1-2. Tlhamuxela ndlela leyi minsinya ya milawu ya kukazri ya Bibele yi nga ha sungulaka ku va ni ntlhamuxelo lowukulu wuton’wini byezru loko swiyimu swi ntxintxa.

 HI SIKU dzra mutxhatu, vatekani lava a va swi yimeli ha khale, va yingiseta ha hombe wukaneli lebyi seketeliwiki Bibeleni lebyi vulavulaka hi wukati. Minsinya ya milawu leyi va yi yingelaka a hi yimpswha kwavu, kambe ku sukela siku ledzro ku ya mahlweni yi ta va ni ntlhamuxelo lowukulu wuton’wini byavu. Ha yini? Hikusa va fanela ku yi tizrisa swanga vatekani.

² Swa fana ni leswi humelelaka ka vatekani lava va nga Vakriste loko va kuma n’wana. Ku dzringana malembe manyingi a va yingela wukaneli byinyingi lebyi vulavulaka hi vana. Kambe ku sukela loko va kuma n’wana, hinkwaswu leswi va swi tivaka mayelana ni ku wundla vana swi sungula ku va ni ntlhamuxelo wumbeni kwavu. Phela wutiyanguleli lebyi a hi matlangwana! I ntiyiso, swiyimu leswi hi nga ha tlhangavetanaka na swone swi nga ha txintxa ndlela leyi hi yi vonaka ha yone minsinya ya milawu ya kukazri ya le Bibeleni. Lexi i xin’we xa swivangelo leswi yentxaka vagandzreli va Yehovha va dondzra matsralwa “masiku hinkwawu” ya wutomi byavu, hi lani tihosi ta Israyele a ti byeliwa ku yentxa ha kone.—Dt 17:19.

3. I yini leswi hi taka bula ha swone ka xidondzro lexi?

³ Vapswele, mi ni tovoko ledzrikulu swanga vakriste dzra ku dondzrisa vanenu mayelana na Yehovha. Handle ka ku dondzrisa vanenu mayelana na Xikwembu Nkulukumba, mi fanela ku tlhela mi va pfuna kuva va mu zrandzra swinene. I yini leswi u nga swi yentxaka akuva u pfuna vanaku kuva va zrandzra Yehovha? Ka xidondzro lexi, hi ta bula hi mune wa minsinya ya milawu ya Bibele leyi nga pfunaka vapswele. (2Tm 3:16) Hi ta tlhela hi vona ndlela leyi vapswele va kukazri lava nga vakriste  va pfunekiki ha yone hi ku tizrisa swidzringanyeto leswo swa le Bibeleni.

4. He wini wun’we wa minsinya ya milawu lowu nga pfunaka vapswele leswaku va pfuna vanavu ku zrandzra Yehovha? (Yakob 1:5)

⁴ Wa ku sungula: Djuletela nkongomiso wa Yehovha. Kombela Yehovha akuva a ku nyika wutlhazri lebyi u byi vilelaka leswaku u pfuna n’wanaku kuva a mu zrandzra. (Dondzra Yakob 1:5) Yehovha hi yene a fanelekaka ngopfu akuva a nyikela swilayu. Hi ni swivangelo swinyingi swa ku hlaya leswo. Kambe hi ta vona swibidzri swa swone. Xa ku sungula, hi leswaku Yehovha i mupswali xileswo a swi tiva ha hombe leswaku i yini ku va mupswali. (Ps 36:9) Nakone xa wubidzri, hi leswaku minkama hinkwayu swilayu swake swa pfuna.—Eza 48:17.

5. a) Xana nhlengeletanu ya Yehovha yi va pfunisa ku yini vapswele? b) U dondzre yini ka vhidiyu mayelana ni ndlela leyi makwezru Amorim ni nkatake va kulisiki ha yone vanavu?

⁵ Hi ku tizrisa Zritu dzrake ni nhlengeletanu yake, Yehovha a nyikela swakuda swinyingi swa moya leswi nga ku pfunaka ku dondzrisa vanaku ku zrandzra Yehovha. (Mt 24:45) Hi xikombiso, hi nga kuma swidzringanyeto leswi pfunaka ka swiyenge leswi liki “Leswi Nga Pfunaka Ndyangu”, ka marevhixta ya Xalamuka! ya malembe lama khalutiki lawa ni swoswi ma kumekaka ka pajina dzrezru dzra internet. Handle ka leswo, ka jw.org u nga kuma mavhidiyu manyingi ya minkombiso ni ku bulisana, lawa ma nga pfunaka vapswele ku tizrisa swidzringanyeto swa Yehovha nkama lowo va kulisaka vana. *—Pr 2:4-6.

6. Xana vapswele va kukazri va titwisa kuyini hi minkongomiso leyi va yi kumaka ka nhlengeletanu ya Yehovha?

⁶ Vapswele vanyingi va hlaye ndlela leyi va titwaka ha yone hi swipfunu leswi va swi yamukela ka nhlengeletanu ya Yehovha. Papayi lweyi a vitaniwaka Joe a li: “Ku wundla vana vazrazru a ntiyisweni, a hi matlangwana! Mine ni nkatanga hi khongota ka Yehovha minkama hinkwayu akuva a hi pfuna. Minkama yinyingi loko hi langusana ni xikazratu xa kukazri a ku humexiwa vhidiyu kumbe nhlokomhaka ya kukazri leswi fambisanaka ni xiyimu xezru, kutani leswo a swi hi pfuna ku langusana na xone.  Ku djuletela nkongomiso wa Yehovha swi hi pfuna ngopfu.” Joe ni nkatake va xiye leswaku malulamiselo lawa ya nhlengeletanu ma pfuna vanavu ku tsrhindzrekela kusuhi na Yehovha.

7. Ha yini swi li swa lisima kuva vapswele va tikazratela ku va xikombiso lexinene? (Ba-le-Roma 2:21)

⁷ Wa wubidzri: Vana xikombiso. Vanezru va hi xiya nakone minkama yinyingi va yetisela leswi va swi vonaka. I ntiyiso leswaku a ku na mupswali lweyi a hetisekiki. (Ro 3:23) Nambitanu vapswele lava tlhazrihiki va yentxa hinkwaswu leswi va nga swi kotaka kuva va va xikombiso lexinene ka vanavu. (Dondzra Ba-le-Roma 2:21.) Papayi wa kukazri a hlaya leswi hi vanake: “Va fana ni swipontxhi, va mpswompswa hinkwaswu.” A tlhela a ku: “Loko va vona leswaku leswi hi swi yentxaka a swi fambisani ni leswi hi va dondzrisaka swone, va ta hlaya!” Loko hi djula leswaku vanezru va zrandzra Yehovha, va fanela ku swi vona leswaku na hine ha mu zrandzra.

8-9. U dondzre yini ka leswi hlayiwiki ha Andrew na Emma?

⁸ Ku ni tindlela tinyingi ta kuva vapswele va dondzrisa vanavu ku zrandzra Yehovha. Xiya leswi makwezru lweyi a vitaniwaka Andrew, lweyi a nga ni 17 wa malembe a swi hlayiki, a te: “Minkama hinkwayu vapswele vanga a va ni byela hi lisima dzra xikhongoto. Siku ni siku, loko ni ya ku yetleleni papayi a a khongota na mine nambiloko kutani ni tihambele xikhongoto. Minkama hinkwayu a va hi dzrimuxa leswi: ‘Mi nga bula na Yehovha minkama hinkwayu.’ Ndlela leyi va khanyisiki ha yone lisima dzra xikhongoto, yi ni khumbe ngopfu lakakuva ni swoswi ni bula na Yene na ni ntsrhunxekile swanga Papayi wanga lwa nga ni lizrandzru.” Vapswele, ndlela leyi mi mu zrandzraka ha yone Yehovha yi nga khumba vanenu. Leswo a hi swa ku swi tekela hansi!

⁹ A hi vone xikombiso xin’wana xa Emma. Loko papayi wake a fambe a va siya, a siye mamana wavu na a ni swikweneti swinyingi. Emma a li: “Ku ve ni minkama yinyingi leyi mamana a a nga na mali, kambe a a hi byela leswaku Yehovha awa zron’weka a tlhela a hlayisa malandzra yake. A ni swi vona leswaku ndlela leyi a a hanya ha yone a yi swi beka livaleni leswaku a a swi kholwa leswo. Mamana a a hanya hi leswi a a swi dondzrisa.” Vapswele va nga dondzrisa vanavu hi xikombiso xavu nambi loko va tlhangana ni swikazratu.—Ga 6:9.

10. He yini mikhandlu leyi vapswele va va-Israyele a va li na yone akuva va bula ni vanavu? (Deuteronoma 6:6, 7)

¹⁰ Wa wuzrazru: Bula ni vanaku minkama hinkwayu. Yehovha a lelete va-Israyele leswaku va dondzrisa vanavu minkama hinkwayu. (Dondzra Deuteronoma 6:6, 7.) Vapswele volavo, siku ni siku a va ni mikhandlu yinyingi ya ku bula ni vanavu ni ku va pfuna ku zrandzra Yehovha. Hi xikombiso, djaha dzra mu-Israyele a dzri heta mawora manyingi ni papayi wa dzrone na va hamba mintizro ya le masin’wini, kasi makwavu wa xisati a a heta nkama wunyingi ni mamana wake na va zrunga ni ku yentxa mintizro yimbeni ya le kaya. Leswi vapswele a va tizra kun’we ni vanavu, a va ni mikhandlu ya ku bula hi timhaka tinyingi ta lisima. Hi xikombiso, a va ta bula hi matsrhamela ya Yehovha ya ku fana ni wunene kumbe ku bula hi ndlela leyi Yehovha a a wu pfuna ha yone ndangu wavu.

11. He wini mukhandlu lowu vapswali va nga na wone akuva va bula ni vanavu?

¹¹ A minkama yi txintxile. A mimbangwini yinyingi, swa kala kuva vana va heta minkama yinyingi ni vapswele. Minkama yinyingi vapswele va le mintizrweni kasi vana va le xikole. Ka swiyimu swa ku fana ni leswo, vapswele va fanela ku tikazratela ku kuma nkama wa ku bula ni vanavu. (Ef 5:15, 16; Flp 1:10) Yin’we ya tindlela leyi nga va nyikaka mukhandlu lowo i  wugandzreli bya ndangu. Mumpswha mun’wana lweyi a vitaniwaka Alexander a li: “Minkama hinkwayu papayi a hamba malulamiselo leswaku hi va ni wugandzreli bya ndangu, nakone a nga pfumeleli ntxhumu leswaku wu sivela kuva hi va na byone. Ntsrhaku ka ku dondzra ho tibulela.”

12. I yini leswi nhloko ya ndangu yi fanelaka ku swi tekela nhlokweni hi nkama wa wugandzreli bya ndangu?

¹² Loko u li nhloko ya ndangu, i yini leswi u nga swi yentxaka akuva vanaku va nyonxela wugandzreli bya ndangu? Swi nga va swinene ku dondzra navu buku ledzrimpshwa ledzri liki Hanya Hi Ku Nyonxa! Xitizro lexi xa lisima xi ta mi nyika mukhandlu wa ku va ni mabulu ya ku nyonxisa. Loko u djula kuva vanaku va ku byela leswi va titwisaka xiswone kumbe leswi swi va vilelisaka, u nga tizrisi nkama wa wugandzreli bya ndangu akuva u va laya kumbe ku va holovisa. Loko va txhuka va hlaya ntxhumu lowu kalaka wu nga fambisani ni matsralwa u nga va holovisi. A matsrhan’wini ya leswo, va tlangeli hi leswi va ku byeliki matitwela yavu nakone va kutxi kuva va ntsrhunxeka. Phela u to kota ku va pfuna loko u tiva ndlela leyi va titwaka ha yone.

13. He yini mikhandlu yin’wana leyi vapswele va nga ha yi londzrovotaka akuva va pfuna vanavu ku tsrhindzrekela ka Yehovha?

¹³ Vapswele, siku ni siku djuletelani mikhandlu ya ku pfuna vanenu ku tsrhindzrekela ka Yehovha. U nga yimeli ku landzra xiyimiso xa kukazri xa ku dondzra Bibele akuva u dondzrisa vanaku mayelanu na Xikwembu Nkulukumba wezru wa lizrandzru. Twana leswi mamana wa kukazri lweyi a vitaniwaka Lisa a swi hlayaka: “Hi tizrisa ntxhumu wun’wana ni wun’wana lowu hi wu vonaka ka ntumbuluku akuva hi dondzrisa vanezru mayelana na Yehovha. Hi xikombiso, loko mbyana yezru yi yentxa ntxhumu wa kukazri lowu va hlekisaka, hi tizrisa xikombiso lexo kuva hi komba vanezru leswaku Xikwembu Nkulukumba wezru a tsrhama na a nyonxile nakone a zrandzra wutomi ku fana na hine.”

14. Ha yini swi li swa lisima kuva vapswele va pfuna vanavu ku hlawula vanghanu hi wutlhazri? (Amaproverbia 13:20)

¹⁴ Wa wumune: Pfuna vanaku akuva va hlawula vanghanu lavanene. Zritu dzra Xikwembu Nkulukumba dzri swi beka livaleni leswaku vanghanu vezru va nga va ni nkutxetelo wa ku biha kumbe lowunene ka hine.  (Dondzra Amaproverbia 13:20.) Vapswele, xana ma va tiva vanghanu va vanenu? Xana mi sama mi hungata na vone? U nga yentxa yini akuva u pfuna vanaku kuva va va vanghanu va lava zrandzraka Yehovha? (1Ko 15:33) U nga zramba vamakwezru akuva mi hungata xikan’we, hi ndlela leyo u ta pfuna vanaku akuva va hlawula vanghanu lavanene.—Ps 119:63.

15. I yini leswi vapswele va nga swi yentxaka akuva va pfuna vanavu ku va ni vanghanu lavanene?

¹⁵ Vona xikombiso xa papayi wa kukazri lweyi a vitaniwaka Tony. A tlhamuxela leswi yene ni nkatake va swi yentxiki akuva va pfuna vanavu ku kuma vanghanu lavanene. A li: “Ku sukela khale, mine ni nkatanga hi zramba vamakwezru va tintanga ni tinxaka ta ku siyanasiyana akuva va ta kaya. Hi da navu hi tlhela hi va navu ka wugandzreli bya ndangu. Leyi i ndlela leyinene ya ku va tiva ha hombe lava zrandzraka Yehovha va tlhela va mu tizrela hi ku nyonxa. Hi ve ni tovoko dzra ku zramba valaviseli va miganga, vazrumiwa ni van’wana akuva va va na hine kaya kwezru. Mimfambu, nkhinkhi ni ku tikazrata kwavu swi va khumbe ngopfu vanezru swi tlhela swi va pfuna ku tsrhindzrekela ka Yehovha.” Vapswele, tiyimiselani ku pfuna vanenu akuva va va ni vanghanu lavanene.

16. U fanele ku dzrimuka yini loko n’wanaku a hlaya leswaku a nga djuli ku tizrela Yehovha?

¹⁶ Kambe swi li yini loko nambi ntsrhaku ka ku tikazrata ngopfu mun’we ka vanaku a hlaya leswaku a nga swi djuli ku tizrela Yehovha? U nga tibyeli leswaku a wu hetisisanga xiyenge xaku swanga hi mupswali. Yehovha a nyike hinkwezru ku patsra ni vanaku ntsrhunxeko wa ku tihlawulela. Hinkwezru hi fanela ku tihlawulela leswaku hi ta tizrela Yehovha kumbe im-him. Loko n’wanaku a hlawule ku tsrhika ku tizrela Yehovha, u nga heleliwi hi dumbo dzra leswaku siku dzrin’wana a ta tlhelela. Dzrimuka xifananiso xa n’wana lweyi a lahlekiki. (Lk 15:11-19, 22-24) N’wana lwiyani a yentxe mintxhumu yinyingi ya ku biha, kambe a tlhelelile. Van’wana va nga ha ku, “phela ko va xifananiso ntsena, a swi nge yentxekeli mhunu leswo”. Kambe nakunene swi nga ha yentxeka. Phela hi leswi yentxekeliki mumpswha lweyi a vitaniwaka Elie.

17. Xana xikombiso xa Elie xi ku tiyisa hi ndlela yini?

 ¹⁷ Elie a hlaya leswi mayelana ni vapswele vake: “Va yentxe hinkwaswu leswi va nga swi kota akuva ni zrandzra Yehovha ni zritu dzrake ku nga Bibele. Kambe loko ni ni kolomu ka 15 wa malembe, ni sungule ku tsrhika leswi a ni swi dondzra”. Nambileswi vapswele vake va tikazratiki akuva va mu dondzrisa ha Yehovha, Elie a a tizrela Yehovha kambe hi tlhelo dzrimbeni afa a yentxa swa ku biha. Hi ku famba ka nkama a suke kaya a va ya pela hi nhloko ka mahanyela ya ku biha. Nambitanu, minkama yimbeni a a txhuka a bula hi Bibele ni vanghanu vake. Elie a li: “Loko ni ya ni bula ni munghanu wanga ha Yehovha, a ni ya ni pimisa ha Yehovha. Hakatsrongokatsrongo, mintiyiso leyi vapswele vanga va yi byaliki a mbilwini yanga yi sungule ku kula.” Hi ku famba ka nkama Elie a tlhelele a ntiyisweni. * Yanakanya ndlela leyi vapswele vake va nyonxiki ha yone, hikuva va tikazratele ku mu dondzrisa ku zrandzra Yehovha ku sukela loko a ha li ntsrongo!—2Tm 3:14, 15.

18. U titwisa kuyini hi vapswele lava tikazrataka hi lani va kotaka ha kone akuva va dondzrisa vanavu ku zrandzra Yehovha?

¹⁸ Vapswele, mi ni tovoko dzra ku hlawuleka dzra ku hamba xiyenge a ku wundleni ka vhanu lava vumbaka lixaka ledzrimpswha dzra vagandzreli va Yehovha. (Ps 78:4-6) Ntizro lowu a hi wa ku wu tekela hansi, nakone hi mi kulungela ngopfu swinene hi ku tikazrata kwenu akuva mi pfuna vanenu. Loko mi tama mi yentxa leswi mi swi kotaka akuva mi pfuna vanenu ku zrandzra Yehovha ni kuva va va ni mahanyela lamanene, mi nga tiyiseka leswaku Papayi wezru wa le matilweni a ta nyonxa.—Ef 6:4.