1. I yini leswi nga ha vaka swi ku hlamalisile loko hi khambi dzra ku sungula u dzringise ku dondzrisa vambeni dzrungula dzra Bibele?

WA HA dzrimuka khambi dzra ku sungula u nga gungula leswaku u kume xihlayelamfuzri? Leswi a wu li ku swi dondzreni a Bibeleni a swi nabyala ngopfu ku swi twisisa​—a swe baa! U tibyele leswi: “Vhanu hinkwavu va ta swi nyonxela ku dondzra mhaka leyi.” A wu tiyiseka leswaku dzrungula dzra Bibele dzri ta va nyika wutomi lebyi nga ni ntlhamuxelo swoswi ni dumbo ledzri nyonxisaka hi wumundzruku. (Ps 119:105) Na u nyonxe hi ku helela, u sungule ku dzrungulela maxaka ni vanghanu mintiyiso leyi u yi kumiki. Kambe ku yentxeke yini? Swi ku hlamalisile loko vanyingi va yala leswi a wu va byela swone.

2-3. A masikwini ya Yesu, xana vanyingi va titwise kuyini ha yene ni dzrungula dzrakwe?

² Ni mun’we ku hine a nga fanelanga a hlamala loko vambeni va yala dzrungula ledzri hi dzri zrezraka. A masikwini ya Yesu, vanyingi va mu fulazrelile, nambi leswi a hambiki mahlolana lama kombisiki leswaku a a ni nseketelo wa Xikwembu Nkulukumba. Hi xikombiso, Yesu a pfuxe Lazaru​—ku nga hlolana ledzri vakaneti vakwe a va nge na ku dzri phika. Nambitanu, vazrangeli va Vayuda a va pfumelanga leswaku Yesu a a li Mesiya. A va djula nambi ku dlaya Yesu na Lazaru!​—Yh 11:47, 48, 53; 12:9-11.

³ Yesu a a swi tiva leswaku ntalu wa vhanu a va ta yala ku pfumela leswaku hi yene Mesiya. (Yh 5:39-44) A byele ntlawa wa vadondzrisiwa va Yohane Mubabatisi a ku: “Awa nyonxa lweyi a kalaka a nga [khunguvanyeki] ha mine.” (Mt 11:2, 3, 6) Ha yini vanyingi va yale Yesu?

4. Hi ta kambisisa yini ka xidondzro lexi?

⁴ Ka xidondzro lexi ni lexi landzrelaka, hi ta kambisisa swivangelo swa ku hlawa leswi yentxiki vanyingi a dzaneni dzra ku sungula va nga kombisi lipfumelo ka Yesu. Hi ta tlhela hi vona leswi  yentxaka vanyingi namunhla va yala dzrungula dzrezru. Xa lisima ngopfu, hi ta dondzra leswaku ha yini hi fanela ku va ni lipfumelo ledzri tiyiki ka Yesu akuva hi nga khunguvanyisiwi.

5. I yini swi nga ha vaka swi yentxe vambeni va pimisa leswaku Yesu a hi yene Mesiya lweyi a a profetiwili?

⁵ Vanyingi va mu yalile Yesu hi mhaka ya lomu a kuleliki kone. Va pfumelile leswaku Yesu a a li mudondzrisi lweyi a hlamalisaka nakone a a yentxa mahlolana. Kambe kwavu a o va ntsena n’wana wa muvatli lwa nga xisiwana. Nakone a a huma a Nazareta, doropa ledzri a swi tikomba na dzri nga nyikiwi lisima. Nambi Natanayele, lweyi a gamiki a va mudondzrisiwa wa Yesu, a ku sunguleni a te: “Ku nga huma yini leswinene a Nazareta?” (Yh 1:46) Swi nga yentxeka Natanayele a nga dzri nyonxelanga doropa ledzri Yesu a a tsrhama ka dzrone hi nkama lowo. Kumbe swi nga yentxeka a a pimisa hi wuprofeta lebyi kumekaka ka Mika 5:2, lebyi hlayiki leswaku Yesu a a ta belekiwa a Betlehema, ku nga li a Nazareta.

6. I yini lexi inhaka xi pfune vhanu a masikwini ya Yesu ku gungula leswaku hi yene Mesiya?

⁶ Xana Matsralwa ma li yini? A wuprofeta bya Ezaya byi hlaye leswaku a valala va Yesu a va ta hluleka ku tiva wutsrhokotsrhoko bya ‘nkama wa vutomi byakwe kumbe wa ku tlhasa ka Mesiya’. (Eza 53:8) Ku tala ka wutsrhokotsrhoko lebyo a byi profetiwile. Loko a va tinyike nkama wa ku kambisisa wumboni hinkwabyu, ina va swi tivile leswaku Yesu a pswaliwe a Betlehema nakone i wa lixaka dzra Hosi Davhida. (Lk 2:4-7) Xileswo, lomu Yesu a belekeliwiki kone ka kumana ni wuprofeta lebyi nga ka Mika 5:2. Kutani ke, a mhaka a yi li kwini? A vhanu va gigisekele ku yavanyisa mhaka. A va nge na wumboni hinkwabyu. Hi mhaka ya leswo, va khunguvanyekile.

7. Ha yini vanyingi namunhla va fulazrela vhanu va Yehovha?

⁷ Xana hi ni xikazratu lexi fanaka namunhla? Ina. Swanga ntlawa, vhanu va Yehovha i va xiyimu xa le hansi. Vanyingi va va vona swanga ‘lava ku ka va nga dondzranga, va nga vhanu ntsena’. (Min 4:13) Van’we va vona leswaku a vhanu va Xikwembu Nkulukumba a va nge swi koti ku dondzrisa timhaka ta Bibele hikusa a va dondzranga ka swikole swa Bibele swa le henhla. Vambeni va li Timboni ta Yehovha i “wukhongoti bya le América”, nambi leswi hi ntiyiso wa kone hi xidzringaniso, ka ntlawa wa 7 wa Timboni ku nga yin’we ntsena yi tsrhamaka Estados Unidos. Vambeni mfuzri va byeliwe leswaku Timboni ta Yehovha a ti pfumeli ka Yesu. Hi ku famba ka malembe, a vhanu va Yehovha va txhuliwe mavito ya leswaku i “vakomunixta”, i “tinhloli ta le América”, ni leswaku “va landzra nawu ku tlula mpimu”. Leswi lava va byeliwaka madzrimi wolawo leswi va ngeke na wumboni kumbe va nga pfumelikiki ntiyiso, va khunguvanyeka.

8. Hi ku ya hi Amintiṛo 17:11, xana vhanu va fanela ku yentxa yini loko va djula ku tiva vatizreli va Xikwembu Nkulukumba va masikwana lawa?

⁸ Hi nga tivonelisa kuyini akuva hi nga khunguvanyeki? Vhanu va fanela ku kambisisa wumboni. Hi leswi Luka, mutsrali wa Evhangeli a a tiyimisele ku swi yentxa. A a tikazratela ku ‘kambisisa hahombe [timhaka] hinkwatu, a sungula hi le ku humeleleni ka tone’. A a djula leswaku vadondzri vakwe va ‘tiva a tiyo dzra tidondzro leti’ va ti twiki mayelanu na Yesu. (Lk 1:1-4) A Vayuda va le khale ka Bereya a va fana na Luka. Loko va twe madzrungula lamanene mayelanu na Yesu hi khambi dzra ku sungula, va kambisise Matsralwa ya Xiheberu akuva va tiyiseka leswaku leswi a va byeliwa swone a a li xihlayelamfuzri. (Dondzra Amintiṛo 17:11.) Hi ku fanana, vhanu namunhla va fanela ku kambisisa wumboni. Va fanela ku dzringanisa  leswi vhanu va Xikwembu Nkulukumba va va dondzrisaka swone ni leswi Matsralwa ma swi hlayaka. Va fanela ku tlhela va dondzra matimu ya masikwana lawa ya vhanu va Yehovha. Loko va kambisisa ha hombe lomu timhaka hinkwatu ti sukelaka kone, va nge ti pfumelela xihlawuhlawu kumbe leswi vambeni va swi hlayaka swi va tsrikisa nhlengeletanu.

9. I yini leswi yentxekiki loko Yesu a yale ku hamba hlolana ledzri pfaka tilweni?

⁹ Vambeni a masikwini ya Yesu a va nga yaneliseki hi tindondzro takwe leti hlamalisaka. A va djula leswi yengeselekiki. Va koxe leswaku a kombisa leswaku hi yene Mesiya hi ku hamba ‘hlolana ledzri pfaka tilweni’. (Mt 16:1) Swi nga yentxeka va hambe xikombelo lexi hi kuva va nga swi twisisanga ha hombe leswi swi hlayiwaka ka Daniel 7:13, 14. Nambi tanu, a wu nge si va wone nkama wa kuva Yehovha a hetisisa wuprofeta lebyo. Leswi Yesu a a li ku swi dondzriseni a swi fanele swi yanelile ku va kholwisa leswaku a a li yene Mesiya. Kambe loko a yale ku va hambela hlolana ledzri a va dzri djula, va khunguvanyekile.​—Mt 16:4.

10. Xana Yesu a swi hetisisise kuyini leswi Ezaya a swi tsraliki mayelanu na Mesiya?

¹⁰ Xana Matsralwa ma li yini? Muprofeta Ezaya a tsrale leswi mayelanu na Mesiya: ‘A ngaka a nga bandlukani, a ngaka a nga tlakuxi zritu, a ngaka a nga dzri twalisi mazruweni.’ (Eza 42:1, 2) A wutizrelini byakwe, Yesu a a nga lweli ku dzrumisiwa hi vhanu. A nga zanga a yaka mimbangu ya wugandzreli leyi hlamalisaka, a yambala timpahla ta wukhongoti leti mu hambanisaka ni vambeni kumbe a koxa ku vitaniwa hi mavito ya swikhundla swa wukhongoti. Loko a li ku yavanyisiweni, Yesu a yalile ku hamba hlolana leswaku a nyonxisa Hosi Heroda, nambi leswi wutomi byakwe a byi li khombyeni. (Lk 23:8-11) Nakunene, Yesu a yentxile mahlolana ya kukazri, kambe nkongometo wakwe a ku li ku zrezra madzrungula lamanene. A byele vadondzrisiwa vakwe a ku: ‘Hikusa ndzri humeli swone.’​—Mr 1:38.

11. I mintxhumu muni leyi hoxekiki leyi vambeni va yi djulaka namunhla?

¹¹ Xana hi ni xikazratu lexi fanaka namunhla?  Ina. Namunhla vanyingi va hlamalisiwa hi tiyindlu letikulu swinene ta wukhongoti, leti nga ni swibya swa ku dula ngopfu. Va tlhela va nyonxisiwa hi vazrangeli va wukhongoti lava nga ni mavito lama tlakukiki swinene, ni hi swihena swa wukhongoti leswi a ntumbuluku ni ntlhamuxelo wa swone wu dzrivaliwiki hi lavanyingi. Kambe leswi vhanu lava yaka mintlhanganwini leyo ya wukhongoti va swi dondzraka mayelanu na Xikwembu Nkulukumba ni minkongometo yakwe, a swi tati nkombe. Lava hlalelaka mintlhanganu yezru ya wukriste va dondzra leswi Yehovha a swi laviseliki kwezru ni ndlela ya ku hanya hi ku ya hi ku zrandzra kwakwe. Tiyindlu tezru ta Wugandzreli ti basile nakone ta pfuna, kambe a ti xongiseliwanga hi ndlela leyi dulaka ku tlula mpimu. Lava va zrangelaka a va yambali timpahla leti va hambanisaka ni vambeni; nakone a va txhuliwi mavito ya swikhundla leswi tlakukiki. Tindondzro tezru ni leswi hi swi kholwaka swi seketeliwa Zritwini dzra Xikwembu Nkulukumba. Vanyingi namunhla va fulazrela dzrungula dzrezru hikusa a hi na swihena swa wukhongoti leswi swi va nyonxisaka. Nakone leswi hi swi dondzrisaka a swi fambisani ni leswi va navelaka ku swi yingela.

12. Hi lani swi tlhamuxeliwiki ha kone ka Ba-Heberu 11:1, 6, xana lipfumelo dzrezru dzri fanela ku tiyisiwa hi yini?

¹² Hi nga tivonelisa kuyini akuva hi nga khunguvanyeki? Mupostola Pawulo a byele vakriste va le Roma, a ku: ‘Hi leswo ke, a ku pfumela ku pfa ku yingeleni: Kambe a ku yingela ku pfa Zritwini dzra Xikwembu Nkulukumba.’ (Ro 10:17) Xileswo, hi tiyisa lipfumelo dzrezru hi ku dondzra Matsralwa, ku nga li hi ku yentxa swihena swa wukhongoti leswi nga pfiki Matsralweni, nambi loko swi nga nyonxisa mahlo ku ya gama kwini. Hi fanela ku txutxela lipfumelo ledzri tiyiki, ledzri seketeliwiki ka wutivi bya xihlayelamfuzri, hikusa ‘a handle ka ku pfumela, a swi koteki ku nha mhunu a tsrhaveliwa hi Xikwembu Nkulukumba’. (Dondzra Ba-Heberu 11:1, 6.) Xileswo, a swi djuli kuva hi vona hlolana ledzri pfaka tilweni akuva hi kholwa leswaku hi kume xihlayelamfuzri. Ku kambisisa tindondzro ta Bibele leti tiyisanaka lipfumelo swa yanela ku hi kholwisa swi tlhela swi hi susela ku ganaganeka kwini na kwini.

13. I yini leswi yentxiki vanyingi va sola Yesu?

¹³ A masikwini ya Yesu, vadondzrisiwa va Yohane Mubabatisi va hlamalile hi leswi Yesu ni vadondzrisiwa vakwe a va nga titsroni swakuda. Yesu a tlhamuxele leswaku a ku nge na xivangelo xa kuva va titsrona swakuda na a ha hanya. (Mt 9:14-17) Nambi tanu, vafarisi ni vakaneti vambeni va Yesu va mu solile hi leswi a a nga landzri swihena swavu. Va khunguvanyekile loko a dahe vhanu hi Savata. (Mr 3:1-6; Yh 9:16) A va tihlaya vahetisisi vakulu va Savata; kambe hi hala tlhelo, a va nga swi voni ku li mhaka ku xavisela a tempeleni. Va khunguvanyeke ngopfu loko Yesu a va solile hi ku yentxa leswo. (Mt 21:12, 13, 15) Nakone, lava Yesu a va zrezreliki a sinagogeni va hlundzruke ku tlula mpimu loko a tizrise xikombiso xa matimu ya va-Israyele akuva a kombisa leswaku a va nge na mhaka ni vambeni, nakone a va nge na lipfumelo. (Lk 4:16, 25-30) Leswi Yesu a swi yentxiki a va nga swi languselanga, nakone swi khunguvanyise vanyingi.​—Mt 11:16-19.

14. Ha yini Yesu a sole swihena swa vhanu leswi a swi nga fambisani ni Matsralwa?

¹⁴ Xana Matsralwa ma li yini? Hi ku tizrisa muprofeta wakwe Ezaya, Yehovha a te: ‘Leswi tiko ledzri dzri tsrhindzrekelaka ku mine hi nomu, va ndzri txhava ka hi milomu, kasi timbilu tavu ti le kule na mine, a xitxhavu lexi va ndzri txhavaka ha xone xa ku va xileleto xa vhanu lexi va xi dondzriki.’ (Eza 29:13) Yesu a a yentxa swone loko a sola swihena swa vhanu leswi nga fambisaniki ni Matsralwa. Lava afaka va zrangisa swihena ni milawu leyi hambiwiki hi vhanu a henhleni ka Matsralwa, va yale Yehovha na Mesiya lweyi a mu zrumiki.

15. I yini leswi kazrataka vanyingi namunhla mayelanu ni Timboni ta Yehovha?

¹⁵ Xana hi ni xikazratu lexi fanaka namunhla? Ina. Vanyingi va sola Timboni ta Yehovha hi leswi ti nga tipatsriki na vone ka swihena leswi nga fambisaniki ni Matsralwa, swa ku fana ni masiku ya ku belekiwa ni khisimusi. Vambeni va khunguvanyeka loko Timboni ta Yehovha ti nga tipatsri na vone ka minkhuvu ya tiko, kumbe ti nga fambisaniki na vone ka swihena leswi fambisanaka ni swilahlu leswi lwisanaka ni Zritu dzra Xikwembu Nkulukumba. Lava va khunguvanyisiwaka hi mintxhumu leyo, va nga ha kholwa hi mbilu hinkwayu leswaku va gandzrela Xikwembu Nkulukumba hi ndlela leyi yamukelekaka. Kambe va nge mu nyonxisi loko va hlawula ku zrangisa swihena swa misava a matsrhan’wini ya tindondzro ta Bibele leti nga livaleni.​—Mr 7:7-9.

16. Hi ku ya hi Amapsalma 119:97, 113, 163-165, i yini leswi hi fanelaka ku swi yentxa ni leswi hi fanelaka ku swi tingawula?

¹⁶ Hi nga tivonelisa kuyini akuva hi nga khunguvanyeki? Hi fanela ku tiyisa lizrandzru dzrezru hi milawu ya Yehovha ni minsinya yakwe ya milawu. (Dondzra Amapsalma 119:97, 113, 163-165.) Loko hi zrandzra Yehovha hi ta tingawula xihena xini na xini lexi mu khunguvanyisaka. Hi nge ti pfumelela ntxhumu ni xin’we xi honisela lizrandzru dzrezru ha Yehovha.

17. I yini leswi vanyingi a masikwini ya Yesu a va swi languselile, leswi va yentxiki va khunguvanyeka?

¹⁷ Vambeni a masikwini ya Yesu a va djula ku txintxa Mfumu hi nkama wolowo. Leswi a va xanisiwa hi mfumu wa Varoma, a va lavisele leswaku Mesiya a va ntsrhunxa. Kambe loko va zame ku mu yentxa hosi yavu, Yesu a yalile. (Yh 6:14, 15) Vambeni​—ku patsra ni vaprista—​a va txhava leswaku Yesu a ta simeka mfumu lowu lwisanaka ni wa Varoma, na kasi hi hala tlhelo a Varoma a va nyike vafarisi mpimu wa kukazri wa wuhosi; xileswo a va txhava ku tekeliwa byone.  Ku kazrateka hi timhaka leto ta politika ku yentxe leswaku Vayuda vanyingi va Khunguvanyeka.

18. He byini wuprofeta bya Bibele mayelanu na Mesiya lebyi vanyingi va nga byi tekelangakiki nhlokweni?

¹⁸ Xana Matsralwa ma li yini? Nambi leswi wuprofeta byinyingi byi kombisiki leswaku Mesiya hi wugamu a a ta va Nhenha leyi taka hlula, wuprofeta byimbeni byi kombise leswaku a a fanela ku zranga hi ku fela swidoho swezru. (Eza 53:9, 12) Kutani ke, ha yini a va ni ku lavisela loku hoxekiki? Vanyingi a masikwini ya Yesu a va swi xiyanga swa ku wuprofeta a byi nga kombisi leswaku Yesu a ta lulamisa timhaka tavu hi nkama lowo.​—Yh 6:26, 27.

19. He yini miyanakanyu leyi hoxekiki leyi yentxaka vanyingi va fulazrela dzrungula dzrezru namunhla?

¹⁹ Xana hi ni xikazratu lexi fanaka namunhla? Ina. Vanyingi va khunguvanyeka namunhla hi leswi hi nga tekiki tlhelo a timhakeni ta politika. Va langusela leswaku na hine hi kheta hosi loko ku tlhasa nkama wa hlawula mani. Nambi tanu, hi twisisa leswaku hi ku ya hi mavonela ya Yehovha, loko hi hlawula mhunu leswaku a va mufumi wezru, hi va na hi fulazrela Yehovha. (1Sa 8:4-7) Vhanu va nga ha tlhela va vona leswaku a hi fanela ku yaka swikole, swipiritana ni ku yentxa mintizro yimbeni ya ku pfuna swisiwana. Va Khunguvanyeka hikusa hi tinyiketela a ntizrweni wa ku zrezra, a matsrhan’wini ya ku lulamisa swikazratu leswi misava yi langusanaka na swone namunhla.

20. Hi ku ya hi leswi Yesu a swi khanyisiki ka Matewu 7:21-23, he wini ntizro wezru lowukulu?

²⁰ Hi nga tivonelisa kuyini akuva hi nga khunguvanyeki? (Dondzra Matewu 7:21-23.) Nkongometo wezru lowukulu ku fanela ku va ku hetisisa ntizro lowu Yesu a hi zrumiki wone. (Mt 28:19, 20) A hi fanelanga hi dzrivatiwa hi timhaka ta politika ta misava leyi. Ha va zrandzra vhanu hi tlhela hi zron’weka hi swikazratu swavu. Kambe ha swi tiva leswaku a ndlela ya ku yampswa ya ku pfuna vambeni i ku va dondzrisa mayelanu ni Mfumu wa Xikwembu Nkulukumba ni ku va pfuna ku txutxela wunghanu na Yehovha.

21. Xana hi fanela ku tiyimisela ku yentxa yini?

²¹ Ka nhlokomhaka leyi, hi kambisise mune wa swikhunguvanyiso leswi yentxiki vanyingi va fulazrela Yesu a dzaneni dzra ku sungula, nakone swi yentxaka vambeni namunhla va fulazrela valandzreli vakwe. Kambe ko va swoswo ntsena hi fanelaka ku swi tivonela ka swone? Im-him. Ka nhlokomhaka leyi landzrelaka, hi ta tlhela hi vona swikhunguvanyiso swimbeni swa mune. Mawaku loko hi ngo tiyimisela ku tivonela ku khunguvanyisiwa hi tlhela hi tama hi tiya a lipfumelweni!