Handle ka ku ganaganeka, Yehovha a djula leswaku vhanu vabidzri lava txhataka va nyonxa, va va ni wuxaka lebyinene va tlhela va ntsrhama xikan’we hi la ku nga helikiki. (Mt 19:4-6) Loko u djula ku txhata, u nga yentxa yini akuva u kuma munghanu lwenene? Swanga muvumbi wezru, Yehovha awa swi tiva leswi nga yentxaka vhanu vabidzri va nyonxa a wukatini byavu. Xileswo, loko u landzra minsinya ya milawu leyi a hi nyikaka yone hi ta kuma ku nyonxa ka ntiyiso. A hi vone yin’wana ya minsinya yoleyo ya milawu.

Wa ku sungula, hi fanela ku twisisa leswi mayelanu na hine vhanu: ‘A mbilu ya kanganyisa ku tlula hinkwaswu, ya vabya ngopfu.’ (Yr 17:9) Loko mhunu a sungula ku gangisa lweyi a djulaka ku tekana na yene, ku pfuka nyanyuku lowukulu hi ku kahlula, lowu yentxaka swi kazrata ku teka xiboho lexinene. Loko vhanu va teka xiboho xa ku txhata, ngopfungopfu hi ku ya hi matitwela yavu, minkama ya ku tala va hetelela hi ku tisola. (Pr 28:26) Xileswo, a hi wutlhazri kuva vhanu va kombisa nyanyuku na va ha sungula ku gangisana kumbe ku teka swiboho leswikulu na va nga si na tivana ha hombe.

Amaproverbia 22:3 yi li: ‘Lwe wa ku yanakanya a vona khombo, kutani a tifihla; kambe va ku mphunta va ya mahlweni va biwa.’ Xana he dzrini khombo dzra ku tizrisa maredi sosiyali akuva u kuma mhunu wa ku txhata na yene? Lexi vavisaka hi leswaku vhanu vambeni va sungule ku zrandzrana ni vhanu lava kalaka va nga va tivi ka internet va gangisana na vone kutani hi wugamu va xiya leswaku mhunu lwiyani va zrandzranaka na yene a va kanganyisile. Handle ka leswo, ka internet ku ni vhanu lava kanganyisaka vambeni akuva va va yivela mali. Minkama yimbeni vakanganyisi volavo va hlaya leswaku vone i Timboni ta Yehovha.

Vona khombo dzrimbeni. Mapajina mambeni ya internet ma tizrisa tikonta, akuva va hlaya leswaku i vamani lava va fanelaka va zrandzrana na vone. Nambi tanu, a ku na wumboni bya leswaku mayentxela lawo ma pfuna hakunene. A ku nga ti va wutlhazri ku teka xiboho xa lisima ngopfu swinene a wuton’wini xa ku fana ni mutxhatu hi ku dumba leswi u swi voniki ka komputadori kumbe ka telefone. Xana tikonta ti nga fananisiwa ni minsinya ya milawu ya Bibele?—Pr 1:7; 3:5-7.

Nsinya wa nawu lowu kumekaka ka Amaproverbia 14:15 wu li: “A xihunguki xi pfumela mazritu hinkwawu; kambe lweyi a nga ni ku yanakanya a langusisa laha a kandzretelaka kone.” Na u nga si na txhata ni mhunu, xa ku sungula lexi u fanelaka  ku xi yentxa i ku mu tiva ku yampswa mhunu lweyo. Kambe mapajina ya internet ma nga yentxa leswaku swi kazrata leswo? Nambi u heta nkama wunyingi na wu bulisana ni mhunu lweyo, xana u nga hlaya leswaku wa mu tiva hakunene? Vhanu vambeni lava a va yanakanya swaku va tikumeli muzrandzriwa wavu va hlamali ngopfu loko hi wugamu va tiva leswi mhunu lweyo a nga xiswone.

A mupsalma a te: ‘A ndzri tsrhami na vhanu va ku hemba, a ndzri yendzrelani na va kanganyisi.’ (Ps 26:4) Vhanu vanyingi va swi vona na swi tolovelekile ku hemba, va beka mafoto ya leswi va nga liki xiswone ka internet akuva va nyonxeliwa hi vambeni. Loko va bulisana ni vambeni ka internet va tiyentxa ingi i vhanu lavanene. Vhanu vambeni va nga ha tihlaya leswaku i Timboni ta Yehovha kambe xana hakakunene i vakriste lava babatisiwiki? Xana va wupfile hi tlhelo dzra moya? Xana va ni wuxaka bya le kusuhi na Yehovha? Va hloniphiwa bandleni? I swikombiso swa ku biha kumbe i vanghanu ‘lavamfani’? (1Ko 15:33; 2Tm 2:20, 21) Xana va ntsrhunxekile akuva va txhata hi ku ya hi minsinya ya milawu ya Bibele? U fanela ku tiva tinhlamulo ta swivutiso leswo, kambe swi nga kazrata ku tiva tinhlamulo toleto loko u nga vutisanga Mboni ya Yehovha leyi mu tivaka ha hombe mhunu yelweyo. (Pr  15:22) Nakone, handle ka ku ganaganeka, nandzra wa Yehovha wa ku dumbeka a nge ‘byatsrhi a pinga mun’we’ ni mhunu lweyi nga liki mupfumeli.—2Ko 6:14; 1Ko 7:39.

Swanga hi leswi ku djuletela mhunu wa ku txhata na yene ka mapajina ya internet swi nga ni khombo, ku ni tindlela timbeni leti hi nga ti tizrisaka kuva hi djuletela mhunu akuva hi va ni mutxhatu lowu hloniphekaka. Xana u nga mu kuma kwini mhunu yelweyo lweyi u nga txhataka na yene? Loko swi nga tsrimbisiwi ku kumana ni vhanu vambeni, a Timboni ta Yehovha ti nga tiva vhanu hi ku kongoma loko ti hlalela mintlhanganu ya bandla, ma-asembleya, makongresso ni mitlhanganu yimbeni.

Loko swi nga koteki akuva hi tlhangana ni vhanu vambeni ku fana ni nkama lowu hi nga ka wone wa COVID-19, hi nga tizrisa switizro swa eletroniku akuva hi ya mintlhanganwini ya bandla lani hi nga ni mukhandlu wa ku tiva Timboni timbeni ta Yehovha leti kalaka ti nga txhatanga. U nga vona ndlela leyi va hlengelaka ya yone a mintlhanganwini ni ku twa ndlela leyi vone va hlamulaka ha yone. (1Tm 6:11, 12) Nakone loko ku hele mitlhanganu va bulisane ni vhanu vambeni hi mintlawa leyi nga hambiwaka ka vhidhiyu conferência. Loko u tlhangana ni Timboni timbeni ta Yehovha ka internet, u nga ha xiya mhunu lweyi n’waninkama u navelaka ku mu tiva ku yampswa u tlhela u vona ndlela leyi a bulisanaka ha yone ni vhanu vambeni akuva u tiva ndlela leyi a nga xiswone hakunene. (1Pe 3:4) Loko nkama wu ya wu famba, nakone mi tivana ku yampswa, u nga xiya leswaku wumhunu byenu kun’we ni makungu yenu swa fana kumbe im-him.

Loko lava kalaka va nga txhatanga va djuletela mhunu wa ku txhata na yene hi ku ya hi minsinya ya milawu ya Bibele swi nga yentxeka va vona ku hetiseka ka mazritu ya Amaproverbia lama liki: ‘Lwa kumiki nsati [kumbe nuna] a kumi ku kateka, a nyikiwi wumbilu hi Yehovha.’—Pr 18:22.