1. Loko hi yanakanyisisa hi leswi Yehovha a swi vumbiki, he swini swivutiso leswi hi nga tihambaka swone?

LOKO hi yanakanyisisa hi wukulu bya wuyaku lebyi Yehovha a byi vumbiki, na hine hi nga ha titwa ku fana na mupsalma Davhida. Khambi dzrimbeni a khongote ka Yehovha a mu vutisa leswi: ‘Loko ndzri hlalela tilu dzraku, wu nga ntizro wa tintiho taku, a hweti ni tinyeleti leti u ti tumbuluxiki, ndzri ku: Xana mhunu i yini loko u ta mu dzrimuka? Ni n’wana wa mhunu i yini loko u ta mu londzrisa?’ (Ps 8:3, 4) Ku fana na Davhida, loko hi yanakanya hi ndlela leyi hi nga vatsrongo ha yone loko hi dzringanisiwa ni wuyaku, hi nga ha hlamalisiwa hi ku tiva leswaku Yehovha a ha tama a zron’weka ha hine. Hi lani hi taka swi vona ha kone, Yehovha a nge kombisa ku zron’weka hi vhanu va ku sungula ntsena, Adamu na Evha, kambe a tlheli a pfumelela leswaku va hamba xiyenge xa ndangu wake.

2. He xini xiyenge lexi Yehovha a nyikiki Adamu na Evha akuva va xi hetisisa?

² Adamu na Evha hi vone vana va ku sungula va lani misaveni va Papayi wezru lwa nga ni lizrandzru, Yehovha. A a yimele leswaku va kulisa ndangu wake, xileswo a va leleti leswi: ‘Belekanani n’wi yandzra n’wi tata misava n’wi yi fuma.’ (Gn 1:28, BX) Adamu na Evha a va fanela ku va ni vana va tlhela va hlayisa misava. Loko a ve yingiseta va tlhela va hetisisa xiyenge lexi Yehovha a va nyikiki xone, Adamu na Evha a va ta tama va va swizro swa ndangu wa Yehovha hi lani ku nga helikiki.

3. Ha yini hi nga hlayaka leswaku Adamu na Evha a va li swizro swa lisima swa ndangu wa Yehovha?

³ Adamu na Evha a va li swizro swa lisima swa ndangu wa Yehovha. Ka Amapsalma 8:5, TNM, Davhida a hlaye leswi mayelanu ni kuva Yehovha a vumbe mhunu: “U mu yentxi a va hansinyana ka tintsrumi; u mu zrwexi vukulu ni ku twala.” I ntiyiso leswaku Yehovha a nga va nyikanga vhanu wutlhazri, wutivi, ni wuswikoti bya ku fana ni bya tintsrumi. (Ps 103:20) Kambe tintsrumi leti nga  ni ntamu i tikulu ‘ku tlula’ vhanu va nyama. Swa hlamalisa! Ku hlaya ntiyiso, Yehovha a nyike vapswele vezru va ku sungula masungulu ya ku hlamalisa!

4. Ku yentxeke yini ha Adamu na Evha, nakone hi ta vona yini ka xidondzro lexi?

 ⁴ Lexi vavisaka hi leswaku Adamu na Evha a va ha li xiyenge xa ndangu wa Yehovha. Swanga hi leswi hi taka swi vona ka xidondzro lexi, leswo swi tise bindzru ledzri nga liki dzrinene ka vatukulu vavu. Nambi tanu nkongometo wa Yehovha hi vhanu a wu txintxanga. A ha djula leswaku lava va mu yingisetaka va va vanake hi lani ku nga helikiki. Ku sungula a hi buleni hi ndlela leyi Yehovha a swi kombisaka ha yone leswaku hi va lisima kwake. Hi ta tlhela hi vona leswi hi faneliki ku swi yentxa akuva hi kombisa leswaku hi djula ku va va ndangu wa Xikwembu Nkulukumba. Hi wugamu, hi ta vona matovoko lawa vana va Yehovha va lani misaveni va taka ma yamukela hi lani ku nga helikiki.

5. Hi swi kombisa hi ndlela yini leswaku ha mu tlangela Xikwembu Nkulukumba hi leswi a hi hambiki a xifanisweni xake?

⁵ Yehovha a hi hambi a xifanisweni xake. (Gn 1:26, 27) Hine vhanu hi vumbiwe a xifanisweni xa Xikwembu Nkulukumba. A hi nyike wuswikoti bya ku kombisa matsrhamela ya ku fana ni yake, lama hi pfunaka ku va muxaka wa vhanu lava a va djulaka a ndangwini wake, ya ku fana ni lizrandzru, lizrezre, ku dumbeka ni wululami. (Ps 86:15; 145:17) Loko hi lwela ku txutxela matsrhamela lawa, hi yisa lidzrumu ni ku kombisa leswaku ha mu tlangela Yehovha hi ku va a hi hambe a xifanisweni xake. (1Pe 1:14-16) Loko hi hanya hi ndlela leyi nyonxisaka Papayi wezru wa le matilweni, wutomi byezru byi nyonxisa ngopfu byi tlhela byi va ni ntlhamuxelo. Nakone hi ku va a hi hambe xifanisweni xake, Yehovha a hi nyike wuswikoti bya kuva hi ndzruluka muxaka wa vhanu lava a va djulaka a ndangwini wake.

6. Xana ndlela leyi Yehovha a tumbuluxiki misava ha yone yi swi kombisisa kuyini leswaku a va nyika lisima vhanu?

⁶ Yehovha a hi lulamisele kaya dzra ku hlawuleka. Na a nga si na hamba mhunu wa ku sungula, Yehovha a lulamisele misava a yi nyika vhanu. (Yb 38:4-6; Yr 10:12) Leswi Yehovha a nga Xikwembu Nkulukumba lweyi a nga ni lizrandzru a tlhela a hanana, a hi nyike mintxhumu yinyingi leyinene akuva hi nyonxa. (Ps 104:14, 15, 24) Loko a yimile a langusa leswi a swi vumbiki, a vone leswaku ‘afa swi swa hombe ngopfu’. (Gn 1:10, 12, 31) Akuva a komba vhanu leswaku i va lisima, Yehovha a va beke “henhla ka” mintizro hinkwayu ya ku hlamalisa leyi a yi yentxiki la misaveni. (Ps 8:6) A nkongometo wa Xikwembu Nkulukumba hi leswaku vhanu lava hetisekiki va va ni ku nyonxa hi ku bekisa hinkwaswu leswi a swi vumbiki hi lani ku nga helikiki. Xana u tolovela ku tlangela Yehovha hi xidumbiso xake xa ku hlamalisa?

7. Xana a buku dzra Yehošua 24:15 dzri swi kombisisa kuyini leswaku mhunu a ni ntsrhunxeko wa ku tihlawulela?

⁷ Yehovha a hi nyike ntsrhunxeko wa ku tihlawulela. Hi nga ha tihlawulela leswi hi djulaka ku yentxa swone hi wutomi byezru. (Dondzra Yehošua 24:15.) Wuswikoti lebyo byi vitaniwa ntsrhunxeko wa ku tihlawulela. Yehovha a nyonxa ngopfu loko hi hlawula ku mu tizrela. (Ps 84:11; Pr 27:11) Hi nga tizrisa ntsrhunxeko wa ku hlawuleka ka swiyimu swa ku siyanasiyana. Vona xikombiso lexi Yesu a hi siyeliki xone.

8. Xana Yesu a wu tizrise hi ndlela yini ntsrhunxeko wake wa ku tihlawulela?

⁸ Hi nga yetisela Yesu hi ku va hi zrangisa swivileleko swa vambeni a matsrhan’wini ya ku zrangisa swivileleko swezru. Yesu ni vadondzrisiwa vake a va kazrale ngopfu. A va djula mbangu wa ku zrula akuva va ya wisa, kambe leswo a swi kotekanga. Xitsrhungu xi va landzrile hikusa a xi djula ku dondzrisiwa hi Yesu. Kambe Yesu a nga  khunguvanyisiwanga hi leswo. A matsrhan’wini ya leswo a va tweli wusiwana. Kutani ke, Yesu a yentxe yini? ‘A sungule ku va dondzrisa leswa ku tala’. (Mr 6:30-34) Hi nga yetisela xikombiso xa Yesu hi ku tizrisa nkama ni ntamu wezru akuva hi pfuna vambeni. Loko hi yentxa leswo hi ta nyika lidzrumu Papayi wezru wa le matilweni. (Mt 5:14-16) Hi ta tlhela hi komba Yehovha leswaku hi djula ku va xiyenge xa ndangu wake.

9. I yini leswi vapswele va faneliki ku swi dzrimuka?

⁹ Yehovha a nyike vhanu wuswikoti bya ku pswala vana, ni ntsrhwalu wa mfanelo wa ku va dondzrisa ku mu zrandzra ni ku mu tizrela. Xana vapswele va yi tlangela nyiko leyi ya ku hlawuleka? I ntiyiso leswaku Yehovha a nyike tintsrumi wuswikoti bya ku hlamalisa, kambe a nga ti nyikanga a nyiko leyi. Xileswo, vapswele va fanela ku kombisa lisima ledzrikulu hi nyiko leyo ya ku wundla vana ‘hi makhatela ni madondzrisela ya Hosi [Yehovha]’. Leswi Yehovha a va dumbaka vapswele a va nyike ntizro lowu wa ku xwenga. (Ef 6:4; Dt 6:5-7; Ps. 127:3) A nhlengeletanu ya Yehovha yi pfuna vapswele hi ku va nyika switizro swinyingi leswi seketeliwiki a Bibeleni swa ku fana ni mabuku, mavhidiyu, wunanga ni swiyenge leswi kumekaka ka internet. Swi le livaleni leswaku Papayi wezru kun’we na Yesu va va nyika lisima vampshwa vezru. (Lk 18:15-17) Yehovha awa nyonxa loko a vona vapswele lava mu dumbaka na va tikazratela ku wundla vanavu va lisima. Vapswele volavo va nyika mukhandlu vanavu wa leswaku na vone va ndzruluka xiyenge xa ndangu wa Yehovha hi lani ku nga helikiki!

10-11. He wini mukhandlu lowu Yehovha a hi nyikaka wone hi ku tizrisa xitizrulo?

¹⁰ Yehovha a nyikele wutomi bya N’wanake wa lisima ngopfu akuva hi kota ku tlhela hi va xiyenge xa ndangu Wake. Hi ku ya hi leswi hi swi voniki ka  yava 4, Adamu na Evha va tsrhike ku va xiyenge xa ndangu wa Yehovha nakone swi ve tanu ni le ka vanavu. (Ro 5:12) Adamu na Evha a va nge yamukeli pfindla hikusa ve tihlawulela ku va va nga mu yingiseti Xikwembu Nkulukumba. Kambe swi li yini hi vatukulu vavu? Yehovha a va zrandzra ngopfu vhanu nakone a yentxe lulamiselo dzra ku xava lava a va ta mu yingiseta, hi ku tizrisa gandzrelo dzra N’wanake, Yesu Kriste. (Yh 3:16; Ro 5:19) Hi kola ka xitizrulo lexi hakeliwiki hi N’wana wa Xikwembu Nkulukumba lweyi a nga wuswake, 144.000 wa vavanuna va ku dumbeka va nga xaviwa swanga vana va Xikwembu Nkulukumba.​—Ro 8:15-17; Mpf. 14:1.

¹¹ Handle ka vatotiwa, vhanu vanyingi va ku dumbeka namunhla va tikazratela ku yentxa ku zrandzra ka Xikwembu Nkulukumba. Va yimela ku ndzruluka ndangu wa Xikwembu Nkulukumba ntsrhaku ka xikambelo xa wugamu xa 1.000 wa malembe. (Ps 25:14; Ro 8:20, 21) Leswi va nga ni dumbo ledzri, vhanu vanyingi va nga vitana Yehovha, Mutumbuluxi wezru, swanga “Papayi”. (Mt 6:9) Ni lava taka pfuxiwa a paradeyisini va ta va ni mukhandlu wa ku dondzra mayelanu ni leswi Yehovha a swi djulaka kwavu. Loko va hlawula ku yingiseta Xikwembu Nkulukumba, na vone va nga hamba xiyenge xa ndangu wake.

12. He xini xivutiso lexi hi taka xi hlamula swoswi?

¹² Hi lani hi swi voniki ha kone, Yehovha a kombise hi tindlela ta ku siyanasiyana leswaku a vona vhanu na va li va lisima. Kutani a xave vatotiwa swanga vanake nakone a nyike lava ‘xitsrhungu lexikulu’ mukhandlu wa leswaku va ndzruluka vanake a misaveni leyimpshwa. (Mpf 7:9) I yini leswi hi nga swi yentxaka swoswi akuva hi kombisa Yehovha swaku hi djula ku va xiyenge xa ndangu wake hi lani ku nga helikiki?

13. I yini leswi hi nga swi yentxaka akuva hi va xiyenge xa ndangu wa Xikwembu Nkulukumba? (Marka 12:30)

¹³ Komba Yehovha leswaku wa mu zrandzra hi ku mu tizrela hi mbilu yaku hinkwayu. (Dondzra Marka 12:30.) Hi kola ka timpswalu take, Yehovha a hi nyike tinyiko tinyingi. Nyiko ya lisima  leyi a nga hi nyika yone i kuva hi mu gandzrela. Hi komba Yehovha leswaku ha mu zrandzra ‘hi ku bekisa swileleto swake’. (1Yh 5:3) Loko a vulavula hi vito dzra Papayi wake, Yesu a hi zrumi ku yentxa vadondzrisiwa hi tlhela hi va babatisa. (Mt 28:19) A tlhele a hi leleta kuva hi zrandzranana. (Yh 13:35) Yehovha a ta yentxa leswaku lava va mu yingisetaka va hamba xiyenge xa ndangu wake wa misava hinkwayu.​—Ps 15:1, 2.

14. Hi nga swi kombisisa kuyini leswaku hi zrandzra vambeni? (Matewu 9:36-38; Ba-le-Roma 12:10)

¹⁴ Kombisa lizrandzru ka vambeni. Lizrandzru i tsrhamela ledzrikulu dzra lisima swinene ka Yehovha. (1Yh 4:8) Yehovha a hi kombe lizrandzru ledzrikulu swinene na hi nga si na mu tiva. (1Yh 4:9, 10) Hi nga yetisela Yehovha hi ku kombisa lizrandzru ka vhanu vambeni. (Ef 5:1) Yin’we ya tindlela ta ku kombisa leswaku hi zrandzra vhanu vambeni i ku va pfuna ku dondzra ha Yehovha na nkama wa ha li kone. (Dondzra Matewu 9:36-38.) Hi ndlela leyo hi va nyika mukhandlu wa ku va na vone va va xiyenge xa ndangu wa Xikwembu Nkulukumba. Nambi loko mhunu a babatisiwile, hi fanela ku ya mahlweni hi mu komba lizrandzru ni ku mu hlonipha. (1Yh 4:20, 21) Hi nga swi yentxisa kuyini leswo? Yin’we ya tindlela i ku va hi vona swivangelo leswinene a nga naswu. A hi fanelanga hi yanakanya leswaku a yentxe swa kukazri hi leswi a nga liki na mhaka ni vambeni. A matsrhan’wini ya leswo, hi fanela hi kombisa xitxhavu ka makwezru hi tlhela hi kombisa leswaku va tlakukile ku hi tlula.​—Dondzra Ba-le-Roma 12:10; Flp 2:3.

15. Hi mani lweyi hi fanelaka ku mu kombisa timpswalu ni wunene?

¹⁵ Kombisa wunene ni timpswalu ka vhanu hinkwavu. Loko hi djula ku vitana Yehovha swanga Papayi wezru swi djula hi hanya hi leswi a swi hlayaka a Zritwini dzrake. Hi xikombiso, Yesu a dondzrise leswaku hi fanela ku kombisa wunene ni timpswalu ka vhanu hinkwavu ku patsra ni valala vezru. (Lk 6:32-36) Minkama yimbeni hi nga ha swi vona na swi hi bindzrela ku yentxa leswo. Loko swi li tanu, hi fanela ku dondzra ku yanakanya ni ku yentxa mintxhumu ku fana na Yesu. Loko hi tikazratela ku yingiseta Yehovha ni ku yetisela Yesu hi komba Papayi wezru wa le matilweni leswaku hi djula ku hamba xiyenge xa ndangu wake hi lani ku nga helikiki.

16. Hi nga dzri sizrelelisa ku yini a vito dzra ndangu wa Yehovha?

¹⁶ Sizrelela vito ledzrinene dzra ndangu wa Yehovha. Swi tolovelekile akuva n’wana lwentsrongo a yetisela makwavu lwenkulu. Loko makwavu lwenkulu a hanya hi ku landzra minsinya ya milawu ya Bibele, a ta va xikombiso ka makwavu lwentsrongo. Kambe loko a sungula ku yentxa mintxhumu ya ku biha swi nga ha yentxeka leswaku makwavu lwentsrongo a tekelela xikombiso xake xa ku biha. Swi nga ha yentxeka hi lani ku fanaka a ndangwini wa Yehovha. Lweyi khale a a dumbeka kambe a ndzrulukiki dukwa leswo swi nga ha susumetela vambeni ku tekelela xikombiso xake lexi nga liki xinene. Kambe lava yentxaka leswo va ntxhimisa vito dzra Yehovha. (1Te 4:3-8) Xileswo, hi djula ku tingawula hi ku helela xikombiso xavu xa ku biha nakone hi nga pfumeleli ntxhumu xi hi tsrhindzreta kule ni Papayi wezru wa le matilweni lweyi a nga ni lizrandzru.

17. Hi yini mimpimiso ya ku biha leyi hi fanelaka ku yi tingawula, nakone ha yini?

¹⁷ Dumba Yehovha ku nga li mintxhumu leyi vonekaka. Yehovha a hi dumbisa leswaku loko hi zrangisa Mfumu wake ku sungula hi tlhela hi mu yingiseta, a ta hi nyika swakuda, mpahla ni mbangu wa ku yetlela. (Ps 55:22; Mt 6:33) Na ha ha ni leswo a miyanakanywini, a hi fanelanga hi yanakanya leswaku mintxhumu leyi vonekaka yi nga hi sizrelela kumbe yi hi nyika ku tsrhava. Ha swi tiva leswaku akuva hi kuma ku tsrhava ka xihlayelamfuzri swi djula kuva hi ya mahlweni hi yentxa ku zrandzra ka Yehovha. (Flp 4:6, 7) Nambi loko hi ni wuswikoti bya ku xava mintxhumu yinyingi, hi fanela ku kambisisa leswaku hi ni  ntamu ni nkama akuva hi tizrisa ni ku hlayisa mintxhumu leyo. Xana hi zrangisa mintxhumu yezru leyi vonekaka? Hi fanela ku dzrimuka leswaku Yehovha a yimela leswaku hi va swizro leswi kulisaka ndangu wake. Leswo swi djula ku hlaya leswaku a hi fanelanga hi pfumelela ntxhumu xi hi hingeleta. Hine a hi djuli ku fana ni djaha ledzriya dzri nga tsrhika mukhandlu wa ku tizrela Yehovha ni wa ku vitaniwa n’wana wa Xikwembu Nkulukumba​—hinkwaswu leswi hi mhaka ya leswi a a zrangisa mintxhumu leyi a a li nayu!​—Mr 10:17-22.

18. Hi wini mukhandlu ni matovoko lawa lava yingisetaka va taka ma kuma?

¹⁸ Vhanu lava yingisetaka va ta va ni tovoko ledzrikulu swinene—dzra ku zrandzra ni ku tizrela Yehovha hi la ku nga helikiki! Lava nga ni dumbo dzra ku hanya hi la ku nga helikiki a misaveni na vone va ta nyonxa hi ku hlayisa Misava, ku nga kaya ledzri hetisekiki ledzri Yehovha a dzri hambeliki vhanu. Ku nga li khale, loko hi tava na hi fumiwa hi Mfumu wa Xikwembu Nkulukumba, misava yi ta pfuxetiwa yi va leswi Xikwembu Nkulukumba a a swi djulisa xiswone. Yesu a ta helisa swikazratu hinkwaswu leswi humeleliki ntsrhaku ka loko Adamu na Evha va tsrhike ku va swizro swa ndangu wa Xikwembu Nkulukumba. Yehovha a ta tlhela a pfuxa lava fiki nakone va ta va ni mukhandlu wa ku hanya a misaveni leyi taka va yi ndzrulutiwi yi va paradeyisi. (Lk 23:42, 43) Nkama lowu lava yingisetaka va yaka va hetiseka, mun’wana ni mun’wana wavu a ta ya a kuma ‘wukulu ni ku twala’ hi lani Davhida a tsraliki ha kone.​—Ps 8:5.

19. I yini leswi u tiyimiseliki ku swi yentxa?

¹⁹ Loko u hamba xiyenge xa ‘xitsrhungu lexikulu’ u ni dumbo dzra ku hlamalisa. Yehovha awa ku zrandzra nakone a djula u va xiyenge xa ndangu wake. Xileswo, yentxa hinkwaswu leswi u nga swi kotaka akuva u nyonxisa Xikwembu Nkulukumba. Tlangela nyiko ya ku gandzrela Papayi waku lweyi a zrandzrekaka wa le tilweni nakone nyika lisima dumbo dzra leswaku u ta mu dzrumisa hi lani ku nga helikiki!