Ku funga kumbe ku hlambanya i ku tiyisekisa xidumbiso xa kukazri lexi mhunu a xi yentxaka, nakone minkama yimbeni mhunu a nga ha tizrisa Xikwembu Nkulukumba swa nga mboni ya leswaku a ta xi hetisisa xidumbiso lexo. Mhunu a nga ha yentxa hi ku xi hlaya kumbe ku xi tsrala.

Vambeni va hlaya leswaku swi hoxile ku funga hikusa Yesu a te: “Mi nga txhuki mi funga . . . A ‘Ina’ wenu a a ve ina, a ‘Im-him’ wenu a a ve im-him, hikusa leswi tlulaka leswo swi huma ka Diyavulosi.” (Mt 5:33-37) I ntiyiso leswaku Yesu a a swi tiva leswaku Nawu wa Moxe a wu va pfumelela kuva vhanu va funga ka swiyimu swa kukazri ni leswaku malandzra mambeni ya ku dumbeka ya Yehovha ma swi yentxile leswo. (Gn 14:22, 23; Ex 22:10, 11) Nakone a a swi tiva leswaku nambi Yehovha a hambile swihlambanyu. (Hb 6:13-17) Kutani Yesu a a nga hlayi swone leswaku mhunu a nga fanelanga a funga. Kambe a a hlaya leswaku a hi swinene kuva mhunu a funga ka xiyimu xin’wana ni xin’wana. Minkama hinkwayu hi fanela ku hetisisa leswi hi swi dumbisaka, hikuva hi leswi Yehovha a djulaka kuva hi yentxa swone.

Kutani u ta yentxa yini loko va ku kombela kuva u hlambanya? Ku sungula u fanela ku tiyiseka leswaku u ta swi kota ku swi hetisisa. Loko u nga tiyiseki u nga fungi. A Bibele dzri li: ‘Swa yampswa ku kala u nga fungi, ku tlula ku funga kutani u nga hakeli.’ (Ekl 5:5, BIBELE DZRA KU XWENGA) Ntsrhaku ka leswo, kambisisa minsinya ya milawu ya Bibele leyi vulavulaka hi mhaka leyo. Kutani u teka swiboho hi ku ya hi lipfalu dzraku ledzri dondzrisiwiki. Kambe he yini yin’we ya minsinya ya milawu ya Bibele leyi nga ku pfunaka?

Swihlambanyu swin’wana swi fambisana ni ku zrandzra ka Xikwembu Nkulukumba. Hi xikombiso, Timboni ta Yehovha ti hamba xidumbiso loko ti txhata. Xidumbiso lexo i xihlambanyu. Mahlweni ka Xikwembu Nkulukumba ni ka vazrambiwa, vatekani va dumbisana “ku zrandzrana, ku hlayisana, ni ku kombana xitxhavu nkama hinkwawu lowu va ta ka hanya xikan’we la misaveni”. (Swi nga yentxeka vatekani van’wana va nga hlayi mazritu lawa loko va txhata.) Nambi tanu va hamba xihlambanyu mahlweni ka Xikwembu Nkulukumba, kutani va ndzruluka nuna ni nsati lava fanelaka ku hanya xikan’we wutomi hinkwabyu. (Gn 2:24; 1Ko 7:39) A swihlambanyu leswo swa mutxhatu swi fambisana ni ku zrandzra ka Xikwembu Nkulukumba.

Swihlambanyu swimbeni a swi fambisani ni ku zrandzra ka Xikwembu Nkulukumba. Mukriste wa ntiyiso a nge hambi xihlambanyu xa ku ya yimpini akuva a seketela tiko dzrake kumbe a hlambanya ku tsrhika ku tizrela Xikwembu Nkulukumba. Ku yentxa leswo a swi fambisani ni milawu ya Xikwembu Nkulukumba. Leswi vakriste va nge ke va misava, a va ngheneli tiyimpi kumbe ku tipatsra  ka timpfilumpfilu ta misava.—Yh 15:19; Eza 2:4; Yk 1:27.

Swihlambanyu swin’wana swi ya hi lipfalu dzra mhunu. Minkama yimbeni na hi nga si hlambanya hi fanela ku yanakanya hi mazritu ya Yesu loko ate: ‘Tlheliselani-ke swa Khezar ku Khezar ni swa Xikwembu Nkulukumba ku Xikwembu Nkulukumba.’ —Lk 20:25.

A hi nge mukriste a djula ku xava mfanelo ya ku va n’wana wa tiko ledzri a kalaka a nga pswaliwanga ka dzrone kumbe ku hambisa pasaporte, kambe ku hlayiwa leswaku akuva leswo swi koteka a fanela ku hamba xihlambanyu xa kukazri. Loko xihlambanyu lexo xi lwisana ni milawu ya Xikwembu Nkulukumba, lipfalu dzra mukriste ledzri dondzrisiwiki hi Bibele a dzri nge ti mu pfumelela ku yentxa leswo. Kambe swi nga yentxeka wuhosi byi txintxa mazritu ya xihlambanyu akuva ma fambisana ni leswi lipfalu dzrake dzri mu pfumelelaka swone.

Akuva wuhosi byi txintxa mazritu ya xihlambanyu akuva ma fambelana ni lipfalu dzraku swi yelana ni nsinya wa nawu lowu kumekaka ka Ba-le-Roma 13:1, leyi liki: ‘A mun’wana ni mun’wana a a yingisete vuhosi lebyi nga kone.’ Hi ndlela leyo, mukriste a nga ha vona swi fanelile kuva a hamba xihlambanyu lexi fambisanaka ni leswi Xikwembu Nkulukumba a liki hi fanela ku swi yentxa.

Hi ndlela leyi fanaka i swa lisima ku tizrisa lipfalu loko hi kombeliwa ku hamba xihlambanyu hi ku tizrisa ntxhumu wa kukazri kumbe ku yentxa swa kukazri swa ku fana ni ku tlakula voko. Hi xikombiso a Varoma va khale ni Vasita a va funga hi matlhazri yavu na va vitana mintamu ya xikwembu xa tiyimpi swanga xitiyisekiso xa leswaku a va vulavula ntiyiso. Kasi Vagriki a va tlakula voko dzri komba tilweni loko va funga na va pfumela leswaku ku ni xivumbiwa xa kukazri xa le matilweni lexi vonaka ni ku twa leswi yentxiwaka la misaveni. Nakone a va ta tihlamulela ka xone.

I ntiyiso leswaku nandzra wa Yehovha a nge hambi xihlambanyu hi ku tizrisa ntxhumu lowu yimelaka tiko kumbe wukhongoti bya madzrimi. Kambe a hi nge a tribunali va ku byela kuva u tlhanteka voko ka Bibele u va u funga leswaku u ta vulavula ntiyiso? U nga swi yentxa leswo. Swa nga hi leswi a Bibeleni ku kombisiwaka leswaku malandzra ya kukazri ya ku dumbeka ya Xikwembu Nkulukumba ma hambe xihlambanyu na ma beke voko a mbangwini wa kukazri. (Gn 24:2, 3, 9; 47:29-31) I swa lisima ku dzrimuka leswaku loko u yentxa leswo u va na u funga mahlweni ka Xikwembu Nkulukumba leswaku u ta khanela ntsena ntiyiso. Xileswo u fanela ku tiyimisela ku hlamula hi ku tiyiseka xivutiso xin’wana ni xin’wana lexi va ta ka ku vutisa xone.

Leswi wuxaka byezru na Yehovha byi nga bya lisima swinene, hi fanela ku yanakanyisisa hi xikhongoto na hi nga si hamba xihlambanyu xa kukazri. Ku djuleka hi tivonela akuva hi nga vavisi lipfalu dzrezru ledzri dondzrisiwiki hi Bibele. Loko u hamba xihlambanyu u fanela ku tiyiseka hi ku helela leswaku u ta swi kota ku xi hetisisa.—1Pe 2:12.