1-2. He kwini ku ganaganeka loku van’wana va nga na kone?

 XANA u ke u ganaganeka leswaku Yehovha awa swi hlamula swikhongoto swaku? Loko u ke u titwa hi ndlela leyo a wu wuswaku. Vamakwezru vanyingi va hlaya leswaku va ke va va na kone ku ganaganeka koloko ngopfungopfu loko va kumane ni swikazratu. Loko hi kumana ni swikazratu swi nga ha hi kazratela ku xiya ndlela leyi Yehovha a hlamulaka ha yone swikhongoto swezru.

² Ka xidondzro lexi, hi ta vona leswaku ha yini hi nga dumbaka leswaku Yehovha awa swi hlamula swikhongoto swa malandzra yake. (1Yh 5:15) Nakone hi ta tlhela hi hlamula swivutiso leswi: Ha yini minkama yin’wana hi nga ha yanakanyaka leswaku Yehovha a nga swi hlamuli swikhongoto swezru? Nakone namunhla a swi hlamulisa kuyini swikhongoto swezru?

3. Ha yini Yehovha a djula leswaku hi khongota kwake?

³ A Bibele dzri hi tiyisekisa leswaku Yehovha awa hi zrandzra ni leswaku hi va lisima kwake. (Hg 2:7; 1Yh 4:10) Xileswo, a hi zramba kuva hi tsrhindzrekela kwake hi xikhongoto. (1Pe 5:6, 7) Yehovha a swi djula ngopfu ku hi pfuna ku va ni wuxaka bya le kusuhi na yene ni ku hi pfuna ku lavisana ni swikazratu leswi hi lavisanaka na swone a wuton’wini.

4. Hi swi tivisa kuyini leswaku Yehovha awa swi hlamula swikhongoto swa malandzra yake? (Tlhela u vona xifaniso.)

⁴ A Bibeleni hi kuma wudzrunguli byinyingi lebyi vulavulaka hi ndlela leyi Yehovha a swi hlamuliki ha yone swikhongoto swa malandzra yake. Xana ku ni xikombiso xa kukazri lexi xi ku buyelaka a miyanakanywini? Swi nga yentxeka u yanakanya hi Davhida. A ve ni valala vanyingi a ku hanyeni kwake. Nakone makhambi  manyingi a khongote ka Yehovha a kombela mpfunu. Khambi dzrin’wana a khongote ka Yehovha a ku: ‘Yehovha, yingela xikhongoto xanga, u zreyela ku kombela kwanga ndleve. A ku dumbekeni kwaku ndzri yingiseti, ni le ku lulameni kwaku.’ (Ps 143:1) Yehovha a hlamule swikhongoto swa Davhida ni ku mu huluxa ka swiyimu swa ku kazrata leswi a kumaniki na swone. (1Sa 19:10, 18-20; 2Sa 5:17-25) Hi leswo swi yentxiki Davhida a hlaya mazritu lawa: ‘Yehovha a le kusuhi ni hinkwavu lava mu vitanala.’ Na hine hi nga va ni ku tiyiseka loku fanaka.—Ps 145:18.

5. Xana Yehovha a a hlamula swikhongoto swa malandzra ya minkama leyi khalutiki hi lani a ma swi yimela ha kone? Nyikela xikombiso. (Tlhela u vona xifaniso.)

⁵ Swi nga yentxeka Yehovha a nga hlamuli swikhongoto swezru hi lani hine a hi swi yimeli ha kone. Hi leswi humeleliki mupostola Pawulo. A kombele Yehovha akuva a mu susa ‘mutwa a nyameni’. Swi ze swi ku makhambi mazrazru na Pawulo a khongota hi mhaka leyi. Xana Yehovha a swi hlamulile swikhongoto leswo? Ina. Kambe a nga swi hlamulanga hi ndlela leyi Pawulo a a yimela leswaku a ta swi hlamula ha yone. A matsrhan’wini ya ku va Yehovha a susa xikazratu xa Pawulo a mu nyike ntamu lowu a a wu vilela akuva a tama a mu tizrela hi ku dumbeka.—2Ko 12:7-10.

6. Ha yini minkama yin’wana swi nga ha yentxaka ingiki Yehovha a nga swi hlamuli swikhongoto swezru?

⁶ Minkama yin’wana Yehovha a nga ha hlamula swikhongoto swezru hi ndlela leyi a hi nga yi yimelanga. Kambe hi nga tiyiseka leswaku Yehovha a swi tiva ha hombe leswi nga swinene kwezru. A nga hi yentxela swa ku ‘tlula ni hinkwaswu leswi hi swi kombelaka ni leswi hi swi yanakanyaka’. (Ef 3:20) Xileswo, Yehovha a nga hlamula swikhongoto swezru hi nkama ni hi ndlela leyi a hi nga yi yanakanyi.

7. Ha yini minkama yin’wana swi nga ha djulaka hi txintxa leswi hi swi kombelaka ka swikhongoto? Nyikela xikombiso.

⁷ Minkama yin’wana swi nga ha djula hi txintxa swikhongoto swezru loko hi xiya ku zrandzra ka Yehovha ha hine. Vona leswi humeleliki makwezru Martin Poetzinger. Ntsrhakunyana ka loko a txhatile makwezru Martin a khomiwile a va a yisiwa ka mbangu lowu Vanazi a va va xanisa ka wone vhanu. A ku sunguleni a khongote ka Yehovha a kombela leswaku a mu humexa a mbangwini lowuyani akuva a kota ku hlayisa nsati ni ku tama a zrezra. Ntsrhakunyana ka mavhiki mabidzri a twisise leswaku loko a ku nga li kone ku zrandzra ka Yehovha. Kutani a khongote a ku: “Yehovha na ku kombela, ni kombe leswi u djulaka ni swi yentxa.” Hi loko a sungula ku pimisa hi vamakwezru van’wana lava na vone a va pfaleliwile a mbangwini lowo wa ku  xaniseliwa ka wone. Ntalu wavu a va kazrateka hi mhaka vasati ni vanavu. Ntsrhaku ka leswo, makwezru Martin a khongote a ku: “Yehovha, khanimambu ngopfu swinene hi xiyavelo xanga leximpshwa ni kombela u ni pfuna akuva ni tiyisa ni ku kutxa vamakwezru lava.” Makwezru Martin a hete 9 wa malembe na a tama a tiyisa vamakwezru lava!

8. I yini leswi hi fanelaka ku swi dzrimuka loko hi hamba swikhongoto?

⁸ Hi fanela ku dzrimuka leswaku Yehovha a ta hetisisa nkongometo wake hi nkama lowu a wu bekisiki. Nkongometo wake wu patsra ku helisa mintxhumu hinkwayu leyi yi hi vangelaka ku hlupheka ya ku fana ni timhangu ta ntumbuluku, mavabyi ni lifu. Yehovha a ta hetisisa nkongometo wake hi ku tizrisa Mfumu wake. (Dn 2:44; Mpf 21:3, 4) Na siku ledzri dzri nga si tlhasa, Yehovha a ha pfumelela leswaku Sathana a tama a fuma misava. b (Yh 12:31; Mpf 12:9) Loko Yehovha a o lulamisa swikazratu leswi vhanu va kumanaka na swone a swi ta yentxa ingiki Sathana a fuma hi ndlela leyinene. Kutani leswo swi hlaya leswaku hi fanela ku lehisa mbilu ku tlhasela loko Yehovha a hetisisa swin’we swa swidumbiso swakwe. Kambe leswo a swi hlayi swone leswaku Yehovha a nga hi pfuni. A hi voneni tin’we ta tindlela leti Yehovha a hi pfunaka ha tone namunhla.

9. Xana Yehovha a nga hi pfuna hi ndlela yini loko hi djula ku teka xiboho? Nyikela xikombiso.

⁹ Yehovha a hi nyika wutlhazri. Yehovha a hi dumbisa ku hi nyika wutlhazri akuva hi teka swiboho leswinene nakone hi byi vilela ngopfu wutlhazri byake loko hi djula ku teka swiboho swa lisima a wuton’wini byezru, hi xikombiso, loko hi djula ku teka xiboho xa leswaku hi ta txhata kumbe im-him. (Yk 1:5) Vona mfambu wa makwezru wa xisati lweyi a kalaka a nga txhatanga lweyi a vitaniwaka Maria. c Makwezru lweyi a tive makwezru wa kukazri wa xinuna na a tizra swanga phayona dzra nkama hinkwawu. A li: “Hi ndzruluke vanghanu, kutani hi ku famba ka nkama hi sungule ku zradzrana. A ni swi tiva leswaku a ni fanela ku teka xiboho, xileswo ni khongote makhambi manyingi ka Yehovha. A ni swi djula kuva Yehovha a ni kongomisa kambe a ni swi tiva leswaku Yehovha a nge ti ni tekela xiboho.” Maria a swi xiyile leswaku Yehovha a swi hlamulile swikhongoto swake swa ku kombela wutlhazri. Hi ndlela yini? A hambe wusetxhi ka mabuku yezru a va a kuma tinhlokomhaka leti kongomiki leti mu pfuniki kuva a susa ku ganaganeka loku a a li na kone. Nakone a yingiseti swilayu swa wutlhazri leswi a nyikiwiki hi mamana wake. Hinkwaswu leswo swi pfune Maria kuva a yanakanyisisa ha hombe hi ndlela leyi a a titwa ha yone hi makwezru lwiyani wa xinuna. Hi wughamu a kote ku teka xiboho lexinene.

10. Hi ku ya hi Ba-le-Filipi 4:13, i yini leswi Yehovha a swi yentxelaka malandzra yake? (Tlhela u vona xifaniso.)

 ¹⁰ Yehovha a hi nyika ntamu wa ku tiyisela. Hi lani a yentxiki ha kone ka mupostola Pawulo, Yehovha a ta hi nyika ntamu lowu hi wu vilelaka akuva hi tiyisela swikazratu leswi hi kumanaka na swone. (Dondzra Ba-le-Filipi 4:13.) Vona ndlela leyi Yehovha a pfuniki ha yone makwezru wa kukazri lweyi a vitaniwaka Benjamin akuva a kota ku langusana ni swiyimu swa ku kazrata. Bejamim a hete wumpshwa byake na a tsrhama ni va ndangu wake ka mbangu wa vahlapfa a África. Benjamin a li: “Minkama hinkwayu a ni khongota ka Yehovha ni kombela leswaku a ni nyika ntamu wa ku yentxa leswi nga swinene mahlweni kwake. Yehovha a swi hlamulile swikhongoto swanga hi ku va a ni yentxa ni va ni ku zrula, a ni nyika xixixi xa ku tama ni zrezra ni ku ni nyika mabuku lawa a ni ma vilela akuva ni tama ni tiyisa wumoya byanga. Ku dondzra mimfambu ya vamakwezru ni ku tiva leswaku Yehovha a va pfunile akuva va tiyisela swi tiyise ku tiyimelela kwanga ni ku tama ni dumbeka kwake.”

11-12. Xana Yehovha a nga tizrisa vamakwezru hi ndlela yini akuva a hlamula swikhongoto swezru? (Tlhela u vona xifaniso.)

¹¹ Yehovha a tizrisa vamakwezru akuva a hi pfuna. Ka wusiku lebyi a a ta fa hi byone, Yesu a khongote hi ku hiteka. Yesu a a nga djuli leswaku vhanu va pimisa leswaku a txhimise vito dzra Papayi wake. Xileswo, a kombele Yehovha akuva a nga pfumeleli leswaku leswo swi yentxeka. Kambe a matsrhan’wini ya kuva Yehovha a yentxa leswi Yesu a swi kombeliki, a zrumele ntsrumi akuva yi mu tiyisa. (Lk 22:42, 43) Na hine, Yehovha a nga hi pfuna hi ku yentxa leswaku makwezru wa kukazri a hi fonela kumbe a hi pfuxela akuva a hi tiyisa. Nakunene hinkwezru hi nga djuletela mikhandlu akuva hi hlaya ‘zritu ledzrinene’ kumbe ku yentxa ntxhumu lowu taka kutxa vamakwezru.—Pr 12:25.

¹² Vona mfambu wa makwezru lweyi a vitaniwaka Miriam. Mavhikinyana ntsrhaku ka loko nuna wake a file, makwezru Miriam a a li wuswake kaya, a a khunguvanyekile nakone a a ni gome. A a nga yimi ku dzrila nakone a a vilela mhunu akuva a bula na yene. Yene a li: “A ni nga koti ku fonela mhunu kutani ni khongote ka Yehovha. Na na ha khongota na ni dzrila ni twe telefone dzri txhaya, a ku li nkulu wa kukazri lweyi a a munghanu. Miriam a txhaveleleki ngopfu hi pfunu lowu a wu kumiki ka nkulu lweyi kun’we ni nsati wake. Makwezru Miriam a nga na ku ganaganeka ka leswaku i  Yehovha lweyi a yentxiki leswaku nkulu lwiyani a mu fonela.

13. Dzrungula mfambu lowu kombisaka leswaku Yehovha a nga tizrisa vhanu lava kalaka va nga mu gandzreli akuva a hlamula swikhongoto swezru.

¹³ Yehovha a nga tizrisa vhanu lava kalaka va nga mu gandzreli akuva va pfuna vhanu vake. (Pr 21:1) Ka swiyimu swin’wana, Yehovha a nga hlamula swikhongoto swezru hi ku yentxa leswaku vhanu lava kalaka va nga mu gandzreli va hi pfuna. Hi xikombiso, Yehovha a yentxe leswaku hosi Artaxerxe a pfumelela Nehemiya leswaku a tlhelela Yerusalema akuva a ya pfunisa ka ku pfuxeta a doropa. (Neh 2:3-6) Ni ko namunhla, Yehovha a nga yentxa leswaku vhanu lava kalaka va nga mu gandzreli va hi pfuna.

14. Xana xikombiso xa makwezru Soo Hing xi ku pfune hi ndlela yini? (Tlhela u vona xifaniso.)

¹⁴ Makwezru wa kukazri wa xisati lweyi a vitaniwaka Soo Hing, a vone ndlela leyi Yehovha a mu pfuniki ha yone hi ku tizrisa dotori wake. A n’wanake a ni mavabyi ya miyanakanyu. Ntsrhaku ka loko n’wanavu a humeleliwe hi mhangu ya kukazri, yene ni nuna wake va bohi ku tsrhika ntizro leswaku va hlayisa n’wanavu. Hi xivangelo lexo, va sungule ku va ni xikazratu xa timali. Makwezru Soo Hing a titwe na a nge he na ndlela nakone a nga ha swi tivi leswaku a ta yentxa yini. Kolanu a khongote ka Yehovha hi mbilu yake hinkwayu a kombela mpfunu. Dokodela wa n’wanavu a hlaye leswaku a a ta va pfuna. Hi ndlela leyo, va kume mpfunu wa wuhosi ni ku tlhela va kuma ni yindlu ya ku tlhela va tsrhama ka yone. Hi wugamu, makwezru Soo Hing a li: “Hi vone voko dzra Yehovha na dzri hi pfuna. Nakunene, Yehovha i ‘muyingeli wa swikhongoto’.”—Ps 65:2.

15. I yini leswi pfuniki makwezru wa kukazri wa xisati ku xiya ndlela leyi Yehovha a swi hlamulaka ha yone swikhongoto swake?

¹⁵ Hi ntolovelo swikhongoto swezru a swi hlamuliwi hi ndlela ya ku hlamalisa. Kambe tinhlamulo ta swikhongoto swezru ka Yehovha hi leti hi ti vilelaka akuva hi tama hi dumbeka kwake. Xileswo, mkama hinkwayu ntsrhama na wu lulameli ku vona ndlela leyi Yehovha a hlamulaka ha yone swikhongoto swaku. Makwezru wa kukazri wa xisati Yoko a a yanakanya leswaku Yehovha a nga swi hlamuli swikombelo swake. Xileswo a sungule ku tsrala mintxhumu hinkwayu leyi a yi kombeliki ka Yehovha. Ntsrhaku, a lavise leswi a swi tsraliki kutani a xiye leswaku swinyingi swa leswi a swi kombeliki ka swikhongoto, Yehovha a swi hlamulile nakone swin’wana swa swone a a patsre ni ku swi dzrivala. Xileswo, i swa lisima  kuva nkama ni nkama hi yimanyana hi yanakanyisisa hi ndlela leyi Yehovha a hlamulaka ha yone swikhongoto swezru.—Ps 66:19, 20.

16. He yini ndlela yin’wana leyi hi nga kombisaka ha yone leswaku hi ni lipfumelo? (Ba-Heberu 11:6)

¹⁶ Hi kombisa leswaku hi ni lipfumelo loko hi khongota ka Yehovha. Kambe hi tlhela hi swi kombisa loko hi yamukela ndlela leyi Yehovha a swi hlamulaka ha yone swikhongoto swezru swi nge na mhaka leswaku a swi hlamulisa kuyini. (Dondzra Ba-Heberu 11:6.) Vona xikombiso xa makwezru Mike ni nkatake, Chrissy. vamakwezru lava a va ni kungu dzra ku ya tizrela a Betele. Vone va li: “Hi ni malembe na hi tsrala ma petisawu ya ku ya tizra a Betele nakone makhambi manyingi a hi khongota ka Yehovha hi mhaka leyi. Kambe a hi vitaniwanga.” Makwezru Mike ni nkatake Chrissy a va tiyiseka leswaku Yehovha hi yene a a ku tiva lomu a va ta tizrisiwa kone ha hombe. Va tame va tikazrata hi ku tizra swanga maphayona ya nkama hinkwawu lomu ku nga ni xivileleko ni ku tama va pfunisa ka mintizro ya ku yaka. Swoswi va tizra swanga valaviseli lava fambafambaka. Mike a ya mahlweni a ku: “A hi minkama hinkwayu leyi Yehovha a hlamuliki swikhongoto hi ndlela leyi a a hi yi yimelile kambe minkama hinkwayu a swi hlamule hi ndlela leyi a a yi vona yi li yinene kwezru ku tlula leswi hine a hi swi yanakanya.”

17-18. Hi ku ya hi Amapsalma 86:6, 7 hi nga tiyiseka hi yini?

¹⁷ Dondzra Amapsalma 86:6, 7. Mupsalma Davhida a a tiyiseka leswaku Yehovha a a swi yingela ni ku tlhela a hlamula swikhongoto swake. Na wene u nga va ni ku tiyiseka loku fanaka. Mimfambu leyi hi yi voniki ka xidondzro lexi, yi hi tiyisekisa leswaku Yehovha a nga hi nyika wutlhazri ni ntamu lowu hi wu vilelaka akuva hi tiyisela. A nga tizrisa vamakwezru kumbe vhanu lava kalaka va nga mu gandzreli akuva a hi pfuna hi ndlela ya kukazri.

¹⁸ I ntiyiso leswaku a hi minkama hinkwayu lani Yehovha a hlamulaka swikhongoto swezru hi lani hi swi yimeliki ha kone kambe hi nga tiyiseka hi leswi: Minkama hinkwayu a ta swi hlamula swikhongoto swezru. A ta hi nyika hinkwaswu leswi hi swi vilelaka hi nkama lowu hi swi vilelaka ha wone. Xileswo, tama u kombisa lipfumelo hi ku khongota na u tiyiseka leswaku Yehovha a ta ku hlayisa swoswi nakone ka misava leyimpshwa a ta yanelisa ‘ku navela ka mintxhumu hinkwayu lemi hanyaka’.—Ps 145:16.