1-2. Na ha ha yimela misava leyimpshwa i yini leswi hi fanelaka ku swi yentxa?

 SWI NYONXISA ngopfu ku tiva leswaku Yehovha a dumbisa ku helisa xiyimo lexi xa misava ku nga li khale kutanoi hi hanya ka misava leyimpshwa. (2Pe 3:13) i ntiuoiso leswaku a hi dzri tivi siku ledzri a misava leyimpshwa yi ta ka tlhasa ha dzrone, kambe hi ni wumboni lebyi byi nga livaleni bya leswaku ku nge khale yi ta tlasa.—Mt 24:32-34, 36; Min 1:7.

² Na leswo swi nga si yentxeka, hinkwezru hi fanela ku kombisa lipfumelo ka xidumbiso xa misava leyimpshwa swi nga na mhaka leswaku hi ni malembe mangaki na hi li ntiyisweni. Kambe ha yini? Hikusa nambiloko hi ni lipfumelo ledzri tiyiki, dzri nga ha tsrana hi ku famba ka nkama. A hi ha vomu Pawulo a tsraliki a ku ku kala lipfumelo i ‘Xihono lexi tekisaka ku hi namazrela’. (Hb 12:1) Akuva lipfumelo dzrezru dzri nga tsrani, hi fanela ku yanakanyisisa hi wumboni lebyi hi nga na byone bya leswaku misava leyimpshwa ku nge khale yi ta tlhasa.—Hb 11:1.

3. Hi ta vona yini ka xidondzro lexi?

³ Ka xidondzro lexi hi ta vona mintxhumu yizrazru leyi hi nga yi yentxaka akuva hi tiyisa lipfumelo dzrezru ka xidumbiso xa misava leyimpshwa lexi Yehovha a xi dumbisiki: 1) Ku yanakanyisisa hi xitizrulo, 2) ku yanakanyisisa hi ntamu wa Yehovha ni 3) ku khomeka hi mintizro ya moya. Ntsrhaku, hi ta vona ndlela leyi a dzrungula ledzri Yehovha a dzri nyikiki Abakuk dzri dzri tiyisaka ha yone lipfumelo dzrezru namunhla. Kambe, ku sungula hi ta vona leswaku hi fanela ku va ni lipfumelo ka xidumbiso xa misava leyimpshwa akuva hi kota ku lavisana ni swiyimu swa ku bindzra.

 SWIYIMU LESWI DJULAKA HI VA NI LIPFUMELO LEDZRI TIYIKI

4. I swiboho swini leswi hi fanelaka ku va ni lipfumelo ledzri tiyiki akuva hi swi teka?

⁴ Siku ni siku hi fanela ku teka swiboho, ku nga ha va swa swikulu kumbe swa switsrongo. Nakone ntxhumu lowu nga hi pfunaka ku teka swiboho swa wutlhazri i lipfumelo ledzri tiyiki. Hi xikombiso, siku ni siku hi teka swiboho mayelanu ni vanghanu, ku tihungata, tidondzro, mutxhatu, vana ni ntizro. Swi nga va swinene hi tivutisa leswi: “Ku nga va leswaku swiboho swanga swi kombisa leswaku na tiyiseka leswaku a xiyimu lexi xa misava xi ta hela ni leswaku misava leyimpshwa yi ta tlhasa ku nga li khale? Kumbe ni yentxa mintxhumu ku fana ni vhanu lava kalaka va nga kholwi leswaku swa koteka ku hanya hi lani ku nga helikiki?” (Mt 6:19, 20; Lk 12:16-21) Loko hi tiyisa lipfumelo dzrezru ka leswaku misava leyimpshwa yi le kusuhi, hi ta kota ku teka swiboho swa wutlhazri wuton’wini byezru.

5-6. Ha yini swi djula hi va ni lipfumelo ledzri tiyiki loko hi lavisana ni swikazratu? Nyikela xikombiso.

⁵ Na hine hi fanela ku va ni lipfumelo ledzri tiyiki akuva hi kota ku lavisana ni swikazratu. Swi nga yentxeka hi ta lavisana ni ku kanetiwa, mavabyi lawa ma nga dahekiki kumbe swiyimu swin’wana leswi swi nga ha hi hetaka ntamu. Loko swa ha sungula hi nga ha tibyela leswaku hi ta swi kota ku lavisana naswone. Kambe xikazratu lexo xi nga ha teka nkama wa ku leha lowu a hi nga wu yimelanga ku nga leswi ha kanyingi swi humelelaka. Kutani swi ta djula hi va ni lipfumelo ledzri tiyiki ni ku tama hi tizrela Yehovha na hi nyonxile.—Ro 12:12; 1Pe 1:6, 7.

⁶ Loko hi tsremakanya ka swiyimu swa ku kazrata hi nga ha yanakanya leswaku a misava leyimpshwa leyi Yehovha a yi dumbisiki a yi nga ti txhuka yi tlhasile. Xana leswo swi djula ku hlaya leswaku lipfumelo dzrezru dzri tsranile? Im-him a hi swone! Yanakanya hi xikombiso lexi landzrelaka: Hi nkama wa wuxika lani ku titimetaka ngopfu, hi nga ha txhuka hi tibyela leswaku a malanga a ma nge he txhuki ma tlhasile, kambe ha swi tiva leswaku a swi nge yentxeki kuva malanga ma nga tlhasi. Hi ndlela leyi fanaka, loko hi hele ntamu, hi nga ha tibyela leswaku a misava leyimpshwa a yi nga ti za yi tlhasile. Kambe loko hi ni lipfumelo ledzri tiyiki hi ta tiyiseka leswaku a swidumbiso swa Xikwembu Nkulukumba swi ta hetiseka. (Ps 94:3, 14, 15; Hb 6:17-19) Loko hi ni ku tiyiseka loko hi ta tama hi teka ku gandzrela Yehovha na ku li ntxhumu wa lisima a wuton’wini byezru.

7. He wani mavonela lawa hi fanelaka ku tivonela ka wone?

⁷ Swi djula hi tlhela hi va ni lipfimelo ledzri tiyiki akuva hi kota ku zrezra. Vanyingi lava hi va zrezrelaka “madzrungula lamenene” mayelanu ni misava leyimpshwa, va yanakanya leswaku ma xonge ngopfu lakakuva a ma nge vi ntiyiso. (Mt 24:14; Ezk 33:32) Kambe a hi fanelanga hi pfumelela ku kutxeteliwa hi mayakanyela ya vhanu lavo. Akuva hi tingawula mayanakayela lawo, swi djula hi tiyisa lipfumelo dzrezru. A hi voneni tindlela tizrazru leti ti nga ta hi komba ndlela leyi hi nga swi yentxaka ha yone leswo.

YANAKANYISISA HI XITIZRULO

8-9. Ha yini ku yanakanyisisa hi xitizrulo swi tiyisa lipfumelo dzrezru?

⁸ Yin’we ya tindlela ta ku tiyisa lipfumelo dzrezru i ku yanakanyisisa hi xitizrulo. A xitizrulo hi xone xi hi tiyisekisaka leswaku Xikwembu Nkulukumba a ta hetisisa hinkwaswu leswi a swi dumbisiki. Ku yanakanyisisa hi leswaku ha yini Yehovha a hi nyike xitizrulo ni hinkwaswu leswi patsrekiki kuva a hi nyika xitizrulo, swi ta tiyisa lipfumelo dzrezru ka leswaku Xikwembu Nkulukumba a ta hetisisa swidumbiso swake hinkwaswu mayelanu ni wutomi lebyi nga helikiki a misaveni leyimpshwa. Ha yini hi nga hlayaka leswo?

⁹ Akuva a hi nyika xitizrulo, Yehovha a zrumele n’wanake lweyi a zrandzrekaka akuva a ta  pswaliwa lani misaveni swa nga mhunu wa nyama lweyi a hetisekiki. Loko a li lani misaveni, Yesu a lavisane ni swiyimu swa ku kazrata a va a dlayiwa hi ndlela ya nsele. Nakunene Yehovha a hakele ku dula! Yehovha a a nga ti pfumela kuva n’wanake a xanisiwa ni ku tlhela a dlayiwa ntsena kuva hi hanya swa nkamanyana. (Yh 3:16; 1Pe 1:18, 19) Leswi a hakeliki ku dula, Yehovha a ta yentxa hinkwaswu akuva xidumbiso xa wutomi lebyi nga helikiki a misava leyimpshwa xi va xa ha kakunene.

YANAKANYISISA HI NTAMU WA XIKWEMBU NKULUKUMBA

10. Hi ku ya hi Ba-le-Efesa 3:20, Yehovha a ni ntamu wa ku yentxa yini?

¹⁰ Ntxhumu wa wubidzri lowu wu nga hi pfunaka ku tiyisa lipfumelo dzrezru i ku yanakanyisisa hi ntamu wa Yehovha. A ni ntamu wa ku hetisisa hinkwaswu leswi a swi dumbisiki. Hi kuya hi lavisela dzra ximhunu, xidumbiso xa wutomi lebyi nga helikiki a misaveni leyimpshwa xi nga voneka na ku li ntxhumu lowu nga kotekiki kambe minkama yinyingi Yehovha a dumbisa mintxhumu leyi vhanu va nga kotiki ku yi yentxa. Hikusa yene i wa ntamu hinkwawu. (Yb 42:2; Mr 10:27) Kutani, xana a hi ta yimela leswaku xikwembu Nkulukumba a dumbisa mintxhumnu leyi mun’wana ni mun’wana wezru a nga swi kotaka ku yi hetisisa?—Dondzra Ba-le-Efesa 3:20.

11. Nyikela xikombiso xa swidumbiso leswi Xikwembu Nkulukumba a swi hetisisiki. (Vona bokisi ledzri liki “Swin’we Swa Swidumbiso Swa Ku Hlamalisa Leswi Hetisekiki”.)

¹¹ A hi voneni swin’we swa swidumbiso leswi Yehovha a swi dumbisiki malandzra yake ya le nkameni lowu khalutiki leswi a swi tikomba ingiki a swi nga ti hetiseka. A dumbise Abrahamo na Sara leswaku nambileswi a va duhalile a va ta va ni n’wana. (Gn 17:15-17) A tlhele a dumbisa Abrahamu lewaku a tiku dzra Kanana a a ta dzri nyika lixaka dzrake. Xidumbiso lexo a xi tikomba ingiki a xi nga ti hetiseka hikusa Vaisrayele lava a va lumba lixaka dzra Abrahamu, va xanisiwe ku dzringana malembe manyingi na va li swikazrawa a tikweni dzra Egipta. Hi ku famba ka nkama Yehovha a hlaye leswaku wansati lweyi a a kule hi ntanga lweyi a vitaniwaka Elisabeti a a ta va ni n’wana. A tlhele a dumbisa leswaku Mariya lweyi a a li n’hwanyana, a a ta pswala n’wana wa Xikwembu Nkulukumba, akuva a hetisisa xidumbiso lexi a xi yentxiki malembe ntsrhaku a xizrambeni xa Edeni!—Gn 3:15.

12. A tindzrimana ta Yehošua 23:14; Ezaya 55:10, 11 ti wu kombisa hi ndlela yini ntamu wa Yehovha?

¹² Loko hi yanakanyisisa hi ndlela leyi Yehovha a swi hetisisiki ha yone swidumbiso swake a nkameni lowu khalutiki, lipfumelo dzrezru dzra leswaku misava leyimpshwa yi ta tlhasa, dzri ya dzri tiya. (Dondzra Yehošua 23:14; Ezaya 55:10, 11.) Hi ndlela leyi, hi ta kota ku pfuna vhanu ku vona leswaku xidumbiso xa misava leyimpshwa a hi lozro. Loko a vulavula hi matilo lamapshwa ni misava lemimpswha Yehovha a hlaye leswi: ‘Mazritu lawa ma dumbeka, i xihlayelamfuzri.’—Mpf 21:1, 5.

KHOMEKA HI MINTIZRO YA MOYA

13. Xana mintlhanganu yi nga tiyisa lipfumelo dzrezru hi ndlela yini? Tlhamuxela.

¹³ Ntxhumu wa wuzrazru lowu nga tiyisaka lipfumelo dzrezru i ku tsrhama na hi khomekile hi mintizro ya moya. Hi xikombiso, yanakanya hi mintlhanganu. Makwezru lweyi a vitaniwaka Anna, lweyi a tizreliki Yehovha ka swiyavelo swa ku siyanasiyana ka ntizro wa nkama hinkwawu, ali: “Mintlhanganu yi tiyisa lipfumelo dzranga swa nga hi hangi. Nambiloko xikaneli swi nga xi nabyeleli ku beka wukaneli kumbe wukaneli bya kone byi nga vulavuli hi mintxhumu leyimpshwa, kambe minkama hinkwayu ku ni ntxhumu wa kukazri lowu ni pfunaka ku twisisa Bibele.” b Handle ka leswo lipfumelo dzrezru  dzri nga tiyisiwa hi tinhlamulu ta vamakwezru leti nyikeliwaka a mintlhanganwini.—Ro 1:11, 12; 10:17.

14. Xana ntizro wa ku zrezra wu dzri tiyisa hi ndlela yini lipfumelo dzrezru?

¹⁴ ku hlengela ka ntizro wa ku zrezra naswone swi nga tiyisa lipfumelo dzrezu. (Hb 10:23) Makwezru Barbara lweyi a nga ni ku tlula 70 wa malembe na a tizrela Yehovha a hlaya leswi: “Akuva nkama ni nkama ni patsreka a ntizrweni wa ku zrezra ku ve wone ntxhumu lowu tiyisiki lipfumelo dzranga. Loko ni ya ni bula ni van’wana mayelanu ni swidumbiso swa ku hlamalisa swa Yehovha, lipfumelo dzranga dzri ya dzri tiya.”

15. Xana dondzro ya ximhunu yi tiyisa lipfumelo dzrezru hi ndlela yini? (Tlhela u vona xifaniso)

¹⁵ Ntxhumu wun’wana lowu nga tiyisaka lipfumelo dzrezru i: dondzro ya ximhunu. Makwezru lweyi a vitaniwaka Susan a swi zrandzra ngopfu ku bekisa nkama lowu a taka dondzra ha wone. A hlaya leswi: “Hi sonto, ni lulamisela dondzro ya Xihondzro Xa Ku Zrindzra xa vhiki ledzri landzrelaka. Hi musumbuluku ni wawubidzri, ni lulamisela mintlhanganu ya xikazri ka vhiki. Kutani masiku lama salaka ka vhiki ni ma tizrisela ku hamba dondzro ya ximhunu.” Ku tikazratela ku bekisa xiyimiso lexinene xa ku dondzra Bibele, swi pfuna Susan ku tama a tiyisa lipfumelo dzrake. Makwezru Irene lweyi a nga ni malembe manyingi na a tizrela Yehovha a ntsindzra wa misava hinkwayu, a hlaya leswaku ku dondzra wuprofeta bya Bibele swi tiyisa lipfumelo dzrake, Loko a tlhamuxela a li: “Ni hlamalisiwa ngopfu hi ndlela leyi wuprofeta bya Yehovha byi hetisekaka ha yone.” c

“XI TA HUMELELA SWINENE”

16. Ha yini hi nga hlayaka leswaku a mazrito lawa Yehovha a ma byeleke Habakuke ma tizra ni kwezru namunhla? (Ba-Heberu 10:36, 37)

¹⁶ Man’we ya malandzra ya Yehovha ma ni malembe manyingi na ma yimela ku helisiwa ka xiyimu lexi xa misava. Hi vonela dzra ximhunu, swi nga ha voneka ingiki swidumbiso swa Xikwembu Nkulukumba swa hlwela ku hetiseka. Kambe Yehovha a yi tiva ha hombe ndlela leyi  malandzra yake ma titwaka ha yone, a patsre ni ku byela Habakuke a ku: ‘Hikuva xivoniso xa ha tsramela nkama wa xone, xi hantla a ku heteleleni, xi nga ka xi nga kanganyisi. Nambi xi hlwela, xi lavisele; Hikusa xi ta humelela swinene, xi nga ka xi nga hlweli.’ (Hab 2:3) Xana Yehovha e hlaya mazrito lawo akuva a txhavelela ntsena Habakuke? Kumbexana mazrito lawa ma tizra ni kwezru namunhla? Hi ku huhuteliwa, mupostola Pawulo a tizrise mazrito lawo akuva a vulavula ni Vakriste lava a va yimela misava leyimpshwa. (Dondzra Ba-Heberu 10:36, 37.) Kutani, nambiloko ka mavonela yezru swi yentxa ingiki xidumbiso xa Xikwembu Nkulukumba xo hlwela ku hetiseka, xone ‘xi ta humelela swinene. Xi nga ka xi nga hlweli!’

17. Xana makwezru wa ku kazri wa xisati a xi tizrisa hi ndlela yini xilayu lexi Yehovha a xi nyikiki Habakuke?

¹⁷ Malandzra manyingi ya Yehovha ma ni malembe manyingi na ma tizrisa xilayu xa ku va ma tama ma “hlunyela” misava leyimpswa. Hi xikombiso, makwezru Louise a sungule ku tizrela Yehovha hi lembe dzra 1939. A li: “Hi nkama lowo a ni yanakanya leswaku a Armagedon a dzri ta tlhasa na ni nga si heta xikole primariya. Kambe a hi swone leswi humeleliki. Hi ku famba ka malembe, ntxhumu lowu ni pfuniki ku ve ku dondzra wudzrunguli bya Bibele lebyi vulavulaka hi vhanu lava swi sindzrisiki kuva va yimela Yehovha akuva a hetisisa swidumbiso swake, va ku fana na Nowa, Abrahamu, Yosefa ni van’wana. Ku tama ni hlunyela swi pfuna mine kun’we ni vhanu van’wana ku tiyiseka leswaku misava leyimpshwa yi le kusuhi. Handle ka ku ganaganeka, vamakwezru vanyingi lava ku nga khale na va tizrela Yehovha va pfumelelana na wone mazrito lawa!

18. Xana ku lavisisa ntumbuluku swi nga tiyisa lipfumelo dzrezru ka leswaku misava leyimpshwa yi ta tlhasa hi ndlela yini?

¹⁸ I ntiyiso leswaku a misava leyimpshwa a yi si tlhasa. Kambe hi xikombiso, yanakanya hi leswi kutani swi nga kone swa ku fana ni tinyeleti, minsinya, swihazri ni vhanu. A nga kone lweyi a nga hlayaka leswaku mintxhumu leyo a hi ya xivizri, kambe ku ve ni nkama lowu a swi nga li kone. Swo va kone hi leswi Yehovha a swi vumbiki. (Gn 1:1, 26, 27) Xikwembu Nkulukumba wezru a hi dumbise ku hi nyika misava leyimpshwa nakone a ta xi hetisisa xidumbiso lexo. Loko xidumbiso lexo xi hetiseka, vhanu va ta va ni wutomi lebyi hetisekiki hi lani ku nga helikiki. Hi nkama lowu Yehovha a wu bekiki misava leyimpshwa yi ta va ya xivizri ku fana ni mintxhumu leyin’wana leyi yi hi zrendzreliki.—Eza 65:17; Mpf 21:3, 4.

19. U nga dzri tiyisa hi ndlela yini lipfumelo dzraku?

¹⁹ Na ha ha yimela misava leyimpshwa, hi fanela ku yi londzrovota ha hombe mikhandlu leyi yi hi pfulekeliki akuva hi tiyisa lipfumelo dzrezru. Minkama hinkwayu kombisa ku tlangela xitizrulo. Yanakanyisisa hi ntamu wa Yehovha. Nakone minkama hinkwayu tsrhama na u khomekile hi mintizro ya moya, hi ndlela leyo, u ta va mun’we wa ‘lava diki pfindla dzra swidumbiso, hi ku pfumela ni ku tiyisela kwavu.’—Hb 6:11, 12; Ro 5:5.