1-2. a) He dzrini lani ngopfungopfu hi dzrimukaka mhunu lweyi a fiki? b) Ka wusiku bya wugamu lani misaveni, i yini leswi Yesu a byeliki vadondzrisiwa vake leswaku va fanela ku swi yentxa?

 LOKO u feliwe hi mhunu lweyi u mu zrandzraka swi nge na mhaka leswaku ku khalute nkama wa ku ya tlhasa kwini wa ha mu dzrimuka mhunu yelweyo. Lembe dzrin’wana ni dzrin’wana wa mu dzrimuka mhunu lweyo hi siku ledzri a fiki ha dzrone.

² Lembe dzrin’wana ni dzrin’wana, ka siku ledzri Yesu a fiki ha dzrone, vhanu vanyingi va tlhangana akuva va dzrimuka xiyentxakalo lexo. (1Pe 1:8) Hi dzrimuka dumbo ledzri hi nga na dzrone hi leswi Yesu a nyikeliki wutomi byake akuva a hi tizrula ka xidoho ni lifu. (Mt 20:28) Nakone, Yesu a djula leswaku vadondzrisiwa vake va dzrimuka lifu dzrake. Ka wusiku bya wugamu lani misaveni Yesu a te: ‘Yentxani leswo, n’wi ta ndzri dzrimuka ha swone.’—Lk 22:19.

3. Xana i yini leswi hi taka swi vona xidondzro lexi?

³ Ka ntalu wa vhanu lava hlalelaka Xidzrimuxo lembe ni lembe i vatsrongo lava nga ni dumbo dzra ku ya hanya a tilweni. Vanyingi hi lava nga ni dumbo dzra ku hanya kola misaveni. Ka xidondzro lexi, hi ta vona leswaku ha yini hi fanela ku ya a Xidzrimuxweni swi nge na mhaka leswaku he dzrini dumbo dzrezru. Hi ta tlhela hi vona leswaku ha yini swi li swinene kwezru ku hlalela Xidzrimuxo. A hi zrange hi ku vona leswaku ha yini vatotiwa va fanela ku va kone ka Xidzrimuxo.

4. Ha yini vatotiwa va da pawu va tlhela va nwa vhinyu hi siku dzra xidzrimuxo?

⁴ Vatotiwa va hlalela Xidzrimuxo lembe dzrin’wana ni dzrin’wana nakone va hlengela ka swifanekiselo, ku nga ku da  pawu ni ku nwa vhinyu. Kambe ha yini va yentxa leswo? Akuva hi swi twisisa ku yampswa hi fanela ku tiva leswi yentxekiki ka wusiku bya wugamu bya Yesu lani misaveni. Yesu ni vadondzrisiwa vake va tlangele nkhuvu wa Vayuda lowu vitaniwaka Paxkwa. Ntsrhaku ka leswo, Yesu a sungule Xilalelo xa Hosi lexi namunhla hi xi vitanaka Xidzrimuxo xa lifu dzra Kriste. Ka xiyentxakalo lexo, Yesu a khalutise pawu ni vhinyu ka 11 wa vapostola vake va ku dumbeka, a tlhela a va byela leswaku va fanela ku da pawu ni ku nwa vhinyu. Handle ka leswo, Yesu a khanele na vone hi swipfumelelanu swibidzri, ku nga xipfumelelanu leximpshwa ni xipfumelelanu xa Mfumu. * (Lk 22:19, 20, 28-30) Hi mhaka ya swipfumelelanu leswi, vapostola va Yesu kun’we ni ntlawa wutsrongo wa valandzreli vake kumbexana vatotiwa va ta ndzruluka tihosi ni vaprista a tilweni. (Mpf 5:10; 14:1) I nsalu wa vatotiwa * ntsena wu daka pawu wu tlhela wu nwa vhinyu ka Xidzrimuxo hikusa wu hamba xiyenge xa swipfumelelanu leswibidzri.

5. Xana he dzrini dumbo ledzri vatotiwa va nga na dzrone nakone va fanela ku yentxa yini akuva va dzri yamukela?

⁵ Ku ni xivangelo ximbeni lexi yentxaka vatotiwa va xi nyika lisima swinene Xidzrimuxo. Ka Xidzrimuxo vatotiwa va ni mukhandlu wa ku yanakanyisisa hi dumbo ledzri va nga na dzrone. Yehovha a va nyike dumbo dzra ku hlamalisa dzra ku hanya tilweni va nga ha fi, va tizra kun’we na Kriste ni vatotiwa vambeni va tlhela va va ni tovoko dzra ku va hi ntshima na Yehovha Xikwembu Nkulukumba! (1Ko 15:51-53; 1Yh 3:2) Vatotiwa va swi tiva leswaku akuva va kota ku yamukela dumbo dzravu va fanela ku tama va dumbeka ka Yehovha ku ya tlhasa loko va fa lani misaveni. (2Tm 4:7, 8) Vatotiwa va nyonxa swinene hi ku yanakanyisisa hi dumbo ledzri va nga na dzrone. (Ti 2:13) Kambe swi li yini hi ‘tihamba tin’wanyana’? (Yh 10:16) Ha yini ti hlalela Xidzrimuxo?

6. Ha yini lava tihamba tin’wanyana va hlalela Xidzrimuxo lembe dzrin’wana ni dzrin’wana?

⁶ Lava tihamba tin’wanyana va ya Xidzrimuxweni kambe a va di pawu ni ku nwa vhinyu. Va nyonxa ntsena hi ku hlalela Xidzrimuxo. Khambi dzra ku sungula lani vhanu lava nga ni dumbo dzra ku hanya misaveni va zrambiwiki kuva va hlalela Xidzrimuxo a ve hi 1938. Xihondzro Xa Ku Zrindzra xa 1 ka Marsu wa 1938 (hi xiputukezi) xi te: “Swa twala kuva lava tihamba tin’wanyana va va kone ka ntlhanganu lowu, na va li vahlaleli ntsena va leswi yentxiwaka. . . . Lowu i nkama wa ku nyonxa ni kwavu.” Nakone swi tanu. Ku fana ni leswi mhunu lweyi a zrambiwaka kuva a hlalela mutxhatu a nyonxaka, lava tihamba tin’wanyana va nyonxa hi ku hlalela Xidzrimuxo.

7. Ha yini lava tihamba tin’wanyana va swi vona na swi li swa lisima ku yingela wukaneli bya xidzrimuxo?

⁷ Ku fana ni vatotiwa lava tihamba tin’wanyana na vone va swi zrandzra ku yanakanyisisa hi dumbo dzravu. Va swi zrandzra swinene ku yingela wukaneli bya xidzrimuxo. Wukaneli lebyo byi khanela hi leswi Yesu ni 144.000 wa vatotiwa va taka swi yentxela vhanu a misaveni ka Mfumu wa Kriste wa 1.000 wa malembe. Hi ku pfuniwa hi vatotiwa, Yesu a ta ndzruluta misava hinkwayu yi va paradeyisi ni ku yentxa leswaku vhanu va va lava hetisekiki. Ka vhanu vanyingi lava hlalelaka Xidzrimuxo swi nyonxisa swinene ku yanakanyisisa hi ndlela leyi misava yi taka va xiswone loko ku hetiseka  wuprofeta bya Bibele lebyi nga ka Ezaya 35:5, 6; 65:21-23; ni Apfuletelo 21:3, 4. Ntxhumu lowu taka hi pfuna ku tiyisa dumbo ledzri hi nga na dzrone hi wumundzruku ni xiboho xa kuva hi nga tsrhiki ku tizrela Yehovha, i ku yanakanyisisa hi ndlela leyi wutomi byi taka va xiswone a misaveni leyimpshwa kun’we ni maxaka ni vanghanu.—Mt 24:13; Ga 6:9.

8. Xana he xini xivangelo xin’wana lexi lava tihamba tin’wanyana va nga na xone akuva va hlalela xidzrimuxo?

⁸ Xivangelo ximbeni lexi yentxaka lava tihamba tin’wanyana va hlalela Xidzrimuxo hi leswaku va djula ku kombisa leswaku va zrandzra va tlhela va seketela vatotiwa. A Bibele a dzri swi hlayile leswaku vatotiwa ni lava tihamba tin’wanyana a va ta tizra kun’we. A hi kambisisi wuprofeta byizrazru.

9. Xana wuprofeta lebyi nga ka Zekariya 8:23 byi swi kombisa hi ndlela yini ndlela leyi lava tihamba tin’wanyana va titwaka ha yone ho vatotiwa?

⁹ Dondzra Zekariya 8:23. Wuprofeta lebyi byi tlhamuxela ndlela ya ku xonga leyi lava tihamba tin’wanyana va titwaka ha yone hi vamakwavu va xinuna ni va xisati lava totiwiki. Zritu ledzri liki ‘Muyuda’ ni ledzri liki ‘n’wine’ dzri khanela hi vhanu van’we—ku nga nsalu wa vatotiwa. (Ro 2:28, 29) A ‘vavanuna va khume va tindzrimi hinkwatu ta matiko’ va fanekisela tihamba tin’wanyana. Va ‘khoma swi tiya’ kumbexana minkama hinkwayu va gandzrela Yehovha kun’we ni vatotiwa hi leswi yentxaka va va kone a Xidzrimuxweni akuva va kombisa leswaku va seketela vatotiwa hi mbilu hinkwayu.

10. Xana Yehovha a byi hetisisa hi ndlela yini wuprofeta bya Ezekiel 37:15-19, 24, 25?

¹⁰ Dondzra Ezekiel 37:15-19, 24, 25. Yehovha a hetisisa wuprofeta lebyi hi ku yentxa leswaku vatotiwa ni tihamba tin’wanyana va tizrisana. Wuprofeta byi khanela hi tinhonga tibidzri. Lava nga ni dumbo dzra ku hanya tilweni va fana ni nhonga “ya Yuda” (lixaka ledzri tihosi a ti langiwa hi Yehovha) nakone lava nga ni dumbo dzra ku hanya misaveni va fana ni nhonga ya ‘Efrayimi’. * Yehovha a a ta patsra mintlawa leyi yibidzri akuva yi va nhonga yin’we. Leswo swi tlhamuxela leswaku mintlawa leyi yibidzri ya tizrisana akuva yi yingiseta Hosi, Yesu Kriste. Leswo swi tikomba loko lembe dzrin’wana ni dzrin’wana vatotiwa ni lava tihamba tin’wanyana va hlalela kun’we Xidzrimuxo, ku nga li mintlawa leyi hambaniki, kambe swanga ‘tlhambi mun’we’ lowu nga ni ‘mubyisi mun’we’.—Yh 10:16.

11. Xana he yini ndlela leyi tihamba ti nga pfunisaka vamakwavu va Kriste ha yone? (Matewu 25:31-36, 40)

¹¹ Dondzra Matewu 25:31-36, 40. Xana he tini tihamba ta xifananiso lexi? Tihamba leti i vhanu lavanene lava hanyaka a masikwini ya wugamu ni lava nga ni dumbo dzra ku hanya hi la ku nga helikiki lani misaveni. Yesu a tlhele a ti vitana swanga tihamba tin’wanyana. Tihamba leto tin’wanyana ti ni wutiyanguleli bya ku pfuna vakriste lava totiwiki lava ha liki misaveni. Ngopfungopfu ti yentxa leswo hi ku hlengela ka ntizro wa ku zrezra ni wa ku dondzrisa vhanu hinkwavu akuva va va vadondzrisiwa.—Mt 24:14; 28:19, 20.

12-13. Xana he tini tin’we ta tindlela leti tihamba tin’wanyana ti nga pfunaka ha yone vamakwavu va Kriste?

¹² Lembe ni lembe na ku nge si na tlhasa siku dzra xidzrimuxo ku yentxaka ntxhumu wa ku hlawuleka. Tihamba tin’hwanyana ti seketela vakriste lava totiwiki hi ku tizra ka tsima dzra ku zrezra a misaveni hinkwayu. Nkongometo wa tsima ledzro i ku zramba vhanu lava nga swi kotaka akuva va hlalela xidzrimuxo. (Vona bokisi “ Xana U Le Ku Lulamiseleni Ka Xidzrimuxo?”) Tihamba tin’wanyana ta pfunisa a ku lulamiseleni ka Xidzrimuxo a mabandleni, nambi  loko ka bandla ledzro ku nge na mutotiwa. Ka tone i tovoko dzrikulu ku pfunisa vamakwavu va Kriste hi ndlela leyo. Tihamba tin’wanyana ta swi tiva leswaku Yesu awa wu vona ntxhumu wun’wana ni wun’wana ti wu yentxelaka vatotiwa swanga hi loko hi yentxela yene.—Mt 25:37-40.

¹³ He swini swivangelo leswi yentxaka leswaku hinkwezru hi hlalela Xidzrimuxo swi nge na mhaka leswaku he dzrini dumbo dzrezru?

14. Xana Yehovha na Yesu va kombise leswaku va hi zrandzra hi ndlela yini?

¹⁴ Ku hlalela xidzrimuxo i yin’we ya tindlela ta ku tlangela lizrandzru ledzri Yehovha na Yesu va hi kombisiki dzrone. Ku ni tindlela tinyiki leti ha tone Xikwembu Nkulukumba a kombisiki leswaku awa hi zrandzra. Kambe ka hinkwatu ku ni yin’we ya ku hlawula. Leswi a hi zrandzraka, Yehovha a zrumele n’wanake lwa zrandzrekaka akuva a xaniseka a tlhela a hi fela. (Yh 3:16) Handle ka leswo, hi mu tlangela swinene Yesu. A ku na mhunu lweyi a mu sindzrisiki akuva a nyikela wutomi byake leswaku a hi tizrula. A yentxe leswo hikusa awa hi zrandzra. (Yh 15:13) A hi nge swi koti ku hakela lizrandzru ledzri Yehovha na Yesu va hi kombisiki dzrone, kambe hi nga kombisa ku tlangela hi ndlela leyi hi hanyaka ha yone siku ni siku. (Kl 3:15) Hi leswi hi yentxaka hi hlalela xidzrimuxo. A Xidzrimuxweni, hi nga yanakanyisisa hi lizrandzru ledzri va hi kombisiki dzrone ni lizrandzru ledzri hine hi nga na dzrone ha vone.

15. Ha yini Xitizrulo xi li xa lisima ka vatotiwa ni ka tihamba tin’wanyana?

¹⁵ Hi xi nyika lisima dzrikulu Xitizrulo. (Mt 20:28) Ka vatotiwa, Xitizrulo i xa lisima hikusa xi yentxa swi kotela leswaku va va ni dumbo dzra ku hanya a tilweni. Hi ku va ni lipfumelo ka gandzrelo dzra Yesu, vatotiwa va hlayiwa lava lulamiki hi Yehovha nakone a va vona swanga vanake. (Ro 5:1; 8:15-17, 23) Xitizrulo i xa lisima ni ka tihamba tin’wanyana. Hi ku va ni lipfumelo ka gandzrelo dzra Yesu, ti nga va ni lipfumelo ledzri basiki mahlweni ka Yehovha, ta va ni tovoko dzra ku tizrela Yehovha hi ndlela leyi yamukelekaka ni ku va ni dumbo dzra ku huluka a ‘nhlomulweni lowukulu’. (Mpf 7:13-15) Swi nge na mhaka kumbe u ni dumbo dzra ku hanya a tilweni kumbe lani misaveni, u nga kombisa leswaku Xitizrulo i xa lisima kwaku hi ku xi hlalela lembe dzrin’wana ni dzrin’wana.

16. Ha yini hi fanela ku hlalela Xidzrimuxo?

¹⁶ Xivangelo xin’wana lexi hi yentxaka hi hlalela Xidzrimuxo hi leswaku hi djula ku yingiseta Yesu. Swi nge na mhaka leswaku dumbo dzrezru he dzrini, hinkwezru hi djula ku landzra leswi Yesu a hi leletiki swone. Ka wusiku bya wugamu lani misaveni, Yesu a te: ‘Yentxani leswo n’wi ta ndzri dzrimuka ha swone.’—1Ko 11:23, 24.

17. Xana xidzrimuxo xi nga hi tsrhindzreta kusuhi na Yehovha hi ndlela yini?

¹⁷ Hi tsrhindzrekela kusuhi na Yehovha. (Yk 4:8) Hi lani hi swi voniki ha kone, Xidzrimuxo i mukhandlu lowunene wa ku dzrimuka dumbo ledzri Yehovha a hi nyikiki dzrone ni ku yanakanyisisa hi lizrandzru ledzri a hi kombisiki dzrone. (Yr 29:11; 1Yh 4:8-10) Loko hi yentxa leswo, lizrandzru dzrezru ha Yehovha dzri ya dzri kula nakone hi ya hi tsrhindzrekela kusuhi na yene.—Ro 8:38, 39.

18. Xana ku yanakanyisisa hi xikombiso xa Yesu swi hi pfuna ku tiyimisela ku yentxa yini?

¹⁸ Hi ya hi tiyimisela ku yetisela Yesu. (1Pe 2:21) Akuva hi lulamisela mbilu yezru na ku nge si tlhasa siku dzra Xidzrimuxo, hi  dondzra mayelanu ni masiku ya wugamu ya Yesu lani misaveni. Kutani hi siku dzra Xidzrimuxo a wukaneli lebyi nyikeliwaka byi hi pfuna ku va hi dzrimuka lizrandzru ledzri Yesu a hi kombisiki dzrone. (Ef 5:2; 1Yh 3:16) Loko hi dondzra ni ku yanakanyisisa hi wutomi bya Yesu hi ya hi tiyimisela ‘ku famba swanga hi leswi na yene a fambisiki xiswone’.—1Yh 2:6.

19. Xana wuxaka byezru na Yehovha byi ta tama byi tiya loko hi yentxa yini?

¹⁹ Hi ya hi tiyimisela ku tama hi va vanghanu va Yehovha. (Yd 20, 21) Wuxaka byezru na Yehovha byi ta ya byi tiya loko hi mu yingiseta, hi yentxa hinkwaswu hi nga swi kotaka akuva hi xwengisa vito dzrake ni ku nyonxisa mbilu yake. (Pr 27:11; Mt 6:9; 1Yh 5:3) Ku hlalela xidzrimuxo swi hi pfuna ku tama hi hanya hi ndlela leyi nyonxisaka Yehovha. Swi fana ni loko hi ku: ‘Hosi yanga ni djula ku tama ni ku tizrela hi lani ku nga helikiki!’

20. He swini swivangelo hi nga na swone swa ku hlalela Xidzrimuxo?

²⁰ Swi nge na mhaka leswaku hi ni dumbo dzra ku hanya a matilweni kumbe kola misaveni, hinkwezru hi ni swivangelo swa ku hlalela Xidzrimuxo. Hi siku ledzri hi dzrimuka lifu dzra mhunu lweyi hi mu zrandzraka swinene, ku nga Yesu Kriste. Handle ka leswo, hi dzrimuka lizrandzru ledzri Yehovha a hi kombisiki dzrone loko a zrumele n’wanake swanga Xitizrulo. Lexo a ve xikombiso xa lizrandzru dzrikulu ngopfu swinene. Lembe ledzri, Xidzrimuxo xi ta va hi Wawuntlhanu, 15 ka Abrili wa 2022. Hi mu zrandzra swinene Yehovha kun’we na Yesu. Xileswo, a ku na ntxhumu xi nga xa lisima ku tlula ku va kone ka xidzrimuxo xa lifu dzra Yesu.