1. I yini leswi vapswali va swi djulaka ka vanavu?

 VAPSWALI, handle ka ku ganaganeka mi swi djula swinene leswaku vanenu va tiva Yehovha va tlhela va mu zrandzra. A hi nge mu voni Yehovha. Nambi tanu u nga va pfunisa kuyini vanaku akuva va twisisa leswaku Yehovha i wa hikakunene nakone swa koteka ku tsrhindzrekela kusuhi na yene?—Yk 4:8.

2. Xana vapswali va nga dondzrisa vanavu mayelanu ni wumhunu bya Yehovha hi ndlela yini?

² Yin’we ya tindlela ta ku pfuna vanaku akuva va tiva Yehovha i ku dondzra Bibele na vone. (2Tm 3:14-17) Kambe Bibele dzri khanela hi ntxhumu wun’wana lowu nga pfunaka a vampshwa leswaku va dondzra ha Yehovha. Ka buku dzra Amaproverbia, papayi wa kukazri a dzrimuxa n’wana leswaku a nga dzrivali matsrhamela ya Yehovha lama xiyekaka ka ntumbuluku. (Pr 3:19-21) Hi ta vona tindlela leti ha tone vapswali va nga tizrisaka ntumbuluku akuva va pfuna vanavu leswaku va dondzra leswi yengetelekiki hi wumhunu bya Yehovha

3. Xana vapswali va nga va dondzrisa hi ndlela yini vanavu akuva va tiva leswi yengetelekiki hi wumhunu bya Yehovha?

³ Bibele dzri hlaya leswaku matsrhamela lama kalaka ma nga voniwi ya Xikwembu Nkulukumba ma ‘voniwa swinene a mintizrweni yakwe ke he loko misava mi tumbuluxiwa, loko swi yanakanyiwa’. (Ro 1:20) Hi ntolovelo, vapswali va zrandzra ku heta nkama ni vanavu a bangwini lowu pfulekiki. Ka swiyimu leswo, londzrovota mikhandlu akuva u fananisa matsrhamela ya ku xonga ya Yehovha ni ‘mintizro leyi a yi yentxiki’. Swoswi a hi voneni ndlela leyi va nga yetiselaka Yesu a mhakeni leyo.

4. Xana Yesu a wu tizrise hi ndlela yini ntumbuluku akuva a dondzrisa vadondzrisiwa vake? (Luka 12:24, 27-30)

 ⁴ Vona ndlela leyi Yesu a tizrisiki ntumbuluku ha yone akuva a dondzrisa vadondzrisiwa vake. Khambi dzrin’wana, a va kombele leswaku va lavisisa magwavava ni magon’wa. (Dondzra Luka 12:24, 27-30.) Yesu a a a ta khanela ni xihazri kumbe ximila xin’wana, kambe a hlawule ku khanela hi nyanyana ni filori hikusa a a swi tiva leswaku vadondzrisiwa a va swi tiva ha hombe. Swi nga yentxeka leswaku hi nkama wolowo, a vadondzrisiwa a va vona swinyanyana na swi haha ni ma filori kusuhi ni lomu a va li kone. U nga yanakanya Yesu na a li kazri a swi xungameta nkama lowu a bulisanaka navu. I yini leswi Yesu a swi yentxiki ntsrhaku ka kuva a nyikele swikombiso swoleswo? A va dondzrise dondzro ya lisima swinene mayelanu ni ku hananna ni wunene bya Papayi wezru wa le matilweni: Yehovha a ta nyika swakuda ni swa ku yambala malandzra yake ya ku dumbeka, hi lani a yentxaka ha kone ka magwavava kun’we ni magon’wa.

5. I yini leswi vapswali va nga swi tizrisaka ka ntumbuluku akuva va dondzrisa vanavu ha Yehovha?

⁵ Vapswali, xana mi nga mu yetisela hi ndlela yini Yesu, loko mi li kazri mi bulisana ni vanenu? U nga khanela hi ntxhumu wa kukazri ka ntumbuluku lowu u wu zrandzraka, ku nga ha va ximilana kumbe xihazri xa kukazri u xi zrandzraka. Loko u yentxa leswo, tlhamuxela ndlela leyi swi kombisaka ha yone matsrhamela ya Yehovha. Ntsrhaku ka leswo, u nga ha vutisa n’wanaku leswaku he xini xihazri kumbe ximilana lexi a xi zrandzraka. Loko u tizrisa leswi n’wanaku a swi zrandzraka ka ntumbuluku swi ta nabyala kuva a yingela nkama lowu u tlhamuxelaka ku yelana ka swone ni matsrhamela ya Yehovha.

6. Hi nga dondzra yini ka xikombiso xa mamana wa Christopher?

⁶ Xana vapswali va fanela ku heta nkama wunyingi na va kambisisa mayelanu ni swihazri kumbe ximilana xa kukazri na va nga si bulisana ni vanavu mayelanu na Yehovha? A swi sindzrisi. Yesu a nga nyikelanga wutsrhokotsrhoko bya ndlela leyi magwavava ma tidisaka ha yone ni ndlela leyi magon’wa ma kulaka ha yone. I ntiyiso leswaku, minkama yimbeni, vanaku va nga ha djula ku tiva leswi yengetelekiki mayelanu ni xivumbiwa xa kukazri xa Yehovha, kambe hi ntolovelo mazritunyana matsrongo ma nga pfuna n’wanaku akuva a twisisa leswi u djulaka ku mu dondzrisa swone. Loko a dzrimuka leswi yentxekiki a wutsrongwanini byake, makwezru lwa vitaniwaka Christopher a hlaya leswi: “Mamana a a hi byela mintxhumu ya ku nabyala akuva mine kun’we ni vamakwezru hi wu nyika lisima ntumbuluku. Hi xikombiso, loko hi li kusuhi ni nhava a a hlaya leswi: ‘Lavisani ku kula ka tinhava leti, ti xonge ngopfu! Yehovha awa hlamalisa, a hi swone xana?’ Kumbe loko hi khaluta kusuhi ni lwandle a a ku: ‘Vona ntamu wa mavimbi lawa! Ntamu wa Yehovha wa hlamalisa.’” Christopher a li: “A a li mazritunyana matsrongo lawa a a ma tizrisa akuva a hi yentxa hi yanakanyisisa.”

7. U nga mu dondzrisisa kuyini n’wanaku akuva a hlamalisiwa hi ntumbuluku?

⁷ Loko vanaku va ya va kula, va lulamiseli akuva ha wuswavu va vona ntumbuluku ni ku va dondzrisa swa kukazri mayelanu ni matsrhamela ya Yehovha. Hi xikombiso, u nga vutisa vanaku mayelanu ni ntxhumu wa kukazri ka ntumbuluku, hi xikombiso: “U dondzra yini ha Yehovha?” U nga ha hlamalisiwa u va u nyonxa loko u yingela nhlamulu yake.—Mt 21:16.

8. I yini leswi vapswali va Vaisrayele a va swi londzrovota ndleleni loko va li kazri va yendzra?

⁸ Vapswali va Vaisrayele a va fanela ku dondzisa vananavu mayelanu ni milawu ya  Yehovha ‘loko va famba ndleleni’. (Dt 11:19) A tikweni dzra Israyele a ku ni tindlela tinyingi nakone ka tone a swi nabyala ku kuma mixaka yinyingi ya swihazri ni swiluva. Loko Vaisrayele va yendzra ka tindlela toleto ni mindangu yavu, a va ni mukhandlu wa ku dondzrisa vanavu mayelanu ni ntumbuluku wa Yehovha. Na n’wine vapswali mi nga londzrovota mikhandlu leyi fanaka akuva mi dondzrisa vanenu hi ntumbuluku. Vona ndlela leyi vapswali va kukazri va swi yentxaka ha yone leswo.

9. U dondzre yini ka Punita na Katya?

⁹ Mamana wa kukazri lweyi a vitaniwaka Punitha, a tsrhamaka ka doropa ledzrikulu dzra Índia, a li: “Man’we ya maxaka yezru ma tsrhama ntlhaveni. Loko hi ya va pfuxela, hi londzrovota mikhandlu yoleyo akuva hi dondzrisa vanezru mayelanu ni ntumbuluku wa Yehovha. Na swi xiya leswaku vananga va wu nyika lisima ntumbuluku wa Yehovha loko va li kule ni doropa.” Minkama yinyingi vana a va yi dzrivali minkama ya ku nyonxisa leyi va yi hetiki ni vapswele a mimbangwini ya ku xonga na va lavisisa ntumbuluku. Makwezru wa kukazri lweyi a vitaniwaka Katya, wa le Moldávia, a li: “Minkama ya ku nyonxisa leyi ni yi dzrimukaka mayelanu ni wutsrongwana byanga hi loko mine ni vapswali vanga hi famba hi tlanga kule ni doropeni. Ni va tlhangela swinene vapswali vanga hi leswi va ni dondzrisiki na na ha li ntsrongo ku lavisisa leswi Yehovha a swi tumbuluxiki ni kuva ni mu tiva ku yampswa hi ku lavisisa ntumbuluku.”

10. I yini leswi vapswali va nga swi yentxaka loko swi nga va nabyaleli ku yendzrela kule ni doropa? (Vona Bokisi ledzri liki “ Leswi Nga Pfunaka Vapswali”.)

¹⁰ Kambe swi li yini loko swi ku kazratela ku yendzra wene kun’we ni ndangu waku mi ya kule ni doropeni? Makwezru lweyi a tsrhamaka a Índia, lweyi a vitaniwaka Amol, a li: “Lomu ni tsrhamaka kone hi tizra mawora manyingi, nakone swi kazrata ngopfu ku yendzra. Nambi tanu, hi nga vona ntumbuluku wa Yehovha ni ku bulisana mayelanu ni matsrhamela  Yake loko hi li a jaradi kumbe a henhla ka predu.” Swi nga yentxeka leswaku kusuhi ni lomu u tsrhamaka kone, ku ni mbangu wa kukazri lowu u nga kombaka n’wanaku akuva a dondzra hi ntumbuluku. (Ps 104:24) Swi nga yentxeka ka mbangu lowo, u vona swinyanyana, swidodwana, swimila ni swin’wana. Karina, lweyi a tsrhamaka a Alemanha, a li: “Mamana wanga awa swi zrandzra swiluva nakone loko hi humahuma a a ni komba leswi a a swi zrandzra.” Vapswali mi nga tlhela mi tizrisa mabuku ya nhlengeletanu kumbe mabuku lama vulavulaka hi ntumbuluku akuva mi dondzrisa vanenu. Swi nge na mhaka leswaku u tsrhama kwini, u nga swi kota ku pfuna vanaku akuva va lavisisa ntumbuluku wa Yehovha. Swoswi a hi voni matsrhamela ma nge mangani lawa u nga ma tizrisaka loko u dondzrisa vanaku loko mi lavisisa ntumbuluku.

11. Xana vapswali va nga pfuna vanavu ku vona ndlela leyi Yehovha a hi zrandzraka ha yone hi ndlela yini?

¹¹ Akuva u pfuna vanaku ku twisisa lizrandzru dzra Yehovha u nga va komba ndlela leyi swihazri swi va wundlaka ha yone a vana. (Mt 23:37) U nga tlhela u va komba mintxhumu ya ku siyanasiyana leyi Yehovha a yi tumbuluxiki akuva hi nyonxa. Karina, lweyi hi buliki ha yene ku sunguleni, a li: “Loko ni huma na mamana, minkama hinkwayu a a ni kutxa ku yima ni lavisisa ndlela leyi xiluva xin’wana ni xin’wana xi hlawulekiki ha yone ni ndlela leyi wuxongi bya swone byi kombisaka lizrandzru dzra Yehovha. Ni namunhla, na ha yima ni lavisisa swiluva ni ndlela leyi swi hambaniki ha yone ni mivalavala ya kone. Leswo swi ni dzrimuxa ndlela leyi Yehovha a hi zrandzraka ha yone.”

12. Xana vapswali va nga pfuna vanavu akuva va twisisa wutlhazri bya Yehovha hi ndlela yini? (Amapsalma 139:14) (Tlhela u vona xifaniso.)

¹² Pfuna vanaku akuva va twisisa wutlhazri bya Yehovha. Yehovha a ni wutlhazri lebyi tlhakukiki ku tlula mun’wana ni mun’wana wezru. (Ro 11:33) Hi xikombiso, u nga ha vulavula hi ndlela leyi mati ma pshwaka ha yone, ndlela leyi ma vumbaka matlavi ha yone ni ndlela leyi matlavi wolawo ha katsrongokatsrongo ma zruzraka ma ya mbangwini wun’wana. (Yb 38:36, 37) U nga tlhela u vulavula hi ndlela ya ku hlamalisa leyi Yehovha a vumbiki mizri wezru ha yone. (Dondzra Amapsalma 139:14.) Vona leswi mupswali wa kukazri a vitaniwaka Vladimir a swi hlayiki: “Siku dzrin’wana n’wanezru a we ka bisikleta a ti vavisa. Ntsrhaku ka masikunyana, xilondzra xi holile. Mine ni nsati wanga  hi mu tlhamuxele leswaku Yehovha a vumbe mizri wezru ni ma célula lama nga ni wuswikoti bya ku tlhela ma tidaha hi ku famba ka nkama. Leswo a swi yentxeki ka mintxhumu leyi vhanu va yi vumbaka. Hi xikombiso, movha a wu swi koti ku tilunghisa loko ku humelele mhangu. Leswo swi pfune n’wanezru ku twisisa wutlhazri bya Yehovha loko a vumba wutomi.”

13. Xana vapswali va nga va pfunisa kuyini vana ku twisisa ndlela leyi Yehovha a nga ni ntamu ha yone? (Ezaya 40:26)

¹³ Ka Ezaya 40:26. (Dondzra.), Yehovha a hi zramba leswaku hi lavisisa matilu ni ku yanakanyisisa hi ntamu lowu vilelekaka akuva hinkwaswu swi tizra hi ndlela leyi nga yinene. U nga tlhela u kutxa vanaku akuva va lavisisa matilu ni ku tinyika nkama wa ku yanakanyisisa hi leswi va swi vonaka. Vona leswi makwezru wa kukazri wa le Taiwan, lweyi a vitaniwaka Tingting, a swi dzrimukaka hi wutsrongwana byake: “Khambi dzrin’wana, mamana a ni tekile akuva hi ya akampara. Nakone swanga hi leswi a hi li kule ni maghezi ya doropa swi nabyalile ku hi vona tinyeleti ni wusiku. Leswo swi yentxeke hi nkama lowu a ni landzreleliwa a xikola nakone a ni nga swi tivi leswaku a ni ta tama ni dumbeka ka Yehovha. Mamana a londzrovote mukhandlu wolowo akuva a ni kutxa ku pimisa hi ntamu lowu Yehovha a wu tizrisiki akuva a tumbuluxa tinyeleti letiya, nakone a ni dzrimuxe leswaku a a ta tizrisa ntamu woluwani akuva a ni pfuna ku lavisana ni xikazratu xin’wana ni xin’wana. Ntsrhaku ka liyendzro ledzriyani, ni loko hi lavisise ntumbuluku, ni tlhele kaya na ni tiyimisele ku tiyisa wuxaka byanga na Yehovha ni kuva ni mu tizrela hi lani ku nga helikiki.”

14. Xana vapswali va nga va pfunisa kuyini vana akuva va vona leswaku Yehovha a tsrhavile?

¹⁴ Ntumbuluku wa Yehovha wu kombisa leswaku yene i Xikwembu Nkulukumba lweyi a tsrhamaka na a nyonxile. Vativi va siyensa va xiye leswaku swihazri swa ku tala swi zrandzra ku tlanga ku patsra ni tinyanyana ni tihlampfi. (Yb 40:20) Xana u sama u mu vona n’wanaku na a nyonxa hi ku vona xihazri na xi tlhanga? Swi nga yentxeka a vone swipixi na swi tlanga hi bola kumbe swimbyanyana na swi lumana tindleve. Loko u vona n’wanaku na a nyonxa loko a vona xihazri xa kukazri na xi tlanga, londzrovota mukhandlu wolowo akuva u mu byela leswaku Yehovha i Xikwembu Nkulukumba lweyi a tsrhaviki.—1Tm 1:11.

15. I yini leswi nga pfunaka vapswali ku tiva leswi vana va swi yanakanyaka? (Amaproverbia 20:5) (Vona xifaniso.)

¹⁵ Minkama yimbeni, vapswali swi nga ha va kazratela leswaku va pfuna vananu leswaku va va pfulela swifuva. Kumbexana swi nga djula u djuletela mikhandlu leswaku va vulavula hi leswi va swi pimisaka. (Dondzra Amaproverbia 20:5.) Vapswele van’wana va xiya leswaku ku hlalela ntumbuluku ni vana swa pfuna akuva va titwa na va ntsrhunxekile. Ha yini? Hikusa nkama lowo, hi lowo vana ni vapswali va titwaka na va ntsrhunxekile nakone ku nge na ntxhumu lexi va hingeletaka. Papayi wa kukazri wa le Taiwan, lweyi a vitaniwaka Masahiko, a hlaya leswi: “Loko mine ni nkatanga hi huma hi beliwa hi moya kun’we ni vanezru hi fambafamba tinhaveni kumbe praya, hakanyingi va titwa na va ntsrhunxekile. Lanu ke, swa nabyala ku bulisana na vone ni ku gungula leswi va swi yanakanyaka.” Katya, lweyi hi vulavuliki ha yene, a li: “Minkama yinyingi loko ni huma xikole, mamana a a ni teka hi ya ka xizramba lexi a xi li kusuhi ni kaya. A a li mbangu wa ku nyonxisa, lani a swi ni nabyalela ku vulavula hi leswi a swi ni humelela a xikole ni leswi a swi ni kazrata.”

16. Xana mindangu yi nga wu londzrovotisa kuyini ntumbuluku wa Yehovha akuva yi tlanga ni ku titwa yi ntsrhunxekile?

¹⁶ Loko ndangu wu tinyika nkama wa ku hlalela ntumbuluku, hinkwavu va titwa na va ntsrhunxekile nakone va tikholisa. Leswo swi tiyisa ndangu. Hi lani Bibele dzri hlayaka ha kone, wu kone “nkama wa ku hleka” nakone wu kone “nkama wa ku kina”. (Ekl 3:1, 4) Yehovha a vumbe mimbangu ya ku xonga a misaveni akuva vhanu va tsrutsruma, va hlambeta, va tlanga ni ku yentxa mintxhumu leyi va nyonxisaka. Mindangu yinyingi ya swi zrandzra ku beliwa hi moya a tintlhaveni, a tinhaveni ni ku ya a lwandle. Vatsrongwana van’wana va swi zrandzra ku tsrutsruma a swizrambeni, va lavisa swihazri ni ku hlambeta a nambyeni, ka mativa kumbe ka lwadle. Hi ni mikhandlu yinyingi ya ku londzrovota ntumbuluku wa Yehovha ni hinkwaswu leswi a swi vumbiki!

17. Ha yini vapswali va fanela ku pfuna vana akuva va londzrovota ni ku hlamalisiwa hi ntumbuluku wa Yehovha?

¹⁷ A misaveni leyimpshwa, vapswali ni vana va ta londzrovota ntumbuluku wa Yehovha ku tlula dzrini. Kone, a hi nge ti txhava swihazri, nakone swone swi nge ti hi txhava. (Eza 11:6-9) Hi ta va ni nkama wa ku londzrovota hinkwaswu leswi Yehovha a swi tumbuluxiki. (Ps 22:26) Kambe i swa lisima kuva vapswali va pfuna vana leswaku va hlamalisiwa hi ntumbuluku na ke he swoswi. Loko u tizrisa ntumbuluku akuva u dondzrisa vanaku ha Yehovha, swi nga yentxeka va ta pfumelelana ni mazritu ya Davhida loko a ku: ‘[We Yehovha, TNM] a ku na mintizro ya ku fana ni mintizro yaku.’—Ps 86:8.