Xana u dondzre ha hombe tinhlokomhaka ta Xihondzro Xa Ku Zrindzra ta lembe ledzri? Xileswo, dzringisa ku hlamula swivutiso leswi:

Ka Amapsalma 103:8 hi kuma leswaku Yehovha a ni ‘timpswalu’ nakone ‘a tali hi lizrandzru’. Xana leswo swi hi tiyisekisa yini?

Leswi a nga ni timpswalu, Yehovha a swi djula ngopfu ku dzrivalela swidoho swezru, nakone lizrandzru dzrake dzra ku dumbeka dzri yentxa leswaku Yehovha a tinyiketa akuva a hi pfuna. Hi fanela ku mu yetisela.​—Xihondzro Xa Ku Zrindzra 01/2021 p. 21.

Ha yini Yehovha a simeke wunhloko?

Hikusa awa hi zrandzra. A wunhloko byi yentxa leswaku hinkwaswu a ndangwini wa Yehovha swi famba hi ndlela leyi zruliki ni leyi hlelekiki. Loko a ku nge na wunhloko, a swi ta kazrata ku tiva leswaku hi mani lweyi a fanelaka ku teka swiboho ni ku yentxa leswaku swi landzriwa.​—Xihondzro Xa Ku Zrindzra 02/2021 p. 3.

Ha yini vakriste va fanela ku tivonela loko va tizrisa ma-aplikativhu ya ku zrumela mamensaji?

Loko mhunu a djula ku tizrisa ma-aplikativhu ya ku zrumela mamensaji, a fanela ku langa leswaku a ta bula na mani, ngopfungopfu loko ntlawa wu li wukulu. (1Tm 5:13) Handle ka leswo, hi fanela ku tivonela akuva hi nga hangalasi madzrimi kumbe ku xolola vamakwezru akuva hi hamba mabindzru.​—Xihondzro Xa Ku Zrindzra 03/2021 p. 31.

Xana he swini swin’we swa swivangelo leswi yentxiki Yehovha a pfumelela Yesu kuva a fa hi ndlela leyi vavisaka?

Xa ku sunguka, hi leswaku Yesu a hayekiwi a mhandzrini akuva a huluxa va-Israyele ka xizruku. (Ga 3:10, 13) Xivangelo ximbeni hi leswaku Yehovha a a li ku wupfiseni ka Yesu akuva a va Muprista Lwenkulu a nkameni lowu taka. Xivangelo xa wugamu, hi leswaku ku va Yesu a dumbeka ku ya tlhasa wugamu swi kombise leswaku vhanu va nga swi kota ku dumbeka ka Yehovha nambi loko va dzringiwa hi ndlela leyikulu. (Yb 1:9-11)​—Xihondzro Xa Ku Zrindzra 04/2021 pp. 16-17.

I yini leswi nga hi pfunaka akuva hi zrezrela vhanu lava swi kazrataka ku va kuma makaya?

Hi nga zrezra hi minkama leyi swi nabyalaka ku kuma vhanu a makaya kumbe ku zrezra hi minkama leyi hambaniki. Nakone hi nga zama ku yentxa swimbeni swa ku fana ni ku tsrala karta.​—Xihondzro Xa Ku Zrindzra 05/2021 pp. 15-16.

Xana Pawulo a a djula ku hlaya swa ku yini loko a ku: ‘Hi nawu ndzri fili ku nawu?’ (Ga 2:19)

A Nawu wa Moxe a wu swi beka a livaleni leswaku vhanu a va nga hetisekanga nakone a va vilela ku huluxiwa. Handle ka leswo, a wu va kokela ka Kriste. (Ga 3:19, 24) Hi mhaka leyo, Pawulo a pfumele Kriste, hi ndlela leyo, a ‘fili ku nawu’ leswi liki, a a nga ha fanelanga a landzra Nawu.​—Xihondzro Xa Ku Zrindzra 06/2021 p. 31.

Yehovha a hi nyika xikombiso lexinene xa ku tiyisela hi ndlela yini?

Yehovha a tiyiselela ku va vito dzrake dzri ntxhimisiwile, vhanu va nga pfumele wuhosi byake, ku xandzruka ka van’we ka vana vake, ku fa ka vanghanu vake, wubihi ni ku kala wululami a misaveni kun’we ni honeteliwa ka mintxhumu leyi a yi vumbiki.​—Xihondzro Xa Ku Zrindzra 07/2021 pp. 9-12.

Xana Yosefa a hi siyele xikombiso lexinene xa ku lehisa mbilu hi ndlela yini?

A tiyiselile nambi leswi a khomiwiki hi ndlela leyi pfumalaka wululami hi vamakwavu vake. Yosefa a lumbetiwe leswaku a yentxe ntxhumu lowu a kalaka a nga wu yentxanga nakone a tsrhame djele ku dzringana nkama wunyingi.​—Xihondzro Xa Ku Zrindzra 08/2021 p. 12.

Xana he kwini ku tsrekatsreka ka ku fanekisela loko kombisiwaka ka Hagai 2:6-9, 20-22?

Matiko a ma yanguli hi ndlela leyinene loko hi zrezra madzrungula lamanene. Nambi tanu, vhanu vanyingi va kokiwa ka ntiyiso. Ku nga li khale, matiko ma ta tsrekatsreka loko ma helisiwa.​— Xihondzro Xa Ku Zrindzra 09/2021 pp. 15-19.

Ha yini hi nga fanelanga hi godola ku zrezra?

Yehovha a vona ku tikazrata kwezru loko hi zrezra nakone a nyonxa swinene hi leswo. Loko hi nga godoli, hi ta hakeliwa hi misava leyi nga helikiki.​—Xihondzro Xa Ku Zrindzra 10/2021 pp. 25-26.

Xana a buku dzra Levitika ndzrima 19 dzri hi pfuna hi ndlela yini ku landzra mazritu lama liki: ‘Xwengani a mahanyeleni yenu hinkwawu?’ (1Pe 1:15)

Swi tikomba na ndzrimana leyi yi seketeliwe ka Levitika 19:2. A ndzrima 19 yi khanela hi tindlela leti hi nga tizrisaka ha tone mazritu lama nga ka 1 Petros 1:15 a wuton’wini byezru.—Xihondzro Xa Ku Zrindzra 12/2021 pp. 3-4.