NHLOKOMHAKA YA XIDONDZRO 29
Seketela Yesu Muzrangeli Wezru
“Ni nyikiwe wulawuli hinkwabyu a tilweni ni lani misaveni.”—MT 28:18.
LISIMU 13 Kriste I Xikombiso Xezru
NKATSRAKANYU WA LESWI TAKA DONDZRIWA *
1. He kwini ku zrandzra ka Yehovha?
NAMUNHLA ku zrandzra ka Xikwembu Nkulukumba hi leswaku madzrungula lamanene ma zrezriwa a misaveni hinkwayu. (Mr 13:10; 1Tm 2:3, 4) Lowu i ntizro wa Yehovha, nakone i wa lisima kwake lakakuva a hlawule N’wanake akuva a wu zrangela. Nakone hi nga tiyiseka leswaku leswi hi nga hansi ka nkongomiso wa Yesu Kriste, ntizro lowu wu ta yentxiwa hilani Yehovha a djulaka ha kone, na wugamu byi nga si tlhasa.—Mt 24:14.
2. I yini leswi hi taka swi vona ka xidondzro lexi?
2 Ka xidondzro lexi, hi ta vona ndlela leyi Yesu a tizrisaka ha yone “nandzra wa ku dumbeka ni ku tlhazriha” akuva a phamela valandzreli vake swakuda swa moya ni ku va pfuna ku yisa mahlweni ntizro wa ku zrezra. (Mt 24:45) Hi ta tlhela hi vona leswi mun’wana ni mun’wana wezru a nga swi yentxaka akuva a seketela Yesu ni nandzra wa ku dumbeka.
YESU A ZRANGELA NTIZRO WA KU ZREZRA
3. He byini wulawuli lebyi Yesu a nyikiwiki byone?
3 Hi nga tiyisekisa kuyini leswaku Yesu a zrangela ntizro wa ku zrezra? Na a li kusuhi ni ku tlhelela tilweni, Yesu a humelele ka valandzreli vake va ku dumbeka a nhaveni ya Galileya. A va byele leswi: “Ni nyikiwe wulawuli hinkwabyu a tilweni ni lani misaveni.” Xiya leswi a tlheliki a swi hlaya, a te: “Fambani mi ya dondzrisa vhanu va matiko hinkwawu.” (Mt 28:18, 19) Kutani a wulawuli lebyi Yesu a byi yamukeliki, byi patsra ni ku zrangela ntizro wa ku zrezra.
4. Ha yini hi tiyiseka leswaku Yesu a ha tama a zrangela ntizro wa ku zrezra?
4 Yesu a hlaye leswaku a ntizro wa ku zrezra ni ku yentxa vadondzrisiwa a wu ta yentxiwa ka “matiko hinkwawu”. A tlhele a byela valandzreli vake leswaku a a ta va na vone “ku ya tlhasa ku heleni ka xiyimu lexi xa misava”. (Mt 28:20) Mazritu lawa Yesu a ma hlayiki ma swi beka livaleni leswaku a a ta zrangela ntizro wa ku zrezra ku ta ta tlhasa ni le masikwini yezru.
5. Xana hi patsreka hi ndlela yini a ku hetisiseni ka Amapsalma 110:3?
5 Yesu a a tiyiseka leswaku a masikwini ya wugamu, a ku ta va ni vatizri lava yaneliki akuva va yentxa ntizro wa ku zrezra. A a swi tiva leswaku a mazrito ya wuprofeta lama nga ka Amapsalma, a ma ta hetiseka. Mazritu ya kone hi lama liki: ‘A vhanu vaku va ta va lava nkhinkhi hi siku dzra ku huma yimpi kwaku.’ (Ps 110:3) Loko na wene u patsreka ka ntizro wa ku zrezra, u seketela Yesu ni nandzra wa ku dumbeka u tlhela u patsreka a ku hetisiseni ka wuprofeta. Kambe nkama lowu hi hetisisaka ntizro lowu, hi ta kumana ni swikazratu.
6. He swini swikazratu leswi hi langutanaka na swone namunhla?
6 Xin’we xa swikazratu lexi vazrezri va langutanaka na xone i ku kanetiwa. Hi xikombiso, madukwa, vazrangeli va wukhongoti ni va politika, va hangalasa madzrimi mayelana ni ntizro wezru. Loko maxaka yezru, lava hi dondzraka na vone xikole ni lava hi tizraka na vone vo kholwa ka madzrimi lawo, va nga ha dzringisa ku hi tsrhikisa ku tizrela Yehovha ni ku zrezra. Ka matiko mambeni valala vezru va txhavisela, va hlasela ni ku pfalela vamakwezru a djele. Kambe leswo a swi hi hlamalisi hikusa Yesu a hi byele leswi: “Va ta mi xanisa ni ku mi dlaya, nakone mi ta nyenyiwa hi matiko hinkwawu hi kola ka vito dzranga.” (Mt 24:9) Ku hlaya ntiyiso, minhlaselo leyo hinkwayu yi kombisa leswaku Yehovha a wa hi yamukela. (Mt 5:11, 12) Phela Sathana hi yene a kutxetelaka minhlaselo leyo! Leswi hi nga na Yesu, madzrungula lamanene ma zrezriwa ka vhanu va matiko hinkwayu. A hi voneni wumboni bya leswo.
7. He byini wumboni lebyi hi nga byone bya leswaku Apfuletelo 14:6, 7 yi le ku hetisekeni?
7 Leswi hi vulavulaka tindzrimi tinyingi, ku nga ha va xikazratu ku zrezra madzrungula lamanene ka vhanu va matiko hinkwawu. Nambileswi ku nga ni xikazratu lexi, Yesu a hlaye leswaku madzrungula lamanene ya Mfumu a ma ta zrezriwa a misaveni hinkwayu. (Dondzra Apfuletelo 14:6, 7.) Hi ndlela yini? Phela ntizro wezru namunhla wu yentxiwa matikweni manyingi hi tindzrimi tinyingi. Hi xikombiso, vhanu va kuma madzrungula lamanene nakone va nga dondzra Bibele ka pajina dzrezru dzra jw.org hi tindzrimi leti tlulaka 1.000. Hi xikombiso, a buku ledzri hi dzri tizrisaka akuva hi fambisela vhanu xidondzro xa Bibele, ledzri liki Hanya Hi Ku Nyonxa!, dzri ta kumeka hi tindzrimi leti tlulaka 700. Handle ka leswo, swakuda swa moya swa kumeka hi mavhidiyu ya lidzrimi dzra mavoko akuva swi pfuna lava kalaka va nga vulavuli kumbe ku twa, nakone ku ni mabuku ya braili akuva ma pfuna lava kalaka va nga voni. ‘Vhanu va tindzrimi hinkwatu ta matiko’ va le ku dondzreni ka lidzrimi dzraku basa, leswi liki, mintiyiso ya Bibele. (Zk 8:23; Tsf 3:9) Hinkwaswu leswi swi hetiseka hi leswi hi kongomisiwaka hi muzrangeli wezru Yesu Kriste.
8. Xana vhanu va pfunekisa kuyini loko va yamukela madzrungula lamanene?
8 Namunhla, a matikweni lama tlulaka 240 ku tlula 8.000.000 wa vhanu va hamba xiyenge xa nhlengeletanu ya Yehovha, nakone kolomu ka 10.000 wa vhanu va babatisiwa lembe dzrin’wana ni dzrin’wana. Kambe tinhlayu leto a hi tone ta lisima. Xa lisima ngopfu, i matsrhamela lawa vhanu lavo va ma txutxelaka, ku nga matsrhamela ya moya. Hi mahlayela mambeni, va ndzruluka ‘mhunu lwemumpshwa’. (Kl 3:8-10) Vanyingi va tsrhike mahanyela ya tingana, wugevenga, ni xihlawuhlawu. A wuprofeta lebyi kumekaka ka Ezaya 2:4 bya hetiseka, a malandzra ya Yehovha ‘ma nga ka ma nga ha dondzrisiwi ku lwa’, kumbe yimpi. Loko hi tikazratela ku yambala wumhunu lebyimpshwa vhanu va ku tala va ta kokeleka a nhlengeletanwini ya Yehovha, nakone hi ta va hi swi beka livaleni leswaku hi landzra muzrangeli wezru Yesu Kriste. (Yh 13:35; 1Pe 2:12) Phela leswo a swo tiyentxekela, swi koteka hi pfunu lowu Yesu a hi nyikaka wone.
YESU A BEKA NANDZRA
9. Hi kuya hi Matewu 24:45-47, i yini leswi Yesu a hlayiki leswaku a a ta swi yentxa a masikwini ya wugamu?
9 Dondzra Matewu 24:45-47. Yesu a hlaye leswaku a masikwini ya wugamu a a ta beka “nandzra wa ku dumbeka ni ku tlhazriha” akuva a phamela vhanu va Xikwembu Nkulukumba swakuda swa moya. Kutani swa twala ku yimela leswaku nandzra lweyo a tizra swi phela a masikwini yezru. Nakunene hi leswi a nga ku swi yentxeni. Muzrangeli wezru, Yesu Kriste, a tizrisa ntlawa wutsrongo wa vatotiwa, akuva a nyikela swakuda swa moya hi nkama lowu fanelaka ka vhanu va Xikwembu Nkulukumba ni ka vhanu lava nyonxelaka. Vamakwezru lava a va tivoni na va li vinyi va lipfumelo dzra vambeni. (2Ko 1:24) A matsrhan’wini ya leswo, va swi twisisa leswaku, Yesu Kriste hi yene ‘hosana ni muleleti’ wa vhanu vake.—Eza 55:4.
10. Ka mabuku lama kombisiwaka ka mufoto, he dzrini ledzri u dzri tizrisiki akuva u dondzra ntiyiso?
10 Ku sukela hi 1919, a nandzra wa ku dumbeka a lulamisela mabuku manyingi akuva a pfuna vhanu lava nyonxelaka kuva va dondzra ha Yehovha. Hi 1921 a nandzra wa ku dumbeka a humexi buku ledzri liki A Harpa De Deus akuva a pfuna lava nyonxelaka kuva va va ni tidondzro ta masungulu ta Bibele. Hi ku famba ka nkama ku humexiwe mabuku man’wana. He dzrini buku ledzri ku pfuniki ku tiva ni ku zrandzra Papayi wezru lwa nga matilweni? Xana i buku ledzri liki Seja Deus Verdadeiro, Ntiyiso Lowu Yisaka eVuton’wini Lebyi Nga Heriki, U Nga Hanya Hi Masiku eParadeyisini eMisaveni, Vutivi Lebyi Yisaka eVuton’wini Lebyi Nga Heriki, Xana Bibele Yi Dyondzisa Yini Hakunene?, I Yini Leswi Hi Nga Swi Dondzraka A Bibeleni? kumbe hi buku ledzrimpswha ledzri liki, Hanya Hi Ku Nyonxa Hi La Ku Nga Helikiki! Mabuku hinkwawu lawa hi ma tizrisile akuva hi pfuna vhanu ku dondzra ha Yehovha nakone dzrin’wana ni dzrin’wana dzra wone dzri humexiwe hi nkama lowu faneliki hikuya hi swivileleko swa vhanu va nkama wolowo.
11. Ha yini swi li swa lisima ku tama hi tidisa hi tlhelo dzra moya?
11 Kambe a hi lavampswha ntsena va djulaka swakuda swa moya. Ku hlaya ntiyiso, hinkwezru ha swi vilela. Mupostola Pawulo a hlaye leswaku swakuda leswi tiyiki, swi fanekela vhanu lava wupfiki. A tlhele a hlaya leswaku ku tizrisa leswi hi swi dondzraka swi ta hi pfuna ‘ku yavanyisa swa ku xonga ni swa ku biha’. (Hb 5:14) Leswi vhanu va yaka va tikhoma hi ndlela ya tingana namunhla, swi nga ha hi kazratela ku landzra milawu ya Yehovha. Kambe Yesu a wa hi pfuna ku tama hi tiya, hi ku hi nyika leswi hi swi vilelaka hi tlhelo dzra moya. Swakuda hinkwaswu swa moya swi seketeliwa a Zritwini dzra Xikwembu Nkulukumba, ku nga Bibele. Nandzra wa ku dumbeka a lulamisela swakuda leswo, na a kongomisiwa ha Yesu Kriste.
12. Xana hi mu yetisela hi ndlela yini Yesu ka ndlela leyi hi dzrumisaka vito dzra Xikwembu Nkulukumba ha yone?
12 Ku fana na Yesu, hi dzrumisa vito dzra Yehovha hi lani swi fanelaka ha kone. (Yh 17:6, 26) Hi xikombiso, hi 1931 hi yamukele vito ledzri liki Timboni ta Yehovha. Hi yentxe leswo hikusa hi djula ku vitaniwa hi vito dzra Yehovha hi tlhela hi mu dzrumisa. (Eza 43:10-12) Ku sukela hi Otubru wa lembe ledzro, a vito dzra Yehovha dzri buya ka kapa dzra Xihondzro xa ku Zrindzra. Handle ka leswo, nkama lowu makezreke manyingi ma susaka vito dzra Xikwembu Nkulukumba loko ma dzrulutela Bibele, a Wundzruluteli Bya Misava Leyimpswha Bya Matsralwa Ya Ku Xwenga dzri tlelisele vito dzra Xikwembu Nkulukumba hinkwaku lomu a dzri kumeka kone ka mabuku lama tsraliwiki hi voko.
YESU A HLELA VALADZRELI VAKE
13. I yini lexi ku tiyisekisaka leswaku Yesu a tizrisa “nandzra wa ku dumbeka ni ku tlhazriha” namunhla? (Yohan 6:68)
13 Yesu a tizrisa “nadzra wa ku dumbeka ni ku tlhazriha” akuva a vumba nhlengeletanu yake lani misaveni leyi seketelaka wugandzreli bya ntiyiso. Xana u titwisa kuyini hi ku hamba xiyenge xa nhlengeletanu leyo? Swi nga yentxeka u ma dzrimuka mazritu ya Petro loko a byela Yesu a ku: ‘Hosi, hi ku sukela hi ya ku mani? U na ni mazritu ya wutomi lebyi nga helikiki.’ (Yh 6:68) Xana a hi tava kwini loko a hi nga li nhlengeletan’wini ya Yehovha? Phela, Yesu a tizrisa nhlengeletanu yake akuva a hi nyika swakuda swa moya ni ku hi kongomisa a ntizrweni wa ku zrezra. Nakone a hi pfuna ku ndzruluka ‘mhunu lwemumpswha’ akuva hi nyonxisa Yehovha.—Ef 4:24.
14. Xana mikongomiso leyi hi yi yamukelaka ka nhlengeletanu ya Yehovha hi nkama lowu wa ntungu wa COVID-19 yi hi pfuna hi ndlela yini?
14 Yesu a hi nyika kongomiso wa wutlhazri hi nkama wa ku kazrata. Leswo swi tikombile loko ku sungule ntungu wa COVID-19. Nkama lowu vhanu a va nga swi tivi swa ku swi yentxa, Yesu hi ku tizrisa nhlengeletanu yake, a hi nyika mikongomiso leyi nga livaleni akuva hi tama hi tisizrelela. Hi xikombiso, hi kutxiwa akuva hi yambala maxkara lomu ku taliki hi vhanu ni kuva hi titsravuxa ni vhanu vambeni. Vakulu va kutxiwe akuva va tama va djuletela tindlela ta ku bulisana ni vazrezri hinkwavu va bandla akuva va vona swivileleko swavu swa nyama ni swa moya. (Eza 32:1, 2) Handle ka leswo, hi kuma kongomiso ni ku tiyisiwa ka swib’iko swa Huvo leyi Zrangelaka.
15. He yini mikongomiso leyi hi yi yamukelaka hi nkama lowu wa ntungu mayelana ni mintlhanganu ni ntizro wa ku zrezra? Xana he wani mabindzru ya kone?
15 Hi nkama lowu wa ntungu, hi tlhela hi yamukela mikongomiso ya ndlela leyi hi nga khomaka ha yone mitlhanganu yezru ya wukriste ni ku tama hi ya mahlweni ni tizro wa ku zrezra. Na hi nga swi yimelanga, hi sungule ku khoma mintlhanganu, ma-asembleya, ni ma kongresu hi ku tizrisa intrenet nakone hi tlhele hi sungula ku zrezra ngopfungopfu hi ku tizrisa mapapela ni telefone. Nakone Yehovha a ku tovokisa ngopfu ku tikazrata kwezru. Ka mazrwavi manyingi a nhlayu ya vazrezri yi yengeseleka ngopfu swinene nakone vanyingi va dzrungula mifambu ya ku nyonxisa ngopfu swinene ka nkama lowu.—Vona bokisi ledzri liki “ Yehovha A Tovokisa Ntizro Wezru Wa Ku Zrezra.”
16. I yini leswi hi nga tiyisekaka ha swone?
16 Van’wana va nga ha yanakaya leswaku a nhlengeletanu yi txhava ntungu ku tlula mpimu. Kambe swi le livaleni leswaku a nhlengeletanu, yi hi nyika kongomiso lowunene minkama hinkwayu. (Mt 11:19) Nakone loko hi yanakayisisa hi ndlela ya lizrandzru leyi Yesu a kongomisaka ha yone vhanu vake, swi nga na mhaka leswaku ku ta yentxeka yini a nkameni lowu wu taka, hi nga tiyiseka leswaku Yehovha na Yesu va tava na hine.—Dondzra Ba-Heberu 13:5, 6.
17. Xana u titwisa kuyini hi ku va na Yesu swanga muzrangeli?
17 Hi nyonxa ngopfu swinene hi ku va na Yesu swanga muzrangeli wezru! Hi lumba nhlengeletanu leyi nga ni wumun’we swi nge na mhaka leswaku hi va lidzrimi muni, hi va tiko dzrini, kumbe lixaka dzrini, nakone ha wundliwa hi tlhelo dzra moya. Handle ka leswo, ha wupfisiwa akuva hi ya malhweni ni ntizro wa ku zrezra. Mun’wana ni mun’wana wezru a pfuniwa ku va ni wumhunu lebyimpswha, nakone hi dondzrisiwa ku zrandzrananana. Handle ka ku gananganeka hi ni swivangelo leswi twalaka swa kuva hi tikhuza hi leswi Yesu a nga muzrangeli wezru!
LISIMU 16 A Hi Dzrumiseni Yehovha Hi Mutotiwa Wakwe
^ Vhanu vanyingi, lavakulu ni lavatsrongo, va zrezra hi ku hiseka madzrungula lamanene ya Mfumu wa Xikwembu Nkulukumba. Loko u li mun’we wa vhanu volavo, u patrseka ka ntizro lowu kongomisiwaka hi muzrangeli wezru Yesu Kriste. Ka xidondzro lexi, hi ta vona wumboni bya leswaku Yesu Kriste a zrangela ntizro wa ku zrezra namunhla. Ku yanakanyisisa hi leswo, swi ta hi pfuna ku tama hi tiyimisela ku tizrela Yehovha na hi landzra nkongomiso wa Kriste.
