Ka xiyimu lexo, a bandla dzri fanela ku vona mutxhatu lowa ku sungula na wu helile loko mhunu lweyo a txhata ni mhunu mumbeni nakone mutxhatu lowa wubidzri wu yamukeleka hi ku ya hi nawu wa mfumu. Akuva hi twisisa xivangelo xa kuva hi tlhasela wugamu lebyo, a hi kambisiseni leswi Yesu a swi hlayiki mayelanu ni ku dlaya wukati ni ku tlhela u txhata.

Hi lani swi kombisiwaka ha kone ka Matewu 19:9, Yesu a kombise xivangelo xin’we ntsena xa matsralwa lexi nga yentxaka leswaku vatekani va dlaya wukati: “Mun’wana ni mun’wana lweyi a tsrhikaka nsati wake, na ku nga li leswaku e yentxa swa tingana hi tlhelo dzra tinkuku, kutani a ya txhata ni mumbeni, a yentxa wumbuye.” Ka mazritu ya Yesu hi dondzra leswaku 1) xivangelo xin’we xa matsralwa lexi nga yentxaka leswaku mhunu a dlaya wukati, hi loko mun’we a yentxe swa tingana hi tlhelo dzra tinkuku ni 2) xa wubidzri, a nuna lweyi a tsrhikaka a nsati wake na ku nga li hi xivangelo xa matsralwa a va a ya txhata ni mumbeni, a yentxa wumbuye. *

Xana mazritu ya Yesu ma djula ku tlhamuxela leswaku wanuna leyi a yentxaka swa tingana hi tlhelo dzra tinkuku a va a dlaya wukati ni nsati wake, matsralwa ma mu pfumelela ku va a tlhela a txhata? A swi tlhamuxeli swone. Loko nuna o yentxa wumbuye, swi le ka nsati lwa doheliwiki leswaku awa mu dzrivalela kumbe im-him. Loko nsati a nga mu dzrivaleli nakone va tsrimba leswaku va ta dlaya wukati, hinkwavu va ntsrhunxekile ku tlhela va txhata, loko mapapela ya ku dlaya wukati ma helelile.

Swi nga ha yentxeka nsati lweyi a nge ke na nandzru a nga swi djuli ku dlaya wukati, lanu ke a nga byela nuna leswaku awa mu dzrivalela. Kambe swi li yini loko wanuna lweyi a yentxiki wumbuye a yala lidzrivalelo dzra nsati wake a va a ya dlaya wukati hi ku ya nawu wa mfumu? Leswi nsati a djulaka ku mu dzrivalela nakone a kalaka a nga djuli ku dlaya wukati, nuna lweyo a ta va a nga txhati hi ku ya hi nawu wa Matsralwa. Loko a tama a sindzrisa ku dlaya wukati na ku nga li hi xivangelo xa Matsralwa a va ya txhata ni mhunu mumbeni, a va na a phindha ku yentxa wumbuye nakone mhunu lweyo a nga ha vumbeliwa xihubyana xa wuyavanyisi.—1Ko 5:1, 2; 6:9, 10.

Loko wanuna a txhata hi xivangelo lexi kalaka xi nga li xa Matsralwa, xana bandla dzri fanela ku wu vonisa kuyini mutxhatu wake wa ku sungula ni lowa wubidzri? Xana mutxhatu lowa ku sungula wa ha ya mahlweni hi ku ya nawu wa Bibele? Xana a nsati lowa ku sungula lweyi a ngeke na nandzru a nga ha tama a ya a mahlweni a djula ku dzrivalela khale ka nkatake? Xana bandla dzri fanela ku vona mutxhatu lowumpswha swanga wumbuye?

A khale a bandla a dzri vona mutxhatu lowa wubidzri swanga wumbuye loko lweyi a doheliwiki a ha hanya, a tama a tsrhama na a nga txhatanga nakone a nga yentxi swa tingana hi tlhelo dzra tinkuku. Nambi tanu, Yesu a nga vulavulanga hi lweyi a doheliwiki loko a vulavula hi ku dlaya wukati ni ku tlhela u txhata. Yesu a tlhamuxele leswaku lweyi a tsrhikaka nsati wake ku nga li hi xivangelo  xa Matsralwa a va a txhata ni mumbeni, a yentxa wumbuye. Ka xiyimu lexo, loko mhunu a dlaya wukati a va tlhela a txhata, Yesu a hlaye leswaku leswo i wumbuye, nakone swi helisa wukati lebya ku sungula.

Loko nuna a tsrhika nsati a va a tlhela a txhata ni mumbeni, a nsati wake lwe wa ku sungula a nge he yentxi ntxhumu hi wukati byavu. Ka xiyimu lexo, a swa ha vileli kuva a nsati a teka xiboho xa kukazri mayelana ni wukati lebyo nakone a bandla a dzra ha fanelanga ku vona mutxhatu lowo wa wubidzri swanga wa wumbuye hi leswi lweyi a doheliwiki a ha hanyaka, a nga siki tlhela a txhata kumbe a kalaka a nga yentxanga swa tingana hi tlhelo dzra tinkuku.  *

Hi ku ya hi xikombiso lexi hi xi voniki, wanuna a yentxe wumbuye lebyi mu yentxiki a za a dlaya wukati. Kutani swi li yini loko wanuna lweyi a kalaka a nga na nandzru a dlaya wukati a va a txhata ni mumbeni? Kumbe swi li yini loko wanuna a dlaya wukati na a nga yentxanga swa tingana hi tlhelo dzra tinkuku kambe a ya swi yentxa a va a txhata ni mumbeni nambi leswi nsati wa ku sungula a a ha djula ku tlhelelana na yene? Ka swiyimu hinkwaswu leswi, ku dlaya wukati ni ku va mhunu a tlhela a txhata i wumbuye nakone swi helisa wukati lebya ku sungula. A mutxhatu wa wubidzri wa tizra hi ku ya hi nawu wa mfumu. A Xihondzro Xa Ku Zrindzra xa 01 ka Fevhereru wa 1980 tluka 32 (hi xiputukezi), xi tlhamuxele mhaka leyi hi ndlela leyi: “Swoswi a ngheneli wukati lebyimpshwa xileswo a ka ha na ndlela ya ku va a tlhelela ka nsati wake wa khale. A dlaye wukati byake bya ku sungula, a yentxa wumbuye a va a nghenela wukati lebyimpswha.”

Matwisisela lawa lamampswha, a ma hlayi swone swaku mukriste a fanela ku tsrhika ku vona mutxhatu swanga lowo xwengiki ni ku vona wumbuye na ku li xidoho xitsrongo. Loko nuna a dlaya wukati na ku nge hi xivangelo xa Matsralwa a va a txhata ni mhunu mumbeni, a vakulu va fanela ku vumba xihubyana xa wuyavanyisi hi kola ka wumbuye byolebyo. (Loko nsati lwemumpswha na yene a li Mukriste, a fanela ku vumbeliwa xihubyana xa wuyavanyisi hikusa na yene a yentxe wumbuye.) Nambi leswi mutxhatu lowa wubidzri wu kalaka wu nga fanelanga wu voniwa swanga wa wumbuye, swi le livaleni leswaku a wu fambisani ni milawu ya Xikwembu Nkulukumba mayelana ni mutxhatu. Wanuna lweyo a nga ha heta malembe manyingi na a nga nyikiwi swiyavelo swa ku hlawuleka a bandleni, ku ta tlhasela lani vamakwezru va nga ha kotaka ku mu bekela xitxhavu. Na vakulu va nga si mu nyika xiyavelo xa kukazri mhunu lweyo va fanela ku yanakanyisisa hi xiyimu xa nsati ni vana lava a nga ha vaka a va tsrhikile.—Mlk 2:14-16.

Na va yanakanyisisa hi mihandzru ya ku biha leyi nga ha va ka kone hi ku dlaya wukati ni ku nghenela wukati byimbeni na ku nga li hi xivangelo xa matsralwa, Vakriste va fanela ku tlhazriha ni ku yetisela Yehovha hi ku vona wukati na byi li lebyi xwengiki kumbe lebyi khensekaka.—Ekl 5:4, 5; Hb 13:4.