1-2. He swini swikazratu leswi vamakwezru vanyingi va kumanaka na swone?

MUPOSTOLA Pawulo a kutxe Timotewu kun’we ni vakriste lavan’wana hinkwavu akuva va hetisisa wutizreli byavu. (2Tm 4:5) Hinkwezru hi ma tekela nhlokweni mazritu ya Pawulo. Kambe ku swikazratu swa kukazri. Hi xikombiso, ka vamakwezru vanyingi swa kazrata kuva va hlengela a ntizrweni wa ku zrezra. (2Tm 4:2) Hi xikombiso, yanakanya hi vamakwezru lava tsrhamaka a matikweni lawa a ntizro wezru wu siveleteliwaka kumbe wu yilisiwaka. Va tama va zrezra nambi loko va swi tiva leswaku va nga ha khomiwa!

² Vhanu va Yehovha va langutana ni swikazratu swinyingi, swa ku hambanahambana leswi hlomulanaka ni mbilu. Hi xikombiso, vanyingi va tizra yi nga txhayi akuva va kumela ndangu wavu swakuda swa siku ni siku. Va swi djula ngopfu ku yentxa leswi yengetelekiki a ntizrweni wa nsimu, kambe a ku heleni ka vhiki va va na va kazralile. Van’wana vavu va hluleka hi ku helela ku yentxa leswi yengetelekiki hi kola ka mavabyi lama kalaka ma nga daheki kumbe hi kola ka ntanga. Van’wana va hluleka nambi ku huma makaya. Kasi van’wana minkama hinkwayu va lwisana ni ku titwa va nga pfuni ntxhumu. Mary, * makwezru lwa tsrhamaka a Médio Oriente, a li: “Swi djula ni tikazrata ngopfu swinene akuva ni lwisana ni matitwela yanga lama hoxekiki, lakakuva ni hela ni moya. Ni titwa nadzru hikusa leswo swi ni tekela nkama swi tlhela swi ni heta ntamu wa ku va ni ya ku zrezreni.”

3. Hi ta bula hi yini ka xidondzro lexi?

³ Swi nge na mhaka leswaku he swini swikazratu leswi hi kumanaka na swone, Yehovha a ta hi nyika ntamu wa kuva hi tama hi mu tizrela hi lani hi nga kotaka ha kone. Na hi nga si yi vona ndlela leyi Yehovha a hi pfunaka ha yone, a hi kambisiseni ndlela leyi Yehovha a tiyisiki Pawulo na Timotewu ha yone akuva va tama va hetisisa wutizreli byavu nambi loko va kumana ni swikazratu.

4. He swini swikazratu leswi Pawulo a a langusana na swone?

⁴ Pawulo a langusane ni swikazratu swinyingi. A a vilela mpfunu wa Yehovha, ngopfungopfu loko valala vakwe va mu bile, va dzringise ku mu dlaya va tlhela va mu pfalela. (2Ko 11:23-25) Ha wuswakwe Pawulo a hlaye leswaku minkama yimbeni a a lwisana ni matitwela lama hoxekiki. (Ro 7:18, 19, 24) A a tlhela a tiyiselela ‘mutwa a nyameni’ lowu a a vilela leswaku Xikwembu Nkulukumba a mu susela wone.​—2Ko 12:7, 8.

5. I Yini leswi Pawulo a swi hetisisiki nambi leswi a a langusana ni swikazratu?

⁵ Yehovha a nyike ntamu Pawulo akuva a hetisisa ntizro wakwe nambi leswi a a langusana ni swikazratu. Vona leswi Pawulo a swi hetisisiki. Hi xikombiso, Pawulo a a nga swi koti ku suka a ya mbangu, hikusa a a pfaleliwe a kaya, a Roma. Nambi tanu, a tame a zrezra madzrungula lamanene hi ku hiseka a mahlweni ka vazrangeli va Vayuda, nambi kumbexana a mahlweni ka vatizreli va mfumu. (Min 28:17; Flp 4:21, 22) A tlhele a zrezrela masotxha manyingi lawa a ma mu lavisela, ni hinkwavu lava a va mu pfuxela. (Min 28:30, 31; Flp 1:13) Hi nkama wolowo a tsrale mapapela lama huhuteliwiki lawa ma pfunaka vakriste ku ta tlhasa ni namunhla. Nakone xikombiso xa Pawulo xi tiyise bandla dzra le Roma. Bindzru dzra kone, vamakwezru va kote ku ‘tiya va hlaya Zritu dzra Xikwembu Nkulukumba va nge na ku txhava’. (Flp 1:14) Nambi leswi minkama yin’wana Pawulo a a nga swi koti ku yentxa leswi a a swi vilela, a yentxe leswi a swi kotiki, nakone a ‘Evhangeli dzri yi mahlweni’.​—Flp 1:12.

6. Hi ku ya hi 2 Ba-le-Korinte 12:9, 10, i yini lexi pfuniki Pawulo ku hetisisa wutizreli byakwe?

⁶ Pawulo a swi twisisile leswaku leswi a a swi yentxa, a a swi kota hi ntamu wa Xikwembu Nkulukumba ku nga li hi wakwe. A hlaye leswaku ‘ntamu wa Xikwembu Nkulukumba wu hetiseka gomeni’. (Dondzra 2 Ba-le-Korinte 12:9, 10.) Hi ku tizrisa moya wakwe wa ku xwenga, Yehovha a nyike Pawulo ntamu wa ku hetisisa a wutizreli byakwe nambi leswi a a landzreleliwa, a khomiwa ni ku langutana ni swikazratu swimbeni.

7. I swikazratu muni leswi Timotewu a a fanela ku swi hlula akuva a hetisisa wutizreli byakwe?

⁷ A munghanu wa Pawulo lweyi a ha li mumpshwa, Timotewu, na yene swi djule a dumba ntamu wa Xikwembu Nkulukumba akuva a hetisisa wutizreli byakwe. Timotewu a fambe na Pawulo ka mayendzro manyingi lawa a ma yentxiki swanga muzrumiwa. A henhleni ka leswo, Pawulo a tlhele a mu zruma ka mayendzro mambeni  akuva a ya pfuxela ni ku tiyisa mabandla. (1Ko 4:17) Swi nga yentxeka Timotewu a titwe na a nga fanekeleki. Swi nga yentxeka a li xivangelo lexo xi yentxiki Pawulo a mu byela leswi: ‘Ku nga vi na mhunu lwa dzrelaka wumpshwa byaku.’ (1Tm 4:12) Nakone, hi nkama wolowo, Timotewu a a ni mutwa wakwe a nyameni, ku nga ‘ku vabya’ hi makhambe manyingi. (1Tm 5:23) Kambe Timotewu a a swi tiva leswaku ntamu wa Yehovha ku nga moya lowa ku xwenga a wu ta mu tiyisa hi lani a a vilela ha kone akuva a zrezra madzrungula lamanene ni ku tiyisa vamakwezru.​—2Tm 1:7.

8. Xana Yehovha a va tiyisa hi ndlela yini vhanu vakwe namunhla?

⁸ Namunhla, Yehovha a nyika vhanu vakwe ‘wukulu bya ntamu’ akuva va tama va mu tizrela hi ku dumbeka. (2Ko 4:7) A hi voneni mune wa malulamiselo lawa a hi nyikaka wone akuva a hi tiyisa leswaku hi tama hi mu tizrela hi ku dumbeka: Xikhongoto, Bibele, ku tlhangana ni vakristekulozri, ni ntizro wezru wa ku zrezra.

9. Xana xikhongoto xi nga hi pfuna hi ndlela yini?

⁹ Ku tiyisiwa hi xikhongoto. Hi lani swi kombisiwaka ha kone ka Ba-le-Efesa 6:18, Pawulo a hi kutxa ku khongota ka Xikwembu Nkulukumba ‘minkama hinkwayu’. Xikwembu Nkulukumba a ta hlamula swikhongoto swezru hi ku hi nyika ntamu. Jonnie, lwa tsrhamaka a Bolívia, a kote ku twa ndlela leyi Yehovha a mu pfuniki ha yone loko a kumani ni swikazratu swa ku bindzra swinene. Nsati wakwe ni vapswele vakwe va vabye ngopfu swinene hi nkama wun’we. A swi mu kazratela ngopfu Jonnie ku va a hlayisa hinkwavu hi ku ya hi swivileleko swavu. Mamana wakwe a file, nakone swi teke nkama akuva nsati ni papayi wakwe swi va yampswela ka wuvabyi byavu. Loko a dzrimukela leswi mu yentxekeliki, Jonnie a li: ‘Leswi ni pfuniki loko ni bindzriwa hi swikazratu swanga, i ku va loko ni khongota ni hlaya leswi swi ni kazrataka hi ku kongoma.’ Yehovha a nyike Jonnie ntamu lowu a a wu vilela akuva a tiyisela. Ronald, nkulu wa kukazri a Bolívia a gungule leswaku mamana wakwe a a ni kankru. Ke khaluta wheti yin’we a va a fa. I yini lexi pfuniki Ronald ka nkama luwani wa ku kazrata? A li: “Ku khongota ka Yehovha swi ni pfumelela ku txhulula mbilu yanga kwakwe ni ku mu byela hinkwaswu leswi ni titwisaka xiswone. Na swi tiva leswaku Yehovha a ni twisisa ku yampswa ku tlula mani na mani, nambi hi ku tlula ndlela leyi mine n’winyi ni ti tivaka ha yone.” Minkama yimbeni hi nga ha titwa na swi hi bindzrela kumbe hi nga tiyiseki leswaku hi nga hlaya yini ka xikhongoto. Kambe Yehovha a hi zramba kuva hi khongota ku yene nambi loko swi hi kazratela ku tlhamuxela leswi hi titwisaka xiswone.​—Ro 8:26, 27.

10. Hi ku ya hi Ba-Heberu 4:12, ha yini ku dondzra ni ku yanakanyisisa hi leswi hi swi dondzraka a Bibeleni swi li swa lisima?

¹⁰ Ku tiyisiwa hi ku tizrisa Bibele. Swanga hi leswi Pawulo a tiyisiwiki hi ku txhaveleliwa hi matsralwa, na hine hi nga ma dumba. (Ro 15:4) Loko hi dondzra ni ku yanakanyisisa hi Zritu dzra Xikwembu Nkulukumba, Yehovha a nga tizrisa moya wakwe lowa ku xwenga akuva a hi pfuna ku twisisa ku yampswa ndlela leyi matsralwa ma tizraka ha yone ka xiyimu xezru. (Donzra Ba-Heberu 4:12.) Ronald, lweyi hi buliki ha yene ku sunguleni, a li: “Ni tlangela ngopfu leswi ni titolovetiki ku dondzra xiyenge xa kukazri xa Bibele wusiku byin’wana ni byin’wana. Ni yanakanyisisa ngopfu hi matsrhamela ya Yehovha ni lizrandzru ledzri a dzri kombisaka malandzra yakwe. Leswi swi ni pfuna ku tlhela ni kuma ntamu.”

11. Xana ku dondzra Bibele swi mu pfunise kuyini makwezru lweyi a ha li xidzrilweni xa ku feliwa hi nuna?

¹¹ Ku yanakanyisisa hi Zritu dzra Xikwembu Nkulukumba swi hi pfuna ku va ni vonela ledzrinene hi swikazratu swezru. Vona leswi Bibele  dzri pfunisiki xiswone wansati wa kukazri lweyi a a ha ku feliwa hi nuna. Nkulu wa kukazri a mu byele leswaku a nga kuma tidondzro ta lisima leti nga mu pfunaka loko a dondzra buku dzra Yob. Na o ho sungula ku dondzra a tekele ku sola Yobe hi miyanakanyu yakwe leyi hoxekiki. A mimpimisweni yakwe a mu kawuki a ku: ‘Yobe, i swa ku yini swoswo!’ Kambe a game a dzrimuka leswaku na yene a ve ni mimpimiso leyi fanaka ni ya Yobe. Leswo swi mu pfune ku lulamisa mapimisela yakwe ni ku mu tiyisa ka xiyimu lexiyani xa ku bindzra hi nkonta ya ku luzekeliwa hi nuna wakwe.

12. Xana Yehovha a va tizrisa hi ndlela yini vapfumelikulozri akuva va hi tiyisa?

¹² Ku tiyisiwa hi ku tlhangana ni vakristekulozri. Ndlela yin’wana leyi Yehovha a tiyisaka vakriste ha yone i ku tizrisa vapfumelikulobye. Pawulo a tsrale leswaku a a navela ku va ni ku yavelana ka ‘tinyiku ta moya’ ni vapfumelikulobye. (Ro 1:11, 12) Maria, lweyi hi buliki a yene a ku sunguleni awa swi zrandzra ku tlhangana ni vamakwezru. A li: “Yehovha a tizrisi vamakwezru va xinuna ni va xisati lava ni ku swi xiya a va nga swi xiyanga leswaku a ni ni swikazratu. Va ni byele kumbe ku ni tsralela mazritu lama ni tiyisaka ku nga leswi a ni swi djula hi nkama wolowo. Ni tlhela ni pfuneka hi ku tsrhindzrekela ka vamakwezru la va nga ni swikazratu swa ku fana ni swanga nakone ni dondzra ka swikombiso swavu. A vakulu minkama hinkwayu va ni yentxa ni titwa na ni hamba xiyenge xa lisima bandleni.”

13. Xana hi nga tiyisana hi ndlela yini a mintlhanganwini ya bandla?

¹³ Mbangu wumbeni lomu hi nga kumaka ku tiyisiwa kone he mintlhanganwini ya wukriste. Loko u li mintlhanganwini, ha yini u nga vi wa ku sungula u ya tiyisa vamakwezru hi mazritu lama sukelaka mbilwini akuva u va tlangela? Hi xikombiso, na ntlhanganu wu nga si na sungula, nkulu wa bandla lwa vitaniwaka Peter, a byeli makwezru wa xisati lweyi nuna wakwe a nga liki mupfumeli, a ku: “A wu yi yanakanyi ndlela leyi swi hi tiyisaka ha yone ku ku vona na wu li lani. Minkama hinkwayu wene ni vanaku va 6 mi lulamisela ha hombe ni ku nyikela tinhlamulo.” A hlaye mazritu ya ku tlangela na a tengatenga ni minyembeti, a ku: “Leswi u swi hlayaka hi swoswi a ni vilela ku swi yingela namunhla.”

14. Xana ku zrezra madzrungula lamanene swi hi khumbisa kuyini?

¹⁴ Ku tiyisiwa hi ntizro wa ku zrezra. Loko hi byela vambeni hi ntiyiso wa Bibele, hi kuma ntamu, swi nge na mhaka leswaku va yamukela kumbe im-him. (Pr 11:25) Makwezru lwa vitaniwaka Stacy a voni ndlela leyi ntizro wa ku zrezra wu mu tiyisiki ha yone. Loko xizro xin’we xa ndangu wakwe xi susiwe a bandleni, a vaviseke ngopfu swinene nakone a a tsrhamela ku tivutisa leswi: ‘Ina ni nga yentxanga leswi yengetelekiki akuva ni mu pfuna?’ Stacy a swi mu kazratela ku tsrhika ku hlatiyela hi mhaka leyi. I yini lexi mu pfuniki ka xiyimu lexiyani xa ku kazrata lexi a a lavisana na xone? I ntizro wa ku zrezra! Loko a li ku zrezreni a a beka miyanakanyu yakwe ka mpfunu lowu vhanu va le nsin’wini yakwe a va wu vilela. A li: “Hi nkama wolowo Yehovha a ni nyike xidondzro xa Bibele lexi yentxiki nhluvuku hi ku kahlula. Leswo swi ni tiyise ngopfu swinene. Lexi ni pfuniki ku va ni tama ni tiya wuton’wini byanga a ve ku yentxa leswi yengetelekiki a ntizrweni wa nsimu.”

15. U dondzri yini ka leswi hlayiwiki ha Maria?

¹⁵ Hi kola ka swiyimu swavu van’wana va nga ha titwa na va nga koti ku yentxa swinyingi a ntizrweni wa ku zrezra. Loko u titwa hi ndlela leyo, dzrimuka leswaku Yehovha a nyonxa swinene loko u yentxa leswi u nga swi kotaka. Tlhela u vona xikombiso xa Maria. Loko a zruzrele ka nsimu leyi vhanu va kone va vulavulaka lidzrimi dzrimbeni, a titwe na a nga ti pfuna ngopfu. A li: “Hi nkama lowo a no kota ku hlayanyana ntxhumu wa kukazri, kumbe ku dondzra ndzrimana ya Bibele kumbe ni nyikela xipapelana.” A a titwa na a nga faneleki loko a tidzringanisa ni lava a va  vulavula ha hombe lidzrimi ledzro. Nambi tanu a lulamise mapimisela yakwe. A sungule ku xiya leswaku Yehovha a nga mu tizrisa nambi loko a swi koti ha hombe ka khanela lidzrimi ledzriyani. A li: “Mintiyiso leyi huluxaka wutomi bya vhanu yi xongi swinene nakone hi yo mintiyiso yoleyo yi txintxaka wutomi bya vhanu.”

16. Loko u nga humi kaya, u nga yentxa yini akuva u kuma ntamu?

¹⁶ Yehovha a tiva ni ku twisisa xiyimu xa lava va djulaka ku zrezra kambe swi kalaka swi nga koteki kuva va huma a makaya. A nga va pfulela mikhandlu ya ku va va nyikela wumboni ka vahlayisi vavu kumbe ka lava tizraka ka ta wudahu. Loko hi fananisa leswi a hi kota ku swi yentxa khale ni leswi hi kotaka ku swi yentxa swoswi, hi nga ha txhuka hi hela ntamu. Kambe loko hi twisisa ndlela leyi Yehovha a hi tiyisaka ha yone swoswi hi ta kuma ntamu lowu hi wu vilelaka akuva hi tiyiselela mindzringo leyi hi langutanaka na yone hi ku tsrhava.

17. Hi ku ya hi Eklesiasta 11:6, ha yini hi fanela ku tama hi zrezra nambi loko hi nga voni mabindzru ya kone hi ku kahlula?

¹⁷ A hi swi tivi leswaku a mbewu ya xihlayelamfuzri leyi hi yi byalaka yi nga ha mila yi va yi kula ku ya tlhasa kwini.(Dondzra Eklesiasta 11:6.) Hi xikombiso, makwezru Barbara, lweyi a nga ni kolomu ka 80 wa malembe, minkama hinkwayu a zrezra hi ku tizrisa telefone ni ku tsrala mapapela. Ka dzrin’we dzra mapapela yakwe a patsre ni Xihondzo Xo Rindza, nkandziyiso wa vanhu hinkwavu, xa Marsu wa 2014, lexi nga ni nhlokomhaka leyi liki: “Leswi Xikwembu Xi Ku Endleleke Swona.” Na a nga swi tivi, Barbara a zrumeli papela dzrakwe ka vatekani lava a va nga a li Timboni ta Yehovha. Va dondzre revhixta hinkwadzru hi ku phindaphindha. A nuna wa kone a titwe na ingi hi loko Yehovha o khanela na yene hi ku kongoma. Hi wugamu vatekani volavo va sungule ku kumeka a mintlhanganwini nakone va tlhele va va Timboni leti hisekaka, ntsrhaku ka kolomu ka 27 wa malembe. Yanakanya ndlela leyi Barbara a kutxekiki ni ku tiyisiwa ha yone loko a vona mihandzru leyinene ya papela ledzriyani dzra dzrin’we ntsena!

18. Hi nga yentxa yini akuva hi pfuneka hi ntamu wa Xikwembu Nkulukumba?

¹⁸ Yehovha a hi nyika mikhandlu ya ku yamukela ntamu wakwe lowukulu. Loko hi tizrisa malulamiselo yakwe, ya ku fana ni xikhongoto, Bibele, ku tlhangana ni vakristekulozri ni ntizro wa nsimu, hi kombisa leswaku hi dumba wuswikoti bya Yehovha ni ku navela kwakwe ka ku hi pfuna. Ingiki hinkwezru hi nga tama hi dumba Papayi wezru wa le matilweni lweyi a ‘lwelaka hinkwavu lava mu dumbaka hi timbilu tavu hinkwatu’.​—2Mk 16:9.