1-2. a) Xana Sathana a va kanganyisa hi tindlela tini vhanu? b) Hi ta bula hi yini ka nhloko-mhaka leyi?

SATHANA, “tatana wa ku hemba”, a kanganyisa vhanu ku sukela ku sunguleni ka wutomi bya vhanu. (Yh 8:44) Man’we ya madzrimi lawa a kanganyisaka vhanu ha wone ma patsra tindondzro ta madzrimi hi lifu ni leswaku ku ni wutomi ntsrhaku ka lifu. Tindondzro leto ti yentxa leswaku ku va ni swihena ni swiyilayila swinyingi. Hi kola ka leswo, van’we ka vamakwezru vaxinuna ni vaxisati va sindzriseka ku “lwela ku pfumela” kwavu loko xaka dzravu kumbe muyakelani a mugangeni a fa.​—Yd 3.

² Loko a li leswaku u tlhangana ni ndzringo wolowo, i yini lexi taka ku pfuna ku tsrhama na u dumbekile swanga heswi u tivaka leswi Bibele dzri swi dondzrisaka mayelanu ni lifu? (Ef 6:11) I yini lexi u nga xi yentxaka akuva u tiyisa vakriste-kuloni lava sindzrisiwaka ku nghenela ka swihena leswi nga mu nyonxisikiki Yehovha? Nhloko-mhaka leyi yi ta khanela hi nkongomiso lowu Yehovha a hi nyikiki wone akuva a hi pfuna. Xa ku sungula, a hi kambisiseni leswi Bibele dzri swi hlayaka mayelanu ni lifu.

3. I yini leswi vangiwiki hi madzrimi ya ku sungula?

³ Xikwembu Nkulukumba a a nga swi djuli leswaku vhanu va fa. Kambe leswaku va kota ku tama va hanya, Adamu na Evha a va fanela ku yingiseta Yehovha, lweyi a a va nyike nawu wa ku nabyala loko a te: ‘Kambe loko wu muzri wa ku tiva leswa hombe ni leswa ku biha, wone u nga ve da, hikusa siku ledzri u taka da, u ta fa.’ (Gn 2:16, 17) Ntsrhakunyana, Sathana a pfuxe mpfilumpfilu. Hi ku tizrisa nyoka a byele Evha a ku: ‘N’wi nga fe nikutsrongo.’ Lexi vavisaka, Evha a kholwe ka madzrimi lawo kutani  a da handzru. Ntsrhakunyana, nuna wakwe na yene a da. (Gn 3:4, 6) Hi ndlela leyi, xidoho ni lifu swi nhingenisa xiswoswo.​—Ro 5:12.

4-5. Xana Sathana a tama a kanganyisa vhanu hi ndlela yini?

⁴ Adamu na Evha va file, hi laha Yehovha a a hlaye ha kone leswaku a va ta fa. Kambe Sathana a nga tsrhikanga ku hangalasa madzrimi mayelanu ni lifu. Hi ku famba ka nkama, a sungule ku hangalasa madzrimi man’wana. Man’we ya madzrimi lawa i ndondzro ya leswaku ku ni lexi salaka xi hanya loko mhunu a file, kumbexana a xivandleni xa mimoya. Madzrimi lawa ma kanganyise vhanu va ntsrandzra-vahlayi ku ta tlhasa namunhla.​—1Tm 4:1.

⁵ Ha yini vhanu va ku tala va kanganyiseka? Sathana a londzrovota leswi hi ntumbuluku hi titwisaka xiswone hi lifu. Leswi hi vumbiwiki akuva hi hanya hi la ku nga helikiki, a hi swi djuli ku fa. (Ekl 3:11) Lifu i nala wezru.​—1Ko 15:26.

6-7. a) Xana Sathana a swi kotile ku fihla xihlayelamfuzri mayelanu ni vafi? Tlhamuxela. b) Xana a xihlayelamfuzri xa Bibele xi hi pfunisa kuyini kuva hi nga va txhavi vafi?

⁶ Nambi leswi Sathana a zamaka hi tindlela hinkwatu, xihlayelamfuzri mayelanu ni lifu a xi fihlekanga. Ku hlaya ntiyiso, vhanu vo ya va yengeseleka lava tivaka va tlhela va tivisa van’wana hi leswi Bibele dzri swi dondzrisaka mayelanu ni xiyimu xa vafi ni dumbo ledzri nga kone hi vafi. (Ekl 9:5, 10; Min 24:15) Ku tiva leswo swa hi txhavelela nakone swi hi susa ntxhavu ni ku ganaganeka hi xiyimu xa vafi. Hi xikombiso, a hi va txhavi vafi, nakone a hi txhavi leswaku va ta humeleliwa hi ntxhumu wa ku biha. Ha swi tiva leswaku a va ha hanyi nakone a va nge hi yentxi ntxhumu wa ku biha. Swi fana ni loko va li wuzrongweni lebyikulu. (Yh 11:11-14) Handle ka leswo, ha swi tiva leswaku vafi a va wu voni nkama na wu famba. Xileswo, hi nkama wa ku pfuka ka vafi, nambi lava va fiki ka madzana ya malembe lama khalutiki va ta vona leswaku nkama wu kahlule swinene, ku fana ni ku byavuta ka tihlo.

⁷ Xana a wu pfumelelani na swone leswaku a xihlayelamfuzri mayelanu ni xiyimu xa vafi xa khanya, xa nabyala nakone xa twisiseka? Xi hambane swinene ni madzrimi ya Sathana! Handle ka ku kanganyisa vhanu ntsena, madzrimi lawa ma zruka Muvumbi wezru. Akuva hi twisisa ha hombe ku honetela loku Sathana a ku vangiki, a hi buleni hi swivutiso leswi: Xana madzrimi ya Sathana ma zruka Yehovha hi ndlela yini? Xana ma yentxa vhanu va pimisa leswaku a swi vileleki ku kholwa ka xitizrulo xa Kriste hi ndlela yini? Xana ma yengesela ku vaviseka ni ku xaniseka ka vhanu hi ndlela yini?

8. Hi laha swi kombisiwiki ha kone ka Yeremiya 19:5, xana madzrimi ya Sathana ma zruka Yehovha hi ndlela yini?

⁸ Madzrimi ya Sathana mayelanu ni vafi ma zruka Yehovha. Madzrimi lawa ma patsra tindondzro ta leswaku vafi va xanisiwa hi ku pswha a ndzrilweni. Madzrimi lawa ma zruka Xikwembu Nkulukumba! Hi ndlela yini? Phela, ma yentxa leswaku Xikwembu Nkulukumba wa lizrandzru a fana na Diyavulosi. (1Yh 4:8) Xana u titwisa kuyini hi ku tiva leswo? Xa lisima ngopfu, xana Yehovha a titwisa kuyini hi leswo? Phela, a venga tihanyi hinkwatu.​—Dondzra Yeremiya 19:5.

9. Xana madzrimi ya Sathana ma yentxa vhanu va pimisa leswaku a swi vileleki ku kholwa ka xitizrulo xa Kriste lexi kombisiwiki ka Yohan 3:16 na 15:13 hi ndlela yini?

⁹ Madzrimi ya Sathana mayelanu ni vafi ma yentxa vhanu va pimisa leswaku a swi vileleki ku kholwa ka xitizrulo xa Kriste. (Mt 20:28) Madzrimi man’wana ya Sathana i ya leswaku vhanu va ni ntxhumu lowu nga fikiki. Loko swoswo a ku li ntiyiso, vhanu hinkwavu a va ta hanya hi la ku nga helikiki. Nakone a swi nga vileleki leswaku Kriste a nyikela wutomi byakwe swanga xitizrulo ka hine akuva hi kuma wutomi lebyi nga helikiki. Kambe, dzrimuka leswaku xitizrulo xa Kriste i xikombiso lexikulu xa lizrandzru ledzri samiki dzri kombiwa vhanu. (Dondzra Yohan 3:16; 15:13.) Yanakanya leswi Yehovha ni N’wanakwe va titwisaka xiswone hi tindondzro leti yentxaka leswaku nyiko leyo ya lisima yi voneliwa hansi!

10. Xana madzrimi ya Sathana mayelanu ni vafi ma yengesela ku vaviseka ni ku xaniseka ka vhanu hi ndlela yini?

¹⁰ Madzrimi ya Sathana ma yengesela ku vaviseka ni ku xaniseka ka vhanu. Vapswele lava dzrilelaka n’wanavu lweyi a fiki va nga ha byeliwa leswaku Xikwembu Nkulukumba a mu tekile leswaku a ya va ntsrumi a tilweni. Xana madzrimi lawo ya wusathana mo pumba kumbe mo yengesela ku vaviseka kwavu? Ndondzro ya madzrimi ya ku ya pswha tilweni yi tizriseliwe ku yimelela ku xanisiwa ka vhanu, ni ku hisiwa ka lava a va yala tindondzro ta kezreke. Hi ku ya hi buku ledzri khanelaka hi ku xanisiwa ka vhanu a Espanha, van’we ka lava a va yentxa tihanyi leti a va kholwa leswaku a vo komba vaduki leswi “a swi ta va swone ku pswha tilweni hi la ku nga helekiki”. Xileswo, vaduki a vo nyikiwa mukhandlu wa ku tisola na va nge si na fa akuva va nga yi ku pswheni a tilweni. Ka matiko ya ku siyana-siyana, vhanu va tivona na va sindzriseka ku yentxela vafi timhamba, leswaku va va dzrimuka kumbe leswaku va va kombela tindjombo. Van’wana va phahla vafi akuva va nge ti va xanisa hi ndlela ya kukazri. Lexi tisaka gome hi leswaku a matsrhan’wini ya ku txhavelela vhanu, tindondzro leti seketeliwiki ka madzrimi ya Sathana ti va yentxa va hlatiyela nambi ku txhava na swi nga vileleki.

11. Xana maxaka kumbe vanghanu lava pimisaka leswaku vo hi pfuna va nga hi sindzrisa ku yentxa leswi lwisanaka ni Zritu dzra Nkulukumba hi ndlela yini?

¹¹ Lizrandzru dzrezru hi Yehovha ni hi Zritu dzrakwe hi dzrone dzri hi nyikaka ntamu wa ku yingiseta Yehovha, nambi loko maxaka kumbe vanghanu lava pimisika leswaku vo hi pfuna va hi sindzrisa ku nghenela ka swihena leswi fambisanaka ni vafi, leswi lwisanaka ni Matsralwa. Vone va nga ha dzringisa ku hi danisa, kumbexana hi ku hlaya leswaku hine a hi nga mu zrandzri kumbe a hi mu hloniphi mhunu lwa fiki. Kumbe va nga ha hlaya leswaku leswi hi yalaka ku nghenela swihena swavu, hi ta yentxa leswaku lweyi a fiki a hlupha lava hanyaka hi ndlela ya kukazri. I yini lexi hi nga xi yentxaka akuva hi lwela xihlayelamfuzri xa Bibele? Vona leswi u nga yi tizrisaka xiswone minsinya ya milawu ya Bibele leyi landzrelaka.

12. Hi swini swihena leswi fambisanaka ni vafi leswi hakunene swi lwisanaka ni Matsralwa?

¹² Tiyimisele ku ‘tsravukana’ ni tindondzro ni  swihena leswi lwisanaka ni Matsralwa. (2Ko 6:17) Vhanu vanyingi lava tsrhamaka a Caribe va kholwa leswaku ntsrhaku ka loko mhunu a file, “xipoko” xakwe xi nga ha famba-famba xi khatisa hinkwavu lava mu hluphiki loko a ha hanya. Buku dzrin’wana dzri li “xipoko” lexi xi nga ha “tisela swikazratu vhanu hinkwavu va le mugangeni”. A África, swi tolovelekile leswaku ku funeketiwa swivonivoni a kaya ka mufi ni kuva mifoto ya mufi yi ndzrulutiwa yi lavisa khumbini. Hi xivangelo muni? Van’we va li va yentxela kuva lweyi a fiki a nga tivoni! Swanga malandzra ya Yehovha, nakunene a hi kholwi mintsiko nakone a hi ngheneleli ka mikhuva hinkwayu leyi hlohlotelaka madzrimi ya Sathana!​—1Ko 10:21, 22.

13. Loko u ni ku ganagana mayelanu ni mikhuva ya kukazri, i yini lexi u nga xi yentxaka, hi ku ya hi Yakob 1:5?

¹³ Loko u ni ku ganaganeka mayelanu ni mikhuva kumbe swihena swa kukazri, khongota ka Yehovha hi lipfumelo u kombela leswaku a ku nyika wutlhazri byakwe. (Dondzra Yakob 1:5.) Ntsrhaku ka leswo setxhisisa ka mabuku yezru. Loko swi vileleka, kombela mpfunu ka vakulu va bandla. Vone a va nge ti ku tekela xiboho, kambe va ta ku pfuna ku kuma minsinya ya milawu ya Bibele ya ku fana ni leyi nga ka nhloko-mhaka leyi. Loko u yentxa leswi, u ta va na u dondzrisa ‘vongwe’ kumbe wuswikoti byaku bya ku yehleketa akuva u kota ku hambanisa swa ku xonga ni swa ku biha.​—Hb 5:14, Testamente Ledrimpswha.

14. Hi nga yentxa yini akuva hi nga khunguvanyisi vhanu vambeni?

¹⁴ ‘Yentxani hinkwaswu hi ku twalisa Xikwembu Nkulukumba. N’wi nga khunguvanyiseni [mhunu].’ (1Ko 10:31, 32) Loko hi hlawula ku hlengela kumbe im-him ka mukhuva kumbe xihena xa kukazri, hi fanela ku yanakanya hi leswi xiboho xezru xi taka dzri khumbisa xiswone lipfalu dzra vambeni, ngopfu-ngopfu dzra vakriste-kulozri. A hi djuli ku khunguvanyisa mhunu ni siku ni dzrin’we. (Mr 9:42) Handle ka leswo, a hi swi djuli ku khunguvanyisa lava nga liki vapfumeli na swi nga vileleki. Lizrandzru dzri ta hi susumetela ku khanela na vone hi ndlela ya xitxhavu, leyi twalisaka Yehovha. Nakunene a hi nge ti holovisana ni vhanu kumbe ku poyila swihena swavu. Dzrimuka, lizrandzru dzri ni ntamu swinene! Loko hi va komba lizrandzru hi ndlela ya ku va yanakanyela ni hi ya xitxhavu, hi nga ha kota ku zrulisa timbilu ta lava va hi kanetaka.

15-16. a) Ha yini swi li wutlhazri ku hlaya leswi u pfumelaka ka swone? Nyikela xikombiso. b) Hi nga ma tizrisa hi ndlela yini mazritu ya Pawulo lama nga ka Ba-le-Roma 1:16?

¹⁵ Titivise swanga mun’we wa Timboni ta Yehovha a mugangeni waku. (Eza 43:10) Swi  nga ha yentxeka swi ku nabyalela ku langusana ni swiyimu swa ku bindzra loko maxaka kumbe vayakelani vaku va tiva leswaku u gandzrela Yehovha Xikwembu Nkulukumba. Francisco, lweyi a tsrhamaka a Moçambique, a tsrale leswi: “Loko mine ni nkatanga Carolina hi dondzre xihlayelamfuzri, hi byele maxaka yezru leswaku a hi nge he ti txhuka hi gandzrela vafi. Xiboho xezru xi dzringiwe loko makwavu waxisati lwenkulu wa Carolina a fa. A mugangeni wezru vhanu va ni mukhuva wa ku hlampswa mufi hi ku tizrisa mizri. Ntsrhaku, xaka dzra le kusuhi swinene dzri fanela ku ya yetlela hi masiku mazrazru ka mbangu lowu mati lama hlampswiki mufi ma halatiwiki ka wone. Mukhuva lowu wu yentxeliwa ku zrulisa moya wa lwe a fiki. Maxaka ya Carolina a ma yimela leswaku na yene a ya yetlela ka mbangu wolowo.”

¹⁶ Francisco na Carolina va yentxe yini? Francisco a li: “Swanga heswi hi mu zrandzraka Yehovha hi tlhela hi djula ku mu nyonxisa, a hi pfumelanga ku hlengela ka xihena lexo. Maxaka ya Carolina ma hlundzruke ngopfu. Ma hlaye leswaku a hi nga mu hloniphi mufi. Ma tlhele ma ku a ma nge he hi pfuxeli nambi ku hi pfuna. Leswi kutani a hi va tlhamuxelile leswi hi swi pfumelaka, a swi djulanga kuva hi kombisana na vone na va ha hlundzrukile. Maxaka man’wana ma hi yimelelile, ma hlaya leswaku a hi va byele hi khale leswi hi swi pfumelaka. Hi ku famba ka nkama, xiviti xa maxaka ya Carolina xi b’ohlile, xileswo hi pfulekele hi mukhandlu wa ku kondletela ku zrula. Kunene, van’we ka vone va buya la kaya akuva va ta kombela mabuku yezru ya nhlengeletanu.” A hi fanelanga ku va ni tingana hi leswi hi yimelelaka xihlayelamfuzri mayelanu ni lifu.​—Dondzra Ba-le-Roma 1:16.

17. I yini leswi nga hi pfunaka ku va nakulobye ka vakriste lava nga ku dzrileni?

¹⁷ Loko mukriste-kulozri a feliwa hi muzrandzriwa wakwe, hi fanela ku tikazratela ku va ‘nakulobye. . .makwavu a makhombyeni’. (Pr 17:17) Xana hi nga tiyimisela ku va “nakulobye” hi ndlela yini, ngopfu-ngopfu loko makwezru wa kukazri lwa nga ku vavisekeni a li hansi ka ku sindzrisiwa leswaku a hlengela ka swihena leswi ngeke Matsralweni? Vona minsinya yibidzri ya milawu leyi nga hi pfunaka ku txhavelela lwa dzrilaka.

18. I yini lexi dzrilisiki Yesu, nakone hi nga dondzra yini ka swoswo?

 ¹⁸ ‘N’wi dzrila kun’we ni lava dzrilaka.’ (Ro 12:15) Swi nga ha hi kazratela ku tiva xa ku xi hlaya ka mhunu lweyi a hlomulekiki mbilu. Minkama yin’wana loko hi nge na xa ku xi hlaya swa yampswa ku dzrila kunene. Loko ku fe Lazaru, munghanu wa Yesu, Mariya, Marta ni van’wana va dzrilile hi kola ka leswo. Ntsrhaku ka mune wa masiku, loko Yesu a tlhasile, na yene a ‘dzrilile’, nambi leswi a a swi tiva leswaku a a ta pfuxa Lazaru. (Yh 11:17, 33-35) Ku dzrila ka Yesu ku kombise leswi Yehovha a a titwisa xiswone. Hi tlhelo dzrin’wana, ku dzrila koloko ku kombise leswaku Yesu a a va zrandzra. Leswo swi tiyise Marta na Mariya. Hi ndlela leyi fanaka, loko vamakwezru va vona lizrandzru ni ku zron’weka kwezru, va vhela va swi vona leswaku a va wuswavu kambe va tsrandzreliwe hi vanghanu lava va va zrandzraka.

19. Loko hi li kazri hi txhavelela makwezru lwa tlhavekiki, xana hi nga yi tizrisa hi ndlela yini Eklesiasta 3:7?

¹⁹ ‘A nkama wu kone wa ku miyela, wu kone nkama wa ku vulavula.’ (Ekl 3:7) Ndlela yin’wana ya ku txhavelela makwezru lwa tlhavekiki i ku va muyingiseti lwenene. Tsrhika makwenu a ku txhululela swa le mbilwini, nakone u nga khunguvanyeki hi mazritu yakwe ya ku mphunta kumbe lama nga twalikiki ha hombe. (Yb 6:2, 3) Swi nga ha yentxeka miyanakanyu yakwe yi kazratekile hi kola ka ku kamiwa hi maxaka. Loko xiyimu xi tsrhamise xileswo, khongota na yene u kombela ka ‘Muyingeli wa swikhongoto’ akuva a mu tiyisa ni ku mu tlhavukanyisa miyanakanyu. (Ps 65:2) Loko xiyimu xi pfumela, dondzra Bibele na yene kumbe nhloko-mhaka ya kukazri leyi nga mabukwini yezru ya ku fana ni leswi yentxekiki ka wutomi bya vambeni leswi nga mu kutxaka.

20. Hi ta bula hi yini ka nhloko-mhaka leyi landzrelaka?

²⁰ Vona ndjombo leyi hi nga nayu ya ku tiva xihlayelamfuzri mayelanu ni lava fiki xikan’we ni dumbo dzra ku xonga ledzri va nga nadzru! (Yh 5:28, 29) Xileswo, hi mazritu ni hi swiyentxo a hi yeni mahlweni hi seketela xihlayelamfuzri xa Bibele hi xixixi hi tlhela hi bula ha xone ni van’wana ka mikhandlu hinkwayu leyinene. Nhloko-mhaka leyi landzrelaka yi ta khanela hi ndlela yin’wana leyi Sathana a dzringisaka ku sivela vhanu ku tiva xihlayelamfuzri ha yone, ku nga wungoma. Hi ta vona leswaku ha yini ku djuleka hi tingawula mikhuva ni swihungatiso leswi fambisanaka ni ntlhamu lowo wa wudemona.