1. Xana Yehovha a hi pfumelela ku yentxa yini?

YEHOVHA a hi pfumelela ku tilangela ndlela leyi hi djulaka ku hanya ha yone. A hi dondzrisa ku yentxa swiboho leswinene, nakone a hi pfuna ku humelela loko hi yentxa swiboho leswi mu tsrhavisaka. (Ps 119:173) Loko hi tizrisa wutlhazri lebyi kumiwaka a Zritwini dzra Xikwembu Nkulukumba, hi ta yengetela wuswikoti byezru bya ku yentxa swiboho leswinene.​—Hb 5:14.

2. Hi xini xizralanganya lexi hi nga ha lwaka naxu a ntsrhaku ka ku yentxa xiboho xa kukazri?

² Kambe, nambi loko hi yentxa xiboho xa wutlhazri, swi nga ha hi bindzrela ku hetisa leswi hi swi sunguliki. Vona swikombiso swa kukazri: Makwezru lweyi a heke mumpswha a yentxa xiboho xa ku dondzra Bibele hinkwadzru. A yentxa tanu hi mavhiki ma nge mangani kambe a gama a yima hi xivangelo xa kukazri. Makwezru wa xisati a yentxa xiboho xa ku tizra swanga phayona dzra nkama hinkwawu kambe a tizra ku tibyela leswaku a wu si tlhasa nkama wa ku sungula ha wone. Huvo ya vakulu hi wumun’we yi yentxa xiboho xa ku yengetela ntizro wa ku hambela swizro swa bandla liyendzro dzra wubyisi kambe a ntsrhaku ka tihweti ta ku tala a yi si singula. Swiyimu leswi swa hambana, kambe swi fanana hi ntxhumu wun’we: Swiboho leswi swi yentxiwiki a swi gamelanga ku hetisisiwa. Vakriste va le Korinte a dzaneni dzra ku sungula va ve ni xizralanganya lexi fanaka. Xiya leswi hi nga swi dondzraka ka vone.

3. Xana va le Korinte va yentxe xiboho xini, kambe ku yentxeke yini?

³ Kusuhi na 55 N.Y., va le Korinte va yentxe xiboho xa lisima. Va yingele leswaku vamakwavu va le Yerusalema na Yudeya a va kumana ni swikazratu ni wusiwana nakone mabandla man’wana a ma  hlenga mali ya ku va pfuna. Hi wumbilu byavu ni moya wa ku hanana, va le Korinte va bohe ku pfunisa ntizrweni lowo, va va va vutisa mupostola Pawulo leswaku va nga pfunisa hi ndlela yini. A va tsralele papela a leleta bandla leswi dzri fanelaka ku swi yentxa, a tlhela a zruma Tito leswaku a ya va pfuna mahlengela ya kone. (1Ko 16:1; 2Ko 8:6) Kambe, ntsrhaku ka tihweti ti nge tingani, Pawulo a yingele leswaku va le Korinte a va nga yentxanga ntxhumu. Xileswo, xihanano xavu a xi nge na ku bekiseka hi nkama akuva xi yisiwa a Yerusalema xikan’we ni minhlengo ya mabandla man’wana.​—2Ko 9:4, 5.

4. Hi laha swi khanyisiwiki ha kone ka 2 Ba-le-Korinte 8:7, 10, 11, xana Pawulo a kutxe va le Korinte ku yentxa yini?

⁴ Va le Korinte a va yentxe xiboho lexinene, nakone Pawulo a va kulungelile hi lipfumelo dzravu ledzrikulu ni ku navela kwavu loku humaka mbilwini ka ku hanana xa kukazri. Kambe a tlhele a va kutxa ku hetisisa leswi a va swi sungulile. (Dondzra 2 Ba-le-Korinte 8:7, 10, 11.) Leswi swi va humeleliki swi hi dondzrisa leswaku nambi vakriste va ku dumbeka swi nga ha va bindzrela ku hetisisa xiboho lexinene.

5. Hi swini swivutiso leswi hi taka swi hlamula?

⁵ Ku fana ni va le Korinte, swi nga ha hi bindzrela ku hetisisa swiboho swezru. Ha yini? Hi mhaka ya ku pfumala ku hetiseka, hi nga ha va ni mihoni. Kumbe ku nga humelela mintxhumu leyi a yi nga yimeliwanga, yi hi sivela ku hetisisa leswi hi bohiki ku swi yentxa. (Ekl 9:11; Ro 7:18) Xana hi nga xi kambisisa hi ndlela yini xiboho xa kukazri hi va hi vona loko ku djuleka kuva hi xi txintxa? Nakone hi nga swi kotisa kuyini ku hetisisa leswi hi swi sungulaka?

6. Swi nga ha djula hi txintxa swiboho swezru loko swi te yini?

⁶ Ku ni swiboho swa kukazri swa lisima leswi hi ngeke na ku swi txintxa ni siku ni dzrin’we. Hi xikombiso, hi namazrela xiboho xezru xa ku tizrela Yehovha, nakone hi tiyimisele ku dumbeka ka vakatezru. (Mt 16:24; 19:6) Kambe, ku ni nkama lowu swi nga ha djulaka leswaku hi txintxa swiboho swezru. Hi loko swi te yini? Loko swiyimu swi txintxa. I yini leswi nga hi pfunaka ku yentxa swiboho leswinene?

7. Xana hi fanela ku kombela yini hi xikhongoto, nakone ha yini?

⁷ Khongota u kombela wutlhazri. Yehovha a huhutele Yakob ku tsrala a ku: ‘Loko a mun’we ku n’wine a pfumala vutlhazri, a a kombele ku Xikwembu Nkulukumba lwa hananaka hinkwavu ntsena.’ (Yk 1:5) Hi tindlela ta kukazri, hinkwezru ‘hi pfumala vutlhazri’. Xileswo, dumba Yehovha loko u yentxa xiboho xa kukazri ni loko u xi kambela akuva u vona leswaku xi djula ku txintxiwa kumbe im-him. Lanu ke, Yehovha a ta ku pfuna ku yentxa swiboho swa wutlhazri.

8. Hi kwini ku kambisisa loku hi fanelaka hi ku yentxa na hi nga si yentxa xiboho xa kukazri?

⁸ Kambisisa hi wuyenti. Kambisisa Zritu dzra Xikwembu Nkulukumba, dondzra mabuku ya nhlengeletanu ya Yehovha u va u bula ni vhanu lava nga ku tlhavukanyisaka. (Pr 20:18) Ku kambisisa koloko i ka lisima na u nga si yentxa xiboho xa ku txintxa ntizro, ku zruzra, kumbe ku hlawula muxaka wa dondzro lowu u nga wu landzrelelaka akuva u kuma ntizro wa ku tihanyisa ni ku ya mahlweni u tizrela Yehovha.

9. Hi ta pfuneka ha yini loko hi dumbeka, hi nga tihembeli?

⁹ Kambisisa swivangelo. Yehovha a zrandzra ku tiva swivangelo swa swiyentxo swezru. (Pr 16:2) A djula leswaku hi dumbeka a mintxhun’wini hinkwayu. Xileswo, loko hi yentxa swiboho, na hine hi fanela ku dumbeka, hi nga tihembeli kumbe ku hembela van’wana mayelanu ni swivangelo. Loko hi nga dumbeki hi ku helela, swi nga ha hi bindzrela ku namazrela xiboho xa kone. Hi xikombiso, djaha dzra kukazri dzri nga ha boha ku va phayona dzra nkama hinkwawu. Kambe, a ntsrhaku ka nkamanyana, a dluveka ku pfala mawora lama djulekaka, kutani a sungula ku  kala a nga ha nyonxi hi nsimu. A nga ha pimisa leswaku lexi mu yentxiki a teka wuphayona a ku li ku navela kwakwe ka ku nyonxisa Yehovha. Kambe, xana swi nga yentxeka ku li leswaku ngopfu-ngopfu a susumeteliwe hi ku djula ku nyonxisa vapswele kumbe mhunu wa kukazri lweyi a mu zrandzraka?

10. Ku djuleka yini akuva mhunu a tsrhika mikhuva ya ku biha?

¹⁰ Vona xiyimu xa mudondzri wa Bibele lweyi a yentxaka xiboho xa ku tsrhika ku dzraha. Ku sunguleni, leswo i yimpi ka yene. A tsrhika ku dzraha vhiki dzrin’we kumbe mabidzri, kambe a tlhela a sungulisa ku dzraha. Kambe, hi wugamu, a kota ku hlula mukhuva lowu! I yini lexi mu pfuniki? Hi leswi a zrandzraka Yehovha ni leswi a djulaka ku Mu nyonxisa.​—Kl 1:10; 3:23.

11. Ha yini u fanela ku va ni makungu ya ku kongoma?

¹¹ Kongometa. Loko u kongometa leswi u swi djulaka, swi nga ha ku nabyalela ku hetisisa leswi u swi sungulaka. Hi xikombiso, u nga ha boha ku dondzra Bibele kanyingi ku tlula khale. Kambe loko u nge na xiyimiso xa ku kongoma, swi nga yentxeka u ba hansi. * Kumbe vakulu va bandla va nga ha boha ku yengetela ntizro wa ku yentxa liyendzro dzra wubyisi, kambe a ntsrhaku ka nkamanyana, va dluveka ku hetisisa xiboho xavu. Akuva va kota ku humelela, a ku djuleka va tivutisa leswi: “Xana hi va hlawulile vamakwezru lava ngopfu-ngopfu va nga pfunekaka hi liyendzro dzra wubyisi? Xana hi wu kongometile nkama wa ku va yendzrela?”

12. I yini leswi hi nga ha swi yentxaka, nakone ha yini?

¹² Pfumela ntiyiso. A nga kone ka hine mhunu lwa nga ni nkama, mali, kumbe ntamu wa ku yentxa hinkwaswu leswi a swi navelaka. Xileswo, pfumela ntiyiso u tlhela u tinabyalisa. Loko swi djuleka, u nga txintxa xiboho xa kukazri lexi tlulaka kotela dzraku dzra ku xi hetisisa. (Ekl 3:6) Kambe, a hi nge u kambisise xiboho xaku, u gama u xi txintxa hi laha swi djulekaka ha kone. Kutani, swoswi u vona leswaku u ta swi kota ku hetisisa xiboho xaku leximpswha. Vona ntlhanu wa mintxhumu leyi nga ku pfunaka ku hetisa leswi u swi sungulaka.

13. Xana u nga wu kumisa kuyini ntamu lowu u wu vilelaka akuva u hetisisa xiboho xaku?

¹³ Khongota u kombela ntamu wa ku tizra. Xikwembu Nkulukumba a nga ku nyika ntamu wa ku hetisisa xiboho xaku. (Flp 2:13) Xileswo, kombela moya wa ku xwenga wa Yehovha akuva wu ku nyika ntamu lowu u wu vilelaka. Yana mahlweni u khongota nambi loko nhlamulo ya xikombelo xaku yi voneka na yi hlwela. Hi laha Yesu a hlayiki ha kone: ‘Kombelani, n’wi ta nyikiwa [moya wa ku xwenga].’—Lk 11:9, 13.

14. Xana nsinya wa nawu lowu hlayiwaka ka Amaproverbia 21:5 wu nga ku pfunisa kuyini ku hetisisa xiboho xaku?

¹⁴ Hlela makungu. (Dondzra Amaproverbia 21:5.) Akuva u hetisisa ntizro wini na wini lowu u wu sungulaka, ku djuleka u zranga hi ku hamba makungu. Kutani tizrela ku hetisisa makungu lawo. Hi ku fana, loko u yentxa xiboho xa kukazri, tsrala mintxhumu ya ku kongoma leyi u djulaka ku yi yentxa akuva u hetisisa xiboho xa kone. Ku yava mintizro ya yikulu hi swintizrwana swi nga ku pfuna ku hatla u vona leswaku wa humelela a makungwini yaku kumbe im-him. Pawulo a kutxe va le Korinte ku beka hi tlhelo leswi a va djula ku pfunisa ha swone ‘hi siku dzra ku sungula dzra vhiki’, a matsrhan’wini ya ku mu yimela ku li kone va hlengaka swipfunu swa kone. (1Ko 16:2) Ku yava mintizro leyikulu hi swintizrwana swi nga tlhela swi ku pfuna kuva u zrula miyanakanyu, u nga tsrhami hi ku hlatiyela.

15. A ntsrhaku ka ku hlela makungu, i yini swi nga yentxiwaka?

¹⁵ Makungu lama khanyaka lawa u yentxaka hi  ku ma tsrala ma nga ku pfuna ku hetisisa swiboho swaku. (1Ko 14:40) Hi xikombiso, tihuvo ta vakulu ti kongomisiwa ku zrwexa mun’we wa vakulu ntizro wa ku tsrala xiboho xin’wana ni xin’wana lexi huvo ya vakulu yi xi yentxaka, ku patsra ni lweyi a nga zrwexiwa ntizro wa ku yentxa leswi bohiwiki ni siku dzra kone. Vakulu lava landzraka nkongomiso lowu swi nga va nabyalela ku hetisisa swiboho swavu. (1Ko 9:26) Na wene u nga dzringisa ku yentxa hi ku fana hi mintizro ya ximhunu. Hi xikombiso, u nga lulamisela nxaxameto wa leswi u fanelaka ku swi yentxa siku ni siku u va u longoloxa mintizro ya kone, u sungula hi leya lisima ngopfu u gamisa hi leyi ngeke ya lisima ngopfu. Leswi swi nga ku pfuna ku hetisa leswi u swi sungulaka, swi tlhela swi ku pfuna ku heta mintxhumu ya ku tala hi nkama wutsrongo.

16. Hi wini ntxhumu wa lisima loko u djula ku hetisisa xiboho xaku, nakone Ba-le-Roma 12:11 yi swi seketelisa kuyini leswi?

¹⁶ Tihite. Swi djula ku tikazrata akuva u landzrelela makungu yaku ni ku hetisa leswi u swi sungulaka. (Dondzra Ba-le-Roma 12:11.) Pawulo a byele Timoteo leswaku a ‘tinyiketa’, kumbe a tihita, ni ku ‘tiya ku swoleswo’ leswaku a ta va mudondzrisi lwenene. Xilayu lexo xi tizra hi ku fana ni le ka makungu man’wana ya moya.​—1Tm 4:13, 16.

17. Xana hi nga yi tizrisisa kuyini Ba-le-Efesa 5:15, 16 loko hi hetisisa xiboho xa kukazri?

¹⁷ Tizrisa nkama waku hi wutlhazri. (Dondzra Ba-le-Efesa 5:15, 16.) Hlawula nkama wa ku hetisisa xiboho xaku u tlhela u wu namazrela. U nga tolovele ku yimela nkama lowunene wa ku yentxa ntxhumu wa kukazri, hikusa swi nga yentxeka wu nga ha kumeki. (Ekl 11:4) Tivonele leswaku u nga tsrhiki mintxhumu leyi ngeke ya lisima ngopfu yi ku dela nkama yi tlhela yi ku yivela ntamu lowu u wu vilelaka akuva u yentxa mintxhumu leya lisima ngopfu. (Flp 1:10) Loko swi koteka, bekisa nkama lowu u ngeke na swinyingi swa ku ku hingeleta. Byela vambeni leswaku a wu djuli ku hingeletiwa. Dzringisa ku tima fone ni ku vona e-mail kumbe maredi sosiyali hi nkama wun’wana. *

18-19. I yini xi nga ku pfunaka ku kala u nga tsrhiki xiboho lexinene loko u kumana ni swihinga?

¹⁸ Pimisa hi mihandzru ya kone. Mihandzru ya xiboho xaku yi fana ni lomu u yaka kone loko u yendzra. Loko hakunene u djula ku tlhasa lomu u yaka kone, u ta tama u famba nambi loko ndlela yi pfaliwile u va u sindzriseka ku teketa yin’wana. Hi laha ku fanaka, loko hi pimisa hi mihandzru ya swiboho swezru, hi nga ti kazrala hi ku nabyala loko hi kumana ni swihinga kumbe migoqo.​—Ga 6: 9.

¹⁹ Ku yentxa swiboho leswinene swa kazrata, nakone a ha ha hlayi ku swi hetisisa. Kambe hi ku pfuniwa hi Yehovha, u nga kuma wutlhazri ni ntamu lowu u wu vilelaka akuva u hetisisa leswi u swi sungulaka.