1-2. I yini leswi hi talisaka ku swi vona hi siku dzra babatiso, nakone hi fanela ku yanakanyisisa ha yini?

 XANA u sama u vona ntlawa wa lava yaka ku babatisiweni a tinhlengeletanwini? A nkama lowu va hambiwaka swivutiso swibidzri na va nge si ya ku babatisiweni, ndlela leyi va hlamulaka ha yone yi kombisa ku tiyimisela kwavu. Wa ma vona maxaka ni vanghanu na va nyonxile ni ku tikhuza ha vone. A nkama va humaka matini, va beliwa mavoko kutani vone va n’wayitela hi ku nyonxa. Ku dzringanyetiwa leswaku hi vhiki vhanu vanyingi va teka xiboho lexi fanaka, xa ku va Timboni ta Yehovha leti ti tinyiketeliki ni ku babatisiwa.

² Wene ke? Loko u yanakanya hi ku babatisiwa, swi tivi leswaku u hlawulekile ka misava leyi nga munyameni. Wene u ‘djula Xikwembu Nkulukumba’. (Ps 14:1, 2) Swi nge na mhaka leswaku u mumpshwa kumbe u nkulu, a xidondzro lexi xi lulamiseliwe wene. Loko a li leswaku kutani u babatisiwile, a xidondzro lexi xi ta tiyisa ku tiyimisela kwaku ka ku tama u tizrela Yehovha hi lani ku nga helikiki. Xileswo, a hi kambisiseni mintxhumu yizrazru leyi yi hi kutxaka ku tama hi tizrela Yehovha.

3. Ha yini malandzra ya Yehovha ma zrandzra ntiyiso ni leswi lulamiki? (Amapsalma 119:128, 163)

³ Yehovha a byele vhanu vake leswaku va ‘zrandzra xihlayelamfuzri’. (Zk 8:19) Nakone Yesu a dondzrise valandzreli vake akuva va tikazratela ku va ni wululami. (Mt 5:6) Leswi swi djula ku hlaya leswaku hi fanela ku tikazratela ku yentxa leswi Xikwembu Nkulukumba a liki swi lulamile nakone i swinene. Xana u zrandzra ntiyiso ni leswi lulamiki? Hi ni ku dumba ka leswaku wa swi zrandzra. Wa ma nyenya madzrimi ni hinkwaswu leswi bihiki. (Dondzra Amapsalma 119:128, 163.) Lweyi a vulavulaka madzrimi a yetisela wumhunu bya Sathana, mufumi wa misava leyi. (Yh 8:44; 12:31) Wun’we wa minkongometo ya Sathana i ku txhimisa vito dzra ku xwenga dzra Yehovha. Ku sukela loko ku ve ni  wuxandzruki a xizrambeni xa Edeni, Sathana a hangalasa madzrimi mayelanu na Xikwembu Nkulukumba. Sathana a zama ku yentxa vhanu va pimisa leswaku Yehovha i mufumi lweyi a nga ni makwanga, lweyi a kalaka a nga dumbeki nakone a yalelaka vhanu mintxhumu leyinene. (Gn 3:1, 4, 5) A madzrimi lawa Sathana a ma hlayaka mayelanu na Yehovha ma fana ni vhenene a timbilwini ni miyanakanywini ya vhanu. Loko vhanu va hlawula ku nga ‘zrandzri xihlayelamfuzri’, Sathana a nga va kutxetela ku yentxa mintxhumu hinkwayu ya ku biha ni leyi kalaka yi nga lulamanga.—Ro 1:25-31.

4. I yini leswi Yehovha a swi yentxaka akuva a kombisa leswaku i ‘Xikwembu Nkulukumba wa ntiyiso’? (Tlhela u vona xifaniso.)

⁴ Yehovha i ‘Xikwembu Nkulukumba wa xihlayelamfuzri’. Xileswo, hi ndlela leyinene a dondzrisa ntiyiso hinkwavu lava mu zrandzraka. (Ps 31:5, BX) Hi ku yentxa leswo, Yehovha a hi pfuna kuva hi nga kanganyisiwi hi madzrimi ya Sathana. Yehovha a tlhela a dondzrisa malandzra yake kuva ma dumbeka ni ku va ni wululami. Leswo swi pfuna lava zrandzraka Yehovha akuva va titwa na va zrandzriwa ni ku va ni ku zrula. (Pr 13:5, 6) U yanakanya leswaku Yehovha awa swi yentxa leswo nkama lowu u dondzraka Bibele? U dondzre leswaku ndlela leyi Yehovha a yentxaka mintxhumu ha yone hi yone a nga yinene ka vhanu vambeni ni le kwaku hi ku kongoma. (Ps 77:13) Xileswo, u djula ku yentxa leswi Xikwembu Nkulukumba a liki swi lulamile. (Mt 6:33) U djula ku yimelela ntiyiso ni ku kombisa leswaku leswi Sathana a swi hlayaka mayelanu na Yehovha, Xikwembu Nkulukumba wezru i madzrimi. U nga swi yentxisa kuyini leswo?

5. U nga swi kombisisa kuyini leswaku u seketela ntiyiso ni leswi lulamiki?

⁵ U nga hanya hi ndlela leyi kombisaka leswaku wa ma nyenya madzrimi ya Sathana nakone u seketela ntiyiso. U nga swi beka livaleni leswaku u djula ku fumiwa hi Yehovha ni leswaku u djula ku yentxa leswi nga swinene kwake. Kambe u nga swi yentxisa kuyini leswo? Hi ku va u khongota ka Yehovha, u mu dumbisa leswaku u ta mu tizrela hi lani ku nga helikiki. U va u swi kombisa a livaleni hi ku babatisiwa. A lizrandzru ledzri u nga na dzrone hi ntiyiso ni leswi lulamiki hi dzrone dzri taka ku pfuna kuva u teka xiboho lexi lulamiki.

6. He swini swivangelo leswi buku dzra Amapsalma 45:4 dzri hi nyikaka swone leswaku hi zrandzra Yesu Kriste?

⁶ Ha yini u mu zrandzra Yesu Kriste? Ka Amapsalma 45:4. (Dondzra.) Hi kuma swivangelo leswi twalaka akuva hi mu zrandzra. Yesu awa  wu zrandzra ntiyiso, awa titsrongahata nakone a lulamile. Swa twala kuva na wene u mu zrandzra Yesu Kriste. Hikusa Yesu a yimelele ntiyiso ni leswi lulamiki. (Yh 18:37) Kambe Yesu a swi kombisise kuyini leswaku awa titsrongahata?

7. I yini leswi ku nyonxisaka ka ku titsrongahata ka Yesu?

⁷ Yesu a hi bekele xikombiso lexinene xa kuva hi titsrongahata. Minkama hinkwayu a yisa lidzrumu ka Papayi wake ku nge ka yene n’winyi. (Mr 10:17, 18; Yh 5:19) Xikombiso lexi xa ku titsrongahata xi ku dondzrisa yini? Nakunene xi ku yentxa u tama u mu zrandzra Yesu ni ku mu yetisela. Ha yini Yesu a titsrongahata? Hikusa Yehovha awa titsrongahata, nakone Yesu a zrandzra ku yetisela xikombiso xa Papayi wake. (Ps 18:35; Hb 1:3) Xana leswi a swi ku yentxi u navela ku mu tiva ku yampswa Yesu, lweyi a yetiselaka matsrhamela lamanene ya Yehovha hi lani ku heleliki?

8. Ha yini hi swi zrandzra ku va na Yesu swanga Hosi yezru?

⁸ Hi mu zrandzra ngopfu Yesu swanga Hosi yezru hikusa i mufumi lwenene. Yehovha ha byake a dondzrise N’wanake nakone a mu beke akuva a fuma. (Eza 50:4, 5) Pimisa hi leswi, Yesu a tsrhike mintxhumu yinyingi hi kola ka lizrandzru ledzri a nga na dzrone ha hine. (Yh 13:1) Swanga Hosi yezru, hi fanela ku mu zrandzra Yesu. Nakone Yesu a tlhamuxele leswaku lava mu zrandzraka i vanghanu vake, nakone vanghanu vake va kombisa lizrandzru dzravu hi ku va va yingiseta swileleto swake. (Yh 14:15; 15:14, 15) I ndjombo yikulu ku va vanghanu va N’wana wa Yehovha!

9. Xana babatiso dzrezru dzri fana ni dzra Yesu hi ndlela yini?

⁹ Xin’we xa swileleto swa Yesu i xa leswaku vadondzrisiwa vake va fanela ku babatisiwa. (Mt 28:19, 20) Nakone yene a ve xikombiso xa leswo. I ntiyiso leswaku babatiso dzra Yesu dzri hambanile ni babatiso dzrezru hi tindlela ta kukazri. (Vona bokisi ledzri liki “ Xana Babatiso Dzra Yesu Dzri Hambane Ni Dzra Valandzreli Vake Hi Ndlela Yini?”) Nambitasu, a mababatiso ha mabidzri ma ni ntxhumu lawu ma fanaka ka wone. A nkama lowu Yesu a nga babatisiwa a a tinyiketela akuva a yentxa ku zrandzra ka Papayi wake. (Hb 10:7) Hi lani ku fanaka, na hine loko hi babatisiwa, hi swi kombisa a livaleni leswaku hi nyiketela wutomi byezru ka Yehovha. Ku sukela ka nkama wolowo, ntxhumu wa lisima a wuton’wini byezru i ku yentxa ku zrandzra ka Xikwembu Nkulukumba ku nge kwezru. Hi ku yentxa leswo, hi va na hi yetisela xikombiso xa Yesu.

10. I yini lexi fanelaka ku ku susumetela kuva u babatisiwa?

¹⁰ Yanakanya kutsrongo hi leswi kutani u swi tivaka ha Yesu. Wa swi tiva leswaku Yesu i n’wana lweyi a pswaliwiki a li swake wa Xikwembu Nkulukumba ni leswaku a hlawuliwile akuva a fuma. Wa swi vona leswaku Yesu a ku yetisele ha hombe ku titsrongahata ka Papayi wake. U dondzre leswaku Yesu a phamele lava nga ni ndlala, a txhavelela lava tsrhovekiki timbilu ni ku daha lava vabyaka. (Mt 14:14-21) Xana wa yi vona ndlela leyi Yesu a zrangelaka ha yone mabandla namunhla? (Mt 23:10) Nakone wa swi tiva leswaku swanga hosi ya mfumu wa Xikwembu Nkulukumba, a ta yentxa leswi yengetelekiki a nkameni lowu taka. Kutani, ntsrhaku ka ku yanakanyisisa hi hinkwaswu leswi, u nga swi kombisa hi ndlela yini leswaku wa mu zrandzra Yesu? Hi ku yetisela xikombiso xake. (Yh 14:21) Nakone ntxhumu wa ku sungula u nga wu yentxaka i ku nyiketela wutomi byaku ka Yehovha ni ku babatisiwa.

11. He xini xivangelo xa lisima lexi hi yentxaka hi mu zrandzra Yehovha nakone ha yini?

¹¹ He xini xivangelo xa lisima ngopfu lexi hi yentxaka hi babatisiwa? Yesu a hlamule xivutiso lexo hi ku hlaya leswaku a ku li xini xileleto xa xikulu lexi a hi nyikiki xone. A te: ‘U ta zrandzra Hosi, Xikwembu Nkulukumba waku, hi mbilu  yaku hinkwayu, ni hi moya waku hinkwaku, ni hi ku yanakanya kwaku hinkwaku, ni hi ntamu waku hinkwawu.’ (Mr 12:30) Xana u titwa na u mu zrandzrisa xileswo Yehovha?

12. Ha yini u zrandzra Yehovha? (Tlhela u vona xifaniso)

¹² Ku ni swivangelo swinyingi leswi hi yentxaka hi zrandzra Yehovha. Hi xikombiso, u dondzre leswaku yene i ‘nhlovo ya wutomi’ ni leswaku ‘a ku hanana hinkwaku loka hombe, ni nyiko hinkwayu leya ku hetiseka’ swi pfa ku yene. (Ps 36:9; Yk 1:17) Yehovha, Xikwembu Nkulukumba wezru lweyi a nga ni timpswalu ni lizrandzru, a ku nyike hinkwaswu leswi nga swinene a wuton’wini.

13. Ha yini xitizrulo ku li xahananu lexikulu?

¹³ A xitizrulo xa Yesu ku ve xihananu xa lisima ngopfu lexi Yehovha a hi nyikiki xone. Hi ni swivangelo leswi twalaka swa ku hlaya leswo. Hi xikombiso, xana u sama u yanakanya hi wunakulobye lebyi Yehovha na Yesu va nga na byone? Yesu a te: ‘Hi leswi Tatana a ndzri zrandzraka’ nakone ‘ndzri zrandzra Tatana’. (Yh 10:17; 14:31) Yehovha na Yesu va hete malembe manyingi xikan’we, xileswo a wuxaka byavu byi tiye ngopfu swinene. (Pr 8:22, 23, 30) Kutani swoswi, yanakanyisisa hi ku vavisa loku Yehovha a ku twiki loko a vona n’wanake a xanisiwa ni ku fa. Yehovha a pfumelele leswaku n’wanake lweyi a zrandzrekaka a dlayiwa akuva a hi nyika mukhandlu wa ku hanya hi lani ku nga helikiki. Hinkwaswu leswo, swi swi beka a livaleni leswaku Yehovha a zrandzra vhanu ku patsra na wene. (Yh 3:16; Ga 2:20) A xitizrulo i xivangelo xikulu lexi hi yentxaka hi zrandzra Yehovha.

14. He dzrini kungu dzra lisima ledzri u nga vaka na dzrone a wuton’wini byaku?

¹⁴ A lizrandzru dzraku ha Yehovha dzri ye dzri yengeseleka nkama lowu a u ya u dondzra ha yene. Ha tiyiseka leswaku u djula ku ya mahlweni u tsrhindzrekela kusuhi na yene. Nakone leswo swa koteka. Yehovha a ku kombela leswaku u nyonxisa mbilu yake. (Pr 23:15, 16) U nga swi yentxa leswo, ku nge hi mazritu yaku ntsena, kambe ni hi swiyentxo. Xileswo, ndlela leyi u hanyaka ha yone yi ta kombisa leswaku hakunene wa mu zrandzra Yehovha. (1Yh 5:3) Ledzro i kungu dzra lisima ledzri u nga vaka na dzrone a wuton’wini byaku.

15. U nga swi kombisisa kuyini leswaku wa mu zrandzra Yehovha?

¹⁵ U nga swi kombisisa kuyini leswaku wa mu zrandzra Yehovha? Ku sungula, hamba xikhongoto xa ku hlawuleka na u dumbisa ku mu tizrela. (Ps 40:8) Ntsrhaku ka leswo, kombisa xiboho xaku a livaleni hi ku va u babatisiwa. Hi lani hi swi voniki ha kone ka xidondzro lexi, a babatiso i dzra lisima swinene a wuton’wini byezru. U ta sungula wutomi lebyimpshwa, u nga ha tihanyeli, kambe u hanyela Yehovha. (Ro 14:8; 1Pe 4:1, 2) Lexo xi nga ha tikomba xi li xiboho xa lisima ngopfu, nakunene hi xone. Kambe xi ku pfulela mukhandlu wa ku va ni wutomi bya ku yampswa ku tlula hinkwabyu. Hi ndlela muni?

16. Hi ku ya hi Amapsalma 41:12, xana Yehovha a ta va hakela hi ndlela yini lava nyiketelaka wutomi byavu ku yene?

¹⁶ Yehovha i mhunu lweyi a hananaka ku tlula hinkwavu. A swi na mhaka leswaku u tikazrata ku ya tlhasela kwini, Yehovha a ta ku nyika leswi yengetelekiki. (Mr 10:29, 30) A ta ku hakela hi wutomi bya ku nyonxisa, nambi swoswi ka misava leyi ya ku biha, leyi nga kusuhi ni ku helisiwa. Lawa o va masungulo ntsena. A wutomi lebyi u taka byi sungula ku nge khale i bya hi lani ku nga helikiki. U nga tama u tizrela Papayi waku wa le matilweni hi lani ku nga helikiki. Lizrandzru ledzri u nga na dzrone ha Yehovha dzri ta ya dzri yengeseleka nakone u ta hanya na yene hi lani ku nga helikiki.—Dondzra Amapsalma 41:12.

17. I yini leswi u nga swi nyikaka Yehovha, leswi a ngeke naswu?

¹⁷ Loko u nyiketela wutomi byaku ka Xikwembu Nkuluku u va u babatisiwa, u ni ndjombo ya ku nyika Yehovha ntxhumu wa lisima ngopfu. Mintxhumu hinkwayu ya ku nyonxisa leyi u nga na yone i nyiko ya Yehovha. Mintxhumu hinkwayu  u nga na yone u nga nyika n’wini wa matilo ni misava. Leyo i mintxhumu leyi yene a kalaka a nge na yone, ku nga ku dumbeka ni ku mu tizrela hi mbilu hinkwayu. (Yb 1:8; 41:11; Pr 27:11) Nakunene, leyi o va yone ntsena ndlela ya ku yampswa ya ku tizrisa wutomi byezru. Handle ka ku ganaganeka, lizrandzru ledzri u nga na dzrone ha Yehovha hi xone xivangelo xikulu xa ku va u babatisiwa.

18. He swini swivutiso leswi u nga ha tihambaka swone?

¹⁸ Xana wa swi djula ku babatisiwa? O va wene ntsena u nga hlamulaka xivutiso lexo. Kambe u nga ha tivutisa leswi: ‘Na ha yimela yini?’ (Min 8:36) Yanakanya hi swivangelo swizrazru leswi hi swi voniki ka xidondzro lexi. Xa ku sungula, ku zrandzra ntiyiso ni leswi lulamiki. Tivutisi: ‘Xana na swi djula ku hanya ka misava leyi hinkwavu va taka vulavula ntiyiso ni ku yentxa leswi lulamiki?’ Xa wubidzri, ku zrandzra Yesu. Tivutisi: ‘Xana ni djula leswaku N’wana wa Xikwembu Nkulukumba a va hosi yanga ni ku yetisela xikombiso xake?’ Xa wuzrazru, ku nga xone xa lisima ku tlula hinkwaswu, u zrandzra Yehovha. Tivutisi: ‘Xana ni djula ku nyonxisa Yehovha ni ku mu tizrela?’ Loko nhlamulo ya swivutiso leswi hinkwaswu ku li ina, ha yini u nga babatisiwi? Wa ha yimela yini?—Min 16:33.

19. Ha yini u nga fanelanga ku ganaganeka ku babatisiwa? Tlhamuxela. (Yohan 4:34)

¹⁹ Loko wa ha ni ku ganaganeka ka kukazri mayelanu ni ku babatisiwa, yanakanyisisa hi xifaniso lexi Yesu a xi yentxiki. (Dondzra Yohan 4:34.) Yesu a fananise ku yentxa ku zrandzra ka Xikwembu Nkulukumba ni swakuda. Ha yini? A swakuda i swa lisima ku hine. Nakone Yesu a a swi tiva leswaku hinkwaswu leswi Yehovha a hi kombelaka kuva hi swi yentxa swi pfuna hine. Yehovha a nga djuli leswaku hi yentxa ntxhumu ni wun’we lowu wu nga txhukaka wu hi vavisa. Kambe xana ku babatisiwa ku hamba xiyenge xa ku yentxa ku zrandzra ka Xikwembu Nkulukumba? Ina. (Min 2:38) Xileswo, u nga tiyiseka leswaku babatiso dzri yentxa leswaku ku pfuneka wene n’winyi. Ha dumba leswaku a u nge ti ganaganeka ku da swakuda swa lisima leswi swi nga kone. Kutani ha yini u ganaganeka ku babatisiwa?

20. Hi ta vona yini ka nhlokomhaka leyi landzrelaka?

²⁰ Wa ha yimela yini? Vanyingi va hlamula xivutiso lexo hi ndlela leyi: “A ni si lulamela ku babatisiwa.” Xiboho xa ku tinyiketela ka Yehovha ni ku babatisiwa hi xone xa lisima lexi u nga xi tekaka a wuton’wini byaku. Kutani swi nga yentxeka wa ha djula ku yanakanyisisa ha hombe mayelanu ni xiboho lexi, nakone swi nga ha tekanyana nkama ni ku tikazrata akuva u tlhaselela kungu ledzro. Loko nakunene u djula ku babatisiwa, u nga yentxa yini akuva u tilulamisela? Hi ta vona nhlamulo ya xivutiso lexo ka nhlokomhaka leyi landzrelaka.