1. I yini leswi hi fanelaka ku swi yentxa akuva hi huluka ka siku dzra Yehovha?

 A BIBELENI xiga lexi liki “siku dzra Yehovha” xi tlhamuxela nkama lowu Yehovha a taka yavanyisa valala vake ni ku huluxa vhanu vake. Leswi swi ke swi yentxeka a nkameni lowu khalutiki. (Eza 13:1, 6; Ezk 13:5; Tsf 1:8) A masikwini yezru a “siku dzra Yehovha” dzri ta sungula loko vazrangeli va politika va ta hlasela Babilona lwenkulu nakone dzri ta ya gama hi yimpi ya Armagedoni. Akuva hi huluka ka “siku” ledzri, hi fanela ku tilulamisela na ke he swoswi. Yesu a dondzrise leswaku hi fanela ku tsrhama na hi lulamele nhlomulo lowukulu. Leswi tlhamuxelaka leswaku i ntxhumu lowu hi fanelaka ku tama hi wu yentxa.—Mt 24:21; Lk 12:40.

2. Ha yini mazritu lama nga ka 1 Vatesalonika ma li ya lisima kwezru?

² Ka papela ledzri a dzri tsraleliki Vatesalonika, mupostola Pawulo a tizrise swikombiso swinyingi akuva a pfuna vakriste ku tsrhama na va lulamele siku ledzrikulu dzra wuyavanyisi bya Yehovha. Pawulo a a swi tiva leswaku a siku dzra Yehovha a dzri nge ti tlhasa hi nkama luwani. (2Te 2:1-3) Nambi tanu, a kutxe vamakwavu ku tsrhama na va lulamele siku ledzro swanga hi loko dzri li kusuhi. A hi voneni leswi Pawulo a swi tlhamuxeliki mayelanu ni: 1) ndlela leyi siku dzra Yehovha dzri taka tlhasa ha yone, 2) leswaku i vamani lava nga tiki huluka ka siku dzra Yehovha, ni 3) ndlela leyi hi nga tilulamisela ha yone akuva hi kota ku huluka.

3. Xana a siku dzra Yehovha dzri ta ta ku fana ni muyivi lweyi a taka wusikwini hi ndlela yini? (Tlhela u vona xifaniso.)

³ “Ku fana ni muyivi lweyi a taka wusikwini.” (1Te 5:2) Lexi i xin’we xa swifananiso ka swizrazru leswi Pawulo a swi tizrisiki akuva a tlhamuxela ndlela leyi siku dzra Yehovha dzri taka tlhasa ha yone. Hi ntolovelo a vayivi va nghena wusikwini hi nkama lowu vhanu va yetleliki. Hi ndlela leyi fanaka, a siku dzra Yehovha dzri ta tlhasa hi xitxhuketa na vhanu va nga dzri yimelanga. A mintxhumu yi ta yentxeka hi ku kahlula, swi nga yentxeka nambi vakriste  va ntiyiso va ta hlamala. Kambe ku hambana ni vhanu va ku biha hine a hi nge ti helisiwa.

4. Xana a siku dzra Yehovha dzri fana ni ku lun’wa ka wansati lweyi a nga ni nyimba hi ndlela yini?

⁴ “Ku fana ni ku lun’wa ka wansati lweyi a nga ni nyimba.” (1Te 5:3) Loko wansati a ni nyimba a nga wu tivi nkama lowu a taka phuluka ha wone kambe awa tiyiseka leswaku a ta phuluka. Hi xitxhuketa a sungula ku lun’wa nakone a swivavu swi ya swi yengeteleka. Hi ndlela leyi fanaka a hi swi tivi leswaku siku dzra Yehovha dzri ta tlhasa siku muni nakone nkama muni kambe ha tiyiseka leswaku byi ta tlhasa. wuyavanyisi bya Yehovha byi ta tlhasa hi ku kahlula swinene nakone lava ku biha a va nge huluki.

5. Xana a nhlomulo lowukulu wu fana ni wuxa hi ndlela yini?

⁵ Ku fana ni vuxa. Ka xifananiso xa wuzrazru Pawulo a tlhela a vulavula hi vayivi lava yivaka ni wusiku. Kambe ka khambi ledzri swi tikomba a nga ha fananisi siku dzra Yehovha ni muyivi kambe a dzri fananisa ni vuxa. (1Te 5:4) A vayivi va nga ha nghena hi nhloko ka ku yiva lakakuva va nga swi voni leswaku a nkama wa khaluta. Dzri nga ha xa na va nga swi yimelanga lakakuva va voniwa hi vhanu van’wana. Nhlomulo lowukulu na wone wu ta kombisa lava fanaka ni vayivi lava tsrhamaka munyameni va va va yentxa mintxhumu leyi khunguvanyisaka Xikwembu Nkulukumba. Ku hambana ni vhanu lava, hine hi fanela ku tsrhama na hi lulamile akuva hi fambela kule ni mintxhumu leyi khunguvanyisaka Yehovha ni ku djuletela “mintxhumu hinkwayu leyinene, ya ku lulama ni ya ntiyiso”. (Ef 5:8-12) Hi ku landzrela Pawulo a tizrisa swifananiso swibidzri akuva a tlhamuxela lava nga tiki huluka ka siku dzra Yehovha.

6. Xana vhanu vanyingi va va lava yetleliki hi ndlela yini? (1 Vatesalonika 5:6, 7)

⁶ “Ku fana ni lavan’wana hinkwavu va yetlelaka.” (Dondzra 1 Vatesalonika 5:6, 7.) Lava  kalaka va nga ti huluka ka siku dzra Yehovha Pawulo a va fananise ni vhanu lava yetleliki. Vone a va wu voni nkama loko wu khaluta nakone a va swi voni leswi yentxekaka. Xileswo, va tama va nga yentxi ntxhumu hikusa a va swi xiyi loko ku yentxeka ntxhumu wa kukazri wa lisima. Vhanu vanyingi namunhla va yetlelile hi tlhelo dzra moya. (Ro 11:8) Vone a va kholwi leswaku hi hanya ka masiku ya wugamu ni leswaku a nhlomulu lowukulu ku nge khale wu ta tlhasa. Loko ku yentxeka ntxhumu wa kukazri a misaveni, wa ku fana ni tiyimpi, mintungu vone va pfuka va va va kombisa ku zron’weka hi dzrungula dzra Mfumu, kambe a matsrhan’weni ya ku tama va tsrhama na va pfukile vo tlhela va ya yetlela. Nambi lava va kholwaka ka siku dzra wuyavanyisi va yanakanya leswaku siku ledzro dzra ha le kule ngopfu swinene akuva dzri tlhasa. (2Pe 3:3, 4) Kambe kwezru i swa lisima kuva siku dzrin’wana ni dzrin’wana hi tsrhama na hi pfukile.

7. Xana vhanu lava kalaka va nge ti huluka ka siku dzra Yehovha va fana ni vapopswi hi ndlela yini?

⁷ “Lava va popswaka.” Pawulo a fananise vhanu lava taka helisiwa ni vhanu lava popswaka. Mhunu lweyi a popswiki loko ku humelela ntxhumu wa kukazri a hlwela ku yangula nakone a teka swiboho leswi ngeke swinene. Hi ndlela leyi fanaka, Xikwembu Nkulukumba a va ba ndleve lava yentxaka swa ku biha kambe a va yentxi ntxhumu. Va hlawula ku hanya hi ndlela leyi va yisaka ku suvisiweni. Vakriste va fanela ku tsrhama na va pfukile kumbe ku tsrhama na va lulamile va va va teka swiboho leswinene. (1Te 5:6) Mukambisisi wa kukazri wa Bibele a tlhamuxela leswaku mhunu lweyi a tsrhamaka na a “pfukile” a tama a va ni ku zrula nakone a nga txhavi ntxhumu. A tizrisa wuswikoti bya ku yanakanya nakone a teka swiboho swa wutlhazri. Kambe ha yini leswo swi li swa lisima? Leswo i swa lisima akuva hi nga patsreki ka timhaka ta politika ni ka mpfilumpfilu ya misava leyi. Loko siku dzra Yehovha dzri ya dzri tsrhindzrekela hi ta ya hi kutxeteliwa ku yima ni tlhelo dzra kukazri ka timhaka leti. Kambe leswo a swi fanelanga swi hi kazrata ngopfu. A moya wa Yehovha wu ta hi pfuna kuva hi teka swiboho swa wutlhazri a mhakeni leyo.—Lk 12:11, 12.

8. Hi ku ya hi 1 Vatesalonika 5:8 xana hi nga tsrhama na hi lulameli siku dzra Yehovha hi ndlela yini? (Tlhela u vona xifaniso.)

⁸ “Xisizrelelo xa xifuva . . . ni . . . Kapaseti.” Pawulo a hi fananise ni masotxha lama tsrhamaka na ma lulameli yimpi. (Dondzra 1 Vatesalonika 5:8.) A yimpini, minkama hinkwayu masotxha ma fanela ku tsrhama na ma lulamile akuva ma lwa. Swi hi lani ku fanaka ni kwezru. Akuva hi tsrhama na hi lulamele siku dzra Yehovha hi fanela ku tsrhama na hi yambale a xisizrelelo ku nga lipfumelo ni lizrandzru, ni ku tlhela hi yambala kapaseti ku nga dumbo. Matsrhamela lawa ma nga hi pfuna ngopfu.

9. Xana lipfumelo dzrezru dzri hi sizrelela hi ndlela yini?

⁹ A xisizrelelo xa xifuva a xi sizrelela mbilu ya musotxha. A lipfumelo ni lizrandzru swi sizrelela mbilu yezru ya ku fanekisela. Matsrhamela lawo ma ta hi pfuna ku tama hi tizrela Xikwembu Nkulukumba ni ku tama hi landzra Yesu. Lipfumelo dzri hi yentxa hi tiyiseka leswaku Yehovha a ta hakela lava mu djulaka hi mbilu hinkwayu. (Hb 11:6) Dzri tlhela dzri hi kutxa ku tama hi dumbeka ka hosi yezru Yesu nambi loko hi kumana ni swikazratu. Akuva hi tiyisa lipfumelo dzrezru ni ku tama hi tiyisela, swi djula hi dondzra hi swikombiso swa vamakwezru lava tamaka va dumbeka nambi loko va kanetiwa kumbe loko va langutana ni swikazratu swa timali. Hi nga tlhela hi fambela kule ni moya wa ku zrandzra mintxhumu leyi vonekaka hi ku yetisela xikombiso xa vamakwezru lava nabyalisiki wutomi byavu akuva va zrangisa swivileleko swa Mfumu a mahlweni. b

10. Xana lizrandzru ledzri hi nga na dzrone hi Xikwembu Nkulukumba ni walikwezru dzri hi pfuna hi ndlela yini akuva hi tiyisela?

 ¹⁰ A lizrandzru i dzra lisima ngopfu swinene akuva hi tama hi tsrhama na hi pfukile. (Mt 22:37-39) Lizrandzru ledzri hi nga na dzrone ha Xikwembu Nkulukumba dzri hi pfuna ku tama hi tiyisela a ntizrweni wa ku zrezra nambi loko hi lavisana ni xikazratu xini na xini. (2Tm 1:7, 8) Hi tlhela hi kombisa leswaku ha va zrandzra vhanu van’wana hi ku tama hi zrezra ka nsimu yezru nambi loko swi vilela leswaku hi yentxa hi ku va fonela kumbe ku yentxa hi ku va tsralela mapapela. A hi heleliwi hi dumbo dzra leswaku siku dzrin’wana vhanu lava va nga ha txintxa va va va sungula ku yentxa leswinene.—Ezk 18:27, 28.

11. Xana lizrandzru ledzri hi nga na dzrone hi vamakwezru dzri hi pfuna hi ndlela yini? (1 Vatesalonika 5:11)

¹¹ Ku zrandzra walikwezru swi patsra kuva hi zrandzra vamakwezru. Nakone hi nga yentxa leswo hi kuva hi “tiyisana [hi] tlhela hi yakana”. (Dondzra 1 Vatesalonika 5:11.) Ku fana ni masotxha lawa ma tizrisanaka loko ma li yimpini, na hine hi djula ku tiyisana ni van’wana. I ntiyiso leswaku swi nga ha txhuka swi yentxeka leswaku a sotxha dzri vavisa sotxha kulobye loko va li yimpini kambe a dzri nge txhuki dzri yentxa leswo ha vomu. Hi ndlela leyi fanaka, a hi djuli ku khunguvanyisa vamakwezru ha vomu kumbe ku tlhelisela wubihi hi wubihi. (1Te 5:13, 15) Hi tlhela hi kombisa leswaku hi ni lizrandzru hi kuva hi hlonipha vamakwezru lava va nga ni wutiyanguleli bya ku hlayisa bandla. (1Te 5:12) Loko Pawulo a tsrale papela ledzri yaka ka Vatesalonika, bandla ledzriyani a dzri nge na lembe na dzri simekiwile. Swi nga yentxeka vavanuna lava hlawuliwiki a va nge na mfambu wukulu, nakone swi nga yentxeka va yentxe swihoxo swa kukazri, nambitanu a va fanela ku hloniphiwa. Nkama lowu hi yaka hi tsrhindzrekela ka nhlomulu lowukulu, hi fanela ku dumba vakulu va bandla ni ku tama hi landzra minkongomiso yavu. Swi nga ha yentxeka swi nga ti koteka kuva hi bulisana ni Ntsindzra wa Misava Hinkwayu kumbe Zrwavi, xileswo i swa lisima kuva na ka ha li swoswi hi dondzra ku zrandzra ni ku nhlonipha vakulu lava nga bandleni dzrezru. Swi nge na mhaka leswaku ku nga ha txhuka ku humelela yini, hi ta tama hi tsrhama na hi pfukile nakone hi nga tibeka tihlo ka ku kala ku hetiseka ka vamakwezru. Hi fanela  ku beka miyanakanyu yezru ka leswaku Yehovha na Yesu va kazri va kongomisa vavanuna lavo va ku dumbeka.

12. Xana a dumbo dzrezru dzri yi sizrelela hi ndlela yini miyanakanyu yezru?

¹² Swanga hi leswi a kapaseti a dzri sizrelela nhloko ya musotxha, a dumbo dzrezru dzra ku huluxiwa dzri sizrelela miyanakanyu yezru. Dumbo dzrezru ledzri tiyiki dzri hi pfuna ku twisisa leswaku hinkwaswu leswi misava yi nga naswone a swi pfuni ntxhumu. (Flp 3:8) Dumbo dzrezru dzri hi pfuna ku tama hi va ni ku zrula ni ku tiyisela. Hi leswi swi humeleliki makwezru Wallace na makwezru Laurinda lava va tizrelaka a África. Laurinda a feliwe hi mamana wake, ndzreni ka mavhiki mazrazru Wallace na yene a feliwa hi papayi wake. Hi kola ka ntungu wa Covid-19, a swi kotekanga kuva va tlhelela kaya akuva va ya tipatsra ni ndangu wavu. Loko Wallace a dzrungula a li: “Dumbo dzra ku pfuka ka vafi dzri ni pfuna kuva ni tsrhamela ku yanakanya ha vone. A ni yanakanyi hi leswi a va tsrhamise xiswone nkama a va nga si fa, kambe ni yanakanya hi leswi va ta ka va xiswone a misaveni leyimpshwa. Loko ni txhuka ni titwa na ni khunguvanyekile hi kola ka leswi swi ni humeleliki, a dumbo ledzri dzra ku pfuka ka vafi dzra ni zrulisa.”

13. I yini leswi hi nga swi yentxaka akuva hi yamukela moya wa ku xwenga?

¹³ “Mi nga timeni ndzrilo wa moya.” (1Te 5:19) Pawulo a fananise moya wa ku xwenga ni ndzrilo lowu pfuzraka ndzreni kwezru. Loko hi ni moya wa ku xwenga wa Xikwembu Nkulukumba hi tala hi nkhinkhi ya ku yentxa leswinene ni ku tlhela hi kuma ntamu wa ku tizrela Yehovha. (Ro 12:11) Kambe hi nga yentxa yini akuva hi yamukela moya wa ku xwenga? Hi nga khongota hi kombela moya wa ku xwenga, hi dondzra Zritu dzra Xikwembu Nkulukumba ni ku tlhela hi hamba xiyenge xa nhlengeletanu yake. Ku yentxa leswo swi ta hi pfuna ku txutxela “handzru wa moya”—Ga 5:22, 23.

14. I yini leswi hi fanelaka ku fambela kule na swone loko hi djula ku tama hi yamukela moya wa Xikwembu Nkulukumba? (Tlhela u vona xifaniso.)

¹⁴ Ntsrhaku ka loko Yehovha a hi nyike moya wa ku xwenga, hi fanela ku tivonela akuva hi nga timi ndzrilo wa moya. Yehovha a nyika moya wake wa ku xwenga ntsena ka lava nga ni swiyentxo ni mimpimiso leyi basiki. Yene a nga ti za a  hi nyike moya wake loko hi tsrhamela ku yanakanya kumbe ku yentxa mintxhumu leyi kalaka yi nga mu nyonxisi. (1Te 4:7, 8) Handle ka leswo, akuva hi tama hi yamukela moya wa ku xwenga hi fanela ku landzra nawu lowu liki “mi nga dzreli wuprofeta”. (1Te 5:20) A “wuprofeta” lebyi byi patsra dzrungula ledzri Xikwembu Nkulukumba a hi nyikiki hi ku tizrisa moya wake mayelanu ni siku dzra Yehovha kun’we ni masiku ya wugamu. A hi ganaganeki leswaku a armagedoni dzri ta tlhasa ku nge khale, a matsrhan’wini ya leswo hi yimele leswaku dzri tlhasa hi ku kahlula. Hi yentxa leswo hi ku tama hi va ni mahanyela lamanene ni ku tsrhama na hi khomekile hi ku “tinyiketela ka Xikwembu Nkulukumba” siku ni siku.—2Pe 3:11, 12.

15. Xana hi nga tivonela hi ndlela yini ka dzrungula ledzri nga liki dzra ntiyiso kun’we ni ka madzrimi lawa ma kanganyisaka lawa ma humaka ka mademona? (1 Vatesalonika 5:21)

¹⁵ A nkameni lowu taka a valala va Xikwembu Nkulukumba hi ndlela ya kukazri va ta hlaya leswaku: “Ku zrulile nakone ku sizrelelekile!” (1Te 5:3) A mademona ma ta humexa madzrimi lawa ma ta ka kanganyisa vhanu vanyingi a misaveni hinkwayu. (Mpf 16:13, 14) Kambe hine ke? Hine a hi nga ti kanganyisiwa loko hi ‘kambela mintxhumu hinkwayu’. (Dondzra 1 Vatesalonika 5:21) A zritu dzra Xigriki ledzri ndzruluteliwiki dzri va “kambelani”, dzri tlhamuxela ku kambela mintxhumu ya nsimbi leyi yi nga ya lisima dzrikulu. Xileswo, hi fanela ku kambela mintxhumu leyi hi yi yingelaka kumbe ku yi dondzra akuva hi vona leswaku i ntiyiso kumbe im-him. Leswo swi ve swa lisima ngopfu ka Vatesalonika nakone i swa lisima ngopfu ni kwezru namunhla swanga hi leswi hi yaka hi tsrhindzrekela kusuhi ni nhlomulu lowukulu. A matsrhan’wini ya ku kholwa hinkwaswu, hi fanela ku tizrisa wuswikoti byezru bya ku yanakanya akuva hi kota ku dzringanisa leswi hi swi dondzraka kumbe ku swi twa, ni leswi Bibele kun’we ni nhlengeletanu ya Yehovha va swi hlayaka. Loko hi yentxa leswo a hi nga ti kanganyisiwa hi madzrungula ya madzrimi lawa ma pfaka ka mademona.—Pr 14:15; 1Tm 4:1.

16. He kwini ku tiyiseka loku hi nga na kone mayelanu ni wumundzruku nakone i yini leswi hi tiyimiseliki ku swi yentxa?

¹⁶ Ha swi tiva leswaku swanga ntlawa a malandzra ya Xikwembu Nlkulukumba ma ta huluka ka nhlomulo lowukulu. Kambe a hi swi tivi leswaku ku ta yentxeka yini hi mun’wana ni mun’wana wezru. (Yk 4:14) Swi nga na mhaka leswaku a nhlomulo lowukulu wu ta sungula na ha ha hanya kumbe na hi file, loko hi tsrhama na hi dumbekile ka Yehovha a ta hi hakela hi wutomi lebyi nga helikiki. A vatotiwa va ta hanya na Yesu a matilweni kasi lava tihamba tin’wana va ta hanya paradeyisini kola misaveni. Xileswo, hi djula ku beka miyanakanyu yezru ka dumbo dzrezru dzra ku hlamalisa ni ku tsrhama na hi lulamele siku dzra Yehovha!