1. He dzrini lisima ledzri pawu a dzri li na dzrone a minkameni ya ku tsraliwa ka Bibele?

 A PAWU a a li swone swakuda swa lisima ka vhanu lava ku vulavuliwaka ha vone Bibeleni. (Gen. 14:18; Luk. 4:4) Phela a pawu a dzri li dzra lisima lakakuva minkama yin’wana a Bibele dzri tizrisa zritu “pawu” akuva dzri vulavula hi swakuda. (Mat. 6:11; Mint. 20:7) Yesu a tizrise pawu ka mahlolana yake mabidzri lawa ma tiviwaka ngopfu swinene. (Mat. 16:9, 10) Byin’we bya wudzrunguli lebyo hi byi kuma ka Yohane ndzrima 6. A nkama lowu hi kambisisaka wudzrunguli lebyi hi ta djula ku susa tidondzro leti hi nga ti tizrisaka namunhla wa siku.

2. Xana i ka xiyimu xini lani vhanu a va djula swakuda?

² Nstrhaku ka loko vapostola va Yesu va hete ntizro wa ku zrezra, va khwele botini kun’we na Yesu va pela hi lwandle dzra Galileya akuva va kota ku wisa. (Mar. 6:7, 30-32; Luk. 9:10) Va tlhase ka mbangu lowu zruliki lowu kumekaka kusuhi ni Betsaida, kambe ku nge kungani ku tlhasetela vhanu vanyingi ngopfu swinene va hlengeletana mbangu wun’we. Yesu a tinyike nkama wa ku va hi lizrandzru a va dondzrisa mayelanu ni Mfumu wa Xikwembu Nkulukumba kun’we ni ku daha lava a va vabya. Kambe leswi a dzri ya dzri pela, a vadondzrisiwa a va vindlavindleka hi leswaku a swi ta kumiwa kwini swakuda swa ku phamela vhanu lavo hinkwavu. Swi nga yentxeka van’we kwavu a va teke swakudanyana switsrongo, kambe ntalu wavu a swi djula kuva va ya ka xidoropana lexiayani akuva va ya djuletela swakuda. (Mat. 14:15; Yoh. 6:4, 5) I yini leswi Yesu a a ta swi yentxa?

HI HLOLANA YESU A YENTXA KU VA NI PAWU

3. I yini leswi Yesu a swi byeliki vapostola kuva va swi yentxela vhanu? (Tlhela u vona mufoto wu nga ka kapa.)

³ Yesu a byele vapostola vake a ku: “Va nga fambi, va nyikani swakuda n’wine.” (Mat. 14:16) Kambe leswi a ku ni kolomu ka 5.000  wa vavanuna, ku yentxa leswo a swi tikomba na swi nge ti koteka. Nakone loko hi pastra vavasati kun’we ni vatrsongwana, swi nga yentxeka a ku ni kolomu ka 15.000 wa vhanu lava a va vilela swakuda. (Mat. 14:21) Andreya a te: “Hi lexi xidjahatana xi nga ni ntlhanu wa mapawu ni swihlampfana swibidzri. Kambe swi ta pfuna yini ka vhanu hinkwavu lava?” (Yoh. 6:9) Hi ntolovelo a mapawu lawa ma hambiwiki hi sevhada a ma diwa hi swisiwana ni vhanu van’wana. Nakone swi nga yentxeka a tihlampfi letitsrongo a ti txheliwe munyu ti tlhela ti womisiwa. Nambitanu, leswi xidjatana lexo a xi li na swone a swi li switsrongo swinene lakakuva a swi nge ti va yaneta vhanu lava hinkwavu.

4. I yini leswi hi swi dondzraka ka Yohane 6:11-13? (Tlhela u vona ni mifoto.)

⁴ Leswi a a djula ku va komba malwandla vhanu lava hinkwavu, Yesu a va byele kuva va tsrhamisa ka byanyi hi mintlawa. (Mar. 6:39, 40; dondzra Yohane 6 :11-13.) A Bibele dzri hi byela leswaku ntsrhaku ka leswo, Yesu a khongotile ka Papayi wake akuva a tlangela mapawu kun’we ni tihlampfi. Hi ku yentxa leswo, a swi beke livaleni leswaku i Xikwembu Nkulukumba lweyi a a va nyika swakuda ni leswaku yene a a mu tlangela hi kola ka swone. Leswo swi hi dzrimuxa lisima dzra ku va hi yetisela Yesu hi ku va hi khongota na hi nga si na da swi nge na mhaka ni leswaku hi wuswezru, hi le xikole, hi le ntizrweni kumbe hi kun’we ni ndangu wezru. Ntsrhaku ka leswo, Yesu a byele vadondzrisiwa vake kuva va yavela vhanu swakuda. A vhanu va dile va tlhela va xuzra. A swakuda a swi li swinyingi lakakuva va hluleke ni ku swi heta. Kambe Yesu a a nga swi djuli kuva swakuda leswo swi txukumetiwa. Xileswo, Yesu a byele vadondzisiwa vake kuva va hlengeleta leswi saliki akuva swi diwa hi nkama wun’wana. Yesu a yi tizrise hi wutlhazri mintxhumu leyi a a li na yone. Kutani hi ku yetisela Yesu hi djula ku yi tizrisa hi wuthazri mintxumu leyi hi nga na yone. Vapswele, swi ngo yini kuva mi tlhela mi  kambisisa wudzrunguli lebyi kun’we ni vanenu, akuva mi va dondzrisa lisima dzra ku khongota na va nga si na da, ni ku kombisa vhanu van’wana malwandla hi lani Yesu a yentxiki ha kone?

5. Xana vhanu va yentxe yini loko va vona leswi Yesu a swi yentxiki nakone yene a yangulise kuyini?

⁵ A vhanu va hlamalisiwe hi madondzrisela ya Yesu ni mahlolana lawa a ma yentxiki. Leswi a va swi tiva leswaku Moxe a hlaye leswaku a ku ta va ni muprofeta lwenkulu, swi nga yentxeka a va tivutisa leswaku xana Yesu hi ye muprofeta yelweyo? (Deut. 18:15-18) Swi nga yentxeka a va yanakanya leswaku Yesu a a ta va mufumi lwenene ngopfu. Lweyi a a ta yentxa leswaku Vaisrayele hinkwavu va va ni swakuda. Xileswo a va djula ku khoma Yesu “va mu yentxa hosi”. (Yoh. 6:14, 15) Loko Yesu a e va pfumelela kuva va mu yentxa hosi, a a ta va a patsreki ka politika dzra Vayuda ledzri a dzri zrangeliwa hi Varoma. Kambe Yesu a a nge ti txhuka a swi yentxa leswo! A matrshan’wini ya leswo, ‘e suka a ya nhaveni na a li wuswake’. Nambileswi a a lavisana ni nkutxetelo lowukulu, yene a a nge ti txhuka a nghenelela ka politika. Leswo swi hi dondzrisa mhaka ya lisima swinene!

6. Xana hi nga xi yetiselisa kuyini xikombiso xa Yesu? (Tlhela u vona ni mufoto.)

⁶ Swi le livaleni leswaku vhanu va nga ti hi kombela kuva hi va nyika swakuda hi hlolana, ku va daha kumbe ku hi kombela kuva hi va hosi yavu. Kambe va nga ha hi hlohlotela ku vhota, kumbe ku va hi seketela mhunu lweyi va pfumelaka leswaku a ta yampswisa wutomi bya vhanu. Nambitanu, Yesu a hi siyele xikombiso. Yene a yalile ku nghenelela ka politika, lakakuva nstrhaku ka leswo a hlaye a ku: “A Mfumu wanga a hi wa misava leyi.” (Yoh. 17:14; 18:36) Swanga vakriste hi ta va na hi yentxa swone loko hi yetisela xikombiso  xa Yesu ka mayanakanyela yezru ni le ka swiyentxo swezru. Ku fana na Yesu, hi seketela Mfumu wa Xikwembu Nkulukumba. Hi byela van’wana mayelanu na wone hi tlhela hi khongota kuva wu ta. (Mat. 6:10) Ka ha ni swin’wana leswi hi nga swi dondzraka ka hlolana ledzri Yesu a dzri yentxiki. A hi swi kambisiseni!

“NTLHAMUXELO WA HLOLANA LEDZRI A DZRI YENTXIKI HI MAPAWU”

7. Xana i yini leswi Yesu a swi yentxiki nakone a vadondzrisiwa vake va yangulise kuyini? (Yohane 6:16-20)

⁷ Ntsrhaku ka loko Yesu a phamele vhanu, a byele vapostola vake kuva va suka va ya Kapernawume hi boti, kambe yene a suke a ya nhaveni ku yentxela leswaku a switsrhungu swi nga mu khomi akuva swi mu yentxa hosi. (Dondzra Yohane 6:16-20.) Na va li botini ku sungule xidzedze lexikulu xi tlhela xi vanga magandlkati lamakulu. Yesu a va yela na a famba henhla ka mati, kutani a zramba Petro kuva na yene a famba henhla ka mati. (Mat. 14:22-31) Loko Yesu a nghena botini, a xidzedze xi yima. A vadondzrisiwa va hlamala lakakuva va ku: “Hakunene u n’wana wa Xikwembu Nkulukumba.” a (Mat. 14:33) Swa hlamalisa ku xiya leswaku leswo ve swi hlaya ntsrhaku ka loko va mu vone a famba henhla ka mati, kambe a va swi hlayanga loko a phamela xitsrhungu swakuda. Xiya leswi Marka a swi hlayiki loko a vulavula hi wudzrunguli lebyi: “[A vapostola] va hlamala ngopfu swinene, hikusa a va nga wu twisisanga ntlhamuxelo wa hlolana ledzri a dzri yentxiki hi mapawu. A timbilu tavu a ti tama ti nga swi twisisi.” (Mar. 6:50-52) A vadondzrisiwa va hluleke ku twisisa leswaku Yehovha a nyike Yesu wuswikoti lebyikulu bya ku yentxa mahlolana. Ntsrhakunyana ka leswo, Yesu a tlhele a vulavula hi hlolana ledzri dzra mapawu a va a hi siyela dondzro leyikulu.

8-9. Ha yini vhanu va djuletele Yesu? (Yohane 6:26, 27)

⁸ Vhanu lava Yesu a va phameliki swakuda va kombise leswaku a vo djula ntsena ku yanelisa swivileleko swavu ni ku navela kwavu. Va swi kombise hi ndlela yini? Mundzruku ka kone, vhanu va ye lani Yesu a va phameliki kone swakuda kambe Yesu kun’we ni vapostola a va sukile, xileswo vhanu va khwele maboti lawa a ma pfa he Tiberiya va kongoma a Kapernawume va ya djuletela Yesu. (Yoh. 6:22-24) A nga va leswaku va yentxe leswo hi leswi a va djula ku dondzrela hi ta Mfumu wa Xikwembu Nkulukumba? Ka kwini! A vo djula ntsena ku phameliwa. Hi swi tivisa kuyini leswo?

⁹ Xiya leswi yentxekiki loko vhanu va ye kuma Yesu a kusuhi ni Kapernawume. Yesu a va byele hi ku kongoma leswaku ve mu djuletela ntsena hi leswi a va djula ku da. Yesu a swi xiyile leswaku ‘ve mu djuletela hi leswi va diki mapawu va xuzra’ ku nga “swakuda leswi bolaka”. A va tsratsriye ku tizrela swakuda “leswi nyikaka wutomi lebyi nga helikiki”. (Dondzra Yohane 6:26, 27.) Yesu a va byele leswaku Papayi wake a a ta hamba malulamiselo ya leswaku swakuda leswo swi kumeka. Swi nga yentxeka vhanu swi va hlamalise ngopfu loko va yingela leswaku ku ni swakuda leswi nga va nyikaka wutomi lebyi nga helikiki! I swakuda muni leswi a swi ta va nyika wutomi lebyi nga helikiki nakone a vayingiseti va Yesu a va ta swi kumisa kuyini swakuda swoleswo?

10. I yini leswi vhanu a va fanela ku swi yentxa akuva va “kuma wutomi lebyi nga helikiki”?

¹⁰ Swi tikomba na Vayuda volavo a va djula ku tiva leswaku i yini leswi a va fanela ku swi yentxa akuva va nyikiwa swakuda leswo. Swi nga yentxeka va yanakanye hi leswi Nawu wa Moxe a wu hlaya leswi a va fanela ku swi yentxa. Kambe Yesu a va byela a ku: “Akuva mi yamukeleka ka Xikwembu Nkulukumba, mi fanela ku kombisa lipfumelo ka lweyi Xikwembu Nkulukumba a mu zrumiki.” (Yoh. 6:28, 29) A va fanela ku yentxa leswo akuva va kuma “wutomi lebyi nga helikiki.” (Yoh. 3:16-18, 36) Nakone hi ku famba ka nkama Yesu  a vulavule hi swin’wana leswi a swi vileleka akuva mhunu a va ni wutomi lebyi nga helikiki.—Yoh. 17:3.

11. Xana a Vayuda va swi kombise hi ndlela yini leswaku a vo djula ku da ntsena? (Amapsalma 78:24, 25)

¹¹ A Vayuda a va nga pfumeli leswaku a va fanela ku va ni lipfumelo ka Yesu. Va mu vutise va ku: “He dzrini hlolana ledzri u nga dzri yentxaka akuva hi dzri vona kutani hi va ni lipfumelo kwaku?” (Yoh. 6:30) Va hlaye leswaku a vhanu a minkameni ya Moxe a va yamukela mana hi hlolana siku dzrin’wana ni dzrin’wana akuva va da. (Nehem. 9:15; dondzra Amapsalma 78:24, 25.) Swi le livaleni leswaku vone a vo zron’wekela ku yaneliseka hi swakuda swa siku ni siku ntsena. Nakone loko ntsrhaku ka leswo Yesu a game a vulavula hi “pawu dzra ntiyiso ledzri pfaka tilweni”, ledzri ku hambana ni mana a dzri ta va nyika wutomi lebyi nga helikiki, vone a va zanga va vutisa leswaku a swi tlhamuxela yini swoleswo. (Yoh. 6:32) Va beke ngopfu miyanakanyu ka swivileleko swa siku ni siku swa le nyameni lakakuva va hluleka ku twisisa mintiyiso ya lisima leyi Yesu a a zama ku va dondzrisa yone. Xana hine hi nga dondzra yini ka leswo?

I YINI LESWI HI FANELAKA KU ZRANGISA SWONE NGOPFU?

12. Xana Yesu a swi kombise hi ndlela yini leswi nga swa lisima ngopfu?

¹² Ntxhumu lowu hi wu dondzraka ka Yohane ndzrima 6 hi leswaku a swivileleko swezru swa le moyeni hi swone swi fanelaka ku va swa lisima a wuton’wini byezru. Mhaka leyi Yesu a vulavule ha yone loko a dzringiwe hi Sathana. Ka xiyentxakalu lexo, Yesu a kombise leswaku a ku yingiseta Yehovha a ku li swone swa lisima ngopfu ku tlula ku yanelisa swivileleko swake swa siku ni siku. (Mat. 4:3, 4) Handle ka leswo, ka dondzro yake ya le nhaveni Yesu a dondzrise leswaku i swa lisima ku tikazratela ku va ni wuxaka lebyinene na Xikwembu Nkulukumba. (Mat. 5:3) Xileswo hi fanela ku tivutisa leswi: Xana ndlela leyi ni hanyaka ha yone ya swi kombisa leswaku a wuxaka byanga na Yehovha hi wone ntxhumu wa lisima ku tlula ku yanelisa swivileleko swanga?

13. a) Ha yini swi nga bihanga ku tikholisa hi swakuda? b) He xini xibasopiso lexi Pawulo a hi nyikiki xone? (1 Vakorinte 10:6, 7, 11)

¹³ A swi bihanga ku va hi khongota hi kombela kuva hi kuma mintxhumu leyi hi yi vilelaka siku ni siku, nambi ku tikholisa hi mintxhumu leyinene leyi hi nga na yone na swone a swi bihanga. (Luk. 11:3) A Bibele dzri li i swinene kuva mhunu ‘a da, a nwa’ a titsrhavela ntizrweni wake. A Bibele dzri patsra ni ku hlaya leswaku leswo ‘swi huma a vokweni dzra Xikwembu Nkulukumba’. (Ekles. 2:24; 8:15; Yak. 1:17) Kambe swi djula hi tivonela akuva hi nga pfumeleli swivileleko swezru swa le nyameni swi va wone ntxhumu wa lisima a wuton’wini byezru. Hi nga dondzra swa kukazri ka leswi mupostola Pawulo a swi tsraleliki vakriste va le Korinte. A vulavule hi leswi yentxekeliki Vaisrayele ku patsra ni leswi yentxekiki kusuhi ni Nhava ya le Sinayi. Ntsrhaku ka leswo, a hi basopise kuva “hi nga naveli mintxhumu ya ku biha hi lani vone va yentxiki ha kone”. (Dondzra 1 Vakorinte 10:6, 7, 11.) Nambileswi Yehovha a a yentxe hlolana kuva Vaisrayele va va ni swakuda, vone a va ni ku navela lokukulu ka ku kuma swakuda lakakuva leswo swi koxe nambi wutomi byavu. (Atinhl. 11:4-6, 31-34) Handle ka leswo hikuva va gandzrele zrole dzra woru, va kombise leswaku vone a vo zron’wekela ku da, ku nwa ni ku hungata a matsrhan’wini ya ku yingiseta Yehovha. (Eks. 32:4-6) Pawulo a vulavule hi Vaisrayele lava akuva a basopisa vakriste lava a va hanya ka nkama lowu a ku sale kutsrongo kuva tempele kun’we ni Yerusalema swi helisiwa. Na hine hi hanya ka minkama leyi ke ke sala kutsrongo kuva xiyimu lexi xi helisiwa. Xileswo hi fanela ku swi tekela nhlokweni switsratsriyo leswi nyikeliwiki hi Pawulo hi tlhela hi tivonela ku va hi nga yentxi swihoxo leswi yentxiwiki hi Vaisrayele.

14. I yini leswi hi nga swi yimelaka a misaveni leyimpshwa mayelanu ni swakuda?

 ¹⁴ Loko Yesu a hi dondzrisa ku khongota akuva hi kombela “swakuda swezru swa siku dzra namunhla” yene a patsre ni ku hlaya leswaku hi fanela ku khongota hi kombela kuva ku zrandzra ka Xikwembu Nkulukumba ‘ku yentxeka lani misaveni, hi lani ku yentxekaka ha kone matilweni’. (Mat. 6:9-11) Yanakanya ndlela leyi misava yi taka va ha yone loko leswo swi yentxeka! A Bibele dzri hlaya leswaku xin’wana lexi ku nga ku zrandzra ka Xikwembu Nkulukumba mayelanu ni misava i ku va misava yi va ni swakuda swinyingi. Ezaya 25:6-8, yi kombisa leswaku a vhanu va ta tikholisa hi fexta dzra tinyama leti noniki. Amapsalma 72:16 yi hi dumbisa leswi: ‘Ku ta va ni mpfunu a tikweni, a swihlungweni swa tinhava.’ Xana u swi languselile ku sweka swakuda leswi ku nadzrikelaka kumbe ku dzringisa ku sweka mixaka yin’wana ya swakuda? Nakone u nga dzrivale leswaku u ta kota ku byala minsinya ya mawuvha u va u da mihandzru ya yone. (Eza. 65:21, 22) Nakone vhanu hinkwavu va ta tikholisa hi mintxhumu leyinene.

15. I yini leswi lava taka pfuxiwa ku feni va taka swi dondzra? (Yohane 6:35)

¹⁵ Dondzra Yohane 6:35. Tlhela u yanakanya hi vhanu lava diki mapawu ni tihlampfi leswi Yesu a yentxiki leswaku swi va kone hi hlolana. Nambileswi a nkameni lowo va kalaka va nga kombisanga lipfumelo ka Yesu swi nga yentxeka na vhanu lavo va ta pfuxiwa a ku pfuxiweni ka vafi nakone swi nga yentxeka u ta va ni mukhandlu wa ku tiva van’we ka vone. (Yoh. 5:28, 29) Vhanu volavo swi ta djula kuva va dondzra ntlhamuxelo wa mazritu lawa Yesu a va byeliki wone loko a ku: “Hi mine pawu dzra wutomi. Lweyi a taka kwanga a nge he tlheli a twa ndlala nikutsrongo.” Swi ta djula kuva va kombisa lipfumelo ka xitizrulo xa Yesu. Va kombisa lipfumelo ka leswaku Yesu a nyikele wutomi byake hi kola kwavu. Nakone a nkameni lowo ku ta va ni ntizro wukulu wa ku dondzrisa vhanu lava va taka pfuxiwa kun’we ni hinkwavu lava va taka pswaliwa a misaveni leyimpshwa. Swi ta hi tisela ku nyonxa lokukulu, ku dondzrisa vhanu lavo mintxhumu ya lisima mayelanu ni ku zrandzra ka Xikwembu Nkulukumba! Ku yentxa leswo swi ta hi nyika ku nyonxa lokukulu loku tlulaka loku hi vaka na kone loko hi da swakuda. A swi ganaganekisi leswaku wuxaka byezru na Yehovha ku ta va wone ntxhumu wa lisima ngopfu a wuton’wini byezru.

16. I yini leswi hi taka swi kambisisa ka nhlokomhaka leyi landzrelaka?

¹⁶ Ka xidondzro lexi hi vone yin’we ya mintxhumu leyi hi yi dondzraka ka wudzrunguli lebyi nga ka buku dzra Yohane ndzrima 6, kambe Yesu a a ha ni swinyingi swa ku hi dondzrisa mayelanu ni “wutomi lebyi nga helikiki”. A Vayuda lava Yesu a vulavuliki na vone a swi djula kuva va swi yingiseta ha hombe leswi a a hlaya swone. Na hine hi fanela ku yentxa hi la ku fanaka. Xileswo ka xidondzro lexi landzrelaka hi ta ya mahlweni hi kambela wutsrhokotsrhoko byin’wana mayelanu ni buku dzra Yohane ndzrima 6.