1. I yini leswi Yehovha a djulaka leswaku malandzra yake ma swi yentxa? (Tlhela u vona xifaniso.)

 LOKO u djula ku txhaveleliwa ni ku kongomisiwa, xana i mani lweyi u tsrutsrumelaka kwake? Hinkwezru ha yi tiva nhlamulo. Hi nga tsrutsrumela ka Yehovha Xikwembu Nkulukumba hi ku tizrisa xikhongoto. Nakone hi swoleswo hi swi yentxaka. Yene a li “khongotani n’wi nga yimi” kumbe ku va hi phikelela a swikhongotweni. (1Te 5:17, TNM) Hi ni ntsrhunxeko wa ku khongota ka Yehovha hi kombela nkongomiso wake ka ntxhumu wun’wana ni wun’wana a wuton’wini byezru. (Pr 3:5, 6) Nakunene, Yehovha i Xikwembu Nkulukumba lweyi a hananaka. Xikombiso xa leswo i mukhandlu lowu a hi pfuleliki wa ku khongota kwake nkama wun’wana ni wun’wana lowu hi wu djulaka.

2. Hi ta vona yini ka xidondzro lexi?

² Kwezru a xikhongoto i xihiwa xa ku hlawuleka. Hi kola ka ku khomeka hi mintizro ya siku ni siku, swi nga ha txhuka swi hi kazratela ku tinyika nkama wa ku khongota. Nakone swi nga ha yentxeka u xiya leswaku u fanela ku yampswisa swikhongoto swaku. A xa ku nyonxisa hi leswaku Bibele dzra hi pfuna ka mhaka leyi. Ka xidondzro lexi, hi ta vona leswaku hi nga xi yetisela hi ndlela yini xikombiso xa Yesu xa ku tinyika nkama wa ku khongota. Hi ta tlhela hi vona ntlhanu wa tinhla ta lisima leti hi nga ti patsraka akuva hi yampswisa swikhongoto swezru.

3. I yini leswi Yesu a a swi tiva mayelanu ni swikhongoto?

³ Yesu a a swi tiva leswaku a swikhongoto i swa lisima swinene ka Yehovha. A nga si ta lani misaveni a vone ndlela leyi Papayi wake a a swi hlamula ha yone swikhongoto swa vavanuna ni vavasati va ku dumbeka. Hi xikombiso, Yesu a a li tlhelweni ka Yehovha loko Yehovha a hlamula swikhongoto leswi sukelaka  mbilwini swa malandzra yake ya ku fana na Ana, Davhida, Eliya ni van’wana. (1Sa 1:10, 11, 20; 1Th 19:4-6; Ps 32:5) Hi leswi yentxiki Yesu a kutxa vadondzrisiwa vake ku khongota nkama ni nkama na va tiyiseka leswaku Yehovha a ta va hlamula!—Mt 7:7-11.

4. He xini xikombiso lexi Yesu a hi siyeliki xone?

⁴ Ndlela leyi Yesu a a swi hamba ha yone swikhongoto ka Yehovha i xikombiso lexinene lexi a hi siyeliki xa ku xi yetisela. Ka wutizreli byake hinkwabyu, Yesu a a khongota nkama ni nkama. Nambi leswi a a tsrhama na a khomekile kun’we ni ku tsrandzreliwa hi xitsrhungu a a fanela ku tinyika nkama wa ku khongota. (Mr 6:31, 45, 46) A a pfuka ni mpundzru swinene akuva a ya khongota na a li wuswake. (Mr 1:35) Khambi dzrin’wana na a li kusuhi ni ku teka xiboho xa lisima swinene a khongote ku dzringana wusiku hinkwabyu. (Lk 6:12, 13) Ka wusiku lebyi a a ta fa ha byone, a khongote hi ku phindhaphindha hi ku tiva xiyimu xa ku kazrata lexi a a ta langutana na xone.—Mt 26:39, 42, 44.

5. Xana hi nga mu yetisela hi ndlela yini Yesu ka swikhongoto swezru?

⁵ Xikombiso xa Yesu xi hi dondzrisa leswaku nambi loko hi tsrhama hi khomekile hi fanela ku tinyika nkama wa ku khongota. Ku fana na Yesu, hi fanela ku tihambela xiyimiso xa ku khongota. Ku nga ha va nkama lowu hi pfukaka ha wone kumbe loko hi ya ku yetleleni. Loko hi yentxa leswo, hi komba Yehovha leswaku hi xi nyika lisima xihiwa xa ku khongota. Makwezru mun’wana lweyi a vitaniwaka Lynne a dzrimuka ndlela leyi a nyonxiki ha yone loko a dondzre hi nyiko ya xikhongoto. Loko a dzrungula a li: ‘Loko ni gungule leswaku ni nga vulavula na Yehovha nkama wun’wana ni wun’wana, ni sungule ku vona Yehovha swanga munghanu wanga wa lisima. Hi kola leswo, ni djule ku yampswisa ndlela leyi a ni khongota ha yone.’ Handle ka ku ganaganeka, vanyingi vezru hi titwa hi ndlela leyi fanaka. Swoswi a hi voneni ntlhanu a tinhla ta lisima leti hi nga ti patsraka ka swikhongoto swezru.

6. Hi ku ya hi Apfuletelo 4:10, 11, Yehovha a faneliwa hi yini?

⁶ Dzrumisa Yehovha. Mupostola Yohane a ve ni xivono xa ku hlamalisa lani a voniki 24 wa vakulu a matilweni na va gandzrela Yehovha. Vone a va dzrumisa Xikwembu Nkulukumba hi ku hlaya leswaku swa mu fanela ku yamukela ‘ku phatima, ni xitxhavu, ni ntamu’.  (Dondzra Apfuletelo 4:10, 11.) Tintsrumi ta ku dumbeka na tone ti ni swivangelo swinyingi swa ku dzrumisa ni ku txhava Yehovha. Tone ti xikan’we na Yehovha a matilweni nakone ti mu tiva ha hombe. Tintsrumi leti ti kota ku xiya matsrhamela ya Yehovha hi kola ka hinkwaswu leswi a swi yentxaka, xileswo ti susumeteleka ku mu dzrumisa.—Ps 38:4-7.

7. He swini swivangelo leswi hi nga na swone swa ku dzrumisa Yehovha?

⁷ Na hine hi djula ku dzrumisa Yehovha ka swikhongoto swezru hi ku mu byela ndlela leyi hi mu hloniphaka ha yone. Nkama lowu u dondzraka Bibele dzringisa ku xiya matsrhamela ya Yehovha lawa ma ku nyonxisaka. (Yb 37:23; Ro 11:33) Ntsrhaku ka leswo, byela Yehovha leswaku ha yini ma ku nyonxisa matsrhamela lawo. Ndlela yin’wana ya ku dzrumisa Yehovha i ku mu tlangela hi hinkwaswu leswi a hi yentxelaka swone ni leswi a swi yentxelaka vamakwezru. Minkama hinkwayu Yehovha awa hi hlayisa ni ku hi sizrelela.—1Sa 1:27; 2:1, 2.

8. He swini swivangelo leswi hi nga na swone swa kuva hi tlangela Yehovha? (1 Ba-le-Thesalonika 5:18)

⁸ Khensa Yehovha. Hi ni swivangelo swinyingi swa ku hi yentxa hi tlangela Yehovha ka swikhongoto swezru. (Dondzra 1 Ba-le-Thesalonika 5:18.) Hi nga tlangela Yehovha hi hinkwaswu leswinene leswi hi nga na swone hikusa nyiko yin’wana ni yin’wana leyi hetisekiki hi pfa kwake. (Yk 1:17) Hi xikombiso, hi nga mu tlangela hi kola ka mintxhumu hinkwayu ya ku xonga leyi a yi tumbuluxiki. Hi nga mu byela leswaku hi mu tlangela ngopfu hi kola ka wutomi, ndangu, vanghanu ni hi dumbo dzra ku xonga ledzri a hi nyikiki dzrone mayelanu ni wumundzruku. Nakone swi le livaleni leswaku hi djula ku tlangela Yehovha hi kola ka ndjombo ya ku hlawuleka leyi a hi nyikiki yone ya ku va vanghanu vake.

9. Ha yini hi nga fanelanga kuva hi dzrivala ku tlangela Yehovha?

⁹ Kumbexana swi nga ha djula hi tikazrata akuva hi yanakanyisisa hi swivangelo leswi hi nga na swone swa ku tlangela Yehovha. Hikusa vhanu vanyingi namunhla hi lava va nga khensiki, va heta nkama wunyingi na va tikazratela ku kuma leswi va swi djulaka a matsrhan’wini ya ku tlangela hi leswi va nga na swone. Loko hi kutxeteliwa hi mayanakanyela lawo, hi nga ha sungula kuva ka swikhongoto swezru ho tama ku kombela ntsem. Akuva leswo swi nga yentxiki hi fanela kuva minkama hinkwayu hi dzrimuka ku tlangela Yehovha hi hinkwaswu a hi yentxelaka swone.—Lk 6:45.

10. Xana ku khensa swi mu pfune hi ndlela yini makwezru wa xisati akuva a tiyisela? (Tlhela u vona xifaniso.)

¹⁰ Ku tiva ku khensa swi ta hi pfuna kuva hi langusana ni swikazratu. Vona xikombiso xa makwezru wa xisati lweyi a vitaniwaka Kyung-sook, ka Xihondzo xo Rindza xa 15 ka Janeru wa 2015. Vadotori va mu byele leswaku a a ni mavabyi ya kankru ka maphaphu lawa kutani a ku li khale na ma mu hlasela. Yene a hlaye leswi: “Ku tiva hi ta mavabyi lawo swi ni tsrhove mazrambu, ni titwe ingiki hi loko wutomi byanga byi helile nakone ni khomiwe hi ntxhavu lowukulu.” I yini lexi pfuniki makwezru lweyi  ku lavisana ni xiyimu lexi? A hlaya leswaku wusiku byin’wana ni byin’wana na a nga si ya ku yetleleni, a a hlawula ntlhanu wa mintxhumu leyi yentxekiki ka siku dzroledzro kutani a tlangela Yehovha hi kola ka mintxhumu leyo. Ntsrhaku ka leswo, a a titwa na a zrulile nakone a a titwa na a navela ku byela Yehovha ndlela leyi a a titwa ha yone. A xiye leswaku Yehovha awa ma seketela malandzra yake loko ma kumana ni swikazratu, nakone a xiye leswaku a matovoko lawa hi ma kumaka a wuton’wini byezru i manyingi ku tlula swikazratu leswi hi kumanaka na swone. Ku fana na makwezru Kyung-sook, na hine hi ni swivangelo swinyingi swa ku va hi tlangela Yehovha nambi loko swoswi hi kumana ni mindzringo. Ku khongota ka Yehovha hi va hi mu byela ndlela leyi hi tlangelaka ha yone swi nga hi pfuna ku tiyisela ni ku tama hi va ni ku zrula ka miyanakanyu.

11. Ha yini vadondzrisiwa va Yesu a va vilela xixixi ntsrhaku ka loko Yesu a tlhelele matilweni?

¹¹ Kombela Yehovha a ku nyika xixixi xa ku zrezra. Na ku sale kutsrongo akuva a tlhelela matilweni, Yesu a dzrimuxe vadondzrisiwa vake leswaku a va fanela ku nyikela wumboni mayelanu na yene a ‘Yerusalema, ni le tikweni hinkwadzru dzra Yudeya, ni le Samariya, ni ku ya tlhasa a wugan’wini bya misava’. (Min 1:8; Lk 24:46-48) Hi ku famba ka nkama, vazrangeli va Vayuda va khome mupostola Petro na Yohane va va yisa a Sanedri. Loko va tlhasile va va txhaviselile va tlhela va va tsrimbisa ku zrezra. (Min 4:18, 21) Xana Petro na Yohane va yangulise kuyini?

12. Hi ku ya hi Amintiṛo 4:29, 31 i yini leswi vadondzrisiwa va swi yentxiki?

¹² Loko Petro na Yohane va txhavisiwile hi vazrangeli va wukhongoti vone va hlamule va ku: ‘A ku tsremi n’wine, xana swi lulamile a mahlweni ka Xikwembu Nkulukumba ku na hi yingela n’wine ku tlula Xikwembu Nkulukumba xana? Hikuva hine a hi swi koti ku miyela ni leswi hi nga swi vona, ni leswi hi nga swi yingela.’ (Min 4:19, 20) Loko Petro na Yohane va ntsrhunxiwile, a vadondzrisiwa va hambe xikhongoto ka Yehovha va mu kombela leswaku a tama a va pfuna ku hetisisa ku zrandzra kwake. Va khongote va ku: ‘Nyika malandzra Yaku ku dondzrisa zritu dzraku hi ku tiya hinkwaku.’ Yehovha a xi yingelile xikhongoto lexo lexi sukelaka mbilwini.—Dondzra Amintiṛo 4:29, 31.

13. Xana hi dondzra yini ka xikombiso xa makwezru Jin-hyuk?

¹³ Loko wuhosi byi tsrimbisa ku tama hi zrezra hi nga yetisela vapostola. Ku ve swoleswo swi humeleliki makwezru Jin-hyuk. Yene a pfaleliwe djele hi kola ka ku yala ku ya yimpini. Loko a li djele a nyikiwe ntizro wa ku heleketela swib’otxhwa swin’wana swakuda kun’we ni mintxhumu yin’wana, kambe va mu byele leswaku a o fanela ku vulavula ni swib’otxhwa loko swi vilela ntxhumu wa kukazri ntsena. A a nga pfumeleliwi ku vulavula hi timhaka tin’wana ni tin’wana ku patsra ni Bibele. A khongote ka Yehovha a kombela leswaku a mu nyika xixixi ni wutlhazri bya ku kota ku zrezra ka mukhandlu wun’wana ni wun’wana lowu wu mu pfulekelaka. (Min 5:29) Jin-hyuk a li: “Yehovha a swi hlamulile swikhongoto swanga hi ku ni nyika xixixi ni wutlhazri. Ni sungule ku fambisa swidondzro na ni yime swipfalwini swa lomu swib’otxhwa kulozri a swi pfaleliwe kone nakone a no fanela ku heta ntlhanu wa maminutu na ni fambisa xidondzro lexo. Kutani a wusikwini a ni tsrala mapapela lawa a ni ta ya ma nyikela ka swib’otxhwa swin’wana ka siku ledzri landzrelaka.” Na hine hi nga tiyiseka leswaku Yehovha a ta hi pfuna akuva hi hetisisa wutizreli byezru. Ku fana na Jin-hyuk na hine hi fanela ku khongota hi kombela xixixi ni wutlhazri.

14. I yini lexi nga hi pfunaka ku langusana ni swikazratu? (Amapsalma 37:3, 5)

 ¹⁴ Kombela mpfunu wa Yehovha akuva u kota ku lavisana ni swikazratu. Vanyingi vezru hi langusana ni swiyimu swa ku kazrata ku nge ntsena hi tlhelo dzra nyama kambe ni hi tlhelo dzra matitwela. Van’wana va luzekeliwe hi vazrandzriwa vavu, van’wana va kumana ni swikazratu a ndangwini, ku kanetiwa kumbe swiyimu swin’wana leswi bindzraka. Leswi pfisaka hi leswaku a swiyimu swa ku fana ni ntungu kun’we ni tiyimpi swi yentxa leswaku xiyimu xi tama xi bindzra. Kutani ke, pfulela Yehovha mbilu yaku, mu byele hinkwaswu leswi u kumanaka na swone, yentxa ingiki u bulisana ni munghanu lweyi a nga kola a tlhelweni kwaku. U nga tiyiseka leswaku Yehovha a ta ku nyika leswi ‘djuliwaka hi mbilu yaku’.—Dondzra Amapsalma 37:3, 5.

15. Xana swikhongoto swi nga hi pfuna ku tiyiselela swikazratu hi ndlela yini? Nyikela xikombiso.

¹⁵ Lexi taka hi pfuna ku tama hi lehisa mbilu ‘a nhlomulweni’ hi ku va hi ‘tiyisela a ku khongoteni’. (Ro 12:12) Yehovha a swi tiva ha hombe swiyimu leswi malandzra yake ma kumanaka na swone. Yene ‘a yingela ku dzrila kwavu’. (Ps 145:18, 19) Kristie, lweyi a nga phayona dzra 29 wa malembe a swi xiyile leswaku mazritu lawa i ntiyiso. A sungule ku va ni swikazratu leswikulu swa lihanyu. Kutani leswo swi mu yentxe a sungula ku hlatiyela. Ntsrhaku a gungule leswaku mamana wake a ni mavabyi lawa ma kalaka ma nga dahekiki. Kristie a li: “A ni khongota swi phela ka Yehovha, ni mu kombela akuva siku dzrin’wana ni dzrin’wana ni mu kombela akuva ni lavisana ni swiyimu leswi, handle ka leswo a ni tsrhikanga ku tama ni hlalela mintlhanganu ni ku tama ni va ni dondzro ya ximhunu. Swikhongoto ku ve swone swi ni pfuniki ku tsremakanya ka swiyimu leswiyani swa ku kazrata. A ni tiyiseka leswaku minkama hinkwayu Yehovha a a na mine. Ntsena hi ku yanakanya hi leswo, a ni titwa ni zrulile. A na ha tama ni va na swone swikazratu swa lihanyu kambe ku twisisa leswaku Yehovha awa swi hlamula swikhongoto swanga swi ni pfune ku va ni ku zrula.” Minkama hinkwayu hi fanela ku dzrimuka leswaku ‘a Hosi  [Yehovha] ya swi kota ku huluxa valulami mindzringweni’.—2Pe 2:9, BX.

16. Ha yini hi vilela mpfunu wa Yehovha akuva hi kota ku hlula mindzringo?

¹⁶ Kombela Yehovha akuva a ku pfuna ku hlula mindzringo. Leswi hi kalaka hi nga hetisekanga, minkama hinkwayu hi fanela ku tikazratela ku fambela kuli ni mintxhumu leyi bihiki. Kambe Sathana a ta tama a yentxa hinkwaswu akuva a hi bindzrisela wutomi a mhakeni leyi. Ndlela yin’wana leyi a yi tizrisaka i ku hungata hi mintxhumu leyi bihiki. Ku hungata hi mintxhumu ya ku fana ni leyo swi nga ha txhimisa mimpimiso yezru kutani mimpimiso leyi kalaka yi nga basanga yi nga ha yi kokela ku yentxa xidoho lexikulu hi va hi nga ha nyonxeliwi ha Yehovha.—Mr 7:21-23; Yk 1:14, 15.

17. Ntsrhaku ka loko hi khongotile hi kombela mpfunu wa Yehovha, i yini leswi hi fanelaka ku swi yentxa? (Tlhela u vona xifaniso.)

¹⁷ Loko hi djula ku hlula ndzringo wa ku hlula ku yentxa leswi bihiki hi fanela ku kombela mpfunu wa Yehovha. Ka xikhongoto xa hosi Yesu a ma patsrile mazritu lawo: “U nga hi tsrhike hi nghena ndzringweni, kambe hi sizreleli ka lweyi wa ku biha.” (Mt 6:13) Yehovha a swi djula ngopfu ku hi pfuna kambe hine hi fanela ku mu kombela kuva hi yentxa leswo. Nakone hi fanela ku hanya hi ku pfumelelana ni swikhongoto swezru. Hi fanela ku yentxa hinkwaswu leswi hi nga swi kotaka akuva hi tingawula mayanakanyela ya misava leyi ya Sathana. (Ps 97:10) Loko hi dondzra Bibele hi va na hi tata mimpimiso yezru hi mintxhumu leyi basiki ni leyinene. Ku ya mintlhanganwini ni ku zrezreni swi ta hi pfuna ku sizrelela miyanakanyu yezru. Lanu ke, Yehovha a ta hetisisa xidumbiso xake xa kuva a nga pfumeleli leswaku hi weliwa hi ndzringo lowu hi nga tiki wu kota.—1Ko 10:12, 13.

18. I yini leswi hi fanelaka ku tama hi swi yentxa?

¹⁸ Ka masiku lawa ya wunghanu lawa xiyimu xi yaka xi bindzra, mun’wana ni mun’wana wezru a fanela ku tikazratela ku khongota akuva a tama a dumbeka ka Yehovha. Siku ni siku tinyike nkama wa ku khongota ka Yehovha. Yehovha a djula leswaku hi ‘txhulula timbilu tezru a mahlweni kwakwe’. (Ps 62:8) Nakone tlangela ni ku dzrumisa Yehovha hi hinkwaswu leswi a ku yentxelaka swone, mu kombele leswaku a ku nyika xixixi xa ku zrezra. Minkama hinkwayu khongota u mu kombela a ku pfuna akuva u lavisana ni swikazratu ni ku tiyiselela mindzringo leyi yi nga ha humelelaka. U nga pfumeleli mhunu kumbe ntxhumu ni wun’we wu ku sivela ku khongota ka Yehovha nkama ni nkama. Xana Yehovha a swi hlamulisa kuyini swikhongoto swezru? Xana Yehovha a swi hlamulisa kuyini swikhongoto swezru? Nhlamulo ya xivutiso lexi hi ta yi kuma ka xidondzro lexi landzrelaka.