Pawulo a tsralele mutizrikulobye Timotewu. Lweyi na yene a a li nkulu wa bandla a ku: “Ni ku byela leswi a mahlweni ka Xikwembu Nkulukumba, ka Kriste kun’we ni ka tintsrumi leti hlawuliwiki, leswaku u landzrelelisa swileleto leswi, na u nga na xihlawuhlawu kumbe ku zrandzra mun’we ku tlula mun’wana.”—1 Tim. 5:21.

Akuva swi hi pfuna ku tiva leswaku he tini tintsrumi leti ku vulavuliwaka ha tone ka ndzrimana leyi, hi ta zranga hi ku kambisisa leswaku he tini leti ti kalaka ti nga patsreki ka ntlawa lowu. Swi le livaleni leswaku lava 144.000 a hi vone lava ku vulavuliwaka ha vone lani. Loko Pawulo a tsralela Timotewu, a vakriste lava totiwiki akuva va ya hanya matilweni a va nga si na sungula ku pfuxiwa. A vapostola kun’we ni vakriste lavan’wana a va nga si na va swivumbiwa swa moya, xileswo a swi nge na ku koteka kuva va va “tintsrumi leti hlawuliwiki”.—1 Kor. 15:50-54; 1 Tes. 4:13-17; 1 Yoh. 3:2.

Handle ka leswo, a “tintsrumi leti hlawuliwiki” a hi tone leti tsrhikiki ku yingiseta a masikwini ya Nowa. A tintsrumi leti kalaka ti nga yingisetanga a masikwini ya Nowa ti yime na Sathana ti va ti ndzruluka mademona ni valala va Yesu. (Gen. 6:2; Luk. 8:30, 31; 2 Pet. 2:4) A nkameni lowu taka, tone ti ta pfaleliwa a xikheleni xa ku yenta ku dzringana 1.000 wa malembe, ntsrhaku ka leswo ti ta helisiwa kun’we na Sathana.—Yud. 6; Mpful. 20:1-3, 10.

Hi ndlela leyo, swi komba leswaku a “tintsrumi leti hlawuliwiki”, leti Pawulo a vulavuliki ha tone, i tintsrumi leti ti tizraka na “Yehovha na Yesu Kriste” a matilweni.

Ku ni tintsrumi ta tinyingi ngopfu swinene leti dumbekiki ka Xikwembu Nkulukumba. (Heb. 12:22, 23) Swi tikomba na Yehovha a nyika tintsrumi swiyavelo leswi hambaniki. (Mpful. 14:17, 18) Hi xikombiso, khambi dzrin’wana Yehovha a zrume ntsrumi yin’we ntsena akuva yi ya helisa 185.000 wa masotxha ya Vaasiriya. (2 Tih. 19:35) Kasi a tintsrumi letin’wana swi nga yentxeka Yehovha a a ti nyike xiyavelo xa ku va ‘a Mfun’wini wa [Kriste] ti ta hlengeleta mintxhumu hinkwayu leyi dohisaka vhanu ni hinkwavu lava yentxaka leswi lwisanaka ni nawu. (Mat. 13:39-41) Kasi tintsrumi tin’wana ti yaveliwe ku ‘hlengeleta vahlawuliwa akuva va ya hanya matilweni’.(Mat. 24:31) Nakone tin’wana ti yaveliwa kuva ti hi ‘bekisa tindleleni tezru hinkwatu’.—Amaps. 91:11; Mat. 18:10; Dzringanisa ni Matewu 4:11; Luka 22:43.

A “tintsrumi leti hlawuliwiki” leti ku vulavuliwaka ha tone ka 1 Timotewu 5:21 swi nga yentxeka ku li tintsrumi leti a ti yaveliwe kuva ti hlayisa mabandla. Ka mongo wa ndzrimana leyi, Pawulo a nyikele swilayu swa ndlela leyi vakulu va nga hlayisaka bandla ha yone a tlhela a kombisa leswaku a bandla dzri fanela ku hlonipha vakulu, kasi a vakulu va fanela ku hetisisa wutiyanguleli byavu na va nge na “xihlawuhlawu” kumbe ku zrandzra mun’we ku tlula mun’wana. Nakone a va fanelanga va teka swiboho hi magugu. Ntsrhaku ka leswo, Pawulo a nyikele xivangelo xa lisima xa kuva vakulu va landzra xitsratsriyo xake. A hlaye leswaku a vakulu va tizrela vamakwavu “mahlweni ka Xikwembu Nkulukumba na Kriste kun’we ni ka tintsrumi leti hlawuliwiki”. Leswo swi djula ku hlaya leswaku Yehovha, Yesu kun’we ni tintsrumi va yi vona ndlela leyi vakulu va hlayisaka bandla ha yone. Xileswo, swi le livaleni leswaku tintsrumi tin’wana ti yaveliwa ku hlayisa mabandla. Yin’we ya mintizro leyi ti yi yentxaka, i ku sizrelela malandzra ya Xikwembu Nkulukumba, ti vonelela ntizro wa ku zrezra ni ku dzrungulela Yehovha leswi yentxekaka.—Mat. 18:10; Mpful. 14:6.