1-2. Ha yini hi fanela ku zron’weka hi leswi tsraliwiki ka buku dzra Apfuletelo?

 U SAMA u kombiwa mafoto hi mhunu wa kukazri lweyi u mu tivaka? Ka mafoto wolawo u vona vhanu vanyingi lava u kalaka u nga va tivi. Hiloko u ya kuma dzrin’wana ledzri ku yentxaka u dzri lavisisa ha hombe. Ha yini? Hikusa na wene u kone ka foto ledzro. Loko u ya u dzri lavisisa, u zama ku dzrimukela leswaku mi suse siku muni nakone kwini. Handle ka leswo, u zama ku gungula leswaku i vamani lava u susiki navu. Handle ka ku ganaganeka, foto ledzro i dzra lisima swinene kwaku.

² A buku dzra Apfuletelo dzri fana ni foto dzroledzro. Ha yini? Hi swivangelo swibidzri. Xa ku sungula, dzri tsraleliwe hine. A ndzrimana ya ku sungula yi li: ‘Apfuletelo dzra Yesu Kriste, ledzri Xikwembu Nkulukumba a mu nyikiki dzrone akuva a komba malandzra yakwe leswi fanelaka ku humelela swoswi.’ (Mpf 1:1) Leswi liki, leswi tsraliwiki ka buku dzra Apfuletelo a swi tsraleliwanga vhanu hinkwavu, kambe swi tsraleliwe hine malandzra lama tinyiketeliki ya Xikwembu Nkulukumba. Swanga vhanu va Xikwembu Nkulukumba, a hi fanelanga hi hlamala loko hi gungula leswaku ha patsreka a ku hetisekeni ka wuprofeta lebyi tsraliwiki ka buku ledzri. Hi mazritu man’wana ha tivona “ka mufoto”.

3-4. Xana wuprofeta bya buku dzra Apfuletelo a dzri ta hetiseka hi nkama muni nakone a byi ta mu khumba hi ndlela yini mun’wana ni mun’wana wezru?

³ Xivangelo xa wubidzri hi leswaku hi hanya a nkameni lowu wuprofeta lebyi byi nga ku hetisekeni. Loko mupostola Yohane a vulavula hi nkama lowu, a hlaye leswi: ‘Ndzro va moyeni hi siku dzra Hosi.’ (Mpf 1:10) Loko Yohane a tsrala mazritu lawo kolomu ka lembe dzra 96 N.Y., a ‘siku dzra Hosi’ a dzra  ha li kule. (Mt 25:14, 19; Lk 19:12) Kambe hi ku ya hi wuprofeta bya Bibele, siku dzra Hosi dzri sungule hi 1914 loko Yesu a bekiwe swanga Hosi a matilweni. Ku sukela hi lembe ledzro, a wuprofeta bya buku dzra Apfuletelo lebyi khumbaka vhanu va Xikwembu Nkulukumba byi sungule ku hetiseka. Ina, swoswi hi hanya a ‘sikwini dzra Hosi’!

⁴ Leswi hi hanyaka a nkameni lowu wa ku nyonxisa, hi hine hi fanelaka ku yingiseta xitsratsriyo xa lizrandzru lexi kumekaka ka Apfuletelo 1:3, lexi liki: ‘Ku tovoki lwa hlayaka ni lava yingelaka a zritu dzra vuprofeta, lava bekisaka leswi tsraliwiki ku dzrone, hikusa nkama wu kusuhi.’ Ku hlaya ntiyiso, hi fanela ku hlaya hi zritu dzra le henhla akuva hi ‘yingela zritu dzra vuprofeta’ hi va hi dzri ‘bekisa’. He wani man’wana ya mazritu lawa hi fanelaka ku ma yingiseta?

5. Xana a buku dzra Apfuletelo dzri dzri kombisa hi ndlela yini lisima dzra kuva hi tiyiseka leswaku a wugandzreli byezru bya yamukeleka ka Yehovha?

⁵ Ku sukela ka ndzrima ya ku sungula ya buku dzra Apfuletelo, hi dondzra leswaku Yesu a swi tiva ha hombe leswi yentxekaka ka mabandla ya vhanu vake. (Mpf 1:12-16, 20; 2:1) Dzrungula ledzri Yesu a dzri zrumeliki ka 7 wa mabandla ya Ásia Menor, dzri wu kombisa ha hombe ntiyiso lowo. Ka dzrungula ledzro, a nyikele nkongomiso lowu kongomiki akuva a pfuna Vakriste va le dzaneni dzra ku sungula akuva va tiyiseka leswaku wugandzreli byavu a byi yamukeleka ka Yehovha, nakone leswi a swi byeliki mabandla lawo, swa tizra ni le ka mabandla hinkwawu ya Xikwembu Nkulukumba namunhla. Hi dondzra yini? Hosi yezru Yesu Kriste a swi tiva ha hombe leswi wuxaka byezru na Yehovha byi tsrhamisisiki xiswone. Hi le hansi ka nkongomiso lowu hi sizrelelaka wa Yesu, xileswo a xi kone lexi yentxekaka na a nga xi voni. Awa swi tiva leswi hi fanelaka ku swi yentxa akuva hi tama hi yamukeliwa ha Yehovha. He wini nkongomiso lowu a wu nyikeliki lowu hi fanelaka ku wu landzra namunhla?

6. a) Hi ku ya hi Apfuletelo 2:3, 4, a ku li xini xikazratu lexikulu lexi a bandla dzra le Efesa a dzri li na xone? b) Hi dondzra yini ka mhaka leyi?

⁶ Dondzra Apfuletelo 2:3, 4. A hi fanelanga hi lahla lizrandzru ledzri a hi li na dzrone a ku sunguleni ha Yehovha. A dzrungula dzra Yesu ledzri a dzri ya ka bandla dzra le Efesa, a dzri kombisa leswaku a va tama va tiyisela ni ku tama va tizrela Yehovha nambiloko va kumana ni swikazratu swinyingi. Nambitanu, a va lahle lizrandzru ledzri a va li na dzrone ku sunguleni. A va fanela ku dzri pfuxeta, handle ka leswo wugandzreli byavu a byi nga ti yamukeleka. Hi ndlela leyi fanaka, na hine namunhla hi fanela ku yentxa swin’wana ku tlula ku tiyisela. Hi fanela ku tiyisela hi xivangelo lexinene. Xikwembu Nkulukumba wezru a nga zron’weki hi leswaku i yini leswi hi swi yentxaka, kambe a tlhela a zron’weka hi leswaku ha yini hi swi yentxa. Yehovha a djula hi mu gandzrela hi ku susumeteliwa hi lizrandzru ni ku mu tlangela, xileswo i swa lisima kwake leswaku ha yini hi mu gandzrela.—Pr 16:2; Mr 12:29, 30.

7. a) Hi lani swi kombisiwiki ha kone ka Apfuletelo 3:1-3, he xini xikazratu lexi Yesu a xi voniki ka bandla dzra Sarda? b) Hi fanela ku yentxa yini?

⁷ Dondzra Apfuletelo 3:1-3. Hi fanela ku tsrhama na hi tibekiselile. Vamakwezru va bandla dzra le Sarda a va ni xikazratu lexi hambaniki. Nambi leswi a ku sunguleni a va li Vakriste lava hisekaka, swoswi a va nge he na nkhinkhi a ntizrweni wa Xikwembu Nkulukumba. Yesu a va byele leswaku a va fanela ku tlhela va “hiteka”. Xana mhaka leyi yi hi dondzrisa yini? Nakunene, Yehovha a nge wu  dzrivali ntizro wezru. (Hb 6:10) Kambe a hi fanelanga hi yanakanya leswaku a ha ha faneli ku tikazrata a ntizrweni wa Yehovha hi leswi hi mu tizreliki hi nkhinkhi malembe ntsrhaku. Ku nga ha va ni swiyimu leswi nga hi yentxaka hi nga koti ku yentxa swinyingi ku fana ni khale, kambe hi fanela ku tama hi khomeka hi ku ‘tizrela Hosi’ hi tlhela hi tsrhama na hi tibekiselile ku ya tlhasa wugamu.—1Ko 15:58; Mt 24:13; Mr 13:33.

8. I yini leswi hi swi dondzraka ka mazritu lawa Yesu a ma byeliki bandla dzra le Lawudikiya, hi lani swi kombisiwiki ha kone ka Apfuletelo 3:15-17?

⁸ Dondzra Apfuletelo 3:15-17. Hi fanela ku hiseka hi tlhela hi gandzrela Yehovha hi mbilu hinkwayu. A dzrungula dzra Yesu ledzri yaka ka bandla dzra le Lawudikiya, dzri kombisa xikazratu ximbeni lexi hambaniki. A wugandzreli byavu a byo ‘kufumela’ ntsena. Hi kola ka ku pfumala kwavu nkhinkhi, Yesu a hlaye leswaku a va li va ‘khombo’ nakone a va li ‘swisiwana’. A va fanela ku hisekela Yehovha ni wugandzreli byake. (Mpf 3:19) Hi dondzra yini? Loko nkhinkhi yezru yi pumbeka, hi fanela ku pfuxeta ndlela leyi hi tlangelaka ha yone swakuda swa moya leswi Yehovha a hi nyikaka swone. (Mpf 3:18) A hi djuli ku pfumelela leswaku ku hlongolisela wutomi bya ku yampswa a misaveni leyi swi hi hingeleta hi va hi nga byi hisekeli a wuxaka byezru na Yehovha.

9. Hi ku ya hi dzrungula dzra Yesu ledzri yaka ka mabandla ya Pergamu na Tiyatira, i yini leswi hi fanelaka ku swi tingawula?

⁹ Tingawula tindondzro ta madukwa. Yesu a khwavele van’wana a bandleni dzra le Pergamu hi leswi a va dondzrisa tindondzro tin’wana leti a ti byala ku yavana a xikazri ka vamakwezru. (Mpf 2:14-16) A kulungele va le Tiyatira hi leswi va nga titsrhindzreta kule ni “ku yeta ka Sathana”, kambe a va kutxe ku khoma swi tiya ntiyisweni. (Mpf 2:24-26) Vakriste lava a va nga tiyanga hi tlhelo dzra moya lava pfumeleliki tidondzro toleto ti va hambukisa a va fanela ku tisola. Hi dondzra yini? Hi fanela ku tingawula dondzro yin’wana ni yin’wana leyi kalaka yi nga fambisani ni mayanakanyela ya Yehovha. Madukwa ma tikomba na ma ni ‘xiyimu xa wukhongoti’ kambe ma ‘landzrula ntamu wa byone’. (2Tm 3:5) Swi ta hi nabyalela ku xiya ni ku bakanya tidondzro toleto loko hi li vadondzri lavanene va Zritu dzra Xikwembu Nkulukumba.—2Tm 3:14-17; Yd 3, 4.

10. He yini dondzro yimbeni leyi hi yi kumaka ka mazritu lawa Yesu a ma byeliki mabandla ya le Pergamu ni Tiyatira?

¹⁰ A hi fanelanga ku pfumelela kumbe ku va ni mahanyela ya ku kala ma nga basanga. A vamakwezru  va le Pergamu ni va le Tiyatira a va ha ni xikazratu ximbeni. Yesu a khwavele vambeni ka mabandla wolawo, hi kuva va nga tingawuli a mahanyela ya ku kala ma nga basanga. (Mpf 2:14, 20) Hi dondzra yini? A hi fanelanga hi yimela leswaku Yehovha a pfumelela mahanyela yezru ya ku biha hi leswi hi nga ni malembe manyingi na hi mu tizrela kumbe hi leswi hi nga ni wutiyanguleli bya kukazri. (1Sa 15:22; 1Pe 2:16) A yimela leswaku hi hanya hi milawu leyi tlakukiki ya mahanyela swi nge na mhaka leswaku misava yi tikhoma hi ndlela ya ku biha ku ya tlhasela kwini.—Ef 6:11-13.

11. Hi dondzre yini ku ta tlhasela lani? (Vona bokisi le dzri liki “ Leswi Hi Swi Dondzraka.”)

¹¹ Hi nga swi songa hi ndlela yini leswi hi swi dondzriki ku ta tlhasela lani? Hi fanela ku tiyiseka hi leswaku a wugandzreli byezru bya yamukeleka ka Yehovha. Loko ku li leswaku hi yentxa xa kukazri lexi nga yentxaka wugandzreli byezru byi nga yamukeleki, hi fanela ku yentxa xa kukazri hi ku kahlula akuva byi ta kota ku yamukeleka. (Mpf 2:5, 16; 3:3, 16) Yesu a tlhele a vulavula hi ntxhumu wumbeni ka madzrungula lawa a ma ya ka mabandla lawayani. He wini ntxhumu wa kone?

12. I yini leswi hi swi dondzraka ka leswi Yesu a swi byeliki mabandla ya Simirna na Filadelfiya? (Mpf 2:10)

¹² A hi voneni leswi hi nga swi dondzraka ka leswi Yesu a swi hlayiki ka mabandla ya Simirna na Filadelfiya. A byele Vakriste lavaya leswaku a va nga fanelanga va txhava tinxanisa leti a va ta kumana na tone hikusa loko va tiyisela a va ta kuma hakelo. (Dondzra Apfuletelo 2:10; 3:10) Hi dondzra yini? Hi ta kumana ni tinxanisa, xileswo hi fanela ku tibekisela. (Mt 24:9, 13; 2Ko 12:10) Ha yini xidzrimuxo lexi xi li xa lisima?

13-14. Xana leswi tsraliwiki ka ndzrima 12 ya buku dzra Apfuletelo swi ma khumba hi ndlela yini vhanu va Xikwembu Nkulukumba?

¹³ A buku dzra Apfuletelo dzri hi byela leswaku vhanu va Xikwembu Nkulukumba a va ta xanisiwa a masikwini yezru, ku nga ‘siku dzra Hosi’. A ndzrima 12 ya buku dzra Apfuletelo, yi hlaya leswaku loko Yesu a sungule ku fuma ku ve ni yimpi a tilweni. Mikayele, ku nga vito dzrin’wana ledzri Yesu a vitaniwaka ha dzrone a matilweni, yene ni tintsrumi take va lwe na Sathana kun’we ni mademona. (Mpf 12:7, 8) Valala lavo va Xikwembu Nkulukumba, va hluliwile va va va txukumeteliwa lani misaveni ku nga leswi vangaka ku xaniseka. (Mpf 12:9, 12) Xana leswo swi va khumbisa kuyini vhanu va Xikwembu Nkulukumba?

¹⁴ A buku dzra Apfuletelo dzri hi byela leswi Sathana a a ta swi yentxa. Leswi a nge he ke na ndlela ya ku tlhelela a tilweni, a yentxa hinkwaswu leswi a nga swi kotaka akuva a xanisa vahlawuliwa, ku nga vayimeli va Mfumu wa  Xikwembu Nkulukumba lava nga ni ntizro wa ku nyikela ‘vumboni bya Yesu Kriste’. (Mpf 12:17; 2Ko 5:20; Ef 6:19, 20) Xana wuprofeta lebyi byi hetiseke hi ndlela yini?

15. I vamani lava fanekiseliwaka hi timboni tibidzri leti ku khaneliwaka ha tone ka buku dzra Apfuletelo 11, nakone i yini leswi va humeleliki?

¹⁵ Sathana a tizrise valala va Xikwembu Nkulukumba va lani misaveni akuva a hlasela vamakwezru lava totiwiki lava a va zrangela ntizro wa ku zrezra. Vamakwezru lavo, va fanekiseliwa hi ‘timboni tibidzri’ leti dlayiwiki. * (Mpf 11:3, 7-11) Hi 1918, 8 ka vamakwezru lavo va hehliwile va va va tsremeliwa ku tsrhama djele malembe manyingi. Vhanu vanyingi a va yanakanya leswaku a ntizro wa vatotiwa a wu tlhase magamu.

16. He wini ntxhumu wa ku hlamalisa lowu humeleliki hi Marsu wa 1919, kambe i yini leswi Sathana a tamaka a swi yentxa?

¹⁶ A wuprofeta bya Apfuletelo 11, byi tlhela byi hlaya leswaku a ‘timboni tibidzri’ a ti ta tlhela ti hanya ntsrhaku ka nkamanyana. Wuprofeta lebyo byi hetiseke hi ndlela ya ku hlamalisa, na ku nga si khaluta ni lembe na vamakwezru va pfaleliwile. Hi Marsu wa 1919, vamakwezru lava a va pfaleliwile va humesiwi djele nakone a swihehlo swavu swi susiwile. Vone va tekele ku tlhelela ka ntizro wavu wa ku zrangela ntizro wa ku zrezriwa ka madzrungula lamanene. Kambe leswo a swi mu yimisanga Sathana kuva tama a hlasela vhanu va Xikwembu Nkulukumba. Ku sukela kolanu, e ya a yengesela ndlela leyi a va xanisaka ha yone. (Mpf 12:15) Xileswo, hinkwezru hi fanela ‘ku tiyisela ni ku dumba’ Xikwembu Nkulukumba.—Mpf 13:10.

17. Xana i mpfunu muni lowu malandzra ya Xikwembu Nkulukumba ma wu yamukelaka nambiloko Sathana a tama a ma hlasela?

¹⁷ A ndzrima 12 ya buku dzra Apfuletelo, yi kombisa leswaku vhanu va Xikwembu Nkulukumba a va ta kuma mpfunu lowu pfaka hi lomu a va nga ku yimelanga. A swi ta fana ni loko a ‘misava’ yi minta “nambu” wa tinxanisa. (Mpf 12:16) Ko va swoswo swi humeleliki. Minkama yin’wana, swiyenge swin’wana swa misava ya Sathana swa ku fana ni matribunali, swi txhuka swi yima ni vhanu va Xikwembu Nkulukumba. Minkama yinyingi malandzra ya Yehovha ma hlula matribunali ma va ma nyikiwa ntsrhunxeko wa kukazri. Xana ma wu tizrisa hi ndlela yini ntsrhunxeko lowo? Ma londzrovota  mukhandlu wun’wana ni wun’wana lowu ma pfulekelaka akuva ma hetisisa ntizro lowu Yehovha a ma nyikiki wone. (1Ko 16:9) I yini leswi patsrekaka ka ntizro lowo?

18. He wini ntizro wa lisima ngopfu lowu hi fanelaka ku wu yentxa a masikwini lawa ya wugamu?

¹⁸ Yesu a profete leswaku a ‘madzrungula lamanene ya Mfumu’ wa Xikwembu Nkulukumba a ma ta zrezriwa a misaveni hinkwayu na wugamu byi nga si na tlhasa. (Mt 24:14) Akuva leswo swi koteka, vhanu va Xikwembu Nkulukumba a va ta pfuniwa hi ntsrumi kumbe ntlawa wa tintsrumi. Tintsrumi leto, ti tamele ‘evhangeli ledzri nga helikiki, akuva [ti] dzri dzrungulela lava yakiki misaveni, hinkwawu matiko, ni tinxaka, ni tindzrimi, ni tintsrhundzru.’—Mpf 14:6.

19. He dzrini dzrungula dzrin’wana ledzri fanelaka ku zrezriwa hi vhanu lava zrandzraka Yehovha?

¹⁹ Vanhu va Xikwembu Nkulukumba a vo zrezra ntsena madzrungula lamanene ya Mfumu, va tlhela va seketela ntizro lowu yentxiwaka hi tintsrumi lowu kombisiwaka ka Apfuletelo ndzrima 8 ku ya ka ndzrima 10. A tintsrumi toleto, ti tivisa makhombo lawa ma taka wela lava yalaka Mfumu wa Xikwembu Nkulukumba. Xileswo, Timboni ta Yehovha ti zrezra dzrungula ledzri fanaka ni ‘xihangu ni ndzrilo’, ku nga wuyavanyisi bya Xikwembu Nkulukumba ka misava leyi ya ku biha ya Sathana. (Mpf 8:7, 13) A vhanu va fanela ku swi tiva leswaku a wugamu byi le kusuhi swinene nakone va fanela ku ntxintxa wutomi byavu loko va djula ku huluka ka siku dzra ku hlundzruka ka Yehovha. (Tsf 2:2, 3) Kambe a vhanu a swi va nyonxisi ku yingela dzrungula ledzro, xileswo swi djula xixixi akuva hi dzri zrezra. Hi nkama wa nhlomulo lowukulu, a dzrungula dzra wuyavanyisi dzri ta txhavisa nakone a dzri nge te gega.—Mpf 16:21.

20. Hi ta vona yini ka tinhlokomhaka tibidzri leti landzrelaka?

²⁰ Hi fanela ku yingela ‘zritu dzra vuprofeta’ lebyi, hikusa ha patsreka a ku hetisekeni ka wuprofeta bya buku dzra Apfuletelo. (Mpf 1:3) Kambe hi nga swi kotisa kuyini ku tama hi dumbeka nambi hi xanisiwa, ni ku tama hi zrezra hi xixixi? Hi nga pfuniwa hi mintxhumu yibidzri. Wa ku sungula, i ku tiva leswi buku dzra Apfuletelo dzri swi hlayaka mayelana ni valala va Xikwembu Nkulukumba. Nakone wa wubidzri, i ku tiva matovoko lawa hi taka ma kuma a nkameni lowu taka loko hi tama hi dumbeka. Leswo hi leswi hi taka swi kambisisa ka tinhlokomhaka tibidzri leti landzrelaka.