1. I yini leswi vhanu va talisaka ku swi xiya loko va ya mintlhanganwini hi khambi dzra ku sungula? (Tlhela u vona xifaniso.)

 YANAKANYA hi vatekani lava hlalelaka mintlhanganu hi khambi dzra ku sungula a Ndlwini ya Wugandzreli. Kutani va hlamalisiwa hi ndlela leyi va yamukeliwaka ha yone nakone va xiyisisa lizrandzru ledzri nga kone a makazri ka vhanu va Yehovha. Loko va muka, a nsati a bulela nuna a ku: “Wa tiva, ku ni ntxhumu wa ku hlawuleka lowu ni wu xiyiki ka Timboni ta Yehovha.”

2. Ha yini van’wana va tsrhika ku tizrela Yehovha?

² Nakunene lizrandzru ledzri nga kone ka Timboni ta Yehovha dzri hlawuleke ngopfu. Kambe i ntiyiso leswaku Timboni ta Yehovha a ti hetisekanga. (1Yh 1:8) Nkama lowu hi yaka hi va xiya vamakwezru va le bandleni, hi ta ya hi vona swihoxo swavu. (Ro 3: 23) Lexi vavisaka, van’wana va pfumelela ku kala ku hetiseka ka vambeni ku va tsrhikisa ku tizrela Yehovha.

3. Xana a swi ta kotekisa kuyini ku xiya valandzreli va Yesu va ntiyiso? (Yohan 13:34, 35)

³ Tlhela u vona tsralwa dzra nhlokomhaka leyi. (Dondzra Yohan 13:34, 35.) Xana valandzreli va Yesu kriste va tiviwa hi yini? Hi lizrandzru, ku nge hi ku hetiseka. Xiya leswaku Yesu a nga hlayanga leswaku: “Hi laha n’wi taka tiva leswaku n’wi vadondzisiwa vanga?” Kambe a hlayi leswi: “Hi laha hinkwavu va taka tiva leswaku n’wi va dondzrisiwa vanga.” Hi mazritu lawa, Yesu a swi beke livaleni leswaku a ku nga li vadondzrisiwa ntsena lava a va ta xiya lizrandzru a makazri ka bandla kambe ni vhanu va le handle a va ta dzri xiya lizrandzru ledzro.

4. I yini leswi van’wana va tivutisaka mayelanu ni vakriste va ntiyiso?

⁴ Lava kalaka va nge Timboni ta Yehovha swi nga yentxeka va  tivutisa leswi: ‘Xana lizrandzru dzri swi kombisa hi ndlela yini leswaku lweyi i mulandzreli wa Yesu Kriste? Xana Yesu a kombise lizrandzru ka valandzreli vake hi ndlela yini? Nakone hi nga yetisela xikombiso xa Yesu Kriste namunhla hi ndlela yini?’ Timboni ta Yehovha na tone ta tihamba swivutiso leswi. Loko hi yentxa leswo, swi ta hi nabyalela ku kombisa lizrandzru ka van’wana ngopfungopfu loko hi lavisana ni ku kala ku hetiseka kwavu.—Ef 5:2.

5. Xana ma tlhamuxela yini mazritu ya Yesu lama kumekaka ka Yohan 15:12, 13?

⁵ Yesu a hlaye leswaku valandzreli vake a va ta zrandzrana hi ndlela ya ku hlawuleka. (Dondzra Yohan 15:12, 13.) Vona nawu lowu Yesu a va nyikiki: “N’wi zrandzrana, swanga hi leswi dzri n’wi zrandzriki.” Swi tlhamuxela yini leswo? Yesu a tlhamuxele valandzreli vake leswaku va zrandzra van’wana ku tlula leswi va tizrandzrisaka xiswone. Loko swi sindzrisa a va fanela va nyikela wutomi byavu akuva va huluxa xa makwavu. b

6. Xana a Zritu dzra Xikwembu Nkulukumba dzri kombisa hi ndlela yini lisima dzra lizrandzru?

⁶ Bibele dzri dondzrisa leswaku lizrandzru i dzra lisima ngopfu swinene. Vhanu vanyingi va ti zrandzra ngopfu tindzrimana leti: ‘Xikwembu Nkulukumba i lizrandzru.’ (1Yh 4:8) “U fanela ku zrandzra vhanu van’wana hi ndlela leyi u tizrandzraka ha yone.” (Mt 22:39) ‘Hikusa a lizrandzru li ta fukumeta wunyingi bya swihono.’ (1Pe 4:8) ‘A lizrandzru li nga suvi ni siku ni dzrin’we.’ (1Ko 13:8) Tindzrimana leti ni tin’wana ti dzri beka livaleni lisima dzra ku kombisa tsrhamela ledzri.

7. Ha yini hi hlaya leswaku Sathana a nge swi koti ku yentxa leswaku vhanu va va ni wumun’we?

 ⁷ Vanyingi va tivutisa leswi: ‘Hi nga byi tivisa kuyini wukhongoti bya ntiyiso? Wukhongoti hinkwabyu byi hlaya leswaku byi dondzrisa ntiyiso kambe byi ni tindondzro leti hambaniki mayelanu na Xikwembu Nkulukumba wa ntiyiso.’ Sathana a simeke wugandzreli byinyingi bya madzrimi, kutani leswo swi pfilunganya miyanakanyu ya vhanu. Sathana a nga ti za a swi kotile ku yentxa leswaku vhanu lava humaka ka mimbangu ya ku siyanasiyana a misaveni hinkwayu va vumba ndangu wun’we ni ku tlhela va zrandzrana. Ko va Yehovha lweyi a nga yentxaka leswo. Leswo swa twala, hikusa lizrandzru dzra ntiyiso dzri pfa kwake. Ko va ntsena lava nga ni moya wa ku xwenga va nga kombanaka lizrandzru dzra ntiyiso. (1Yh 4:7) Xileswo, a swi hlamalise leswi Yesu a hlayiki leswaku vakriste va ntiyiso va ta tiviwa hi lizrandzru.

8-9. Xana vanyingi va titwa hi ndlela yini ntsrhaku ka ku xiya lizrandzru ledzri Timboni ta Yehovha ti nga na dzrone?

⁸ Hi lani Yesu a hlayiki ha kone, vhanu vanyingi va swi xiya leswaku i vamani vagandzreli va ntiyiso hi kola ka lizrandzru ledzri va kombanaka dzrone. Hi xikombiso, makwezru wa kukazri lweyi a vitaniwaka Ian a dzrimuka leswi mu khumbiki hi khambi dzra ku sungula ledzri a hlaleliki kongresu. Kongresu ledzro dzri khomeliwe kusuhi ni kaya kwake, ka xtadiyu lexi tihwetinyana ntsrhaku a yiki a ya hlalela ntlangu wa bola. A hlaya leswi: “Xiyimu xa kone a xi hambanile. c Timboni ta Yehovha a ti ni xitxhavu a ti yambale ha hombe nakone vana va tone a va tikhoma ha hombe. Handle ka leswo, a va tikomba va ni ku zrula lokukulu ka le ndzreni, ku nga leswi a ni swi djula, a ni dzrimuki wukaneli ni byin’we lebyi bekiwiki, kambe ndlela leyi Timboni ta Yehovha ti tikhomiki ha yone siku ledzriyani a yi suki a miyanakanywini yanga.” Leswi Ian a swi xiyiki ka kongresu ledzro, i mabindzru ya ku kombisana lizrandzru dzra ntiyiso. Loko hi zrandzra vamakwezru swi ta hi nabyalela ku kombisa wunene ni xitxhavu.

⁹ Makwezru wa kukazri lweyi a vitaniwaka John a titwe hi ndlela leyi fanaka loko a sungule ku hlalela mintlhanganu ka Yindlu ya Wugandzreli. A li: “Ni nyonxisiwe hi ntizrisanu lowu a wu li kone a xikazri kwavu. A swi yentxa ingi i vaxwengi. Lizrandzru dzravu dzra xihlayelamfuzri dzri ni pfune ku vona leswaku kutani a ni byi kumile wugandzreli bya ntiyiso.” d Mimfambu leyi ni yin’wana yi kombisa leswaku malandzra ya Yehovha i vakriste va ntiyiso.

10. I ka swiyimu muni lani hi nga ni mukhandlu waku kombisa lizrandzru ka vamakwezru? (Vona ntlhamuxelo wa le hansi.)

¹⁰ Hi lani hi swi voniki ha kone a ku sunguleni, a nga kone lweyi a hetisekiki a makazri ka bandla. Minkama yimbeni, vamakwezru va nga ha vulavula kumbe ku yentxa mintxhumu leyi taka hi khunguvanyisa. e (Yb 3:2) Loko leswo swi yentxeka, hi nga yangula hi ndlela leyi taka kombisa leswaku ha va zrandzra vamakwezru. Lexi nga hi pfunaka i ku dondzra hi xikombiso xa Yesu.—Yh 13:15.

11. I mayanakanyela wani ya ku biha lawa ma kombisiwiki hi Yohane na Yakobe? (Tlhela u vona xifaniso.)

¹¹ Yesu a a nga yimelanga leswaku vadondzrisiwa vake va va lava hetisekiki. A matsrhan’wini ya leswo, Yesu a va pfune kuva va lwisana ni ku kala ku hetiseka kwavu akuva va kota ku yamukeleka ka Yehovha. Khambi dzrin’wana, vapostola vabidzri, ku nga Yakobe na Yohane, va tizrise mamana wavu akuva va kombela  Yesu leswaku a va nyika swikhundla leswi tlakukiki a Mfun’wini wake. (Mt 20:20, 21) Leswi Yakobe na Yohane va swi yentxiki swi kombise leswaku a va ni moya wa ku tibyela nakone a va djula ku voniwa na va li va lisima ku tlula van’wana.—Pr 16:18.

12. Xana ke va Yakobe na Yohane ntsena lava kombisiki matitwela ya ku biha? Tlhamuxela.

¹² A ku vanga Yakobe na Yohane lava kombisiki mayanakanyela ya ku biha ka xiyimu lexiyani. Vona leswi vapostola van’wana va swi hlayiki: “Loko lavan’wana va 10 va twa mhaka leyi, va hlundzrukela lavabidzri va vamakwavu.” (Mt 20:24) U nga yanakanya hi pongwe ledzrikulu ledzri viki kone ka vapostola. Swi nga yentxeka va hlaye mazritu ya ku fana ni lawa: “Mi yanakanya leswaku mi vamani n’wine akuva mi kombela swikhundla swa ku tlakuka a Mfun’wini? A mo yanakanya leswaku mi wuswenu mi tizrisanaka na Yesu hi ku dumbeka? Phela na hine swa hi fanela leswo!” Swi nge na mhaka leswaku va yangulise kuyini, leswi hi swi tivaka hi leswaku vapostola va dzrivale ku kombisana lizrandzru ni wunene.

13. Xana Yesu a yangulise kuyini loko a langutana ni ku kala ku hetiseka ka vapostola? (Matewu 20:25-28)

¹³ Xana Yesu a yangulise kuyini a mhakeni leyi? A nga heleliwanga hi mbilu. A nga zanga a va byela leswaku a ta va txintxa a va a hlawula vapostola van’wana, vhanu va ku yampswa, va ku titsrongahata ni lava kombanaka lizrandzru. A matsrhan’wini ya leswo, hi ku lehisa mbilu Yesu a bulisane navu, hikusa a a swi tiva leswaku vapostola a va swi djula ngopfu ku yentxa leswinene. (Dondzra Matewu 20:25-28.) Phela ledzri a ku vanga khambi dzra  ku sungula kumbe dzra wugamu na vapostola va holovisana hi leswaku i mani wa lisima a makazri kwavu. Nambi tanu, Yesu a tame a va khoma hi ndlela leyinene.—Mr 9:34; Lk 22:24.

14. Xana vapostola va kulele ka xiyimu xa matsrhamela muni?

¹⁴ Handle ka ku ganaganeka, Yesu a yanakanyisise hi mbangu lowu va kuleliki ku wone. (Yh 2:24, 25) Phela va kulele ka mbangu lowu a vazrangeli va wukhongoti a va dondzrisa leswaku mhunu o va wa lisima loko a ni xikhundla xa ku kazri lexi tlakukiki. (Mt 23:6; vona vhidiyu ledzri liki Primeiros assentos na sinagoga, ka ntlhamuxelo wa Matewu 23:6.) Vazrangeli va vayuda na vone a va titeka va li va lisima ku tlula van’wana. f (Lk 18:9-12) Yesu a a swi tiva leswaku leswo a swi ta khumba ndlela leyi vapostola a va tivona ha yone ni ndlela leyi a va vona van’wana ha yone. (Pr 19:11) Yesu a a swi tiva leswaku a vadondzrisiwa a va ta yentxa swihoxo, xileswo a a va lehisela mbilu. A a swi tiva leswaku va ni timbilu letinene, xileswo a tinyike nkama wa kuva a va dondzrisa ku titsrongahata ni ku kombisana lizrandzru, matsrhan’wini ya ku tivona na va li lava tlakukiki.

15. Hi nga dondzra yini ka leswi humeleliki Yakobe na Yohane?

¹⁵ Hi nga dondzra swinyingi ka leswi humeleliki Yakobe na Yohane. Nakunene ku kombela swikhundla leswi tlakukiki a Mfun’wini a swi bihe ngopfu. Kambe leswi vapostola va swi yentxiki a swi bihile hikusa va pfumelele xiyimu lexo xi va hambanisa. Kambe Yesu a khome vapostola hinkwavu va 12 hi ndlela ya lizrandzru. Xana hi dondzra yini? Xa lisima a hi ndlela leyi van’wana va hi khunguvanyisiki ha yone, kambe i ndlela leyi hi taka yangula ha yone. I yini lexi nga hi pfunaka ku yangula hi ndlela leyinene? Loko makwezru wa kukazri a hi khunguvanyisile, hi nga tivutisa leswi: ‘Leswi a swi yentxiki ha yini swi ni kazrata hi ndlela leyi? Xana leswi swi kombisa leswaku ku ni lomu ni faneliki ni yampswisa kone? Xana makwezru lweyi a nga va na a lavisana ni swikazratu swa kukazri? Nambi loko ni ni swivangelo leswi twalaka swaku khunguvanyeka, xana ni nga mu komba lizrandzru ni va ni mu dzrivalela?’ Loko hi khoma van’wana hi lizrandzru hi ta kombisa leswaku hi valandzreli va Yesu Kriste.

16. I yini swin’wana leswi hi nga swi dondzraka ka xikombiso xa Yesu?

¹⁶ Xikombiso xa Yesu xi hi pfuna ku vona lisima dzra ku twisisa swiyimu swa vamakwezru. (Pr 20:5) I ntiyiso leswaku Yesu a a ni wuswikoti bya ku vona leswi nga mbilwini. Hine a hi na byone wuswikoti lebyo, kambe hi nga swi kota ku lehisa mbilu nkama lowu hi langusanaka ni ku kala ku hetiseka ka vamakwezru. (Ef 4:1, 2; 1Pe 3:8) Lexi nga hi pfunaka ku yentxa leswo i ku va tiva ku yampswa vamakwezru. Vona mfambu lowu landzrelaka.

17. Xana mulaviseli wa muganga a pfunekise kuyini hi kuva a tinyike nkama wa ku mu tiva ku yampswa makwezru wa kukazri?

¹⁷ Mulaviseli wa kukazri wa muganga lweyi a tizrelaka a África Oriental a dzrimuka makwezru wa kukazri lweyi a a ni wumhunu bya ku kazrata ku hanyisana na byone. Kutani i yini leswi mulaviseli lweyi wa muganga a swi yentxiki? A li: “A matsrhan’wini ya ku fambela kule ni makwezru lweyi, ni kunguhate ku  mu tiva ku yampswa.” Ku yentxa leswo swi ni pfune ku gungula leswaku makwezru lwiyani a kulisiwe hi ndlela ya ku kazrata swinene, kutani leswo a swi khumba ndlela leyi a a va khoma ha yone van’wana. Mulaviseli wa muganga a ya mahlweni a ku: “Loko ni twisise ndlela leyi swi kazratiki ha yone kuva makwezru lweyi a txintxa a wumhunu byake leswaku a kota ku hanyisana ni van’wana ni ku txintxa loku a ha tamaka a ku yentxa, swi ni yentxe ni hlamala. Hi ndzruluke vanghanu lavakulu.” Nakunene, i ntiyiso leswaku loko hi yentxa hinkwaswu leswi hi nga swi kotaka akuva hi va tiva ku yampswa vamakwezru ni ndlela leyi va titwaka ha yone swi ta hi nabyalela kuva hi va kombisa lizrandzru.

18. Hi fanela ku tihamba swivutiso swini loko hi djula ku ya bulisana ni makwezru lweyi a hi khunguvanyisiki? (Amaproverbia 26:20)

¹⁸ Minkama yin’wana, hi ta vona swi sindzrisa kuva hi khanela ni makwezru lweyi a hi khunguvanyisiki akuva hi lulamisa mhaka. Kambe na hi nga si na ya bula na yene, swi nga va swinene ku tivutisa leswi: ‘Xana ni swi twisise ha hombe hinkwaswu leswi humeleliki?’ (Pr 18:13) ‘Ku nga va leswaku a yentxe leswo ha vomu?’ (Ekl 7:20) ‘Mine ke, xana a ni ngi yentxa xihoxo lexi fanaka?’ (Ekl 7:21, 22) ‘Xana ku ya bulisana na yene, ku tava ku ya timela ndzrilu kumbe ku ya txheletela phalafeni?’ (Dondzra Amaproverbia 26:20.) Loko hi tinyika nkama wa ku yanakanyisisa hi swivutiso leswi, hi nga ha tlhasela wugamu bya leswaku swa yampswa kuva hi kombisa lizrandzru hi kuva hi tsrhika mhaka leyi yi khaluta.

19. I yini leswi u tiyimiseliki ku swi yentxa?

¹⁹ Timboni ta Yehovha ti kombisa leswaku i vadondzrisiwa va Yesu hi ku va ti kombana lizrandzru. Mun’wana ni mun’wana wezru a kombisa leswaku i mulandzreli wa Yesu hi ku kombisa lizrandzru ka vamakwavu swi nge na mhaka ku kala ku hetiseka kwavu. Loko hi yentxa leswo, van’wana va nga ha swi xiya leswaku hi le ka wugandzreli bya ntiyiso, nakone va nga ha djula ku gandzrela Xikwembu Nkulukumba wezru wa lizrandzru, Yehovha. Xileswo, a hi tiyimiseleni ku kombanana lizrandzru swanga mfungu wa vagandzreli va ntiyiso.