1. I yini leswi Yehovha a ku yentxeliki swone?

I YINI lexi ku yentxiki u va Mboni ya Yehovha? Swi nga yentxeka ku sungula u yingeli ‘madzrungula lamanene’​—kumbexana hi vapswele vaku, a ntizrweni, a xikole, kumbe ka ntizro wa ku zrezra hi muti ni muti. (Mr 13:10) Ntsrhaku, mhunu wa kukazri a tinyike nkama a tlhela a tikazratela ku ku fambisela xidondzro xa Bibele. Loko dondzro yi ya yi famba, u sungule ku zrandzra Yehovha nakone u dondzre leswaku awa ku zrandzra. Yehovha a ku kokele ntiyisweni, nakone swoswi swanga mudondzrisiwa wa Kriste u ni dumbo dzra ku hanya hi la ku nga helikiki. (Yh 6:44) Handle ka ku ganaganeka u mu tlangela ngopfu Yehovha hi leswi a susumeteliki mhunu wa kukazri akuva a ku dondzrisa ntiyiso ni ku va a ku pfumele swanga mun’we wa malandzra Yake.

2. Xana hi ta bula ha yini ka nhlokomhaka leyi?

² Leswi swoswi hi tivaka ntiyiso, hi ni ndjombo ya ku pfuna vambeni akuva va tipatsra na hine a ndleleni leyi yisaka wuton’wini. Hi nga ha titwa na hi ntsrhunxekile akuva hi zrezra hi muti ni muti, kambe swi hi kazratela ku sungula xidondzro xa Bibele. Xana u titwa hi ndlela leyo? Loko swi li tanu, swidzringanyeto leswi nga ka xidondzro lexi swi ta ku pfuna. A hi buleni hi leswi swi hi yentxaka hi djula ku pfuna vhanu akuva va va vadondzrisiwa. Hi ta tlhela hi bula hi leswaku hi nga swi hlulisa kuyini swikazratu leswi nga hi sivelaka kuva hi fambisa xidondzro xa Bibele. Ku sungula, a hi voneni leswaku ha yini hi nga fanelanga ku va zrezrela ntsena kambe ni ku va dondzrisa madzrungula lamanene.

3. Ha yini hi zrezra?

³ Loko Yesu a ha li lani a misaveni, a zrume vadondzrisiwa vake akuva va yentxa mintxhumu yibidzri. Wa ku sungula, a va byele leswaku a va fanela ku zrezra madzrungula lamanene ya Mfumu, nakone  a va kombe leswi a va ta yentxisa xiswone. (Mt 10:7; Lk 8:1) Swin’we swa leswi Yesu a va byeliki hi leswaku vhanu van’wana a va ta pfumela kasi van’wana a va ta yala dzrungula dzra Mfumu. (Lk 9:2-5) A tlhele a profeta leswaku a ntizro wa ku zrezra a wu ta kula, loko a hlaye leswaku valandzreli vake a va ta nyikela “wumboni ka matiko hinkwawu”. (Mt 24:14; Min 1:8) Swi nge na mhaka leswaku vhanu a va ta yangulisa kuyini loko va va zrezrela, vadondzrisiwa a va fanela ku byela vambeni mayelanu ni Mfumu wa Xikwembu Nkulukumba ni leswi a wu ta swi yentxa.

4. Hi ku ya hi Matewu 28:18-20, handle ka ku zrezra mayelanu ni Mfumu i yini swin’wana leswi hi fanelaka ku swi yentxa?

⁴ Hi wini ntxhumu wa wubidzri lowu Yesu a zrumiki vadondzrisiwa vake akuva va wu yentxa? A va byele leswaku a va fanela ku dondzrisa vhanu ku bekisa hinkwaswu leswi yene a va leletiki swone. Swi nga yentxeka vhanu vambeni va hlaya leswaku a xileleto xa Yesu xa ku zrezra ni ku dondzrisa a xi fanela ku landzriwa ntsena hi vakriste va ku sungula. Kambe leswo a hi ntiyiso. Yesu a hlaye leswaku ntizro lowu a wu ta ya mahlweni ku ya tlhasa ka masiku yezru, leswi liki “ku ya tlhasa ku heleni ka xiyimu lexi xa misava”. (Dondzra Matewu 28:18-20.) Swi tikomba na Yesu a nyikele xileleto lexo nkama lowu a humeleliki ka 500 wa vadondzrisiwa vake. (1Ko 15:6) Nakone ka xivoniso xa Yohane, Yesu a kombise hi ku khanya leswaku vadondzrisiwa vake hinkwavu va ni wutiyanguleli bya ku pfuna vhanu akuva va dondzra ha Yehovha.​—Mpf 22:17.

5. Hi ku ya hi 1 Ba-le-Korinte 3:6-9, xana mupostola Pawulo a ku kombise hi ndlela yini ku yelana ka ntizro wa ku zrezra ni wa ku dondzrisa?

⁵ Mupostola Pawulo a fananise ntizro wa ku yentxa vadondzrisiwa ni wa ku byala. Hi ndlela leyo, a kombise leswaku hi fanela ku yentxa leswi tlulaka ku byala ntsena. A dzrimuxe vamakwezru va le Korinte a ku: ‘Mine, dzri byalile; Apolosi, yene, a txheletelile, . . . N’wine n’wi vudzrimu bya Xikwembu Nkulukumba.’ (Dondzra 1 Ba-le-Korinte 3:6-9.) Hine hi vatizri va nsimu ya Xikwembu Nkulukumba. Hi byala mbewu loko hi zrezra. Kasi loko hi dondzrisa hi va na hi li ku txheleteleni ka mbewu yoleyo. (Yh 4:35) Kambe hi nkama wun’we ha pfumela leswaku Xikwembu Nkulukumba hi yene a yentxaka mbewu yi kula.

6. Loko hi dondzrisa mhunu hi fanela ku mu pfuna ku yentxa yini?

⁶ Hine hi djuletela lava ‘bekiseliwiki wutomi lebyi nga helikiki’. (Min 13:48) Akuva vhanu va va vadondzrisiwa, hi fanela ku va pfuna akuva 1) va twisisa, 2)  va pfumela, nakone 3) va tizrisa leswi va swi dondzraka a Bibeleni. (Yh 17:3; Kl 2:6, 7; 1Th 2:13) Hinkwavu a bandleni va nga pfuna swidondzro swa Bibele hi ku swi kombisa lizrandzru ni ku swi yentxa swi titwa na swi yamukeleka loko swi ya mintlhanganwini. (Yh 13:35) Swi nga yentxeka lweyi a fambisaka xidondzro xa Bibele a fanela ku heta nkama wunyingi kumbe ntamu akuva a pfuna xidondzro leswaku xi “hahlula makhokholo” ku nga ku tsrhika tindondzro ta madzrimi ni mintxhumu ya ku biha leyi a xi yi yentxa leyi dzimiki timitsru a mbilwini. (2Ko 10:4, 5) Swi nga ha teka tihweti akuva hi kongomisa mhunu ka magwasu lawa akuva a za a tlhasela ku babatisiwa. Kambe ku tikazrata koloko ka pfuna.

7. I yini lexi hi susumetelaka ku patsreka ka ntizro wa ku yentxa vadondzrisiwa ni wa ku zrezra?

⁷ Xana i yini leswi hi yentxaka hi patsreka ka ntizro wa ku zrezra ni wa ku yentxa vadondzrisiwa? Xa ku sungula, hi leswi hi zrandzraka Yehovha. Loko u yentxa hinkwaswu leswi u nga swi kotaka akuva u yingiseta xileleto xa ku zrezra ni ku yentxa vadondzrisiwa u va na u kombisa lizrandzru dzraku ha Xikwembu Nkulukumba. (1Yh 5:3) Yanakanya hi leswi: Lizrandzru ledzri u nga na dzrone ha Yehovha dzri ku susumetele kuva u zrezra hi muti ni muti. Xana swi kazratile ku landzra xilayu lexo? Swi nga yentxeka swi kazratile. Xana u txhavile loko u tsrhindzrekeli ka muti wa ku sungula akuva u  ya zrezra? Swi nga yentxeka u txhavile ngopfu swinene. Kambe a wu swi tiva leswaku ntizro lowu hi lowu Yesu a djulaka leswaku u wu yentxa nakone u xi yingisetile xilayu xake. Hi ku famba ka nkama swi ye swi ku nabyalela ku zrezrela vambeni. Kutani ke, swi li yini hi ku fambisa swidondzro swa Bibele? Xana ku yanakanya hi leswo swi ku yentxa u txhava? Swi nga yentxeka, nambi tanu loko u kombela Yehovha leswaku a ku pfuna akuva u hlula ku txhava ni ku va ni xixixi xa ku sungula xidondzro xa Bibele. A nga ku pfuna akuva u tiyisa ku navela kwaku ka ku yentxa vadondzrisiwa!

8. Hi ku ya hi Marka 6:34, i yini lexi nga hi susumetelaka kuva hi dondzrisa vhanu vambeni?

⁸ Ntxhumu wumbeni lowu wu hi susumetelaka ku dondzrisa vambeni ntiyiso i lizrandzru ledzri hi nga na dzrone hi vhanu. Hi khambi dzra kukazri Yesu ni vadondzrisiwa vake a va kazralile swinene hi leswi a va hete nkama wunyingi a ku zrezreni. A va vilela mbangu wa kuva va wisa, kambe vhanu vanyingi swinene va zrange va tlhasa lomu a va ya wisa kone. Yesu a va twele wusiwana lakakuva a dondzrisa vhanu ‘leswa ku tala’. (Dondzra Marka 6:34.) Handle ka ku ganaganeka Yesu a a fanela ku tikazrata hi nkama lowo. Kambe ha yini a swi yentxile leswo? A tibeke a mbangwini wa vhanu van’wana. A vone ku xaniseka kwavu ni leswaku a va vilela dumbo. Yesu a a djula ku va pfuna. Vhanu namunhla va le ka xiyimu lexi fanaka. U nga kanganyisiwi hi leswi va nga xiswone hi le handle. Vhanu lava va fana ni tihamba leti pfumalaka mubyisi wa ku ti kongomisa. Mupostola Pawulo a hlaye leswaku vhanu lavo a va mu tivi Xikwembu Nkulukumba nakone a va na dumbo. (Flp 2:12) Va le ka “nyangwa leyi yisaka ku suvisiweni”. (Mt 7:13) Loko hi yanakanyisisa hi ndlela leyi vhanu va le nsin’wini yezru va swi vilelaka ha yone ku tiva Xikwembu Nkulukumba, lizrandzru ni ntwelawusiwana swi ta hi susumetela akuva hi va pfuna. Ndlela leyinene ya kuva hi va pfuna i ku tinyiketela akuva hi dondzra na vone Bibele.

9. Hi ku ya hi Ba-le-Filipi 2:13, xana Yehovha a nga ku pfunisa kuyini?

⁹ Swi nga yentxeka u txhava ku sungula xidondzro xa Bibele ni vhanu vambeni hi leswi u tivaka leswaku swi djula nkama. Loko swi li tanu, bulela Yehovha ndlela leyi u titwaka ha yone. Mu kombele akuva a ku pfuna leswaku u kuma xidondzro xa Bibele akuva u xi fambisa. (Dondzra Ba-le-Filipi 2:13.) Mupostola Yohane a hi tiyisekise leswaku Xikwembu Nkulukumba a ta hlamula swikhongoto leswi fambisanaka ni ku zrandzra kwake. (1Yh 5:14, 15) Xileswo, tiyiseka leswaku Yehovha a ta ku pfuna akuva u txutxela ku navela kwaku ka ku hlengela ka ntizro wa ku yentxa vadondzrisiwa.

10-11. I yini leswi nga hi sivelaka ku fambisa xidondzro xa Bibele?

¹⁰ Hi teka ntizro wa ku dondzrisa wu li wa lisima swinene. Kambe minkama yimbeni hi kumana ni swikazratu leswi nga hi sivelaka ku va hi yentxa hinkwaswu leswi a hi swi navela a ntizrweni wa ku yentxa vadondzrisiwa. A hi kambisiseni swin’wana swa swikazratu ni ndlela leyi hi nga swi hlulaka ha yone.

¹¹ Hi mhaka ya swiyimu swezru hi nga ha titwa na hi hluleka ku yentxa leswi hi swi navelaka. Hi xikombiso, vazrezri van’wana va kulile hi tanga nakone va ni swikazratu swa lihanyu. Xana swi tanu ni kwaku? Loko nhlamulo a li ina, xiya leswi hi swi dondzriki hi mhaka wa ntungu wa COVID-19. Hi gungule leswaku swa koteka ku fambisa swidondzro swa Bibele hi ndlela leyinene hi ku tizrisa switizrisiwa swa eletroniku! Kutani u nga sungula ku fambisa xidondzro xa Bibele na we gee a kaya. Handle ka leswo, vambeni va swi navela ku dondzra Bibele na hine kambe va khomekile hi nkama lowu hi ntolovelo vamakwezru va zrezraka ha wone. Va nga va ni nkama ni mixo kumbe ni madambu. Xana u nga tinyikela akuva u va dondzrela hi nkama lowo? Yesu a dondzrisi Nikodema ni wusiku, ku nga nkama lowu Nikodema a tilangeliki wone.—Yh 3:1, 2.

12. He yini mintxhumu leyi nga hi pfunaka akuva hi tiyiseka leswaku hi nga va vadondzrisi lavanene?

 ¹² Hi nga ha pimisa leswaku a hi swi koti ku fambisa xidondzro xa Bibele hi ndlela leyinene. Hi nga ha yanakanya leswaku hi fanela ku yengesela wutivi kumbe ku va ni wuswikoti swanga vadondzrisi akuva hi dondzrela vhanu vambeni. Loko u titwa hi ndlela leyo. Vona mintxhumu yizrazru leyi nga ku pfunaka akuva u tiyiseka leswaku u nga swi kota ku fambisa xidondzro xa Bibele. Wa ku sungula, Yehovha a ku vona na u faneleka ku dondzrisa vambeni. (2Ko 3:5) Wa wubidzri, Yesu, lweyi a nga ni “wulawuli hinkwabyu a ma tilweni ni lani misaveni”, a ku pfumelele kuva u dondzrisa. (Mt 28:18) Wa wuzrazru, u ni mpfunu wa vhanu vambeni. Yehovha a dondzrise Yesu leswi a a fanela ku swi hlaya, nakone Yesu a dumbe leswi Papayi wake a mu dondzrisiki swone. Na wene u nga yentxa leswi fanaka. (Yh 8:28; 12:49) Handle ka leswo, u nga ha kombela mulaviseli wa ntlawa waku wa nsimu, phayona ledzri fanelekaka kumbe muzrezri lweyi a nga ni wuswikoti akuva a ku pfuna ku sungula ni ku fambisa xidondzro xa Bibele. Ndlela yimbeni ya kuva u dondzra ku fambisa swidondzro swa Bibele i kuva u zreya ndleve loko mun’we wa vazrezri lava va fambisa swidondzro swavu.

13. Ha yini hi fanela ku titwananisa ni swiyimu?

¹³ Hi nga swi vona na swi kazrata ku titwananisa ni mayentxela lamampshwa kumbe switizrisiwa leswimpshwa swa ku zrezra ha swone. Ndlela leyi hi fambisaka ha yone swidondzro swa Bibele yi txintxile. Akuva hi fambisa xidondzro hi ku tizrisa xitizrisiwa lexi liki Hanya Hi Ku Nyonxa Hi La Ku Nga Helikiki!, hi fanela ku tilulamisela ha hombe nakone hi fanela ku fambisa xidondzro hi ndlela leyi hambaniki ni leyi a hi yi tizrisa khale. Hi dondzra mayava matsrongo nakone hi bulisana hi nkama wunyingi ni xidondzro. Loko hi dondzrisa hi tizrisa ngopfu mavhidiyu ni switizrisiwa swa eletroniku swa ku fana ni JW Library^®. Loko u nga swi koti ha hombe ku tizrisa switizrisiwa leswi, bulisana ni mhunu lweyi a nga ku dondzrisaka ku swi tizrisa. Hine vhanu hi titwa ha hombe loko hi yentxa mintxhumu leyi hi yi toloveliki. A swi nabyali ku titwananisa ni ndlela leyimpshwa ya ku yentxa mintxhumu. Kambe hi ku pfuniwa hi Yehovha ni vhanu vambeni u nga swi vona na swi nyonxisa ku titwananisa ni mayentxela lamampshwa ni ku swi vona na swi nyonxisa ku dondzra ni vambeni. Hi lani phayona dzra kukazri dzri hlayiki ha kone, ndlela leyimpswha ya ku fambisa xidondzro “yi nyonxisa mudondzri ni mudondzrisi”.

14. Loko hi tizra ka nsimu leyi swi kazrataka ku tizrela ka yone, xana hi fanela ku dzrimuka yini? Xana buku dzra 1 Ba-le-Korinte 3:6, 7 dzri hi tiyisa hi ndlela yini?

¹⁴ Hi nga ha tsrhama ka mbangu lowu swi kazrataka kuva hi sungula swidondzro swa Bibele. Vhanu vambeni a va dzri nyonxeli dzrungula dzrezru van’wana va patsra ni ku dzri yala. I yini lexi nga hi pfunaka ku va hi va ni vonela ledzrinene ka nsimu ya ku fana ni leyo? Dzrimuka leswaku xiyimu xa vhanu xi nga ha txintxa swa kola ni kola nakone vhanu lava a va nga na mhaka ni dzrungula dzra Mfumu va nga ha sungula ku xiya leswaku va fanela ku va ni wuxaka na Xikwembu Nkulukumba. (Mt 5:3) Vanyingi ka lava khale a va yala mabuku yezru va pfumelile ku dondzra Bibele. Nakone ha swi tiva leswaku Yehovha i n’winyi wa ntsrhovelo. (Mt 9:38) A djula leswaku hi tama hi byala hi tlhela hi txheletela kutani yene a ta swi yentxa swi kula. (1Ko 3:6, 7) Swa tiyisana ku dzrimuxiwa leswaku nambi loko hi nga swi koti ku fambisa xidondzro xa Bibele swoswi, Yehovha awa hi tovokisa hi mhaka ya ku tikazrata kwezru ku nga li hi mhaka ya nhlayu ya vhanu lava pfumelaka mabuku yezru kumbe lava pfumelaka ku dondzra Bibele! *

15. Xana Yehovha a titwisa kuyini loko mhunu a pfumela xidondzro xa Bibele a tlhela a hanya hi ku ya hi leswi a swi dondzriki?

¹⁵ Yehovha awa nyonxa loko mhunu a pfumela ntiyiso wa Bibele a tlhela a byela vambeni. (Pr 23:15, 16) Yehovha a nyonxa swinene loko a vona vhanu vake na va zrezra va tlhela va dondzrisa hi ku hiseka. Hi xikombiso, nambi leswi ku viki ni ntungu hi lembe dzra ntizro dzra 2020, ku fambisiwe 7.705.765 wa swidondzro swa Bibele. Leswi pfuniki kuva 241.994 va tinyiketela ka Yehovha va tlhela va babatisiwa. Vadondzrisiwa volavo na vone va ta fambisa swidondzro swa Bibele va tlhela va pfuna van’wana akuva va va vadondzrisiwa. (Lk 6:40) Handle ka ku ganaganeka, loko hi hlengela ka ntizro wa ku yentxa vadondzrisiwa hi nyonxisa Yehovha.

16. He dzrini kungu dzrinene ledzri hi nga tibekelaka dzrone?

¹⁶ Ntizro wa ku yentxa vadondzrisiwa a wu nabyali, kambe hi ku pfuniwa hi Yehovha, hi nga dondzrisa lavampshwa akuva va zrandzra Papayi wezru wa le matilweni. Swi ngo yini hi tibekela kungu dzra ku va hi sungula hi tlhela hi fambisa nambi ko va xidondzro xin’we xa Bibele? Hi nga hlamalisiwa hi leswi swi nga yentxekaka loko hi tizrisa mikhandlu hinkwayu akuva hi kombela vhanu lava hi va kumaka leswaku va dondzra Bibele na hine. Hi nga tiyiseka leswaku Yehovha a ta tovokisa ku tikazrata kwezru.

17. Xana hi titwa hi ndlela yini loko hi fambisa xidondzro xa Bibele?

¹⁷ I ndjombo yikulu leyi hi nga na yone ya ku zrezra hi tlhela hi dondzrisa ntiyiso vhanu vambeni! Ntizro lowu wu hi yentxa hi nyonxa hakunene. Mupostola Pawulo lweyi a pfuniki vhanu vanyingi a Tesalonika akuva va va vadondzrisiwa a phofule ndlela leyi a a titwa ha yone, a te: ‘Hikuva hi yini ku dumba kwezru, ni ku tsrhava kwezru, ni ngiyana yezru ya ku tikutxa, loko a nge n’wine a mahlweni ka Hosi yezru Yesu, a ku tlhaseli kwakwe? Hikuva hi n’wine n’wi nga ku twala kwezru ni ku tsrhava kwezru.’ (1Te 2:19, 20; Min 17:1-4) Vhanu vanyingi namunhla va titwa hi ndlela leyi fanaka. Makwezru wa xisati lweyi a vitaniwaka Stéphanie kun’we ni nuna wake va pfune vhanu vanyingi akuva va babatisiwa, vone va li: “A ku na ntxhumu wa ku nyonxisa lowu tlulaka ku pfuna vhanu akuva va tinyiketela ka Yehovha.”