Loko u dondzra tindzrimana leto hi ku kahlula swi nga yentxeka u tivutisa leswo. Kambe ntiyiso wa mhaka hi leswaku tindzrimana leti ti vulavula hi vavanuna vabidzri lava va hambaniki, lava nga ni vito ledzri fanaka ku nga Mefiboxeth, nakone hi nga dondzra ntxhumu wa kukazri loko hi kambisisa leswi yentxekiki.

Hosi Sawulo a a ni 7 wa vana va madjaha ni vanh’wanyana vabidzri. A mativula a a li Yonatani. Hi ku famba ka nkama, hosi Sawulo a ve ni n’wana lweyi a vitaniwiki Mefiboxeth lweyi a pswaliwiki hi Ritspa. Lexi hlamalisaka, hi leswaku Yonatani na yene a a ni n’wana lweyi a a vitaniwa Mefiboxeth. Leswi liki hosi Sawulo a a ni n’wana ni ntukulu lava a va ni vito dzra ku fana, Mefiboxeth.

Nkama lowu na a fuma, Sawulo a yentxe hinkwaswu akuva a helisa Vagibiyoni lava a va tsrhama a makazri ka va-Israyele. Swi tikomba na Vagibiyoni van’wana va dlayiwile. Kambe leswo a swi bihe ngopfu swinene. Ha yini? Hikusa a masikwini ya Yoxuwa, a va-Israyele va hambe ntwananu ni Vagibiyoni.—Yš 9:3-27.

Xipfumelelanu a xa ha tizra nile masikwini ya Hosi Sawulo. Kambe hosi Sawulo a xi tsrhovile xipfumelelanu lexo ni Vagibiyoni. Hi mhaka leswo, a ‘ku ni nandzru wa ngati ku Sawulo ni yindlu wakwe’. (2Sa 21:1) Ntsrhaku ka nkamanyana Davhida a ve hosi. Kutani a Vagibiyoni lava hulukiki ku dlayiwa hi Sawulo va ye byela Davhida leswi a swi yentxekile. Kutani Davhida a vutise Vagibiyoni leswaku a nga va hakelisa kuyini hikusa a a ta va ndlela leyo ntsena leyi a yi ta yentxa Yehovha a tovokisa tiko. Kambe a matsrhan’wini ya ku kombela mali, Vagibiyoni va kombele leswaku Davhida a va nyika 7 wa vana va wanuna ‘lwe afaka a hambi mazrengu’ leswaku va dlayiwa. (Tin 35:30, 31) Davhida a pfumele xikombelo xavu.—2Sa 21:2-6.

A nkameni luwani, Sawulo na Yonatani a va file, kambe a n’wana wa Yonatani Mefiboxeth a ha hanya. Leswi a limaliki na a ha li ntsrongo ka mhangu ya kukazri, swi le livaleni leswaku a nga hlengelanga a ku dlayeni ka Vagibiyoni. Leswi Davhida a a li munghanu wa Yonatani, a hambe xipfumelelanu na yene kun’we ni vanake ku patsra na Mefiboxeth. (1Sa 18:1; 20:42) Bibele dzri li: ‘A hosi [Davhida] yi tsretsrelela Mefiboxeth, n’wana Yonatani, n’wana Sawulo, hi nkonta ya ku funga ku Yehovha.’—2Sa 21:7.

Nambi tanu, Davhida a xi hlamulile xikombelo xa Vagibiyoni. A nyikele vana vabidzri va Sawulo, lani mun’we wavu a a li Mefiboxeth, ni ntlhanu wa vatukulu va Sawulo. (2Sa 21:8, 9) Leswi Davhida a swi yentxiki swi yentxi tiko dzri nga ha vi na nandzru wa ngati.

Dzrungula ledzri a hi mfambu wa ku hlamalisa ntsena. Nawu wa Xikwembu Nkulukumba a wu li livaleni. A wu ku: ‘Vana va nga ka va nga dlayeliwe vatatana.’ (Dt 24:16) Yehovha a a nge te pfumelela ku dlayiwa vana vabidzri va Sawulo ni ntlhanu wa vatukulu loko a va nge na nandzru. Nawu lowo a wu tlhela wu ku: ‘Mun’wana ni mun’wana a ta dlayeliwa xihono xakwe.’ Kutani swi tikomba na vana lavabidzri va Sawulo ni vatukulu va ntlhanu va hlengelile hi ndlela ya kukazri a ku dlayeni ka Vagibiyoni. Hinkwavu va khatisiwile hi swidoho swavu.

Leswo swi hi dondzrisa leswaku mhunu a nge tiyimeleli a yentxa leswi hoxiki na a pimisa kumbe a hlaya leswaku a yentxi ntxhumu luwani hi leswi a a landzra nawu wa kukazri. Ndzrimana yin’wana yi li: ‘Yentxela milenge yaku a ndlela ya ku lulama; a tindlela taku hinkwatu a ti tiye.’—Pr 4:24-27; Ef 5:15.