1. Xana Zritu dzra Xikwembu Nkulukumba dzri hi nyika yini?

YEHOVHA hi yene Mudondzrisi wezru Lwenkulu. Hi ku kongomisiwa ha yene, hi kota ku tlhantlha xikazratu xini na xini. (Eza 30:20, 21) Zritu dzrakwe dzri hi nyika hinkwaswu leswi hi swi vilelaka akuva hi va lava ‘hetisekiki’ hi tlhela hi ‘bekiseliwa mintizro leminene hinkwayu’. (2Tm 3:17) Loko hi hanya hi ku pfumelelana ni tindondzro ta Bibele, hi ndzruluka lava tlhazrihiki ngopfu ku tlula lava txhumayelaka ‘wutlhazri bya misava leyi’.—1Ko 3:19; Ps 119:97-100.

2. Hi ta dondzra hi yini ka nhloko-mhaka leyi?

² Hi laha hi taka swi vona ha kone, wutlhazri bya misava byi tala ku hi kutxa ku yentxa ku navela ka nyama. Xileswo, swi nga ha hi bindzrela ku bakanya miyanakanyu ni mahanyela ya ku fana ni ya lava nga va misava. Swa twisiseka, ke, loko Bibele dzri ku: ‘Tivonani ku nga ti va na mhunu lwa taka n’wi koka hi filosofiya, kumbe hi ku kanganyisa ka ku ka ndlela, a ku landzreni ka mintsiko ya vhanu.’ (Kl 2:8) Ka nhloko-mhaka leyi, hi ta vulavula hi madzrimi mabidzri hi va hi kambisisa leswaku ma sukele kwini ni leswaku ha yini ma zrandzriwa. Ka mhaka yin’wana ni yin’wana, hi ta vona leswaku ha yini wutlhazri bya misava byi li wusinge, kumbe wumphunta, ni ndlela leyi a wutlhazri bya Zritu dzra Xikwembu Nkulukumba byi tlakukiki ngopfu swinene ha yone ku tlula ntxhumu wini na wini lowu misava yi wu hananaka.

3-4. Ku ve ni ku txintxa kwini ka mavonela ya vhanu hi mahanyela lama khumbaka wanuna ni wansati le Estados Unidos a ku sunguleni ka dzana dzra wu-20?

³ A ku sunguleni ka dzana dzra wu-20, le Estados Unidos ku ve ni ku txintxa lokukulu ka ndlela leyi vhanu a va ma vona ha yone mahanyela lama khumbaka wanuna ni wansati. Khale ka kone, vanyingi a va kholwa leswaku wanuna ni wansati va nga yetlela xikan’we ntsena loko va tekanile nakone a swi yila ku khanela hi  timhaka ta tinkuku. Kambe mavonela wolawo ma hohlotiwile, ku sungula ku hangalaka moya wa leswaku mhunu a nga yetlela ni lweyi a mu djulaka nkama wini na wini.

⁴ Hi ma-1930 ku ve ni nkitsrinkitsri ya mahanyela, laha vhanu va txintxiki mahanyela yavu hi ku helela. Hi ku ya hi mukambisisi mun’we, “a sinema, mintlangu ya ku hlekisa vhanu, tinsimu, mabuku ni wuhaxi, hinkwaswu ka swone a swi komba leswaku a ku zrandzriwa swihungatiso swa ku vulavula hi swa tinkuku”. A malembeni wolawo, makinela ya kone ma sungule ku va lawa ma pfuxaka ku navela ka swa tinkuku nakone mayambalela a ma nga ha kombi xitxhavu. Hi laha Bibele dzri profetiki ha kone mayelanu ni masiku ya wugamu, vhanu a va ta va ‘lava zrandzraka ku titsrhavisa’ hi ndlela leyi ngiki sama yi voniwa.​—2Tm 3:4.

5. Ku yentxeke yini ka ndlela leyi misava yi ma vonaka ha yone mahanyela lama khumbaka wanuna ni wansati ku sukela hi ma-1960?

⁵ Hi ma-1960, vhanu a va zrandzra ku dokadokisana hi timhaka ta ku fana ni ta ku swi bihile kumbe im-him ku hanya ni wanuna kumbe wansati na mi nga txhatanga, ku va musodoma ni ku dlaya wukati hi ku nabyala. Mixaka ya ku tala ya swihungatiso a swi ya swi kombisa vhanu na va li ka swa tinkuku. Ka malembenyana ya swoswi, swi sungule ku tikomba hi tindlela ta ku tala leswaku mahanyela ya ku biha hi swa tinkuku ma pswala mihandzru ya ku bava. Mutsrali mun’we a te ku hahluka ka miti, ku kumeka ka miti leyi nga ni mupswele mun’we ntsena, ku da mbitsi, mavabyi ya ku hlalela swinavetisi swa tinkuku, ni makhombo man’wana, swi yentxiwa hi “leswi swoswi ku kalaka ku nga ha tsimbisiwi ntxhumu a timhakeni ta swa tinkuku”. Ku yandzra ka mavabyi lawa ma tlulelanaka hi tlhelo dzra tinkuku, ya ku fana ni SIDA, ko va xin’we xa swikombiso swa leswaku wutlhazri bya misava i wumphunta.​—2Pe 2:19.

6. Xana mavonela ya misava hi swa tinkuku ma mu pfunisa kuyini Sathana ku kanganyisa vhanu?

⁶ Mavonela ya misava hi timhaka ta swa tinkuku ma pfuna Sathana ku kanganyisa vhanu. Kunene a nyonxa ngopfu hi ku vona vhanu va tizrisa nyiko ya Xikwembu Nkulukumba ya swa tinkuku hi ndlela ya ku biha ni loko va vhilekisa nyiko ya wukati leyi pfaka hi ka Nkulukumba. (Ef 2:2) Mahanyela ya ku biha hi swa tinkuku ma yentxa ingiki nyiko leyi xongiki ya ku pswalana, leyi Yehovha a nga hi hanana, a hi ya lisima. Hi tlhelo dzrimbeni, ma nga yentxa leswaku lava ma landzraka va hluleka ku da pfindla dzra wutomi lebyi nga helikiki.​—1Ko 6:9, 10.

7-8. Ha yini leswi Bibele dzri swi dondzrisaka hi swa tinkuku swi yampswa ngopfu ku tlula wutlhazri bya misava?

⁷ Vhanu lava landzraka wutlhazri bya misava leyi va poyilela milawu ya Bibele ya mahanyela,  va ku a yi twisiseki nikutsrongo. Vhanu lavo va nga ha ku: ‘Xikwembu xi nga hi hambela yini na hi ni ku navela ka swa tinkuku xi gama xi ku a hi tikhomeni?’ Va hamba xivutiso lexo hi mhaka ya leswi va kanganyisiwiki va va va kholwa leswaku leswi mhunu swi mu byelaka swone, a fanela ku swi yentxa. Kambe leswi Bibele dzri swi hlayaka swi hambanile. Dzri hi nyika xintsrhuti hi ku hi dondzrisa ku lwa ni ku navela ka ku biha. (Kl 3:5) Handle ka leswo, Yehovha a hi nyike lulamiselo dzra wukati, laha ku navela ka swa tinkuku ku nga nyonxisiwaka kone hi ndlela leyi khensekaka. (1Ko 7:8, 9) Ndzreni ka wukati, ku hambana ni leswi swi talaka ku yentxeka ka lava mbuyetaka, nuna na nsati va nga tinyonxisa hi swa tinkuku na va nga tisoli kumbe ku txhava ntxhumu.

⁸ Ku hambana ni wutlhazri bya misava leyi, Bibele dzri hi dondzrisa vonela ledzrinene a timhakeni ta swa tinkuku. Dzra pfumela leswaku swa tinkuku swi nga yentxa mhunu a nyonxa. (Pr 5:18, 19) Nambitanu, dzri tlhela dzri ku: ‘Mun’wana ni mun’wana ku n’wine [ku djuleka] a tiva ku va ni xibya xakwe, a xi tamela hi ku xwenga ni xitxhavu, ku nge ku naveleni ka xambya, swanga hi vamatiko, lava ku ka va nga tivi Xikwembu Nkulukumba.’​—1Te 4:4, 5.

9. a) A ku sunguleni ka dzana dzra wu-20, xana vhanu va Yehovha va kutxisiwe kuyini ku namazrela wutlhazri bya Zritu dzra Xikwembu Nkulukumba? b) Hi xini xilayu xa wutlhazri lexi hi xi kumaka ka 1 Yohan 2:15, 16? c) Hi laha swi xaxametiwiki ha kone ka Ba-le-Roma 1:24-27, hi wani mahanyela ya ku biha lawa hi faneliki ku ma dzrela?

⁹ Loko ku sungula dzana dzra wu-20, vhanu va Yehovha a va hambukisiwanga hi mazritu ya ku kala ndlela ya lava a va ‘nga ha yingeli ntxhumu’. (Ef 4:19) Va lwele ku namazrelisisa milawu ya Yehovha. A Xihondzro Xa Ku Zrindzra xa 15 ka Mayu wa 1926 (hi xinghiza) xi hlaye leswi: “A wanuna kumbe wansati a fanela ku basa ni ku tenga a miyanakanywini ne swiyentxweni swakwe, ngopfu-ngopfu loko a li mahlweni ka wa zrambu ledzri hambaniki.” Ku hambana ni leswi vhanu a va hanyisa xiswone a nkameni wolowo, vhanu va Yehovha va landzrelele wutlhazri lebyi tlakukiki bya Zritu dzra Xikwembu Nkulukumba. (Dondzra 1 Yohan 2:15, 16.) Hi khensa ndjhani hi ku va ni Zritu dzra Xikwembu Nkulukumba! Nakone hi khensa hi leswi Yehovha a hi phamelaka swakuda swa moya hi nkama wa kone ku hi pfuna ku dzrela wutlhazri bya misava leyi a timhakeni ta mahanyela. *​—Dondzra Ba-le-Roma 1:24-27.

10-11. Xana Bibele dzri basopise leswaku a ku ta yentxeka yini a masikwini ya wugamu?

¹⁰ Bibele dzri basopise leswaku a masikwini ya wugamu, vhanu a va ta va ‘vatizrandzri’. (2Tm 3:1, 2) Kutani ke, a swi hlamalisi leswi misava yi kutxaka vhanu ku tibeka. Buku dzrin’we dzra mintlhamuxelo dzri li hi ma-1970 “ku ve ni ku yandzra ka mabuku ya ku tipfuna ha byaku”. Man’we ya wone “ma hlohlotele lava ma dondzraka leswaku va nga tisoli hi leswi va nga xiswone kumbe leswi va swi pimisaka, nambi ku txintxa ntxhumu wa ku biha wuton’wini byavu”. Hi xikombiso, vona leswi buku dzrin’wana dzri swi hlayiki. Dzri te: “Tizrandzre hikusa u xonge ku tlula hinkwavu, nakone a ku na wa ku nyonxisa ku fana na wene.” A dzri hlohlotela mhunu kuva a “tigandzrela a va a tilangela leswi a djulaka ku hanyisa xiswone hi ku landzra lipfalu dzrakwe ni milawu ya lomu a kuleliki kone leyi a vonaka leswaku yi nga mu tizrela”.

¹¹ Xana swi yentxa ingiki u sama u twa swa ku fana ni swoswo? Sathana a kutxetele Evha ku yentxa swa ku fana ni swoswo. A te Evha a a ta ‘fana ni Xikwembu Nkulukumba, a tiva leswa hombe ni leswa ku biha’. (Gn 3:5) Namunhla, vanyingi va tibeka ngopfu, lakakuva hi mavonela yavu a ku na mhunu lwa fanelaka ku va byela leswi nga  swa hombe kumbe leswi bihiki​—nambi o va Xikwembu Nkulukumba. Hi xikombiso, moya lowo ngopfu-ngopfu wu tikomba ka ndlela leyi vhanu va byi langutaka ha yone wukati.

12. Xana misava yi hlohlotela ku va ni vonela dzrini?

¹² Bibele dzri dondzrisa nuna na nsati ku hlayisa swidumbiso swavu swa wukati. Dzri kutxa vatekani kuva va tsrhama xikan’we ku ya tlhasa wugamu, loko dzri ku: ‘Wanuna a ta siya tatana wakwe, ni mamana wakwe, a ta namazrela nsatini wakwe; kutani va ta va nyama yin’we.’ (Gn 2:24) Lava ngheniwiki hi wutlhazri bya misava va hlohlotela vonela dzra ku hambana ni ledzro, va ku: “Mun’wana ni mun’wana a a lwele byakwe.” Buku dzrin’we ledzri khanelaka hi ku dlaya wukati dzri li: “Loko vhanu van’wana va txhata, matsrhan’wini ya ku funga hi mazritu ya khale ya ku va ta va nuna na nsati ‘loko va ha hanya’, swoswi va li va ta va nuna na nsati ‘loko va ha zrandzrana’.” Hi mhaka ya ku vona wukati swanga ntxhumu wa matlangwana, mindangu yinyingi ya hohloka nakone vanyingi va sale ni swilondzra timbilwini. A swi ganaganekisi leswaku mavonela ya misava hi wukati ma phuntisela vhanu.

13. Ha yini Yehovha a nyenya vatikukumuxi?

¹³ Bibele dzri li: ‘Mun’wana ni mun’wana lwa tikukumuxaka hi mbilu i likasi ku Yehovha.’ (Pr 16:5) Ha yini Yehovha a nyenya vatikukumuxi? Xin’we xa swivangelo hi leswaku va tekelela ku tibyela ka Sathana. Hi nga vona! Sathana a a tibyela ngopfu lakakuva a hlaya leswaku Yesu​—lweyi Xikwembu Nkulukumba a mu tizrisiki ku tumbuluxa mintxhumu hinkwayu​—a a fanela ku mu khinsamela a mu gandzrela! (Mt 4:8, 9; Kl 1:15, 16) Lava tibekaka va komba leswaku wutlhazri bya misava hakunene i wumphunta ka Xikwembu Nkulukumba.

14. Xana Ba-le-Roma 12:3 yi hi pfunisa kuyini ku tivona hi mpimu wa kone?

¹⁴ Bibele dzri hi pfuna kuva hi tivona hi mpimu wa kone. Dzra pfumela leswaku swa twisiseka kuva mhunu a tizrandzra hi mpimu wa kone. Yesu a te: ‘Zrandzra walekwenu swanga hi loko u tizrandzra.’ Leswi swi komba leswaku kuva hi yangula swivileleko swa ka kwezru hi mpimu wa kone a swi bihanga. (Mt 19:19) Nambitanu,  Bibele a dzri dondzrisi swone leswaku hi fanela ku titlakuxa ka van’wana. Matsrhan’wini ya leswo, dzri li: ‘N’wi nga yentxeni ntxhumu hi ku kanetana, kumbe hi ku titwalisa ka ku ka ndlela; kambe [hi] ku titsrongahata, a mun’wana ni mun’wana a a hlaye leswaku va mu tlula van’wana.’​—Flp 2:3; Dondzra Ba-le-Roma 12:3.

15. Ha yini u vona leswaku xilayu xa Bibele mayelanu ni ku tikukumuxa xa pfuna?

¹⁵ Namunhla, vanyingi lava hlayiwaka tintlhazri va hewula leswi Bibele dzri swi hlayaka hi ku tikukumuxa. Va li loko u tibyela leswaku van’wana va ku tlula, u ta matha u tlhela u dlisiwa hi van’wana. Kambe, hi ntiyiso wa kone, xana moya wa ku titxhaya phambeni lowu hlohloteliwaka hi misava ya Sathana wu pswale mihandzru yini? I yini leswi wene u swi xiyiki? Xana lava vo ko pimisa hi leswi djuliwaka hi vone ntsena va nyonxile? Va ni mindangu leyi nyonxiki? Va ni vanghanu va ntiyiso? Va nabyu wuxaka bya le kusuhi na Xikwembu Nkulukumba? Ka leswi wene u swi voniki, hi byini wutlhazri lebyi pswalaka mihandzru leyinene​—hi lebya bya misava leyi kumbe hi lebyi kumiwaka ka Zritu dzra Xikwembu Nkulukumba?

16-17. I yini leswi hi khensaka ha swone, nakone ha yini?

¹⁶ Lava landzrelelaka mazritu ya lava misava yi va vonaka na va li tintlhazri va fana ni muyeni lwa kombelaka muyeni-kulobye ku mu komba ndlela kuve na yene a lahlekile. Mayelanu ni tintlhazri ta le masikwini yakwe, Yesu a te: ‘I va ku fa mahlu lava fambisaka va ku fa mahlu; kambe loko lwe wa ku fa mahlu a fambisa lwe wa ku fa mahlu, va ta wela kheleni hi vubizri byavu.’ (Mt 15:14) Kunene, wutlhazri bya misava leyi i wumphunta ka Xikwembu Nkulukumba.

¹⁷ Swilayu swa Bibele minkama hinkwayu swi tikombe na swi pfuna ‘ku dondzrisa, ni ku kholwisa, ni ku busetela, ni ku luleka a ku lulameni’. (2Tm 3:16) Hi khensa ndjhani hi leswi Yehovha, hi ku tizrisa nhlengeletanu yakwe, a hi sizreleliki ka wutlhazri bya misava leyi! (Ef 4:14) Swakuda swa moya leswi a tsrhamaka hi ku hi phamela swi hi nyika ntamu lowu hi wu vilelaka akuva hi namazrela milawu ya Zritu dzrakwe. Mawaku nkateko lowu hi nga nawu wa ku kombiwa ndlela hi wutlhazri lebyi dumbekaka lebyi nga Bibeleni!