1-2. a) I yini leswi hi pfunaka ku tama hi tiyisela siku ni siku? Tlhamuxela. b) I yini leswi hi taka bula ha swone ka nhloko-mhaka leyi?

LOKO u sama u kumana ni ndzringo wa kukazri, swi nga yentxeka u txhuka u swi dzrimukela leswi u wu hlulisiki xiswone, u va u ku: “Na swi tiva leswaku anha ni nga swi kotanga hi ntamu wa ka kwanga.” Phela hi leswi ku tala kwezru hi titwisaka xiswone. Kumbexana u hlaye mazritu lawo a ntsrhaku ka ku yanakanyisisa hi ndlela leyi u kotiki ha yone ku tiyiselela mavabyi lamakulu kumbe lifu dzra mhunu lweyi u mu zrandzraka. Kutani loko u dzrimukela, u twisisa leswaku u kote ku tiyisela siku ni siku ntsena hi leswi moya wa ku xwenga wa Yehovha wu ku nyikiki ntamu lowu tlulaka lowu tolovelekiki.​—2Ko 4:7-9.

² Hi tlhelo dzrin’wana, hi dumba moya wa ku xwenga leswaku wu hi pfuna ku lwa ni nkutxetelo wa misava leyi ya ku somboloka. (1Yh 5:19) Handle ka leswo, hi lwa ni ‘mimoya lemimfani’. (Ef 6:12) Na hi li kazri hi yanakanya hi leswo hinkwaswu, a hi buleni hi tindlela tibidzri leti moya wa ku xwenga wu hi pfunaka ha tone. Hi ta gama hi bula hi leswi hi nga swi yentxaka akuva hi pfuniwa hi moya wa ku xwenga hi ku helela.

3. Hi yini yin’we ya tindlela leti Yehovha a hi pfunaka ha tone ku tiyisela hansi ka mindzringo?

³ Moya wa ku xwenga wa Yehovha wu hi pfuna hi ku hi nyika ntamu, akuva hi hetisisa wutiyanguleli byezru nambi loko hi kumana ni mindzringo. Mupostola Pawulo a te lexi mu pfuniki ku ya mahlweni a tizrela Yehovha hi leswi a dumbiki ntamu wa Kriste. (2Ko 12:9) Loko a li liyendzrweni dzrakwe dzra wubidzri dzra wuzrumiwa, Pawulo a tizre hi nkhinkhi a ku zrezreni, na kuve hi nkama wun’we a a hamba ntizro wa mavoko akuva a tihanyisa. A tsrhame a Korinte a kaya ka Akila na Prisila, lava a va li vahambi va matende. Leswi Pawulo a a li wa ntizro wun’we na vone, a tizre na vone hi nkamanyana.  (Min 18:1-4) Moya wa ku xwenga wu nyike Pawulo ntamu wa ku yentxa ntizro wa mavoko ni wa ku hetisisa wutizreli byakwe.

4. Hi ku ya hi 2 Ba-le-Korinte 12:7b-9, hi xini xikazratu lexi Pawulo a a langusana naxu?

⁴ Dondzra 2 Ba-le-Korinte 12:7b-9. Hi laha swi kombisiwiki ha kone ka tindzrimana leti, xana Pawulo a a djula ku tlhamuxela yini loko a ku a a ni “mutwa a nyameni”? Loko u ni mutwa a nyameni, wa kazrateka swinene. Xileswo, Pawulo a a djula ku tlhamuxela leswaku a a yingela ku kazrateka loku fanaka hi kola ka ndzringo lowu a a li na wone. A te ndzringo lowo a wu fana ni ‘ntsrumi ya Sathana’ leyi a yo tama yi mu “hodlota” kumbe ku mu ba. Swi nga ha yentxeka leswaku a ku nga li Sathana kumbe tintsrumi takwe lava hi ku kongoma a va dzringa Pawulo, swa ku fana ni ku mu beka mutwa nyameni. Kambe loko tintsrumi leto ta ku biha ti xiye “mutwa” wolowo, swi nga yentxeka ti dzringise ku yengesela ku kazrateka kwakwe, ku fana ni loko mhunu a yentxa leswaku u ya u yingela ku vavisa a nyameni. Xana Pawulo a yentxe yini?

5. Xana Yehovha a swi yangule hi ndlela yini swikhongoto swa Pawulo?

⁵ A ku sunguleni, Pawulo a djule ku suseliwa “mutwa” wolowo. A li: ‘Ha wone ndzra khongoti Hosi [Yehovha] kuzrazru, akuva wu suka ku mine.’ Kambe, nambi leswi a hambiki swikhongoto swinyingi, mutwa wu tame wu va nyameni yakwe. Xana leswo swi tlhamuxela leswaku Yehoha a nga swi yangulanga swikhongoto swa Pawulo? A swi hi ndlela leyo. A swi yangulile. Yehovha a nga mu suselanga xikazratu xakwe, kambe a nyike Pawulo ntamu wa ku xi tiyiselela. Yehovha a te: ‘A ntamu wanga wu hetiseka a gomeni.’ (2Ko 12:8, 9) Nakone hi ku pfuniwa hi Yehovha, Pawulo a kote ku tsrhama na a nyonxile a tlhela a va ni ku zrula ka le ndzreni!​—Flp 4:4-7.

6. a) Xana Yehovha a nga ha swi yangula hi ndlela yini swikhongoto swezru? b) Ka swidumbiso leswi kumekaka ka tindzrimana leti kombisiwiki, hi xini lexi ku nyikaka ntamu?

⁶ Ku fana na Pawulo, xana u sama u kombela Yehovha leswaku a ku ntsrhunxa ka ndzringo wa kukazri? Nakone loko ku li leswaku u khongotile hi mbilu hinkwayu, nambitanu xikazratu xaku xi simama xi va kone kumbe xi ya xi kula—xana u pimisa leswaku kumbexana Yehovha a nga ha nyonxi ha wene? Loko swi li tanu, dzrimuka leswi yentxekeliki Pawulo. Ku fana ni leswi Yehovha a yanguliki swikhongoto swakwe, handle ka ku ganaganeka a ta yangula ni swa ka kwaku. Swi nga ha yentxeka a nga ku suseli xikazratu xaku, kambe hi ku tizrisa moya wakwe wa ku xwenga, a ta ku nyika ntamu lowu u wu vilelaka akuva u tiyiselela ndzringo. (Ps 61:3, 4) U nga ha “wisiwa hansi”, kambe Yehovha a nga ti ku fulazrela.​—2Ko 4:8, 9; Flp 4:13.

7-8. a) Xana moya wa ku xwenga wu fana ni moya lowu hungaka hi ndlela yini? b) Xana Petro a tlhamuxele ku tizra ka moya wa ku xwenga hi ndlela yini?

⁷ Hi yini ndlela yin’wana leyi moya wa ku xwenga wu hi pfunaka ha yone? Ku fana ni moya lowu hungaka wu ya lomu hi djulaka kone ka lwandle ledzri lebyaka, moya wa ku xwenga wa hi fambisa, wu hi pfuna ku khaluta swizralanganya leswi hi tlhanganaka naswu hi za hi ya tlhasa a hlalukwini dzra ku dumbeka dzra misava leyimpswha ya Xikwembu Nkulukumba.

⁸ Swanga mutsrhevi, mupostola Petro a a tolovele ku wela. Xileswo swa nyonxisa ku xiya leswaku a fanise ku tizra ka moya wa ku xwenga hi xiga lexi xi vonekaka na xi fambelana ni ku wela. A tsrale leswi: ‘A vuprofeta a bya vanga byi tisiwa ha ku zrandzra ka mhunu, kambe a vhanu va Xikwembu Nkulukumba ve ku kanela na va susumetiwa hi Moya lowa ku xwenga.’ Zritu dzra xigriki ledzri ndzruluteliwiki dzri ku “susumetiwa” hi ku kongoma dzri tlhamuxela “ku hungiwa”.​—2Pe 1:21.

9. Hi xini xifaniso lexi Petro a xi hambiki hi zritu ledzri liki vaprofeta ve “susumetiwa”?

⁹ Hi xini xifaniso lexi Petro a xi hambiki hi zritu ledzri liki vaprofeta ve “susumetiwa”? Muxaka lowu fanaka wa zritu dzra dzrin’we dzra xigriki wu tizrisiwe hi Luka, mutsrali wa buku dzra Amintiṛo, ku tlhamuxela leswaku ngalawa yavu  ye “susumetiwa” hi mheho. (Min 27:15) Xileswo, loko Petro a tsrale leswaku vatsrali va Bibele ve “susumetiwa”, a tizrise “xifaniso xa ku xonga xa ku tluta”, hi laha xidondzri xin’we xa Bibele xi hlayaka ha kone. Hi ntiyiso wa kone, Petro a te ku fana ni leswi ngalawa yi susumetiwaka hi moya akuva yi heta mpfhuka lowu yi wu fambaka, xiswoswo vaprofeta ni vatsrali va Bibele va susumetiwe hi moya wa ku xwenga leswaku va hetisisa ntizro wavu. Xidondzri lexi xi tlhele xi ku: “Hi ndlela ya ku fanekisela, vaprofeta va gwimbe matsranga yavu.” Yehovha a yentxe xiyenge xakwe. A va nyike “mheho”, kumbe moya wa ku xwenga. Vatsrali va Bibele na vone va yentxe xiyenge xavu. Va tizre hi ku twanana ni nkongomiso wa moya wolowo.

10-11. Hi yini mintxhumu yibidzri leyi hi fanelaka ku yi yentxa akuva hi pfuniwa hi moya wa ku xwenga? Hamba xifaniso.

¹⁰ Swi le livaleni leswaku namunhla Yehovha a nga ha tizrisi moya wa ku xwenga akuva a yentxa vhanu va tsrala mabuku ya Bibele. Nambitanu, moya wa ku xwenga wa ha tizra a henhla ka vhanu va Xikwembu Nkulukumba. Yehovha a ha yentxa xiyenge xakwe. Xana hi nga pfunekisa kuyini hi moya wa ku xwenga wa Xikwembu Nkulukumba? Hi fanela ku tiyiseka leswaku hi ya mahlweni hi yentxa xiyenge xezru. Xana hi swi yentxisa kuyini leswo?

¹¹ Yanakanya hi xifaniso lexi. Akuva mutluti a pfuniwa hi moya lowu susumetaka byatsrhu, ku djuleka a yentxa mintxhumu yibidzri. Ku sungula, ku djuleka a beka byatsrhu a ndleleni leyi moya wu hungaka ha yone. Loko swi nge tanu, byatsrhu dzrakwe dzri nga ti ya a mahlweni loko mutluti o tama a tsrhama a hlalukwini kule ni lani moya wu hungaka kone. Xa wubidzri, ku djuleka a gwimba matsranga swi phela. Phela, nambi loko moya wu ba, lexi taka pfuna byatsrhu dzrakwe ku ya mahlweni hi loko matsranga ma khoma moya ntsena. Hi laha ku fanaka, hi ta tiyisela a ntizrweni wa Yehovha ntsena loko hi pfuniwa hi moya wa ku xwenga. Akuva hi pfuniwa hi moya wolowo, ku djuleka hi yentxa mintxhumu yibidzri. Ku sungula, ku djuleka hi tibeka hi ku helela a ndleleni ya moya wa Xikwembu Nkulukumba hi ku hlengela a mintizrweni leyi hi bekaka a hansi ka nkutxetelo wa moya wakwe. Xa wubidzri, ku djuleka hi gwimba matsranga swi phela, hi ku kumeka hi ku helela  a mintizrweni leyi hi laha hi nga swikotaka ha kone. (Ps 119:32) Loko ho yentxa mintxhumu leyi, moya wa ku xwenga wu ta hi susumeta hi ya phambeni, hi lwa ni ntamu wa nkaneto ni mindzringo, nakone wu ta hi pfuna ku tiyisela hi ku dumbeka a ndleleni leyi yisaka a misaveni leyimpswha ya Xikwembu Nkulukumba.

12. I yini leswi hi taka swi vona swoswi?

¹² Ku ta tlhasa swoswi, hi bule hi tindlela tibidzri leti moya wa ku xwenga wu hi pfunaka ha tone. Moya wa ku xwenga wu hi nyika ntamu wu tlhela wu hi pfuna ku tsrhama na hi dumbekile loko hi tlhangana ni mindzringo. Nangweso, moya wa ku xwenga wa hi susumeta nakone wu hi pfuna ku tsrhama a ndleleni leyi yisaka a wuton’wini lebyi nga helikiki. Swoswi hi ta vona mune wa mintxhumu leyi hi fanelaka ku yi yentxa akuva hi pfuniwa hi ku helela hi moya wa ku xwenga.

13. Hi ku ya hi 2 Timoteo 3:16, 17, xana Matsralwa ma nga hi pfuna ha yini, kambe ku djuleka hi yentxa yini?

¹³ Ku sungula, dondzra Zritu dzra Xikwembu Nkulukumba. (Dondzra 2 Timoteo 3:16, 17.) Xikwembu Nkulukumba a tizrise moya wakwe ‘ku huhutela’ miyanakanyu yakwe a tinhlokweni ta vatsrali va Bibele. Loko hi dondzra Bibele hi va hi yanakanyisisa hi leswi hi swi dondzraka, swileleto swa Xikwembu Nkulukumba swi nhingena a tinhlokweni ni timbilwini tezru. Miyanakanyu leyi huhuteliwiki yi hi susumetela ku twananisa wutomi byezru ni ku zrandzra ka Xikwembu Nkulukumba. (Hb 4:12) Kambe akuva hi pfuniwa hi moya wa ku xwenga hi ku helela, ku djuleka hi tinyika nkama wa ku dondzra Bibele minkama hinkwayu hi va hi yanakanya hi wuyenti hi leswi hi swi dondzraka. Lanu ke Zritu dzra Xikwembu Nkulukumba dzri ta khumba mazritu yezru hinkwawu ni swiyentxo swezru.

14. a) Ha yini hi ku ‘moya wa hunga’ a mintlhanganwini yezru ya wukriste? b) Xana hi nga fanisa kuyini ni maboti lama ‘susumetiwaka hi moya’ loko hi li mintlhanganwini?

¹⁴ Xa wubidzri, gandzrela Xikwembu Nkulukumba xikan’we ni vambeni. (Ps 22:22) Hi ndlela ya kukazri, mintlhanganu yezru ya wukriste i minkama leyi “moya wu hungaka” ha yone. Moya wa Yehovha wu kone mintlhanganwini. (Mpf 2:29) Ha yini hi hlaya tanu? Hikusa loko hi tlhanganela ku gandzrela xikan’we ni vakriste-kulozri, hi hamba xikhongoto hi kombela moya wa ku xwenga, hi yimbelela tinsimu ta Mfumu leti seketeliwiki a Zritwini dzra Xikwembu Nkulukumba, hi tlhela hi yingiseta ndondzro leyi seketeliwiki a Bibeleni leyi nyikeliwaka hi vamakwezru lava hlawuliwiki hi moya wa ku xwenga. Nakone hi nkama wun’we moya wa ku xwenga wu pfuna vamakwezru va xisati ku lulamisela ni ku nyikela swiyenge swavu. Nambitanu, akuva hi pfuniwa hi moya wa ku xwenga hi ku helela, ku djuleka hi buya na hi tilulamisele ku yangula a mintlhanganwini. Hi ndlela leyo, loko hi li mintlhanganwini, hi ta fana ni maboti lawa ma “gwimbiki matsranga” akuva ma susumetiwa hi moya a lwandle.

15. Xana moya wa ku xwenga wu hi pfunisa kuyini a ntizrweni wa ku zrezra?

¹⁵ Xa wuzrazru, hlengela a ntizrweni wa ku zrezra. Loko hi tizrisa Bibele a ntizrweni wa ku zrezra ni ku dondzrisa, hi pfumelela moya wa ku xwenga ku hi pfuna a wutizrelini byezru. (Ro 15:18, 19) Kambe, akuva u pfuniwa hi moya wa Xikwembu Nkulukumba hi ku helela, ku djuleka u hlengela nkama ni nkama a ntizrweni wa ku zrezra u tlhela u tizrisa Bibele loko swi koteka. Yin’we ya tindlela ya ku yentxa leswaku ntizro waku wa nsimu wu phela i ku tizrisa swikombiso swa mabulu leswi nga ka Xibukwana Xa Ntlhanganu Wa Wutomi Ni Wutizreli.

16. Hi yini ndlela ya ku kongoma ya ku kuma moya wa ku xwenga?

¹⁶ Xa wumune, khongota ka Yehovha. (Mt 7:7-11; Lk 11:13) Ndlela ya ku kongoma ya ku kuma moya wa ku xwenga i ku kombela Yehovha hi xikhongoto leswaku a hi nyika wone. A xi kone lexi nga sivelaka swikhongoto swezru ku tlhasa ka Yehovha kumbe lexi nga pfalelaka nyiko leyinene ya Xikwembu Nkulukumba leswaku yi nga hi tlhaseli​—nambi makhumbi ya madjele nambi Sathana hi  byakwe. (Yk 1:17) Hi nga khongotisa kuyini akuva hi pfuniwa hi moya wa ku xwenga hi ku helela? Akuva hi kuma nhlamulo, a hi buleni hi mhaka ya xikhongoto hi wuyenti hi ku kambisisa xifaniso lexi kumekaka a bukwini dzra Evhangeli dzra Luka. *

17. Xana hi nga dondzra yini ka xifaniso xa Yesu lexi tsraliwiki ka Luka 11:5-9, 13?

¹⁷ Dondzra Luka 11:5-9, 13. Xifaniso xa Yesu xi komba ndlela leyi hi fanelaka ku khongota ha yone hi kombela moya wa ku xwenga. Ka xifaniso lexo, wanuna lweyi a kume leswi a a swi djula ‘hi nkonta ya ku sindzrisa kwakwe’. A a nga txhavi ku kombela xipfunu ka nakulobye nambi leswi a a li makazri ka wusiku. Xana Yesu a xi tizrise hi ndlela yini xifaniso lexi ka xikhongoto? A te: ‘Kombelani, n’wi ta nyikiwa; djulani, n’wi ta swi kuma; gongondzrani, n’wi ta pfuleliwa.’ Xileswo, xana hi nga dondzra yini ka xifaniso lexi? Hi nga dondzra leswaku akuva hi pfuniwa hi moya wa ku xwenga, hi fanela ku phikelela ku khongoteni hi wu kombela.

18. Hi ku ya hi xifaniso xa Yesu, ha yini hi dumba leswaku Yehovha a ta hi nyika moya wakwe wa ku xwenga?

¹⁸ Xifaniso xa Yesu xi tlhela xi hi pfuna ku vona leswaku ha yini Yehovha a ta hi nyika moya wa ku xwenga. Wanuna lwa hlayiwaka ka xifaniso xa kone a a djula ku kombisa malwandla. A a titwa na a sindzriseka ku fihluta muyeni wakwe lwa tlhasiki ni wusiku, kambe a a nge na xa ku mu nyika. Yesu a te muyakelani a ze a hlamula hi mhaka ya ku phikelela kwakwe ku kombeleni ka makati. Xana Yesu a a djula ku dondzrisa yini? Loko mhunu wa ku pfumala ku hetiseka a pfumela ku pfuna muyakelani wakwe lwa phikelelaka, ngopfu-ngopfu Tatana wezru wa le tilweni lwa nga ni wumbilu a ta va pfunisa xitanu lava phikelelaka ku mu kombeleni ka moya wa ku xwenga! Xileswo, hi nga khongota hi ku dumba leswaku Yehovha a ta yangula xikombelo xezru xa xihatla xa ku pfuniwa hi moya wa ku xwenga.​—Ps 10:17; 66:19.

19. Ha yini hi dumba leswaku hi ta hlula?

¹⁹ Hi nga tiyiseka leswaku nambi leswi Sathana a lwaka hi ntamu hinkwawu leswaku a hi wisa hansi, hi ta hlula. Ha yini? Hikusa moya wa ku xwenga wu hi pfuna hi tindlela tibidzri. Ya ku sungula, wu hi nyika ntamu lowu hi wu vilelaka akuva hi hlula mindzringo. Ya wubidzri, i ntamu lowu fanaka ni moya lowu susumetaka boti, wu hi pfuna ku ya mahlweni hi tizrela Yehovha na hi lavisela ku hanya a misaveni leyimpswha ya Xikwembu Nkulukumba. A hi tiyimiseleni ku pfuniwa hi moya wa ku xwenga hi ku helela!