Xana u ti dondzre ha hombe tinhlokomhaka ta Xihondzro Xa Ku Zrindzra ta lembe ledzri? Kutani, vona kumbe u nga swi kota ku hlamula swivutiso leswi landzrelaka:

He xini xikombiso lexi Yehovha a hi bekelaka xone mayelanu ni ndlela leyi hi hanyisanaka ha yone ni vamakwezru va xisati?

Yehovha a nga va kombisi xihlawuhlawu vavasati. Yehovha awa va yingiseta vavasati. Yehovha awa byi dumba a wuswikoti byavu.—Xihondzro Xa Ku Zrindzra 01/2024 pp. 15-16.

Xana hi nga yi tizrisa hi ndlela yini ndzrimana ya Vaefesa 5:7 leyi liki: “Mi nga swi yentxi leswi vone va swi yentxaka”?

Mupostola Pawulo a a hi ba ndleve leswaku hi nga tipatsri ni vhanu lava taka hi yentxa swi hi kazratela ku landzra milawu ya Xikwembu Nkulukumba. Ku tipatsra loko ku hlayiwa lava hi ku kongoma hi hetaka nkama na vone, ku patsra ni lava hi bulaka na vone ka maredi sosiyali.—Xihondzro Xa Ku Zrindzra 03/2024 pp. 22-23.

Xana he swini swihitana swa madzrimi leswi hi fanelaka ku fambela kule na swone?

Hi fanela ku tivonela ka swihitana leswi kalaka swi nga kambisisiwanga ha hombe, leswi va nga ha hi zrumelelaka swone hi ku tizrisa ma e-mail ya vhanu lava hi kalaka hi nga va tivi na va yentxa ingi va wu nyonxela ntiyiso nakasi i madukwa.—Xihondzro Xa Ku Zrindzra 04/2024 p. 12.

He swini leswi hi swi tivaka ni leswi hi kalaka hi nga swi tivi mayelanu ni ndlela leyi Yehovha a taka yavanyisa ha yone hosi Solomoni, kun’we ni lava va fiki a Sodoma, Gomora ni ka Ndhambhi ya Nowa?

A hi swi tivi leswaku Yehovha a va yavanyisele wugamu. Kambe nambitanu, ha swi tiva leswaku a ni mintiyiso hinkwayu nakone a ni ntwelawusiwana.—Xihondzro Xa Ku Zrindzra 05/2024 pp. 3-4.

Leswi Yehovha a nga ‘zribye’ xana leswo swi hi tiyisekisa yini? (Deut. 32:4)

Hi nga djula wutumbelo ka Yehovha. Minkama hinkwayu awa dumbeka nakone awa swi hetisisa swidumbiso swake. A nga txintxi nakone a tlhela a hetisisa swidumbiso swake hinkwaswu.—Xihondzro Xa Ku Zrindzra 06/2024 pp. 26-28.

I yini lexi nga ku pfunaka kuva u titwananisa ni xiyimu xa bandla ledzrimpshwa?

Dumba Yehovha, lweyi a taka ku pfuna hi lani a ma pfuniki ha kone malandzra yake a nkameni lowu khalutiki. U nga fananise bandla ledzri a u li ka dzrone khale ni ledzri u nga ka dzrone swoswi. Tsrhama na u ni swinyingi swa ku swi yentxa ka bandla ledzrimpshwa nakone tikazratele ku tihambela vanghanu lavampshwa.—Xihondzro Xa Ku Zrindzra 07/2024 pp. 26-28.

Hi byeliwa yini ka swifaniso swizrazru leswi kumekaka ka Matewu ndzrima 25?

A xifaniso xa tihamba ni timbuti xi tshimisisa lisima dzra kuva hi dumbeka. A xifaniso xa van’whanyana va ku tlhazriha ni va ku phunta xi tshimisisa lisima dzra ku tsrhama na hi lulamile ni ku tlhela hi zrindzra.—Xihondzro Xa Ku Zrindzra 09/2024 pp. 20-24.

A dzri tlakuke ku gama kwini likupakupa kumbe vharanda dzra tempele ya Solomoni?

Ka 2 Makronika 3:4, a matsralwa ya khale ma vulavulaka hi “120 wa minkono”, leswi liki a vharanda a dzri ta va ni 53 wa mametru hi ku leha. Kambe a matsralwa man’wana ma vulavula hi “20 wa minkono” leswi a swi ta yentxa kuva vharanda dzri va ni 9 wa mametru hi ku leha. Mpimu lowu wa wugamu wu fambisana ha hombe ni ku yanama ka makhumbi ya tempele.— Xihondzro Xa Ku Zrindzra 10/2024 p. 31.

Xana swi tlhamuxela yini kuva nandzra wa wutizreli a va nuna wa “nsati mun’we”? (1 Tim. 3:12)

Swi tlhamuxela leswaku a txhate ni nsati mun’we ntsena nakone a nga fanelanga ku yentxa swa ku biha hi tlhelo dzra tinkuku. Handle ka leswo a nga fanelanga ku lavisa vavasati vambeni hi ndlela ya ku va navela.—Xihondzro Xa Ku Zrindzra 11/2024 p. 19.

Ha yini hi nga hlayaka leswaku Yohane 6:53 a yi tlhamuxeli mhaka leyi fanaka loko ku hambiwa Xilalelo xa Hosi?

Yohane 6:53 yi vulavula hi xivileleko xa ku da nyama ya Yesu ni ku nwa ngati yake. Yesu a hlaye mazritu lawa hi 32 N.Y. a Galileya na a byela Vayuda lava a swa ha djula kuva va kombisa lipfumelo kwake. Nambitanu a Xilalelo xa Hosi xi simekiwe ntsrhaku ka lembe a Yerusalema. Lanu Yesu a a vulavula ni lava a a ta fuma na vone a matilweni.—Xihondzro Xa Ku Zrindzra 12/2024 pp. 10-11.