A Bibele a dzri hlayi kambe dzri nyikela swivangelo swa ku twala leswi ku nga ha vaka ku li swone swi va yentxiki va tama va tsrhama a Betlehema.

Ntsrumi ya kukazri yi byele Mariya leswaku a a ta va ni nyimba a va a pswala n’wana. Loko Mariya a yamukele dzrungula ledzri, yene na Yosefa a va tsrhama Nazareta ka xidoropana xa Galileya lomu Yosefa a pswaleliwiki kone. (Lk 1:26-31; 2:4) Hi ku famba ka nkama, loko va buye hi Egipta, va tlhelele a Nazareta. Hi lani Yesu a kuleliki kone nakone a ve Munazareta. (Mt 2:19-23) Xileswo, loko hi vulavula hi Nazareta hi dzrimuka Mariya, Yesu na Yosefa.

Mariya a a ni xaka ledzri a dzri vitaniwa Elizabeti nakone a a tsrhama a Yuda. Elizabeti a a li nsati wa muprista lwenkulu Zakariya nakone a ve mamana wa Yohane Mubabatisi. (Lk 1:5, 9, 13, 36) Mariya a ye pfuxela Elizabeti nakone a tsrhame tihweti tizrazru a Yuda. Ntsrhaku ka leswo a tlhelele a Nazareta. (Lk 1:39, 40, 56) Xileswo, Mariya a a ku tiva Yuda.

Hi ku famba ka nkama Yosefa a suke a Nazareta a ya Betlehema hikusa Varoma a va djula leswaku mun’wana ni mun’wana a “tsralisiwa, mun’wana ni mun’wana a doropeni dzrake”. Hi ku ya hi wuprofeta Mesiya a a ta pswaleliwa a Betlehema. (Lk 2:3, 4; 1Sa 17:15; 20:6; Mik 5:2) Ntsrhaku ka loko a pswaliwile, Yosefa a a nga djuli leswaku va yendzra mpfhuka wa ku leha va tlhelela a Nazareta na va ni xibebetana. Kutani va tsrhame a Betlehema lani a ku ni mpfhuka wa 9 wa makilometro ku ya Yerusalema. Handle ka leswo, swanga hi leswi nawu a wu sindzrisa leswaku loko ka ha ku pswaliwa n’wana a ku fanela ku ya nyikeliwa magandzrelo, a swi ta va nabyalela ku ya nyikela magandzrelo a tempeleni swanga hi leswi a ku li kusuhi.—Lv 12:2, 6-8; Lk 2:22-24.

A ntsrumi ya Xikwembu Nkulukumba a yi byele Mariya leswaku a n’wana lweyi a taka pswaliwa a a ta kuma ‘xitsrhamu xa wuhosi xa Davhida a va hosi’. Swi nga yentxeka Yosefa na Mariya va hlamalisiwe hi leswi a pswaleliwiki a doropeni dzra Davhida.

Swi nga yentxeka va vone ku li wutlhazri ku tama va tsrhama kwahala ku tlhasela loko va twa Xikwembu Nkulukumba a va byela leswi a va fanela ku swi yentxa. (Lk 1:32, 33; 2:11, 17) A hi swi tivi leswaku a ku khalute nkama wa ku gama kwini loko va yendzreliwe hi vangoma. Kambe ha swi tiva leswaku a ndangu lowu kutani a wu ni muti ni leswaku Yesu a a nga li xibebetana lexi a xa ha ka ku pswaliwa. (Mt 2:11) Swi tikomba ingiki a matsrhan’wini ya kuva va tlhelela Nazareta va vone swi yampswa kuva va tsrhama a Betlehema.

Heroda a zrumele leswaku “ku dlayiwa vatsrongwana hinkwavu va xinuna a Betlehema ni le migangeni hinkwayu ya le kusuhi, ku sukela ka va malembe mabidzri ku ya hansi”. (Mt 2:16) Ntsrumi ya kukazri yi byele Yosefa mayelanu ni Nawu lowu wa Heroda. Kutani va balekeli a Egipta nakone va tsrhame kone ku tlhasela loko Heroda a fa. Ntsrhaku ka nkamanyana, Yosefa a teke ndangu wake wu ya a Nazareta. Kambe ha yini va nga tlhelelanga a Betlehema? Hikusa hi nkama lowu lweyi a a fuma a Yuda a ku li Arkelewu, n’wana wa Heroda, nakone a a bihe ngopfu swinene. Handle ka leswo, a va djula ku landzra leswi Xikwembu Nkulukumba a va byeliki swone. A Nazareta, Yosefa a a ta kota ku pfuna Yesu kuva mugandzreli wa Xikwembu Nkulukumba.—Mt 2:19-22; 13:55; Lk 2:39, 52.

Swi tikomba na Yosefa a fe na Yesu a nga si pfula ndlela ya kuva vhanu va ya hanya a tilweni. Xileswo, Yosefa a ta pfuxeliwa ku hanya kola misaveni. Vanyingi va ta va ni mukhandlu wa ku mu tiva ni ku gungula leswaku ha yini yene na Mariya va hlawule ku tama va tsrhama a Betlehema ntsrhaku ka ku pswaliwa ka Yesu.