’wana leswi pfuniki Mauricio? A li: “Ni sungule ku yi hisekela ngopfu mintizro ya le bandleni. Loko ni nyikiwa swiyavelo bandleni a ni swi lulamisela ha hombe. Swiyavelo leswo, swi ni pfune ku vona leswaku a ni li wa lisima ka Yehovha ni le ka vamakwezru.”

8. Hi nga ha titwisa kuyini loko hi kumana ni swikazratu?

⁸ Leswi hi hanyaka a masikwini ya wugamu, hinkwezru hi ta kumana ni mindzringo. (2Tm 3:1) Nambileswi hi yi tivaka mhaka leyo, mindzringo yi nga ha hi kuma na hi nga swi yimelanga. Hi xikombiso, hi nga ha pfumala swaku tihanyisa, hikumiwa hi mavabyi lamakulu, kumbe hi feliwa hi mhunu lweyi hi mu zrandzraka. Swikazratu swa ku fana ni leswo, swi nga ha hi heta ntamu ngopfungopfu loko swi yentxa hi ku landzrelelana kumbe swi tlhasa hi nkama wun’we. Kambe hi fanela ku dzrimuka leswaku Yehovha a wa swi tiva leswi hi kumanaka na swone nakone a nga hi nyika xixixi xa ku tiyiselela xikazratu xin’wana ni xin’wana.

9. He swini swikazratu leswi Yobe a kumaniki naswone?

⁹ Yanakanya ndlela leyi Yehovha a pfuniki ha yone nandzra wake wa ku dumbeka Yobe. Yobe a langutane ni swikazratu swinyingi hi nkama wun’we. Hi siku dzrin’we, a luze swifuyo swake hinkwaswo, vatizri vake va dlayiwa, nakone xa ku vavisa ngopfu a ve ku feliwa hi vanake lava a a va zrandzra. (Yb 1:13-19) Ntsrhakunyana ka nkama, na a ha twa ku vavisa mbilwini, Yobe a ngheniwe hi mavabyi ya ku txhavisa lawa ma honiki mizri wake. (Yb 2:7) Yobe a xaniseke ngopfu lakakuva loko a vulavula hi wutomi kumbe masiku ya ku hanya kwake a te: ‘Ndzra ma nyenya. Ndzri nga ka ndzri nga hanyi hi laha ku nga helikiki.’—Yb 7:16.

10. Xana Yehovha a mu pfunise kuyini Yobe akuva a hlula swakazratu swake? (Vona xifaniso lexi nga ka kapa.)

¹⁰ Yehovha a a swi vona hinkwaswu leswi Yobe a a kumana na swone. Nakone leswi a a mu zrandzra, a mu nyike hinkwaswu leswi a a swi vilela akuva a hlula swikazratu leswo. Hi xikombiso, Yehovha a bule na Yobe a mu dzrimuxa leswaku a ni wutlhazri lebyi nge ke na wugamu nakone a hlayisa swivumbiwa hinkwaswu leswi hanyaka. A vulavule hi swihazri swinyingi swa ku hlamalisa. (Yb 38:1, 2; 39:9, 13, 19, 27; 40:15; 41:1, 2) A tlhele a tizrisa wanuna wa ku dumbeka Elihu akuva a tiyisa ni ku txhavelela Yobe. Elihu a tiyisekise Yobe leswaku Yehovha minkama hinkwayu awa ku hakela ku tiyisela ka malandzra yake. Yehovha a tlhele a susumetela Elihu akuva a nyika Yobe swilayu swa kukazri. Elihu a pfune Yobe akuva a yima ku ti pimisela ni kuva a twisisa leswaku hi va tsrongo ngopfu loko hi dzringanisiwa na Yehovha muvumbi wa wuyaku hinkwabyu. (Yb 37:14) Handle ka leswo, Yehovha a nyike Yobe xiyavelo xa kukazri, kunga ku khongotelela vanghanu lava a va nge va ntiyiso lava a va dohile. (Yb 42:8-10) Kambe, xana Yehovha a nga hi pfunisa kuyini loko hi kumana ni swikazratu?

11. Xana Bibele dzri hi txhavelelisa kuyini loko hi kumana ni swikazratu?

¹¹ Namunhla, Yehovha a nga ha khaneli na hine hi ku kongoma, ku fana ni leswi a yentxisiki xiswone a nkameni wa Yobe, kambe a vulavula ni mun’wana ni mun’wana wezru hi ku tizrisa Zritu dzrake ku nga Bibele. (Ro 15:4) Dumbo ledzri Yehovha a hi nyikaka dzrone mayelana ni wumundzruku dzri hi txhavelela ngopfu. A hi voneni mazritu ya kukazri a Bibeleni lawa ma nga hi txhavelelaka loko hi  tlhangavetana ni mindzringo. Hi xikombiso, a Bibele dzri hi dumbisa leswaku a ku na txhumu ni xin’we, nambi kova swikazratu leswikulu, ‘lexi taka kota ku hi tsravukanisa ni lizrandzru [dzrake]’. (Ro 8:38, 39) Yehovha a tlhela a hi tiyisekisa leswaku ‘a le kusuhi ni hinkwavu lava mu vitanaka’ hi xikhongoto. (Ps 145:18) A tlhela a hi tiyisekisa leswaku loko hi mu dumba hi nga swi kota ku hlula swikazratu hinkwaswu na hi nyonxile. (1Ko 10:13; Yk 1:2, 12) A Bibele dzri tlhela dzri hi dzrimuxa leswaku a swikazratu leswi hi lavisanaka na swone i swa nkamanyana loko swi pimanisiwa ni wutomi lebyi nga helikiki lebyi hi byi yimeliki. (2Ko 4:16-18) Yehovha a tlhela a dumbisa ku helisa hinkwavu lava vangaka swikazratu, ku nga Sathana ni valandzreli vake. (Ps 37:10) Swi ngo yini loko ho bekisa madzrungula ya kukazri ya Bibele lawa ma nga ku txhavelelaka loko u kumana ni swikazratu a nkameni lowu taka?

12. I yini leswi Yehovha a djulaka leswaku hi swi yentxa akuva hi susa londzrovoto ka Bibele?

¹² Yehovha a djula leswaku hi tinyika nkama wa ku dondzra ni ku yanakanyisisa hi leswi hi swi dondzraka a Bibeleni siku ni siku. Nakone loko hi tizrisa leswi hi swi dondzraka lipfumelo ni wughanu lebyi hi nga na byone na Yehovha swiya swi tiya. Leswo swi hi nyika ntamu wa ku tama hi lwisana ni mindzringu. Yehovha a tlhela a nyika moya lowa ku xwenga hinkwavo lava nga ni mahanyela lawa ma kombisaka leswaku va dumba Bibele, nakone moya lowa ku xwenga wu nga hi nyika ‘vukulu bya ntamu’ kumbe ntamu lowu tlulaka lowu tolovelekiki leswaku hi lwisana ni xikazratu xini na xini.—2Ko 4:7-10.

13. Xana swakuda swa moya leswi hi swi yamukelaka ka “nandzra wa ku dumbeka ni ku tlhazriha” swi nga hi pfunisa kuyini ku lwisana ni swikazratu?

¹³ Hi mpfunu wa Yehovha a “nandzra wa ku dumbeka ni ku tlhazriha” a humesa mabuku manyingi, mavhidiyu ni wunanga, leswi hi pfunaka ku tiyisa lipfumelo dzrezru ni ku tsrhama na hi zrindzrile. (Mt 24:45) Hi fanele ku swi londzrovota ha hombe swakuda swa moya leswi Yehovha a hi nyikaka swone. Makwezru wa kukazri wa xisati wa le Estados Unidos a kombise ku tlangela swakuda swa moya hi ku hlaya mazritu lawa: “Ni ni 40 wa malembe na ni tizrela Yehovha nakone ndzreni ka nkama lowo hinkwawu lipfumelo dzranga dzri dzringiwe hi tindlela tinyingi.” Hi xikombiso, vhovho wake a file hi ku gadliwa hi mufambisi wa kukazri lweyi a a popswile, vapswele vake va dlayiwe hi mavabyi lama txhavisaka, nakone a khomiwe hi kankru makhambi mabidzri. I yini leswi mu pfuniki ku tiyisela ka swiyimo hinkwaswu leswo? Ali: “Minkama hinkwayu Yehovha a ni hlayisile  nakone swakuda swa moya leswi nandzra wa ku dumbeka ni ku tlhazriha a hi phamelaka swone swi ni pfuna ku tiyisela. Xileswo, ni titwa ku fana na Yobe lwa tiki: ‘Ku kota ni fa, ni nga ka ni nga suki ku lulameni kwanga!’”—Yb 27:5 BX.

14. Xana Yehovha a nga va tizrisa hi ndlela yini vamakwezru akuva a hi pfuna loko hi langusana ni swikazratu? (1 Ba-le-Thesalonika 4:9)

¹⁴ Yehovha a dzondzrisa vhanu vake ku kombisa lizrandzru ni ku pfuna vambeni ka minkama ya ku kazrata. (2Ko 1:3, 4; dondzra 1 Ba-le-Thesalonika 4:9.) Hi ku yetisela xikombiso xa Elihu, vamakwezru lava zrandzrekaka va swi djula ngopfu swinene ku hi pfuna ku langusana ni swikazratu swezru. (Min 14:22) Vona xikombiso xa Diane. Nuna wake a khomiwe hi mavabyi ya ku txhavisa ngopfu nakone bandla dzri yentxe mintxhumu yinyingi akuva dzri mu pfuna ku tama a tiya hi le moyeni. A li: “A swi ni nabyalelanga, kambe ka tiwheti letiyani, ni kote ku vona ndlela leyi Yehovha a hi pfunaka ha yone. Vamakwezru a bandleni va yentxe leswi va nga swi kota akuva va hi pfuna. Vamakwezru vanyingi va hi fonelile, van’wana va hi yendzrela va hi barasara, nakone leswo swi hi nyike ntamu lowu a hi wu vilela. Leswi ni kalaka ni nga fambisi movha, vamakwezru va tinyikelile akuva minkama hinkwayu loko ni swi kota, va famba na mine mintlhanganwini ni le nsin’wini.” Nakunene i tovoko dzrikulu ngopfu swinene ku hamba xiyenge xa ndangu lowu wa moya, lowu nga ni lizrandzru!

15. I yini lexi hi tiyisekisaka leswaku hi ta swi kota ku hlula swikazratu?

¹⁵ Hinkwezru hi langusana ni swikazratu. Kambe hi lani hi swi voniki hakone ka xidondzro lexi, a hi nge te txhuka hi lwisana ni swikazratu leswi wuswezru. Yehovha a fana ni papayi lwa nga ni lizrandzru. A vona hinkwaswu leswi hi langutanaka na swone. Minkama hinkwayu a kusuhi na hine nakone a tiyimisele ku yingela swikhongoto swezru ni ku hi pfuna. (Eza 43:2) Hi nga tiyiseka leswaku hi kota ku hlula xikazratu xini na xini hi leswi Yehovha a hi nyikaka hinkwaswu leswi hi swi vilelaka akuva hi tiyisela, swa ku fana ni xikhongoto, Bibele, swakuda swinyingi swa moya ni vamakwezru lava zrandzrekaka.

16. I yini leswi hi fanelaka ku swi yentxa akuva hi yamukela mpfunu wa Yehovha?

¹⁶ Hi tlangela ngopfu swinene hi kuva hi ni Xikwembu Nkulukumba lweyi a zron’wekaka hi mun’wana ni mun’wana wezru. Ina, ha mu tlangela ‘hikuva timbilu tezru ti titsrhavela ku yene’. (Ps 33:21) Hi nga kombisa ku tlangela kwezru ka Yehovha hi ku londzrovota hinkwaswu leswi a hi nyikaka swone akuva a hi pfuna. Na hine hi fanela ku hamba xiyenge xezru, leswi liki, hi tikazratela ku mu yingiseta ni ku yentxa leswi lulamiki a mahlweni kwake. Hi ndlela leyo, hi nga tiyiseka leswaku a ta hlayisa mun’wana ni mun’wana wezru hi lani ku nga helikiki!—1Pe 3:12.