NHLOKOMHAKA YA XIDONDZRO 15
Hi Dondzra Yini Ka Mahlolana Ya Yesu?
‘A tifambela na a yentxa leswi swa swinene, a hanyisa.’—MIN 10:38, BX.
LISIMU 13 Kriste I Xikombiso Xezru
NKATSRAKANYU WA LESWI TAKA DONDZRIWA a
1. I ka xiyimu xini lani Yesu a yentxiki hlolana dzrake dzra ku sungula?
ZAMA ku yanakanya hi mhaka leyi: Hi le ndzreni ka lembe dzra 29 N.Y., hi loko Yesu a sungula ntizro wake a misaveni. Yesu ni mamana wake, Mariya, kun’we ni vadondzrisiwa vake va zrambiwe ka nkhuvu wa mutxhatu ka doropa dzra Kana, ledzri kumekaka n’walungu ka doropa ledzri Yesu a pswaliwiki ka dzrone, ku nga Nazareta. Mariya i munghanu wa vatekani nakone swi tikomba a li ku pfuniseni ka ku bekisa vazrambiwa. Loko nkhuvu wu ya wu famba, ku hela vhinyu, ku nga xiyimu lexi a xi ta yentxa va ndangu kun’we ni vatekani va khomiseka tingana. b Swi nga yentxeka nhlayu ya vazrambiwa yi li yikulu ku tlula leyi a va yi yimelile. Kutani hi ku kahlula Mariya a ya ka Yesu kutani a mu byela leswi: ‘Va pfumala vuvhinya.’ (Yh 2:1-3) Kutani Yesu a yentxa yini? A yentxa ntxhumu wa ku hlamalisa ku nga ku ndzruluta mati ma va vhinyu.—Yh 2:9, 10.
2-3. a) I mahlolana ya muxaka muni lawa Yesu a ma yentxiki? b) Hi ta vona yini ka xidondzro lexi?
2 Ledzri ku ve hlolana dzra ku sungula ka mahlolana manyingi lawa Yesu a ma yentxiki loko a li lani misaveni. c A yentxe mahlolana manyingi ni ku pfuna vhanu vanyingi. Ka xiyentxakalu xa kukazri, Yesu a phamele 5.000 wa vavanuna hi ku tizrisa hlolana. Ntsrhaku, ka xiyentxakalu xin’wana, a phamele 4.000 wa vavanuna hi hlolana, lani loko hi patsra nhlayu hinkwayu ya vavanuna, vavasati ni vana yi nga dzringanaka kolomu ka 27.000 wa vhanu. (Mt 14:15-21; 15:32-38) Ka swiyentxakalu leswo ha swibidzri, Yesu a tlhele a daha vhanu vanyingi lava a va vabya. (Mt 14:14; 15:30, 31) Yanakanya ku nyonxa loku vhanu lava va viki na kone loko Yesu a va dahile ni ku va phamela hi ku tizrisa hlolana.
3 Hi nga dondzra swinyingi ka mahlolana lawa Yesu a ma yentxiki. Ka xidondzro lexi, hi ta vona swin’we swa leswi hi nga swi dondzraka, leswi nga yengeselaka lipfumelo dzrezru. Ntsrhaku, hi ta vona leswaku hi nga ku yetiselisa kuyini ku titsrongahata ni ntwelawusiwana leswi Yesu a swi kombisiki loko a yentxa mahlolana.
LESWI HI NGA SWI DONDZRAKA KA YEHOVHA NA YESU
4. Loko hi dondzra hi mahlolana ya Yesu, hi va na hi dondzra ha mani?
4 Mahlolana ya Yesu a ma hi dondzrisi ha yene ntsena, kambe ma tlhela ma hi dondzrisa mayelanu na Yehovha. Phela ku ve Yehovha lweyi a nyikiki Yesu ntamu wa ku yentxa mahlolana lawayani. A buku dzra Amintiṛo 10:38 dzri li: ‘Leswaku Xikwembu Nkulukumba a mu toti [Yesu] hi moya wa ku xwenga ni ntamu, a tifambela na a yentxa swinene, a hanyisa hinkwavu lava kandzreteliwiki hi Diyavulosi, hikusa Xikwembu Nkulukumba ife naye.’ Dzrimuka leswaku ka hinkwaswu leswi Yesu a swi yentxiki ku patsra ni mahlolana, a a yetisela hi ku helela mayanakanyela ni matitwela ya Papayi wake. (Yh 14:9) Ka xidondzro lexi, hi ta vona mintxhumu yizrazru leyi hi nga yi dondzraka ka mahlolana ya Yesu.
5. I yini lexi susumeteliki Yesu ku yentxa mahlolana? (Matewu 20:30-34)
5 Xa ku sungula, Yesu na Yehovha va hi zrandzra ngopfu. Loko Yesu a li lani misaveni a kombise ndlela leyi a a va zrandzra ha yone vhanu hi ku va yentxela mahlolana akuva a va phula ka swikazratu swavu. Ka xiyentxakalu xa kukazri, vavanuna vabidzri lava fiki matihlo, va kombele Yesu akuva a va pfuna. (Dondzra Matewu 20:30-34.) Yesu hi “timpswalu” a dahe vavanuna lavo. Ka ndzrimana leyi, a zritu dzra Xigrika ledzri ndzruluteliwiki dzri va “timpswalu” dzri kombisa matitwela ya le ndzreni ku nga ku khumbeka hi leswi a swi vonaka. Ku va ni timpswalu, a nga xikombiso xa lizrandzru, ku susumetele Yesu ku phamela lava nga ni ndlala ni ku daha wanuna lweyi a a ni nhlokonho. (Mt 15:32; Mr 1:41) Hi nga tiyiseka leswaku Yehovha, Xikwembu Nkulukumba wa ‘lizrezre’ ni n’wanake, Yesu, va hi zrandzra ngopfu nakone va vaviseka loko va hi vona hi hlupheka. (Lk 1:78; 1Pe 5:7) A hi na ku ganaganeka ka leswaku Yehovha kun’we na Yesu va swi djula ngopfu ku helisa swikazratu leswi vangelaka vhanu ku hlupheka!
6. I ntamu wa ku yentxa yini lowu Yehovha a wu nyikiki Yesu?
6 Xa wubidzri, Xikwembu Nkulukumba a nyike Yesu ntamu wa ku helisa swikazratu hinkwaswu swa vhanu. Mahlolana lawa Yesu a ma yentxiki ma kombisa leswaku a ni ntamu wa ku helisa swikazratu leswi hine hi kalaka hi nga swi koti ku swi helisa. Hi xikombiso, a ni ntamu wa ku hi ntsrhunxa ka xidoho ni ka hinkwaswu leswi tisiwaka ha xone, swa ku fana ni mavabyi ni lifu. (Mt 9:1-6; Ro 5:12, 18, 19) Mahlolana lawa Yesu a ma yentxiki ma tiyisekisa leswaku a ni ntamu wa ku daha “mavabyi ya ku hambanahambana” ni ku tlhela a pfuxa lava fiki. (Mt 4:23; Yh 11:43, 44) Nakone a ni ntamu wa ku lawula swidzedze leswikulu ni ku ntsrhunxa vhanu ka mademona. (Mr 4:37-39; Lk 8:2) Hi nyonxa ngopfu swinene hi ku tiva leswaku Yehovha a nyike n’wanake Yesu ntamu wa ku yentxa mintxhumu hinkwayu leyi!
7-8. a) Xana mahlolana ya Yesu ma tiyisa dumbo dzrezru hi ku helela hi ndlela yini? b) Ka mahlolana lawa ma taka yentxiwa a misaveni leyimpshwa, he dzrini u dzri yimeliki hi manyawu?
7 Xa wuzrazru, hi nga dumba hi ku helela leswaku Mfumu wa Xikwembu Nkulukumba wu ta tisa matovoko manyingi lani misaveni. Mahlolana lawa Yesu a ma yentxiki loko a li lani misaveni ma kombisa leswi a taka swi yentxa swanga hosi ya Mfumu wa Xikwembu Nkulukumba, kambe hi ndlela leyikulu. Vona matovoko lawa ma hi yimeliki hansi ka wuhosi bya Kriste. Hi ta va ni lihanyu ledzrinene hikusa Yesu a ta helisa mavabyi ni wulema leswi yentxaka vhanu va hlupheka. (Eza 33:24; 35:5, 6; Mpf 21:3, 4) A nga kone lweyi a taka fa hi ndlala kumbe ku weliwa hi mhangu ya ntumbuluku. (Eza 25:6; Mr 4:41) Hi ta va ni ku nyonxa lokukulu loko vazrandzriwa vezru lava fiki va pfuka ‘masizreni’. (Yh 5:28, 29) Ka mahlolana lawa ma taka yentxiwa a misaveni leyimpshwa, he wani lawa u ma yimeliki hi manyawu?
8 Loko a li kazri a yentxa mahlolana, Yesu a kombise moya wa ku titsrongahata ni ntwelawusiwana, kutani na hine hi fanela ku yetisela matsrhamela lawo. Hi ta vona swikombiso swibidzri. Ku sungula a hi kambisiseni xa nkhuvu wa mutxhatu a Kana.
DONDZRO YA LISIMA YA KU TITSRONGAHATA
9. I yini leswi Yesu a swi yentxiki ka nkhuvu wa mutxhatu? (Yohan 2:6-10)
9 Dondzra Yohan 2:6-10. Nkama ku nga hela vhinyu a nkhubyini wa mutxhatu, xana Yesu a sindzrisiwe ku yentxa xa kukazri? Im-him! A ku na wuprofeta lebyi a byi kombisa leswaku Mesiya a a ta ndzruluta mati ma va vhinyu hi ndlela ya hlolana. Kambe zama ku yanakanyisisa hi ndlela leyi a u ta titwa ha yone loko a wo heleliwa hi byala a mutxhatwini waku. Swi tikomba Yesu a wu twele wusiwana ndangu luwani, ngopfungopfu vatekani, hikusa a a nga djuli va khomiseka tingana. Kutani, hi lani hi swi voniki ha kone a ku sunguleni ka xidondzro lexi, Yesu a yentxe hlolana. A ndzrulute kolomu ka 390 wa malitru ya mati ma va vhinyu dzra lisima. Swi nga yentxeka a hambe mpimu lowukulu wa vhinyu akuva dzri tizrisiwa ntsrhaku ka nkhuvu kumbe kuva dzri xavisiwa hi nkongometo wa ku pfuna vatekani. Handle ka ku ganaganeka, vatekani lavayani va nyonxile hi mpfunu wa Yesu!
Yetisela Yesu nakone u nga tibyeli hi mintxhumu leyi u yi yentxaka kumbe u yi tivaka (Vona mayava 10-11) e
10. He byini wutsrhokotsrhoko bya lisima lebyi hi byi kumaka ka Yohan ndzrima 2? (Tlhela u vona xifaniso.)
10 Ku ni byin’we bya wutsrhokotsrhoko bya lisima lebyi kumekaka ka Yohan ndzrima 2. Xana u swi xiyile leswaku a hi Yesu lweyi a tatiki tihotsro hi mati? A matsrhan’wini ya ku kokela yingiso kwake, a kombele vatizri akuva va tata tihotsro hi mati. (Tindzrimana 6, 7) Nakone loko Yesu a ndzrulute mati ma va vhinyu, a nga tekanga hi wuswake vhinyu a ya dzringela mufambisi wa nkhuvu. A matsrhan’wini ya leswo, a kombele vatizri akuva va yentxa leswo. (Ndzrimana 8) Nakone handle ka ku ganaganeka, ha tiyiseka leswaku Yesu a nga zanga a tlakuxa kopo dzra vhinyu a henhla kutani a byela vazrambiwa a ku: ‘Dzringani vhinyu ledzri na ha ka ku dzri hamba!’
11. Xana hi nga dondzra yini ka hlolana dzra Yesu?
11 Hi nga dondzra yini ka hlolana ledzri Yesu a dzri yentxiki dzra ku ndzruluta mati ma va vhinyu? Hi dondzra tsrhamela dzra ku titsrongahata. Yesu a nga zanga a tibyela hi kola ka hlolana ledzri a dzri yentxiki. Ku hlaya ntiyiso, a ngi ngi sama a tibyela hi leswi a swi yentxiki. A matsrhan’wini ya leswo, minkama hinkwayu Yesu a a titsrongahata ni ku yisa lidzrumu ka Papayi wake. (Yh 5:19, 30; 8:28) Loko hi yetisela xikombiso xa Yesu nakone hi va ni mayanakanyela ya ku titsrongahata, hi ta twisisa leswaku a hi koti ku yentxa ntxhumu. Swi nge na mhaka leswaku he xini xiyavelo xezru a ntizrweni wa Yehovha, swi ta va swinene ku kala hi nga tikokeli matihlo, kambe hi yisa lidzrumu ka Xikwembu Nkulukumba wezru wa ku hlamalisa. (Yr 9:23, 24) Phela swa mu fanela ku dzrumisiwa, hikusa a xi kone ni xin’we lexi hi nga xi yentxaka handle ka loko hi pfuniwa ha yene.—1Ko 1:26-31.
12. Xana hi nga yetisela xikombiso xa Yesu xa ku titsrongahata hi ndlela yini? Nyikela xikombiso.
12 Vona ndlela leyi hi nga xi yetiselaka ha yone xikombiso xa Yesu xa ku titsrongahata. Yanakanya hi leswi: Nkulu wa kukazri a heta nkama wunyingi na a pfuna mumpshwa lweyi a nga nandzra wa wutizreli ku lulamisela wukaneli byake bya ku sungula bya le livaleni. Hi kola ka mpfunu lowo, mumpshwa lweyi a beka wukaneli hi ndlela ya ku xonga swinene lakakuva bandla hinkwadzru dzri nyonxa. Ntsrhaku ka ntlhanganu, mun’we wa vamakwezru, a bula ni nkulu lwiyani a ku: ‘Nyonxisani ka wukaneli lebyi hi viki na byone namunhla, u byi twise kuyini?’ Nkulu lwiyani a nga ha hlamula a ku: ‘I ntiyiso, phela ni hete nkama wunyingi na ni mu pfuna ku lulamisela.’ Kambe swi nga va swinene ngopfu loko nkulu o hlamula hi ndlela leyi: ‘Nakunene byi nyonxise ngopfu, na tikhuza ha yene.’ Loko hi titsrongahata, a hi nge ti yimela ku kulungeliwa hi mintxhumu ya yinene leyi hi yi yentxelaka van’wana. Kwezru swi ta va swi yanelile ku tiva leswaku Yehovha a swi vonile leswi hi swi yentxiki nakone a swi nyika lisima. (Dzringanisa Matewu 6:2-4; Hb 13:16) Handle ka ku ganaganeka, Yehovha a nyonxa ngopfu loko a hi vona hi yetisela xikombiso xa Yesu xa ku titsrongahata.—1Pe 5:6.
DONDZRO YA LISIMA YA NTWELA WUSIWANA
13. I yini leswi Yesu a swi vonaka loko a nghena a doropeni dzra Nayimi nakone a yentxa yini? (Luka 7:11-15)
13 Dondzra Luka 7:11-15. Loko a li ka ntizro wake wa lani misaveni, Yesu a yendzrele doropa ledzri vitaniwaka Nayimi. Doropa ledzro a dzri kumeka a Galileya, a kusuhi ni Xunemi lani 900 wa malembe lama khalutiki muprofeta Elixa a pfuxiki n’wana wa wansati wa mufelwa. (2Th 4:32-37) Zama ku yanakanyisisa hi leswi: Yesu a ya a tsrhindzrekela nyangweni ka doropa kutani a vona ntalu wa vhanu lava yaka ku lahleni. Mhaka leyi yi tsrema nhlana hikusa wansati wa kukazri wa mufelwa a ha ku luzekeliwa hi n’wanake wa mun’we. Mamana lweyi a nga wuswake kambe a kun’we ni ntlawa lowukulu wa vhanu lava tsrhamaka ka doropa dzroledzro. Yesu a va yimisa kutani a yentxa ntxhumu lowu mufelwa a nga tiki wu dzrivala a wuton’wini byake. Ku nga ku pfuxa n’wanake! Lexo i xiyentxo xa ku sungula xa ku pfuxiwa lexi yentxiwiki hi Yesu ka swizrazru leswi tsraliwiki ka tiyevhangeli.
Yetisela Yesu nakone vana wa ku zranga a ku kombiseni ka malwandla ka vhanu lava luzekeliwiki hi mhunu lweyi va mu zrandzraka (Vona mayava 14-16)
14. I wutsrhokotsrhoko byini bya lisima lebyi hi byi kumaka ka wudzrunguli bya Luka ndzrima 7? (Tlhela u vona xifaniso.)
14 Vona wutsrhokotsrhoko byin’wana bya lisima ka Luka ndzrima 7. Xiya leswaku Yesu a vona wansati kutani a mu twela wusiwana. (Ndzrima 13) Swi nga yentxeka Yesu a vone mamana lweyi a li kazri a dzrila na a li kusuhi ni ntsrumbu wa n’wanake, kutani a mu twela wusiwana. Yesu a nge gamela ntsena ka ku mu twela wusana wansati lwiyani kambe a swi kombise ni hi swiyentxo. A vulavule naye hi ndlela ya ku mu txhavelela a ku: ‘U nga dzrili.’ Kutani a yentxe xa kukazri akuva a mu pfuna. A pfuxe n’wanake a va a ‘mu nyika ku mamana wakwe’.—Tindzrimana 14, 15.
15. Xana hi dondzra yini ka hlolana ledzri Yesu a dzri yentxiki?
15 Hi nga dondzra yini ka hlolana ledzri Yesu a dzri yentxiki? Hi dondzra leswaku hi fanela ku kombisa ntwelawusiwana ka vhanu lava luzekeliwiki hi vazrandzriwa vavu. I ntiyiso leswaku a hi nge swi koti ku pfuxa mhunu lweyi a fiki, kambe ku fana na Yesu hi nga va ni wuxiyaxiya ni ku kombisa ntwelawusiwana ka mhunu lweyi a feliwiki. Hi nga ha hlaya kumbe ku yentxa ntxhumu wa kukazri lowu taka va pfuna kumbe ku va txhavelela. d (Pr 17:17; 2Ko 1:3, 4; 1Pe 3:8) Mazritunyana matsrongo kumbe swiyentxo switsrongo swi nga ha va ni ntlhamuxelo wukulu.
16. Hi lani swi kombisiwaka ha kone a mufoto, u dondzre yini ka mamana lweyi a a ha ka ku luzekeliwa hi n’wanake wa n’hwanyana?
16 Vona mfambu lowu landzrelaka. Malembe ntsrhaku na va li ku yimbeleleni ka lisimu a mintlhanganwini, makwezru wa kukazri wa xisati a vone mamana wa kukazri na a li ku dzrileni. Lisimu ledzri a dzri yimbeleliwa a dzri vulavula hi dumbo dzra ku pfuka ka vafi. A a ha ku luzekeliwa hi n’wanake wa n’hwanyana lweyi a a li mumpshwa. Makwezru lweyi e na ku swi vona a tekela ku tsrhindzrekela kusuhi ni mamana lweyi, kutani a mu tlhanteka voko ka makatla va ya mahlweni va yimbelela xikan’we. Mamana lweyi a game a hlaya leswi: “Ni titwe ni zrandzriwa ngopfu swinene hi vamakwezru.” A nyonxe ngopfu hi ku va a ye mintlhanganwini. A ya mahlweni a ku: “A mpfunu lowu hi wu vilelaka hi wu kuma la a Ndlwini ya Wugandzreli.” Hi nga tiyiseka leswaku Yehovha awa yi vona nakone a yi nyika lisima nambi ko va mintxhumu yitsrongo leyi hi yi yentxaka akuva hi kombisa ntwelawusiwana ka lava luzekeliwiki hi vazrandzriwa vavu ni lava nga ni ‘mbilu leyi tsrhovekiki’.—Ps 34:18.
DONDZRO YA BIBELE LEYI TAKA TIYISA LIPFUMELO DZRAKU
17. I yini leswi hi swi voniki ka xidondzro lexi?
17 Hi nga tiyisiwa ngopfu loko hi hamba wusetxhi mayelanu ni mahlolana ya Yesu lawa ma kumekaka ka tiyevhangeli. Wone ma hi dondzrisa leswaku Yehovha na Yesu va hi zrandzra ngopfu swinene nakone ma hi pfuna ku vona ndlela leyi Yesu a nga ni ntamu ha yone wa ku lulamisa swikazratu leswi vhanu va nga na swone ni ku hi tiyisekisa leswaku swidumbiso hinkwaswu swa Yehovha mayelanu ni wumundzruku swi ta hetiseka loko Mfumu wa Xikwembu Nkulukumba wu sungula ku fuma misava. Loko hi li kazri hi dondzra hi mahlolana ya Yesu, hi nga yanakanyisisa hi ndlela leyi hi nga ma yetiselaka ha yone matsrhamela yake. Swi ngo yini u tihambela xiyimiso xa dondzro yaku ya ximhunu kumbe ku hlawula dzrin’we ka masiku ya wugandzreli bya ndangu akuva u kambisisa man’we ya mahlolana ya Yesu. Vona mintxhumu leyimpshwa leyi u nga yi dondzraka nakone yi buleli van’wana. Yanakanya hi mabulu ya ku nyonxisa lawa u nga ha vaka na wone!—Ro 1:11, 12.
18. I yini leswi hi taka swi vona ka xidondzro lexi landzrelaka?
18 Na a li kusuhi ni ku heta ntizro wake wa lani misaveni, Yesu a pfuxe mhunu hi khambi dzra wuzrazru nakone loko ku ve ku pfuxa ka wugamu loku a ku yentxeki loku tsraliwiki a Bibeleni. Hi khambi ledzri, a pfuxe munghanu wake lweyi a zrandzrekaka nakone xiyimu a xi hambane ngopfu ni leswin’wana. Hi nga dondzra yini ka hlolana ledzro nakone hi nga tiyisa lipfumelo dzrezru ka dumbo dzra ku pfuka ka vafi hi ndlela yini? Hi leswi hi taka swi vona ka xidondzro lexi landzrelaka.
LISIMU 20 U Hi Nyike N’wanaku Lwa Dulaka
a A yimise xidzedze lexikulu, a daha mavabyi ni ku pfuxa lava fiki. Nakunene swi nyonxisa ngopfu ku dondzra mayelanu ni mahlolana ya Yesu! Timhaka leti a ti tsraliwanga a Bibeleni akuva ti hi nyonxisa ntsena kambe akuva ti hi dondzrisa. A hi voneni man’we ya mahlolana lawo ni ku susa tindondzro ta lisima mayelanu na Yehovha kun’we na Yesu leti taka tiyisa lipfumelo dzrezru, ni ku xiya man’we ya matsrhamela lawa hi fanelaka ku ma txutxela.
b Xidondzri xin’wana xa Bibele xi hlaya leswi: “A Oriente, a malwandla a ku li mfanelo leyi xwengiki. Malwandla ya ntiyiso, ngopfungopfu ka minkhuvu ya mitxhatu, a ma fanela ku kombisiwa hi ndlela leyikulu.”
c Mabuku ya tiyevhangeli ma vulavula hi mahlolana lawa ma tlulaka 30 lawa Yesu a ma yentxiki. Kambe ha swi tiva leswaku nhlayu ya mahlolana lawa Yesu a ma yentxiki i yikulu, hikusa makhambi manyingi Bibele a dzri nyikeli wutsrhokotsrhoko bya mahlolana lawa Yesu a ma yentxiki ka xiyimu xin’wana ni xin’wana. Hi xikombiso, ka xiyimu xin’wana, ‘a muti hinkwawu’ wu ye ka Yesu.—Mr 1:32-34.
d Akuva u kuma leswi yengetelekiki mayelanu ni leswi u nga swi hlayaka kumbe ku swi yentxa akuva u txhavelela lweyi a feliwiki, vona nhlokomhaka leyi liki “Chavelela Lava Feriweke Hilaha Yesu A Endleke Hakona” ka Xihondzo xo Rindza xa 1 ka Novhembru wa 2010.
e NTLHAMUXELO WA XIFANISO: He kule Yesu a vona vatekani lava ha ka ku txhata na va nwa vhinyu ledzri a ha ka ku dzri hamba.
