Makwezru Winston, hi nga hi byela: U sungulise kuyini ku djula Xikwembu Nkulukumba?

A muti lowu ni nga kulela ka wone a wu nga khongeli. A hi ni swifuyo ni masimu a ntlhaveni lomu a hi tsrhama kone a Queensland, a Austrália. Leswi a hi tsrhama kule ni vhanu, lava a ni tolovela ku bula navu a ko va vhanu va le kaya ntsena. Loko ni li kusuhi ni ku pfala 12 wa malembe, ni sungule ku djula Xikwembu Nkulukumba. A ni hamba swikhongoto, ni mu kombela leswaku a ni yentxa ni tiva ntiyiso ha yene. Ni gamele ku suka ni ya tizra a Adelaide, a nyingitimu wa Austrália. Loko ni pfale 21 wa malembe, ni tive Pam na ni li ka maferiya a Sydney. Pam a ni bulele hi ntlawa wa wukhongoti bya manghiza ni ma-israyele, lowu liki manghiza ma pswaliwa hi vana va Israyele va tinxaka leti lahlekiki. Ntlawa lowu wu li tinxaka ta kone hi leta khume ta mfumu wa le n’walungwini leti yisiwiki wub’otxhweni ka dzana dzra wu-8 Mahlweni ka Nguva Yezru (M.N.Y). Kutani loko ni tlhelele a Adelaide, ni ye pfuxa mhaka leyi ni munghanu wanga wa ntizro lweyi a a sungule ku dondzra Bibele ni Timboni ta Yehovha. A ntsrhaku ka ku bula naye mawora ma nge mangani​—ngopfu-ngopfu hi tindondzro ta Timboni​—ni gungule leswaku xikhongoto lexi a ni xi yentxa na ne he ntsrongo a xo hlamuliwa. A ni li ku dondzreni ka ntiyiso mayelanu ni Mutumbuluxi wanga ni Mfumu wakwe! A ni kume ‘perola dzra lisima lolikulu’.​—Mt 13:45, 46.

Makwezru Pam, na wene u sungule ku djuletela perola ledzro na we he mumpswha. U dzri kumise kuyini?

A muti lowu ni nga kulela ka wone a wu khongela. A hi tsrhama ka xidoropana xa Coffs Harbour, Nova Gales do Sul. Vapapayi na vakokwana a va kholwa ka tindondzro ta ntlawa wa wukhongoti bya manghiza ni ma-israyele. Mine ni makwezru wa mufana, na mana ni vana va vamalume vanga, hi kule na hi tiva leswaku Xikwembu Nkulukumba a zrandzra ngopfu-ngopfu vatukulu va manghiza. Kambe mine a ni nga swi kholwisisi nakone a ni ni  ndlala ya moya. Loko ni pfale 14 wa malembe, ni fambe ni pfuxela makezreke ya ku hambana-hambana a mugangeni wezru, ku patsra ni dzra Ngilikana, Batixta ni dzra Divhentixta. Kambe a ni swi kotanga ku dlaya ndlala ya moya.

Ndangu wanga wu game wu zruzra wu ya a Sydney, laha ni nga tiva kone Winston, na a li ka maferiya. Hi laha a hlayiki ha kone, mabulu yezru ya timhaka ta wukhongoti ma gamele ku mu yentxa a dondzra ni Timboni. Ku sukela kolanu, loko a ni tsralela mapapela, a a ma tata hi tindzrimana! Ntiyiso wa djuleka: A ku sunguleni ka kone, ni kazratekile​—ni tlhela ni kwata—​hi mhaka leyo. Kambe ha katsrongo-tsrongo ni sungule ku swi twisisa leswaku a a li ntiyiso.

Hi 1962, ni zruzrele a Adelaide akuva ni va kusuhi na Winston. A a ni kombelele ndangu wa va ka Sloman, lava a va li Timboni, kuva va tsrhama na mine. A va li makwezru Thomas na Janice, lava nga sama va va vazrumiwa a Papua Nova Guiné. Va ni kombe malwandla lamakulu swinene. Phela a no va xin’hwanyatana xa 18 wa malembe ntsena, nakone va ni pfune ngopfu hi tlhelo dzra moya. Hi kone na mine ni nga sungula ku dondzra Zritu dzra Xikwembu Nkulukumba. A ni hlwelanga ku swi vona leswaku ni kume ntiyiso. Loko ni txhate na Winston, hi tekele ku nghena ka wutomi bya ku nyonxisa swinene bya ku tizrela Yehovha. Nambi leswi hi kumaniki ni swizralanganya, wutomi lebyo byi hi yentxe hi tlangela swinene ndjombo leyi hi viki nayu ya ku kuma perola dzra lisima.

Makwezru Winston, u ma vonise kuyini malembe ya ku sungula a nkameni lowu mi nga nghena a ntizrweni wa Yehovha?

Neti hi txhata, Yehovha a sungule ku hi pfulela ‘tinyangwa’ tinyingi ‘letikulu’ akuva hi yengetela ntizro wezru. (1Ko 16:9) Nyangwa ya ku sungula hi kombiwe hi Makwezru Jack Porter, lweyi a a djikelezela xibandlana xezru. (Swoswi hi tizra xikan’we ka Xihubyana xa Zrwavi dzra Australásia.) Yene ni nkatakwe, Roslyn, va hi kutxe ku nghenela wuphayona bya nkama hinkwawu—lebyi hi tizriki ka byone hi 5 wa malembe. Loko ni pfale 29 wa malembe, hi kombeliwe ku djikeleza a Swihlale swa Pacífico Sul leswi nga gama swi va hansi ka zrwavi dzra Fiji. Swihlale swa kone a ku li Samoa Americana, Samoa, Kiribati, Nauru, Niue, Tokelau, Tonga, Tuvalu na Vanuatu.

A masikwini lawo, vhanu lava a va tsrhama ka swihlale swa le kule swinene a va nga ti dumbi Timboni ta Yehovha, kutani swi djule kuva hi tlhazriha hi tlhela hi tivonela. (Mt 10:16) A mabandla a ma nge na swizro swinyingi, nakone man’wana a ma nga swi koti ku hi nyika ka ku yetlela kone. Kutani a hi famba hi djula ka ku yetlela kone ka vayaki va le mugangeni wolowo, lava minkama hinkwayu a va hi komba malwandla.

Makwezru Winston, ha swi tiva leswaku u wu zrandzra swinene ntizro wa wundzruluteli. Swi sukele kwini swoswoswo?

A nkameni lowo, vamakwezru va le xihlaleni xa Tonga a vo va ni swipapelana ni swibukwana swi nge swingani ntsena hi xitonga​—ku nga dzrin’we dzra tindzrimi ta Polinésia. A nsin’wini, a va tizrisa buku dzra xinghiza ledzri liki A Xihlayelamfuzri Lexi Yisaka Vutomini Lebyi Nga Helikiki. Xileswo, loko va li ka xikole xa vakulu xa mune wa mavhiki, vakulu vazrazru lava humaka kolanu, lava a va nga tivi xinghiza xa ku tlhasa mbangu, va pfumele ku ndzrulutela a buku ledzri dzri ya ka xitonga. Pam hi yene a nga dzri ba hi mutxhini, hi gama hi dzri zrumela a zrwavini dzra Estados Unidos akuva dzri gandlisiwa. Ntizro hinkwawu wu teke 8 wa tihweti. Nambi leswi wundzruluteli bya kone a byi tale hi swihoxo, buku ledzri dzri pfune vanyingi lava a va khanela xitonga ku dondzra ntiyiso. Mine na Pam a hi vandzruluteli, kambe mhaka leyo hi yone yi yentxekiki leswaku hi zrandzra ntizro lowu.

Makwezru Pam, u byi vonise kuyini wutomi bya le swihlaleni loko u byi fananisa ni bya le Austrália?

A byi hambane ngopfu swinene! A ku ni lomu a hi sindzriseka ku lwa ni wusuna, mumu wa ku patsra ni nyuku, makondlo, mavabyi ni ku pfumala swakuda minkama yin’wana. Kambe, loko dzri pela, a hi zrandzra ku vona lwandle na he gee ka xintsrhutana xezru lexi va-Samoa va liki i fale​—ku nga yindlu leyi fuleliwiki hi byanyi na yi nge na makhumbi. Loko n’weti wu te mpaa ni wusiku, a minkhokho a yi gwira hi ku xonga, nakone a n’weti a wu  phatima a matini. Ku vona mintxhumu ya ku hlamalisa ya ku fana ni leyo a swi hi susumetela ku yanakanya ha Yehovha ni ku mu tsrhindzrekelela hi xikhongoto, hi tsrhika ku pimisa hi swikazratu swezru hi pimisa hi makateko yezru.

A hi va zrandzra swinene vatsrongwana. A va hlekiselana swinene nakone loko va vona hine va xikhumba xa ku basa a va tala hi ku hlamala. Siku dzrin’wana a hi ye pfuxela xihlale xa Niue. Ko suka xifanyana xin’we xi ta ta swoswela mavoko ya Winston lama nga tala hi voya, xi ku: “He wene! Mavoya ya ku ma nyonxisa.” Swa voneka leswaku a xi ngi ngi sama xi vona mhunu wa voya mavokweni nakone, ka xone, a swo fana ni loko ku li mavoya ya huku!

A swi hi tlhava timbilu ku vona vhanu va ku tala va hanya wusiwaneni. Lomu a va tsrhama kone a ku xongile kambe a ku nge na swipiritana nakone mati ya ku nwa a ma kala. Kambe, a wu nge na ku va kuma vamakwezru na va vavisekile. A va tolovelile ku hanyisa xileswiyana. A va tinyonxela hi leswi a va ni mindangu yavu, va tlhela va va ni mbangu wa ku tlhangana ka wone ni ku kota ku dzrumisa Yehovha. Xikombiso xavu xi hi pfune ku vona leswaku hi swini leswi nga swa lisima a wuton’wini ni ku kala hi nga tiphaseteli hi mintxhumu.

Makwezru Pam, minkama yin’wana a wu boheka ku ya kelela mati ni ku sweka hi tindlela ta timpswha ka wene hi ku helela. U swi kotise kuyini leswo?

Ni khensa papayi hi ku ni dondzrisa ku hanya. A ni dondzrise ku yentxa mintxhumu yinyingi, ya ku fana ni ku tlhavika ndzrilo hi tihunyi ni ku sweka ha tone ni ku zrendzreveta hi mintxhumu ya ku kala yi nga nyawuli. Siku dzrimbeni loko hi yendzrele xihlale xa Kiribati, hi tsrhame ka xiyindlwana xa ku hambiwa hi misengele, xi fuleliwa hi byanyi, na xi nga semendeliwanga a hansi. Loko ni djula ku sweka, a ni kelanyana hansi ni tlhavika ndzrilo hi swikhambati swa makhokho. Loko ni djula mati, a ni ya fola ni vamamana va le mugangeni ka xihlovo xa kukazri. Akuva va kelela mati, vamamana lavo a va tizrisa nhonga ya ku djula ku tlhasa ka 2 wa mametro na yi tsrimbiwe pindzra a ponteni ingaku i ndzrovo. Kambe a matsrhan’wini ya ku tsrimba ndzrovo, a va tsrimba xikelelo. Loko ku tlhasa nkama wakwe, mun’wana ni mu’wana a a teka xikelelo a ku xi dlomu! Mbhayimbhayi a xi koka xi huma. A xikelelo a xi ya wa hi nomu wa kone xi tala hi mati. Loko ni swi vona, ni tibyele leswaku swi nabyalile leswo. Kambe loko ku tlhase nkama wanga, ni wupfe ni ku txukumetela xikelelo kambe kwii?! A xikelelo a xo ya wa hi zreve xi mbekuka! Vamamana hinkwavu va ku hiyaa! Kambe a ntsrhaku ka loko va ma thomile, mun’we wa vone a ni twela wusiwana, a ni pfuna. Vhanu lava minkama hinkwayu a va pfunana, va twelana wumbilu.

Hi wubidzri byenu a mi wu zrandzra ntizro wenu wa le swihlaleni. Mi hi byela yini hi mintxhumu leyi mi ngeke na ku yi dzrivala?

Winston: Swi teke nkamanyana akuva hi yi tiva ku yampswa mikhuva yin’wana. Hi xikombiso, loko vamakwezru va hi phamela swakuda, a va tala ku hi nyika swakuda hinkwaswu leswi a va li naswu. A ku sunguleni, a hi nga swi tivi leswaku a hi fanela ku va siyela. Kutani hinkwaswu leswi a va hi nyika, a ho da swi ku jii! Vhela, loko hi swi tivile leswaku a ku yentxeka yini, hi va siyelile swakuda. Nambi leswi a hi va hoxela, vamakwezru a va hi lehisela mbilu. A va tsrhama na va hi yimelile loko ku khaluta 6 wa tihweti loko hi va djikelezela. A minkameni leyo vamakwezru lava a va nga tivani ni Timboni tin’wana handle ka hine ntsena.

Loko hi pfuxela vamakwezru vhanu va le swihlaleni na vone va txhumayelekile. Ku tala ka vayaki a va pimisa leswaku wukhongoti bya vamakwezru a byi li ntxhumu lowu ve ke tikhandhela. Kutani loko va vona mutizreli ni nsati wakwe va zrumeliwiki hi le matikweni ku ta pfuxela vamakwezru, vayaki va pfuleke mahlo va tlhela va hlamala.

Pam: Wun’we wa mintxhumu leyi hi ngeke na ku yi dzrivala wu yentxeke a Kiribati, laha a ku ni bandla dzri nga ni vamakwezru va nga tatiki ni xiyandla. Makwezru Itinikai Matera, lweyi a a li yene ntsena nkulu wa bandla, a yentxe hinkwaswu akuva a hi hlayisa. Siku dzrin’wana a buye ni ntsrhava lowu nga ni tandzra dzra dzrin’we ntse, a ku: “I dzrenu.” A nkameni lowo tandzra a dzri li mafandjara. Timbilu tezru ti khumbeke swinene hi xihanano lexo xa xitsrongo kambe xi kombisaka malwandla.

 Makwezru Pam, a ntsrhaku ka malembenyana u honekeliwe hi khuzri. I yini lexi ku pfuniki ku tiyisela?

Ni kume khuzri hi 1973, hi nkama lowu a hi li a Pacífico Sul. Hi vone swi yampswa ku muka a Austrália. Kambe, ntsrhaku ka mune wa tihweti xibebetana xezru xi luzile. Ni twe ku vavisa lokukulu. Winston na yene a vaviseke ngopfu swinene hi ku luza bebeti wakwe. Hi ku famba ka nkama mbilu yi ye zrula, kambe a yi swi kotanga ku hola hi ku helela ku ya tlhasa siku ledzri hi nga yamukela Xihondzro xa 15 ka Abrili wa 2009. Ka “Swivutiso Swa Vahlayi” a ku ni xivutiso lexi: “Xana loko xibebetana xi fela ndzreni ka khuzri dzra mamana wa xone, xa ha ni dumbo dzra ku pfuxiwa ke?” Nhloko-mhaka leyi yi hi txhavelele hi mazritu ya leswaku a mhaka leyo yi le mavokweni ya Yehovha, lweyi minkama hinkwayu a yentxaka leswa ku lulama. A ta hi holisela swilondzra swa ku tala leswi wutomi bya misava leyi ya ku biha byi hi vangeliki swone loko a ta zruma N’wanakwe ku ‘helisa mintizro ya Diyavulosi’. (1Yh 3:8) Nhloko-mhaka leyo yi tlhele yi hi pfuna ku twisisa leswaku mpela hi ni “perola” dzra lisima swanga vhanu va Yehovha! A hi ta ku yini loko a hi nge na dumbo dzra Mfumu?

A ntsrhaku ka ku luza xibebana xezru, hi tlhele hi sungulisa ntizro wa nkama hinkwawu. Hi tizre tihwetinyana a Betele dzra Austrália hi gama hi sungulisa ntizro wa ku djikeleza. Hi 1981, a ntsrhaku ka ku tizra mune wa malembe a migangeni ya handle ka madoropa ya Nova Gales do Sul ni le Sydney, hi zrambiwe ku ya tizrela a zrwavini dzra le Austrália, hi laha a dzri tiviwa ha kone, nakone ni swoswi ha ha li kone.

Makwezru Winston, xana mfambu waku le Swihlaleni swa Pacífico Sul swi ku pfunile ka ntizro waku swanga xizro xa Xihubyana xa Zrwavi dzra Australásia?

Ina, hi tindlela ta ku siyana-siyana. Ku sungula, a Austrália a kombeliwe ku hlayisa Swihlale swa Samoa Americana na Samoa. A ntsrhaku, a zrwavi dzra Nova Zelândia dzri patsriwe ni dzra Austrália. Swoswi, a nsimu ya zrwavi dzra Australásia yi patsra Austrália, Samoa Americana na Samoa, Ilhas Cook, Nova Zelândia, Niue, Timor-Leste, Tokelau na Tonga. Ku tala ka matiko lawa ni ve ni ndjombo ya ku ma pfuxela swanga muyimeli wa zrwavi. Ku va ni tizrile ni vamakwezru lava vaxinuna ni vaxisati lava ku dumbeka, lava hanyaka a swihlaleni leswi, swi ni pfuna ngopfu swoswi ni va tizrelaka na ni li a zrwavini.

Hi wugamu a ni nyonxela ku hlaya leswaku mine na Pam i khale hi swi tiva leswaku, ku fana ni leswi swi nga hi yentxekela, a hi vakulu va vhanu ntsena lava djulaka Xikwembu Nkulukumba. Na vone vampswha va djuletela ‘perola dzra lisima lolikulu’​—nambi loko maxaka man’wana ma nge na mhaka. (2Th 5:2, 3; 2Mk 34:1-3) Nakunene, Yehovha i Xikwembu lexi nga ni lizrandzru, lexi djulaka leswaku hinkwavu, lavampswha ni lavakulu, va kuma wutomi!

Loko mine na Pam hi sungule ku djula Xikwembu Nkulukumba ka malembe lama tlulaka 50 lama khalutiki, a hi nga swi yanakanyi ni ku swi yanakanya leswaku ku djuletela koloko ku nga hi yisa kwini. Handle ka ku ganaganeka, a ntiyiso wa Mfumu i perola dzra lisima ledzri ngeke na ku hlayiwa! Hi tibekisele ku yima hi ku nde hi lwela ku hlayisa perola ledzri dzra lisima dzrikulu!