1-2. Xana xikombiso xa mupostola Pawulo xi nga va pfuna hi ndlela yini vakulu namunhla?

 MUPOSTOLA PAWULO a a va zrandzra swinene vamakwavu. A a tizra hi nkhinkhi akuva va hlayiseka. (Min 20:31) Hi leswi swi yentxiki vamakwezru va mu zrandzra swinene. Khambi dzrimbeni vakulu va bandla dzra le Efesa va dzrili ngopfu loko va tive leswaku a va nga ha ti mu vona Pawulo. (Min 20:37) Hi ndlela lyi fanaka, namunhla vakulu lava tizraka hi nkhinkhi va va zrandzra vamakwezru nakone va tikazrata akuva va va pfuna. (Flp 2:16, 17) Kambe minkama yimbeni vakulu va langusana ni swikazratu. I yini lexi nga va pfunaka?

² Lexi nga pfunaka vakulu i ku yetisela xikombiso xa Pawulo. (1Ko 11:1) Mupostola Pawulo a a fana na hine, a a nga hetisekanga. Minkama yimbeni a swi mu kazratela ku yentxa leswi nga swinene. (Ro 7:18-20) Nambi leswi a a langutana ni swikazratu swinyingi Pawulo a a tsrhama na a nyonxile. Loko vakulu va yetisela xikombiso xa Pawulo, va ta swi kota ku hlula swikazratu ni ku tama va nyonxa a ntizrweni wa Yehovha. Hi ndlela yini? A hi swi voneni.

3. I yini leswi hi ta ka swi vona ka xidondzro lexi?

³ Ka xidondzro lexi hi ta vona mune wa swikazratu leswi vakulu va langutanaka na swone: 1) Ku hisekela ntizro wa nsimu nambi loko va ni wutiyanguleli byimbeni, 2) ku kombisa lizrandzru ka tihamba, 3) ku langusana ni ku tsrana ka vone vinyi, ni 4) ku langusana ni ku kala ku hetiseka ka vambeni. Hi ta tlhela hi vona ndlela leyi Pawulo a swi hluliki ha yone swikazratu leswi ni ndlela leyi vakulu va nga mu yetiselaka ha yone.

4. Ha yini swi nga ha vaka xikazratu kuva vakulu va hlengela ka ntizro wa ku zrezra?

⁴ Ha yini ku li xikazratu? Vakulu hi vone vazrangelaka ntizro wa nsimu kambe va ni wutiyanguleli byimbeni a bandleni. Hi xikombiso van’we vavu va fambisa mintlhanganu ya xikazri ka vhiki, nakone va fambisa dondzro ya Bibele ya bandla, va beka wukaneli bya le livaleni ni swiyenge swimbeni. Va tlhela va wupfisa malandzra ya wutizreli, nakone va swi zrandzra swinene ku hamba mayendzro ya wubyisi ka vamakwezru va xinuna ni va xisati a bandleni. (1Pe 5:2) Handle ka leswo vakulu van’wana va tizra ka ku yaka Tiyindlu ta Wugandzreli. Nambi tanu ntizro wa ku sungula lowu vakulu va nga na wone i wa kuva vazrezri va madzrungula lamanene ya Mfumu ku fana ni vamakwezru hinkwavu a bandleni.—Mt 28:19, 20.

5. Ha yini hi nga hlayaka leswaku Mupostola Pawulo a a li xikombiso lexinene a ku zrezreni ka madzrungula lamanene?

⁵ Xikombiso xa Pawulo. Ka Ba-le-Filipi 1:10, Pawulo a hi byele leswi mu pfuniki akuva a va muzrezri lwenene wa madzrungula lamanene. A te: ‘N’wi hlawula leswa ku lulama.’ Nakone leswo hi leswi Pawulo a a swi yentxa. Pawulo a a yamukele xiyavelo xa ku zrezrela van’wana nakone ku dzringana malembe manyingi lexo ku ve xiyavelo xa lisima kwake. A a zrezra ‘livaleni’ ni hi yindlu ni yindlu. (Min 20:20) Pawulo a a nga nyonxi ntsena hi kuva a zrezra hi siku dzra kukazri kumbe hi nkama wa kukazri, kumbe hi ku va a zrezra hi siku dzrin’we hi vhiki. A a londzrovota mikhandlu hinkwayu akuva a zrezra! Hi xikombiso, na a ha yimela vayendzri kulobye a Atena, a zrezrele vhanu va kukazri lava a va ni ndhuma nakone leswo swi pswale mihandzru leyinene. (Min 17:16, 17, 34) Pawulo a zrezrele vhanu vambeni nambi loko a tsrimbiwile hi mapindzra.—Flp 1:13, 14; Min 28:16-24.

6. Xana Pawulo a a va wupfisa hi ndlela yini van’wana?

⁶ Pawulo a a wu londzrovota ha hombe nkama wake. Hi xikombiso, a a zramba van’wana akuva va zrezra na yene. Ka liyendzro dzrake dzra ku sungula, Pawulo a fambe na Marka nakona ka dzra wubindzri a fambe na Timotewu. (Min 12:25; 16:1-4) A swi ganaganekisi leswaku Pawulo a a tikazrata akuva a wupfisa vavanuna lava. A va dondzrise ku simeka mabandla, ku hamba mayendzro ya wubyisi, ni ku va vadondzrisi lavanene va zritu dzra Xikwembu Nkulukumba.—1Ko 4:17.

7. Xana vakulu va nga swi landzra hi ndlela yini leswi Pawulo a wi hlayiki ka Ba-le-Efesa 6:14, 15?

⁷ Leswi hi swi dondzraka. Vakulu va nga landzra xikombiso xa Pawulo hi ku zrezra hi yindlu ni yindlu, ni ku zrezra ka mbangu wa mani na mani. (Dondzra Ba-le-Efesa 6:14, 15.) Va nga zrezra loko va li bazara kumbe loko va li ntizrweni. Nakone lava pfunisaka a  ku yakeni ka tiyindlu ta wugandzreli va nga londzrovota ku zrezrela vhanu lava nga kusuhi ni lomu va yakaka kone ku patsra ni lava va va xaviselaka switizro. Nakone ku fana na Pawulo vakulu va nga londzrovota nkama lowu va nga ku zrezreni akuva va wupfisa vambeni ku patsra ni malandzra ya wutizreli.

8. I yini leswi swi nga ha djulaka leswaku vakulu swi yentxa minkama yin’wana?

⁸ Vakulu a va fanelanga va khomeka ngopfu hi mintizro ya bandla lakakuva va nga ha kumi nkama wa ku hlengela a ntizrweni wa ku zrezra. Akuva va kota ku hetisisa wutiyanguleli hinkwabyu lebyi va nga na byone, vakulu va fanela ku dondzra ku va va nga pfumeli swiyavelo swin’wana. Ntsrhaku ka loko a khongote ni ku yanakanyisisa hi mhaka leyo, swi nga yentxeka nkulu a vona leswaku a nga ti swi kota ku xi hetisisa xiyavelo xa kukazri. A fanela ku hetisisa wutiyanguleli byake bya ku fambisa wugandzreli bya ndangu vhiki ni vhiki, ku hiseka a ntizrweni wa ku zrezra, ni ku dondzrisa vana kuva va va vazrezri lavanene. Vakulu vambeni va nga ha swi vona swi kazrata ku yala swiyavelo swimbeni. Va nga tiyiseka leswaku Yehovha a wa swi twisisa leswaku va swi navela hamba mintizro yinyingi.

9. Xana he swini swikazratu leswi vakulu vanyingi va langutanaka na swone?

⁹ Ha yini ku li xikazratu? Vhanu va Yehovha va langusana ni swikazratu swinyingi. A masikwini lawa ya wugamu, hinkwezru hi vilela ku tiyisiwa, ku pfuniwa ni ku txhaveleliwa. Minkama yin’wana hi vilela mpfunu akuva hi nga yentxi leswi bihiki. (1Te 5:14) I ntiyiso leswaku vakulu va nge swi koti ku helisa swikazratu swa vamakwezru. Nambi tanu, Yehovha a djula leswaku va tama va zron’weka ni ku sizrelela tihamba take. Xana vakulu va nga wu kuma kwini nkama wa ku pfuna vamakwezru nambi leswi va nga ni mintxhumu yinyingi ya ku yi yentxa?

10. Hi ku ya hi 1 Ba-le-Thesalonika 2:7, xana Pawulo a a va khoma hi ndlela yini vamakwezru?

¹⁰ Xikombiso xa Pawulo. Minkama hinkwayu Pawulo a a tiyisa vamakwezru nakone a a djuletela mikhandlu akuva a va tiyisa. Vakulu va xi yetisela xikombiso xa Pawulo nakone va dzri kombisa lizrandzru ka vamakwezru. (Dondzra 1 Ba-le-Thesalonika 2:7.) Pawulo a a nga tlhoti lizrandzru ledzri a a li na dzrone hi vamakwavu ni leswaku Yehovha a zrandzra mun’wana ni mun’wana wavu. (2Ko 2:4; Ef 2:4, 5) Pawulo a a vona vamakwavu bandleni swanga vanghanu vake, nakone a a heta nkama na vone. A a va dumba swinene vamakwezru lakakuva a khanele na a ntsrhunxekile mayelanu ni ku txhava kwake ni ku tsrana kwake. (2Ko 7:5; 1Tm 1:15) Kambe Pawulo a a nga khaneli hi swikazratu swake ntsena. A a swi djula ku pfuna vamakwezru.

11. I yini lexi susumetiki Pawulo ku nyikela swilayu ka vamakwavu?

¹¹ Minkama yin’wana Pawulo a a fanela ku nyikela xilayu ka vamakwezru. Kambe a a nga  yentxi leswo na a hlundzrukile. A a yentxa leswo hikuva a a zron’weka ha vona nakone a a djula ku va sizrelela. Pawulo a a yentxa hinkwaswu akuva swilayu swake swi nabyala ku swi twisisa swi tlhela swi nabyala ku swi yamukela. Hi xikombiso, Pawulo a nyikele swilayu leswi kongomiki ka va le Korinte, ntsrhaku a zrumele Titu akuva a tiva leswaku vamakwezru va yangulise kuyini loko va dondzre papela. Handle ka ku ganaganeka a nyonxe swinene hikuva va yamukele xilayu lexo hi ndlela leyinene!—2Ko 7:6, 7.

12. Xana vakulu va nga va tiyisa hi ndlela yini vamakwezru a bandleni?

¹² Leswi hi swi dondzraka. Vakulu va nga dondzra ka xikombiso xa Pawulo hi ku va va tinyika nkama akuva vava ni vamakwezru. Yin’we ya tindlela ta ku yentxa leswo i kuva va hatla va tlhasa mintlhanganwini. Hi ndlela leyo va ta kota ku bulisana ni vamakwezru. A swi djuli kuva u heta nkama wunyingi na u bula ni makwezru akuva u mu tiyisa, ku bulanyana na yene nkamanyana wutsrongo swa yanela. (Ro 1:12; Ef 5:16) Vakulu va nga yetisela xikombiso xa Mupostola Pawulo hi ku tizrisa Bibele akuva va tiyisa vamakwezru bandleni ni ku va tiyisekisa leswaku Yehovha a va zrandzra ngopfu swinene. Minkama hinkwayu vakulu va bulisana ni vamakwezru nakone va londzrovota mikhandlu hinkwayu akuva va va kulungela. Loko swi vileleka kuva a nyikela xilayu, minkama hinkwayu a seketela leswi a swi hlayaka a Bibeleni. Va nyikela swilayu leswi kongomiki kambe hi lizrandzru, hikusa va zron’weka hi ndlela leyi vamakwezru va taka yangula ha yone.—Ga 6:1.

13. He wani mavonela ya ku biha lawa nkulu a nga ha vaka na wone hi swihoxo swake?

¹³ Ha yini ku li xikazratu? Vakulu a va hetisekanga, xileswo va hoxa ku fana na hine hinkwezru. (Ro 3:23) Hi ndlela leyo van’wana swi nga ha va kazratela ku dzringanisela. Hi xikombiso, van’wana va kazrateka swinene hi swihoxo leswi va nga na swone lakakuva va hela ntamu. Nakone van’wana va yanakanya leswaku swihoxo swavu a hi swa ntxhumu nakone a va vileli ku txintxa.

14. Hi kuya hi Ba-le-Filipi 4:13, xana ku titsrongahata ku mu pfune hi ndlela yini Pawulo akuva a lwisana ni ku tsrana kwake?

¹⁴ Xikombiso xa Pawulo. Pawulo a a titsrongahata nakone a a swi tiva leswaku a nge swi koti ku lwisana ni swihoxo swake yene wuswake. A a swi tiva leswaku a vilela mpfunu wa Xikwembu Nkulukumba. A ku sunguleni Pawulo a a xanisa vakriste. Kambe ntsrhaku, a vone leswaku leswi a a swi yentxa a swi hoxile nakone a txintxe wumhunu byake. (1Tm 1:12-16) Hi ku famba ka nkama Pawulo a ndzruluke nkulu lwa  nga ni lizrandzru, wumbilu a tlhela a titsrongahata. Pawulo a a swi tiva leswaku a a nga hetisekanga, kambe a a nga tsrhameli ku pimisa hi swihoxo swake. Matsrhan’wini ya ku tsrhamela ku titwa nandzru, Pawulo a a swi tiva leswaku Yehovha a a ta mu dzrivalela. (Ro 7:21-25) A a swi tiva leswaku a a nga ti swi kota ku tizrela Yehovha hi ndlela leyi hetisekiki. Nambi tanu a a tikazratela kuva a yampswisa wumhunu byake bya wukriste nakone hi ku tisrongohata a a kombela mpfunu wa Yehovha akuva a kota ku hetisisa ntizro wake.—1Ko 9:27; dondzra Ba-le-Filipi 4:13.

15. Xana vakulu va fanela ku ku vona hi ndlela yini ku tsrana kwavu?

¹⁵ Leswi hi swi dondzraka. Mhunu a nga bekiwi ku va nkulu hi leswi a hetisekiki. Kambe Yehovha a djula leswaku vakulu va pfumela swihoxo swavu, ni kuva va tama va txutxela wumhunu bya wukriste. (Ef 4:23, 24) Nkulu a fanela ku dondzra Bibele akuva a tiva lomu a fanelaka ku yampswisa kone. Leswo hi swone swi taka mu pfuna kuva a nyonxa, nakone Yehovha a ta mu pfuna ku va nkulu lwenene.—Yk 1:25.

16. Ku nga ha yentxeka yini loko vakulu va beka miyanakanyu yavu ka swihoxo swa vamakwezru?

¹⁶ Ha yini ku li xikazratu? Loko vakulu va heta nkama ni vamakwezru va le bandleni swa nabyala ku vona swihoxo swavu. Loko va nga tivoneli vakulu va nga ha sungula ku hlundzrukela vamakwezru, kuva solasola ni ku va khoma hi ndlela leyi hoxekiki. Hi lani mupostola Pawulo a hlayiki ha kone hi leswi Sathana a djulaka swone.—2Ko 2:10, 11.

17. Xana Pawulo a a va vona hi ndlela yini vamakwezru?

¹⁷ Xikombiso xa Pawulo. Pawulo a a beka miyanakanyu ka mintxhumu leyinene leyi vamakwezru a va yi yentxa nambi leswi swihoxo swavu a swi mu khumba. Nambi tanu, Pawulo a a swi tiva leswaku kuva mhunu a hoxa a swi mu yentxi lwa bihiki. Pawulo a a va zrandzra vamakwezru nakone a a vona mintxhumu leyinene kwavu. Loko vamakwezru va yentxa ntxhumu lowu hoxekiki, Pawulo a a nga va solasoli a hlaya leswaku va yentxe ha vomu. A a yanakanya leswaku vamakwezru va swi djula ku yentxa leswinene kambe a va djula ku pfuniwa.

18. I yini leswi hi swi dondzraka ka ndlela leyi Pawulo a pfuniki Evhodiya na Sintike ha yone? (Ba-le-Filipi 4:1-3)

¹⁸ Hi xikombiso, vona ndlela leyi Pawulo a langusaniki ha yone ni xiyimu xa kukazri xa vamakwezru vabidzri va xisati ka bandla dzra le Filipi. (Dondzra Ba-le-Filipi 4:1-3.) Evhodiya na Sintike a va kwatelanile nakone a a va tsrhike kuva vanghanu. Pawulo a nga va yavanyisanga kambe a beki miyanakanyu yake ka matsrhamela yavu lamanene. Vamakwezru lavayani vabidzri a va ni malembe manyingi na va tizrela Yehovha. Pawulo a a swi tiva leswaku Yehovha a a va zrandzra. Vonela ledzrinene ledzri  Pawulo a a li na dzrone hi vone, dzri mu susumetele kuva a va kutxa leswaku va kondletela ku zrula. Ku va ni vonela ledzrinene hi vambeni swi pfuni Pawulo kuva a tama a nyonxa ni ku bekisa wunghanu lebyi a a li na byone ni vamakwezru a bandleni.

19. a) Xana vakulu va nga mu yetisela hi ndlela yini Pawulo? b) Xana U dondzre yini ka mufoto wa nkulu lweyi a basisaka yindlu ya wugandzreli?

¹⁹ Leswi hi swi dondzraka. Vakulu bekani miyanakanyu yenu ka matsrhamela lamanene ya vamakwezru. Hinkwezru a hi hetisekanga. Makwezru mun’wna ni mun’wana a ni matsrhamela lawa a hi navela ku va na wone. (Flp 2:3) I ntiyiso leswaku minkama yimbeni vakulu va fanela ku nyika swilayu vamakwezru bandleni. Kambe ku fana na Pawulo, vakulu a va fanelanga ku vona mintxhumu leyi va kwatisaka ntsena ka vamakwezru. Matsrhan’wini ya leswo, lavisisa lizrandzru ledzri va nga na dzrone ha Yehovha, ku tiyisela ni wuswikoti lebyi va nga na byone. Loko vakulu va ni vonela ledzrinene hi vamakwezru, a bandla dzra tiya nakone hinkwavu va titwa na va zrandzriwa.

20. Xana vakulu va nga tama va pfuneka hi ndlela yini ka xikombiso xa Pawulo

²⁰ I swa lisima kuva vakulu va yetisela xikombiso xa Pawulo. Hi xikombiso, ka Índice das Publicações da Torre de Vigia, u ta kuma mintxhumu yinyingi mayelanu na Pawulo. Djuletela lomu ku liki “Paulo” u gama u ya ka “exemplo para os anciãos”. Na u dondzra leswi u swi kumiki tivutise leswi: “Xana xikombiso xa Pawulo xi nga ni pfuna hi ndlela yini akuva ni hetisisa xiyavelo xanga swanga nkulu na ni nyonxile?”

21. I yini leswi vakulu va nga tiyisekaka ha swone?

²¹ Vakulu dzrimukani leswaku Yehovha a nga djuli leswaku mi va lava hetisekiki kambe a djula leswaku mi dumbeka. (1Ko 4:2) Pawulo a tizre ngopfu swinene nakone a a dumbeka, xileswo Yehovha a a mu nyika lisima swinene. U nga tiyiseka leswaku Yehovha a swi nyika lisima leswi u mu yentxelaka swone. Nakone Yehovha ‘a nge dzrivali mintizro yenu, ni ku tikazrata ka lizrandzru lo lu n’wi nga li kombisa ku vito dzrakwe, n’wi nga va lava tizreliki tinsasi’.—Hb 6:10.