1-2. Xana mazritu ya Yehovha lama nga ka Ezaya 65:16, 17 ma hi kutxisa kuyini kuva hi nga kazrali?

“U NGA KARHALI!” leyi ku ve nhlokomhaka leyi kutxaka ya nhlengeletanu leyikulu ya xifundzra ya 2017. Nhlengeletanu leyo yi hi kombe ndlela leyi ha yone hi nga tiyiselelaka mindzringo leyi yi hi welaka. Ku khalute mune wa malembe, kambe ku ta ta tlhasa ni swoswi ha ha tiyiselela mindzringo a misaveni leyi ya ku biha.

² I swikazratu swa matsrhamela muni leswi u lavisanaka na swone swoswi? U feliwe hi xizro xa ndangu kumbe munghanu lweyi u mu zrandzraka? U ni mavabyi lama bekaka wutomi byaku a khombyeni? U ni swikazratu leswi tisiwaka hi ku duhwala? U weliwe hi timhangu ta ntumbuluku, wugevenga kumbe tinxanisa? Kumbe u xanisiwa hi mavabyi ya ku fana ni ntungu wa COVID-19? Hi dzri langusele swinene siku ledzri mintxhumu leyi hinkwayu yi taka kala yi nga ha dzrimukiwi nikutsrongo yi va yi nga ha yentxeki swimbeni!—Dondzra Ezaya 65:16, 17.

3. Hi fanela ku yentxa yini swoswi, nakone ha yini?

³ Wutomi a misaveni leyi bya bindzra, kambe hi nga ha langusana ni swiyimu leswi bindzraka hi ku tlulisa a nkameni lowu taka. (Mt 24:21) Swi le livaleni leswaku hi fanela ku tama hi tiyisa ku tiyisela kwezru. Ha yini? Hikusa Yesu a te: ‘Hi ku tiyisela kwenu n’wi ta huluxa mahika yenu.’ (Lk 21:19) Hi nga kota ku tama hi tiyisela hi ku yanakanya hi ndlela leyi vambeni lava langusanaka ni swikazratu swa ku fana ni swezru va tiyiselaka ha yone.

4. Ha yini hi nga hlayaka leswaku Yehovha i xikombiso lexikulu swinene xa ku tiyisela?

⁴ I mani lweyi a nga xikombiso lexikulu swinene xa ku tiyisela? I Yehovha Xikwembu Nkulukumba. Xana nhlamulo leyo a yi ku hlamalisi? Yi nga ha ku hlamalisa. Xileswo, yanakanyisisa hi leswi: Misava leyi yi le mavokweni ya Diyavulosi, nakone yi tale hi swikazratu. Yehovha a ni ntamu wa ku helisa swikazratu leswo swoswi, kambe a ha yimela nkama lowu taka. (Ro 9:22) Kambe,  Xikwembu Nkulukumba wezru a ha tama a tiyisela, ku kota ku tlhasa nkama lowu a wu bekiki wa kuva a helisa xiyimu lexi xa misava. A hi voneni 9 wa mintxhumu leyi Yehovha a yi tiyiselelaka.

5. Xana a vito dzra Xikwembu Nkulukumba dzri ntxhimisiwe hi ndlela yini, nakone u titwisa kuyini hi mhaka leyo?

⁵ Ku ntxhimisiwa ka vito dzrake. Yehovha awa dzri zrandzra vito dzrake, nakone a djula leswaku hinkwavu va dzri bekela xitxhavu. (Eza 42:8) Kambe swi hamba kolomu ka 6.000 wa malembe na vito dzrake ledzrinene dzri ntxhimisiwa. (Ps 74:10, 18, 23) Leswi swi sungule a xizrambeni xa Edeni loko Diyavulosi (vito ledzri liki “Mulumbeti”) a lumbete Xikwembu Nkulukumba a ku a tsrona Adamu na Evha leswi va swi vilelaka akuva va nyonxa. (Gn 3:1-5) Ku sukela kolanu, Yehovha a lumbetiwa leswaku a tsrona vhanu leswi nakunene va swi vilelaka akuva va nyonxa. Yesu a a kazrateka swinene hi ku vona vito dzra Papayi wake na dzri hehliwa hi ndlela leyo. Xileswo, a dondzrise valandzreli vake ku khongota va ku: “Papayi wezru lweyi a nga matilweni, a vito dzraku a dzri xwengisiwe.”—Mt 6:9.

6. Ha yini Yehovha a pfumelela kuva ku khaluta nkama wa ku leha na a nge si na kombisa leswaku a ni mfanelo ya ku fuma?

⁶ Ku pfukeliwa ka wuhosi byake. Yehovha a ni mfanelo leyi heleliki ya ku fuma a matilweni ni lani misaveni, nakone a mafumela yake hi lamanene ku tlula hinkwawu. (Mpf 4:11) Kambe Diyavulosi a dzringisa ku kanganyisa tintsrumi ni vhanu akuva va pimisa leswaku Xikwembu Nkulukumba a nga na yone mfanelo leyo. Mhaka ya mfanelo ya Yehovha ya kuva a fuma a yi nge na ku lulamisiwa hi ku byavuta ka tihlo. Hi wutlhazri, Xikwembu Nkulukumba a nyike vhanu nkama lowu dzringanaka akuva va swi vona leswaku a swi nge va fambeli ha hombe loko va tifuma handle ka Mutumbuluxi. (Yr 10:23) Hi kola ka ku lehisa mbilu ka Xikwembu Nkulukumba, mhaka ya wuhosi yi ta lulamisiwa hi lani ku nga helikiki. A ta kombisa leswaku a ni mfanelo ya ku fuma, nkama lowu a kombisaka leswaku ko va Mfumu wake ntsena wu nga tisaka ku zrula ka xihlayelamfuzri ni nsizrelelo a misaveni.

7. I vamani va pfukeliki Yehovha, nakone a ta va yentxa yini?

⁷ Ku pfukeliwa hi van’we va vanake. Yehovha a vumbe tintsrumi ni vanake va lani misaveni na va hetisekile. Kambe ntsrhaku, ntsrumi leyi mu pfukeliki, ku nga Sathana (vito ledzri liki “Mukaneti”), yi yentxe leswaku Adamu na Evha, vhanu lava hetisekiki, va pfukela Yehovha. Tintsrumi timbeni ni vhanu va tipatsre ka ntlawa wa vapfukeli. (Yd 6) Hi ku famba ka nkama, nambi vhanu vambeni va tiko dzra Israyele, ku nga vhanu lava Xikwembu Nkulukumba a va hlawuliki, va mu fulazrelile, va ya gandzrela swikwembu swa madzrimi. (Eza 63:8, 10) A swi fanela kuva Yehovha a titwa na a kanganyisiwile. Nambi tanu, a le ku tiyiseleni, nakone a ha ta tama a tiyisela ku kota ku tlhasa nkama wa ku helisa vapfukeli vake hinkwavu. Leswo swi ta buyisa ku zrula ka vhanu lava dumbekaka kwake, lava tiyiselelaka xiyimu lexi xa ku biha kun’we na yene!

8-9. I madzrimi muni lawa Yehovha a hehliwaka ha wone, nakone hi nga xi hlamulisa ku yini xihehlo xolexo?

⁸ Madzrimi ya nkama ni nkama ya Diyavulosi. Sathana a hehle Yobe, mutizreli wa ku dumbeka wa Yehovha, a hlaya leswaku vagandzreli hinkwavu va ku dumbeka va Yehovha va tizrela Xikwembu Nkulukumba hi ku djula xa kukazri. (Yb 1:8-11; 2:3-5) Ku ta ta tlhasa ni namunhla, Diyavulosi a ha hlaya swoleswo. (Mpf 12:10) Hi nga hamba xiyenge xezru akuva hi kombisa leswaku Sathana i muhembi, hi ku tiyisela mindzringo leyi hi kumanaka na yone ni ku tama hi dumbeka ka Yehovha hi leswi hi mu zrandzraka. Ku fana na Yobe, Yehovha a ta hi tovokisa hi ku tiyisela kwezru.—Yk 5:11.

 ⁹ Sathana a tizrisa vazrangeli va wukhongoti bya madzrimi akuva a hlaya leswaku Yehovha a ni tihanyi nakone a ku xaniseka ka vhanu i nandzru wake. Vambeni va tlhela va hlaya ni leswaku loko ku fa vatsrongwana, i Xikwembu Nkulukumba a va tekiki akuva a yengesela tintsrumi a matilweni. Lexo i xizruku xikulu swinene! Kambe hine ha swi tiva leswaku Yehovha i Papayi wa lizrandzru. Loko hi kumiwa hi mavabyi lamakulu, kumbe mhunu lweyi hi mu zrandzraka a fa, a hi nyiki nandzru Xikwembu Nkulukumba ni kutsrongo. A matsrhan’wini ya leswo, hi ni ku dumba ka leswaku siku dzrimbeni a ta hanyisa timbabyi, a pfuxa lava fiki. Hi nga byela hinkwavu lava djulaka ku yingiseta leswaku Yehovha i Xikwembu Nkulukumba wa lizrandzru swinene. Leswo swi mu yentxa a nyikela nhlamulo leyinene ku lweyi a mu zrukaka.—Pr 27:11.

10. Xana Amapsalma 22:23, 24 yi hi byela yini mayelanu na Yehovha?

¹⁰ Ku xaniseka ka malandzra yake lama zrandzrekaka. Yehovha i Xikwembu Nkulukumba wa ntwelawusiwana. Swa mu vavisa ku hi twa na hi dzrila hi kola ka nhlomulo lowu hi wu tiyiselelaka—ku nga ha va hi kola ka ku xanisiwa, mavabyi kumbe ku pfumala ku hetiseka. (Dondzra Amapsalma 22:23, 24.) Yehovha awa ku twa ku vavisa loku hi ku twaka; a djula ku ku helisa, nakone a ta ku helisa. (Dzringanisa na Eksoda 3:7, 8; Ezaya 63:9.) Dzra ta siku ledzri a taka ‘hlangula minyembeti hinkwayu a mahlweni [yezru]; ni ku fa ku nga ha vi kone; ku nga ha vi na nkosi, ni ku bongosa, ni ku vaviseka’.—Mpf 21:4.

11. Xana Yehovha a titwisa kuyini hi malandzra yake ya ku dumbeka lama fiki?

¹¹ Ku tsravukana ni vanghanu vake lava fiki. Xana Yehovha a titwisa kuyini hi vavanuna ni vavasati va ku dumbeka lava fiki? A xuva ku tlhela a va vona! (Yb 14:15) Xana wa yi pimisa ndlela leyi Yehovha a mu xuvaka ha yone munghanu wake Abrahamu? (Yk 2:23) Kumbe  Moxe, lweyi a vulavuliki na yene na ‘va lavisane hi vuso’? (Eks 33:11) Nakone a swi hlunyela swinene ku yingela Davhida ni vatsrali vambeni va mapsalma na va mu dzrumisa hi tinsimu tavu ta ku xonga! (Ps 104:33) Nambi leswi vanghanu lava va Xikwembu Nkulukumba va yetleliki ku feni, Yehovha a nga va dzrivalanga. (Eza 49:15) Awa dzrimuka wutsrhokotsrhoko hinkwabyu bya matsrhamela yavu. Hi ndlela ya kukazri, ‘ku yene hinkwavu va hanya’. (Lk 20:38) Siku dzrimbeni a ta va pfuxa, nakone a ta tlhela a yingela swikhongoto swavu swa le mbilwini, a yamukela ni wugandzreli byavu. Loko u feliwe hi lweyi u mu zrandzraka, ingiki mazritu lawa ma nga ku txhavelela ma tlhela ma ku tiyisa.

12. I yini leswi ngopfungopfu swi vavisaka Yehovha a masikwini lawa ya wugamu ya ku biha?

¹² Ku xaniseka ka vhanu hi kola ka wubihi. Loko wupfukeli byi sungulile a Edeni, Yehovha a swi tivile leswaku xiyimu a xi ta ya xi biha ku ya tlhasela lani mintxhumu yi taka yampswisiwa. Yehovha awa byi venga wubihi, ku pfumaleka ka wululami ni wugevenga lebyi nga kone namunhla. Minkama hinkwayu a zron’weka swinene hi lava ngeke na ntamu wa ku tisizrelela, va ku fana ni vana lava feliwiki hi vapswele ni vafelwa. (Zk 7:9, 10) Yehovha swi mu vavisa hi ku tlulisa loko a vona vatizreli vake na va xanisiwa va tlhela va pfaleliwa. Tiyisekani, n’wine hinkwenu mi tiyiselaka kun’we na yene, leswaku awa mi zrandzra.

13. Xana vhanu va honeke hi ndlela yini a mahlweni ka Xikwembu Nkulukumba, nakone a ta yentxa yini ha swone?

¹³ Ku honeka ka mahanyela ya vhanu hi tlhelo dzra swa tinkuku. Sathana awa swi zrandzra ku hona vhanu lava vumbiwiki a xifanisweni xa Xikwembu Nkulukumba. Loko Xikwembu Nkulukumba ‘a vona leswaku ku hona ka vhanu ku talile’ a masikwini ya Nowa, ‘Yehovha a vilela hi leswi a nga hamba vhanu misaveni, a tsretsra a mbilwini yakwe’. (Gn 6:5, 6, 11) Xana ku ve ni ku yampswa ka xiyimu ku sukela ka nkama wolowo? Ni kutsrongo! Diyavulosi swi mu nyonxisa swinene ku vona wubihi hi tlhelo dzra tinkuku byi yandzra hi tindlela hinkwatu, ku patsra ni mintizro ya ku biha hi tlhelo dzra tinkuku, leyi yentxiwaka hi wanuna ni wansati ni hi vhanu va limbewu ledzri fanaka! (Ef 4:18, 19) Sathana a nyonxa hi tlulisa ngopfungopfu loko a kota ku dohisa vagandzreli va xihlayelamfuzri. Loko Yehovha a heleliwa hi mbilu a ta helisa hinkwavu lava nga ni mahanyela ya ku biha, lava nga djulikiki ku txintxa.

14. Xana mhunu a yi yentxa yini misava ni swihazri swa Xikwembu Nkulukumba?

¹⁴ Ku honiwa ka ntumbuluku wake. A mhunu a ngo ‘fuma mun’wana ku mu yentxa swa ku biha’ ntsena kambe a tlhela a khoma misava ni swihazri hi ndlela ya ku biha, leyi hambaniki ni leyi Yehovha a mu leletiki yone. (Ekl 8:9; Gn 1:28) Tintlhazri timbeni ta siyensa ti hlaya leswaku mintizro ya vhanu yi ta yentxa leswaku a malembeninyana lama taka ku nyamalala kolomu ka 1.000.000 wa swihazri ni minsinya. A hi vomu loko va ku a ntumbuluku wu le khombyeni! Lexi nyonxisaka, Yehovha a dumbisa ku ‘helisa lava helisaka misava’ a tlhela a yi ndzruluta yi va paradeyisi.—Mpf 11:18; Eza 35:1.

15-16. I yini xi fanelaka ku hi susumetela ku tiyisela kun’we na Yehovha? Kombisa.

¹⁵ Pimisa hi swikazratu hinkwaswu leswi Papayi wezru wa le matilweni a nga ku swi tiyiseleleni ku dzringana malembe manyingi swinene. (Vona bokisi ledzri liki “ Leswi Yehovha A Nga Ku Swi Tiyiseleleni”.) Yehovha a nga helisa xiyimu lexi xa ku biha hi nkama wini na wini lowu a wu djulaka. Kambe ku lehisa kwake ka mbilu ku tikomba na ku li tovoko kwezru! Pimisa hi xifaniso lexi: A hi nge vapswele va kukazri va byeliwa leswaku n’wanavu a ta pswaliwa na a ni wulima, swi ta mu kazratela ku hanya, nakone a ta  hatla a luza. Nambi tanu, va hoyozela n’wanavu na va nyonxile loko a pswaliwa, nambi leswi swi taka va bindzrela swinene ku mu hlayisa. Lizrandzru dzravu hi n’wanavu dzri va susumetela ku tiyiselela swizralanganya swini na swini akuva va kota ku mu hlayisa hi ndlela leyinene hi lani va nga kotaka ha kone.

¹⁶ Hi lani ku fanaka, a vatukulu hinkwavu va Adamu na Evha va pswaliwa na va nga hetisekanga. Nambi tanu, Yehovha awa va zrandzra a tlhela a va hlayisa. (1Yh 4:19) Ku hambana ni vapswele va le xifanisweni xezru, Yehovha a nga swi kota ku helisa ku xaniseka ka vanake. A beke siku ledzri a taka helisa swikazratu hinkwaswu leswi vhanu va langusanaka na swone. (Mt 24:36) Xana lizrandzru dzrake a dzri fanelanga ku hi susumetela ku tiyisela kun’we na yene ku dzringana nkama lowu djulekaka?

17. Xana ndlela leyi Yesu a tlhamuxeliwiki ha yone ka Ba-Heberu 12:2, 3 yi hi kutxisa kuyini ku tama hi tiyisela?

¹⁷ Yehovha a hi bekele xikombiso lexi hetisekiki xa ku tiyisela. Yesu a swi kotile ku yetisela Papayi wake a mhakeni ya ku tiyisela. Loko a li lani misaveni, Yesu a tiyiselele mazritu lama tlhavaka, tingana ni mhandzri ya nxanisa akuva ku pfuneka hine. (Dondzra Ba-Heberu 12:2, 3.) Handle ka ku ganaganeka, xikombiso xa Yehovha xa ku tiyisela xi nyike Yesu ntamu wa ku tiyisela. Xikombiso lexo xi nga hi tiyisa na hine.

18. Xana 2 Petros 3:9 yi hi pfunisa kuyini ku twisisa leswi ku lehisa mbilu ka Yehovha ku swi hetisisiki?

¹⁸ Dondzra 2 Petros 3:9. Yehovha awa wu tiva nkama lowunene wa ku helisa misava leyi ya ku biha. Ku lehisa kwake mbilu ku pfumelele ku hlengeletiwa ka xitsrhungu lexikulu lexi hambaka mawakawaka, lexi mu gandzrelaka xi tlhela xi mu dzrumisa. Hinkwavu va mu khensa Yehovha hi leswi a tiyiseliki nkama lowu dzringanaka va kota va pswaliwa, va dondzra mayelanu na yene va tlhela va tinyiketela kwake. Loko ku kumeka mawakawaka ya vhanu lava tiyiseliki ku ya tlhasa wugamu, swi ta va livaleni leswaku Yehovha a teke xiboho lexinene xa kuva a tiyisela!

19. Hi fanela ku tiyimisela ku yentxa yini, nakone dzri ta va dzrini hakelo dzrezru?

¹⁹ Hi dondzra ka Yehovha ku tiyisela na hi nyonxile. Nambi leswi Sathana a vangaka tinxanisa hinkwatu leti hlomulanaka mbilu, Yehovha a ha tama a li Xikwembu Nkulukumba lwa nyonxiki. (1Tm 1:11) Hi ndlela leyi fanaka na hine hi nga tama hi tsrhama na hi nyonxile, na hi lehisa mbilu hi yimela Yehovha kuva a xwengisa vito dzrake, a lwela wuhosi byake, a helisa wubihi hinkwabyu a tlhela a helisa swikazratu leswi hi langusanaka na swone namunhla. A hi tiyimiseleni ku tiyisela na hi txhaveleliwa hi ku tiva leswaku Papayi wezru wa le matilweni na yene a le ku tiyiseleni. Loko hi yentxa leswo, mazritu lawa ma ta hetiseka ka mun’wana ni mun’wana wezru: ‘Ku tovoki mhunu lwa tiyiselaka a ndzringweni wake, hikuva, loko a kumiwi na a tiyile, a ta yamukela ngiyana ya wutomi, leyi Hosi yi dumbisiki lava yi zrandzraka.’—Yk 1:12.