LEMBE ni lembe, tihamba tinyingi ta lisima ta tlhelela a bandleni dzra wukriste. Yanakanya ku nyonxa loku nga kone a tilweni loko yin’we ya tone yi tlhelela! (Lk 15:7, 10) Loko wa ha ku tlhelela a bandleni, tiyiseka leswaku Yesu, tintsrumi kun’we na Yehovha va nyonxe ngopfu swinene hi ku ku vona u tlhelela a ntiyisweni. Kambe a nkama lowu u yakaka wuxaka byaku na Yehovha, u ta kumana ni swikazratu. He swini swin’we swa kone? Hi swini leswi taka ku pfuna ku va u langutana na swone?

Ntsrhaku ka loko va tlhelela a bandleni, vanyingi va ha tama va lwisana ni matitwela lama hoxekiki. Swi nga yentxeka u titwa ku fana na hosi Davhida. Nambi ntsrhaku ka loko a dzrivaleliwile, a hlaye leswi: ‘A wusomboloki byanga byi ndzri khomile.’ (Ps 40:12; 65:3) Loko va tlhelela ka Yehovha, vambeni va ha tama va lwisana ni ku titwa va nga pfuni ntxhumu kumbe tingana ku dzringana malembe manyingi. Isabelle, a tlhelele a bandleni ntsrhaku ka 20 wa malembe na a susiwile. * A te: “A swi ni kazratela ku pfumela leswaku Yehovha a a ta ni dzrivalela.” Loko u hela ntamu, a wuxaka byaku na Yehovha byi nga ha tlhela byi hola. (Pr 24:10) U nga pfumeleli kuva leswo swi yentxeka.

Van’wana va pimisa leswaku a va nge swi koti ku yentxa hinkwaswu leswi vilelekaka akuva va pfuxeta wunghanu byavu na Yehovha. Ntsrhaku ka loko a tlhelele a bandleni, Antoine a te: “A swi yentxa ingiki a ni dzrivalile ndlela leyi mukriste a fanelaka ku hanya ha yone.” Hi mhaka ya matitwela ya ku fana ni lawo, vambeni a va tinyiketeli hi ku helela ka mintizro ya moya.

Akuva u swi twisisa, yanakanya hi xidzedze lexi honeteliki yindlu ya kukazri. Loko a n’winyi wa yindlu a vona xiyimu lexiyani, a hela ntamu ntsena hi ku pimisa hi hinkwaswu leswi fanelekaka akuva yi tlhela yi yakiwa. Ku yentxeka leswi fanaka loko u yentxe xidoho xa kukazri, u va u honetela wuxaka byaku na Yehovha. U nga ha kazrateka hi ku yanakanya hi hinkwaswu leswi vilelekaka akuva u pfuxeta  wumoya byaku. Kambe a wu nge swi koti ku byatsrha leswo wuswaku.

Yehovha a hi zramba, a ku: ‘Tanani ke, hi kanelisana timhaka.’ (Eza 1:18) U tikazrate ngopfu akuva u “kanelisana timhaka” na Yehovha nakone awa ku zrandzra hi leswi u yentxiki leswo. Yanakanya hi leswi: Yehovha a nga tizrisa xikombiso xaku akuva a hlamula swihehlo swa Sathana!—Pr 27:11.

Akuva u tlhelela a ntiyisweni, u tsrhindzrekele kusuhi na Yehovha. Nakone a dumbisa leswaku a ta tsrhindzrekela kusuhi na wene. (Yk 4:8) Kambe u nga nyonxisiwi ntsena hi kuva van’wana va tiva swaku u tlhelele a bandleni. U fanela ku tiyisa lizrandzru ledzri u nga na dzrone hi Papayi waku ni munghanu waku, Yehovha. Xana u nga swi yentxisa kuyini leswo?

Dzringisa ku tibekela makungu lawa u taka kota ku ma tlhaselela. Dzrimuka leswaku leswi tiyisaka lipfumelo dzraku, a swi txintxi. Leswi liki, wa ha ti dzrimuka tindondzro ta masungulo ta Bibele mayelanu na Yehovha ni dumbo ledzri a hi nyikaka dzrone hi wumundzruku. Kambe u fanela ku pfuxeta wuxaka byaku na Yehovha. Nakone leswo swi patsra ku zrezra madzrungula lamanene nkama ni nkama, ku ya a mintlhanganwini ni ku heta nkama ni vamakwezru. Vona man’we ya makungu lawa u nga tibekelaka wone.

Bulisana na Yehovha minkama hinkwayu. Papayi waku wa le matilweni awa swi tiva leswaku ku titwa nandzru swi nga yentxa leswaku swi ku kazratela ku khongota. (Ro 8:26) Kambe tama u khongota. Byela Yehovha leswaku u swi djula ngopfu ku va munghanu wake. (Ro 12:12) Loko a dzrimukela, Andrej a li: “A ni titwa nandzru ku tlula mpimu ni tlhela ni dana. Kambe loko ni ya ni khongota, a ni vona leswaku a matitwela wolawo a ma yampswa. Kambe loko ni ya ni khongota, a swi ya swi ni yampswela. A ni twa ku zrula.” Loko u nga swi tivi swa ku swi hlaya ka xikhongoto xaku, dondzra Amapsalma ndzrima 51 ni 65, lani ku kombisiwaka swikhongoto swa Davhida loko a tisola.

Dondzra Bibele nkama ni nkama. Leswo swi ta tiyisa lipfumelo dzraku ni ku tiyisa lizrandzru dzraku ha Yehovha. (Ps 19:7-11) Felipe a hlaya leswi: “Ku va ni nga na xiyimiso xa ku dondzra Bibele siku ni siku hi swone swi tsranisiki lipfumelo dzranga swi tlhela swi ni yentxa ni khunguvanyisa Yehovha. A ni nga swi djuli ku tlhela ni phindha xihoxo xo xa xin’we. Xileswo, ni sungule ku va ni xidondzro xa ximunhu nakone leswo swi ni sizrelelile.” Na wene u nga yentxa leswi fanaka. Loko u nga swi tivi leswaku u nga dondzra ha yini, kombela munghanu lweyi a wupfiki akuva a ku pfuna.

Tiyisa wuxaka byaku ni vamakwezru. Van’wana lava tlhelelaka a bandleni va txhava leswaku vamakwezru va nga va bekela xiviti. Larissa a li: “A ni ni tingana swinene. A ni titwa ingiki ni kanganyise bandla. Nakone ni titwe hi ndlela leyo ku dzringana nkama wunyingi.” Tiyiseka leswaku vakulu ni vamakwezru vambeni lava wupfiki va swi navela ku ku pfuna akuva u pfuxeta wunghanu byaku na Yehovha. (Vona bokisi ledzri liki “ Leswi Vakulu Va Nga Swi Yentxaka”.) Va nyonxe ngopfu hi leswi u tlheleliki a bandleni, nakone va djula kuva u nyonxa!—Pr 17:17.

Xana u nga tsrhindzrekelisa kusuhi ni bandla? Titlhanganise kun’we ni vamakwezru hi ku va minkama hinkwayu u va kone a mintlhanganwini ne nsin’wini. Xana leswo swi nga ku pfunisa kuyini? Felix a li: “Vamakwezru a bandleni a va swi lavisele ngopfu ku va ni tlhelela. Ni titwe na ni zrandzriwa. Va ni pfune ku va ni tlhela ni titwa na ni li xizro xa bandla, ni titwa na ni dzrivaleliwile, ni ku ya mahlweni ni tizrela Yehovha.”—Vona bokisi ledzri liki “ Xana U Fanela Ku Yentxa Yini?”

Nkama lowu u tikazratelaka ku pfuxeta wuxaka byaku na Yehovha, Sathana a ta tama a ku buyisela “swidzedze” kumbe swikazratu akuva a tsranisa wuxaka lebyo. (Lk 4:13) Xileswo, tsrhama na u tibekiselile akuva u tiyisa wuxaka byaku na Yehovha swoswi.

Yehovha a ti dumbisa leswi tihamba take: ‘Ndzri ta djula leya ku lahleka, ndzri buyisa leya ku hlangoliwa, ndzri tsrimbelela leya mbanga, ndzri tiyisa leya ku vabya.’ (Ezk 34:16) Yehovha a pfune malandzra manyingi yake akuva ma tlhelela kwake. U nga tiyiseka leswaku Yehovha a djula ku ku pfuna akuva u tama u pfuxeta ni ku tiyisa wuxaka lebyi u nga na byone na yene.