1. Xana i yini lexi yentxaka vhanu vanyingi va kazrateka?

NAMUNHLA ku ni wukhongoti byinyingi lebyi tinhlayaka vakriste byi tlhela byi hlaya leswaku byi gandzrela Xikwembu Nkulukumba hi ndlela leyinene. Hi leswi yentxaka vhanu vanyingi va kazrateka! Va ti vutisa leswi: “Xana ko va ni wukhongoti byin’we bya ntiyiso ntsena, kumbe wukhongoti hinkwabyu byi nyonxisa Xikwembu Nkulukumba?” Hi nga ku yini hi hine? Xana ha tiyiseka hi ku helela leswaku hi dondzrisa leswi nga ntiyiso? Xana ha tiyiseka leswaku Timboni ta Yehovha namunhla hi tone ti gandzrelaka Xikwembu Nkulukumba hi ndlela leyi yene a djulaka ha yone? A hi voni mintxhumu yi nga li yingani leyi taka tiyisa ku kholwa kwezru.

2. Ka 1 Ba-le-Thesalonika 1:5, Pawulo a tlhamuxele leswaku a a tiyiseka leswaku a a kume ntiyiso. Ha yini a hlaye leswo?

² Mupostola Pawulo a a tiyiseka hi ku helela leswaku a a kume ntiyiso. (Dondzra 1 Ba-le-Thesalonika 1:5.) Ku tiyiseka koloko a ku nga yi hi matitwitela yake. Pawulo a a dondzra ha hombe Zritu dzra Xikwembu Nkulukumba. A a kholwa leswaku a matsralwa hinkwawu ma huhuteliwe hi Xikwembu Nkulukumba. (2Tm 3:16) Xana i yini leswi Pawulo a swi dondzriki? A matsralwini, Pawulo a kume wumboni lebyi nga livaleni bya leswaku Yesu a a li mesiya. Hi tlhelo dzrimbeni vazrangeli va wukhongoti va Vayuda a va byi yala wumboni byolebyo. A va li vakanganyisi, hikusa a va hlaya leswaku va yimela Xikwembu Nkulukumba kasi hi tlhelo dzrimbeni a a va yentxa leswi yene a a swi nyenya. (Ti 1:16) Kambe Pawulo a a nga fani ni vazrangeli volavo. A a nga langi swiyenge leswi a a ta swi landzra ka Xikwembu Nkulumba kambe a a tiyimisele ku dondzrisa ni ku tizrisa swiyenge hinkwaswu swa Zritu bya Xikwembu Nkulukumba.—Min 20:27.

3. Xana hi fanela ku va ni nhlamulo ya swivutiso hinkwaswu akuva hi tiyiseka leswaku hi kume ntiyiso? (Vona bokisi ledzri liki “ Mintizro Ni Mimpimiso Ya Yehovha I Yikulu Swinene Lakakuva A Yi Nge Hlayiwi”.)

 ³ Vhanu vambeni va yanakanya leswaku wugandzreli bya ntiyiso byi fanela ku hlamula swivutiso hinkwaswu ku patsra ni leswi Bibele dzri nga swi hlamuliki. Xana leswo swa koteka? Vona xikombiso xa Pawulo. A kutxe Vakriste akuva va tiyiseka, va ‘dzringa hinkwaswu’. Kambe a pfumelile leswaku ku ni mintxhumu yinyingi leyi a a nga yi twisise ha hombe. (1Te 5:21) A tsrale leswi: ‘Hi tiva ha tlhelo dzrin’we . . . hikusa swoswi hi vona hi xivonivoni hi liphume.’ (1Ko 13:9, 12) Pawulo a a nga twisisi hinkwaswu. Swi hi ndlela leyi fanaka na hine. Kambe Pawulo a a twisisa mintiyiso ya ku sungula mayelanu na Yehovha. Leswi a a swi tiva a swi yanelile akuva a tiyiseka leswaku a a kume ntiyiso!

4. Xana hi nga ku tiyisa hi ndlela yini ku tiyiseka kwezru ka leswaku hi kume ntiyiso? Xana i yini leswi hi taka swi vona mayelanu ni vakriste va ntiyiso?

⁴ Hi fanela ku tiyisa ku tiyiseka kwezru ka leswaku hi kume ntiyiso. Yin’we ya tindlela ta ku yentxa leswo i ku va hi fananisa leswi Yesu a dondzrisiki swone mayelanu ni wugandzreli bya ntiyiso ni leswi Timboni ta Yehovha ti swi yentxaka namunhla. Ka xidondzro lexi hi ta vona leswaku vakriste va ntiyiso 1) a va gandzreli swithombe, 2) va hlonipha vito dzra Yehovha, 3) va zrandzra ntiyiso, nakone 4) va zrandzrana swinene.

5. Xana Yesu a hi dondzrise yini mayelanu ni ndlela leyi hi fanelaka ku gandzrela Xikwembu Nkulumba ha yone, nakone hi nga mu yetisela hi ndlela yini?

⁵ Ku sukela khale swinene, Yesu awa mu zrandzra Yehovha, hi leswi yentxiki leswaku a gandzrela ntsena Yehovha na a li matilweni ni loko a li lani misaveni. (Lk 4:8) Yesu a dondzrise vadondzrisiwa vake akuva va yentxa  leswi fanaka. Yesu kun’we ni vadondzrisiwa vake va ku dumbeka a va nga tizrise swithombe a wugandzrelini byavu. Leswi Yehovha a nga moya, xithombe xin’wana ni xin’wana lexi mhunu a nga xi yentxaka a xi nge fani ni kutsrongo na Yehovha. (Eza 46:5) Xana ku hlayiwa yini hi ku hamba swifaniso swa vhanu lava vitaniwaka vaxwengi ni ku va vhanu va khongota kwavu? Ka milawu ya 10, a wa wubidzri a wu ku: ‘U nga vi tiyentxela xithombe lexa ku vatliwa, nambi xa ku va xithombe xini ni xini xa mintxhumu lemi nga henhla a tilweni, nambi xa ku va xa mintxhumu lemi nga hansi misaveni . . . u nga vi xi khinsamela.’ (Eks 20:4, 5) Ka lava va djulaka ku nyonxisa Xikwembu Nkulukumba a mazritu lawa me baa!

6. Xana he yini ndlela ya wugandzreli leyi Timboni ta Yehovha ti yi landzraka namunhla?

⁶ Nambi vativi va swa matimu va pfumelile leswaku a vakriste va ku sungula a va gandzrela Xikwembu Nkulukumba ntsena. Hi xikombiso, buku dzra kukazri ledzri khanelaka hi matimu dzri hlaya leswaku a vakriste va ku sungula a va swi nyenya ntsena ku pimisa hi ku va ni swithombe ka mimbangu leyi a va gandzrela ka yone. Namunhla, Timboni ta Yehovha ti landzra ndlela leyi vakriste va ku sungula va hi siyeliki yone. A hi khongoti ka swithombe swa vhanu lava hlayiwaka vaxwengi kumbe swa tintsrumi. Nambi Yesu a hi khongoti ka yene. Nakone a hi yentxi ntxhumu lowu nga ha kombisaka leswaku hi gandzrela tiko. Swi nge na mhaka leswaku ku ta yentxeka yini, hi tiyimisele ku landzra mazritu ya Yesu lama liki: “U fanela ku gandzrela Yehovha Xikwembu Nkulukumba waku, u tizrela yene ntsena.”—Mt 4:10.

7. Xana he kwini ku hambana loko nga kone a xikazri ka Timboni ta Yehovha ni wukhongoti byimbeni?

⁷ Namunhla, vhanu vanyingi va zrandzra ku landzra vazrangeli va wukhongoti lava tiviwaka ngopfu. Minkama yimbeni ndlela leyi va va zrandzraka ha yone vazrangeli lavo yi ndzruluka wugandzreli. Vhanu vanyingi va ya makezrekeni yavu, va xava mabuku yavu, nakone va nyikela mali yinyingi akuva va seketela ntizro wa vazrangeli volavu. Vhanu vambeni va kholwa xin’wana ni xin’wana lexi vazrangeli lavo va xi hlayaka. Kambe a swi kholwisi leswaku vhanu lavo a va ta yentxa leswi fanaka ka Yesu Kriste loko a ho humelela kwavu. I ntiyiso leswaku ha va hlonipha lava nga ni wulawuli, kambe minkama hinkwayu hi dzrimuka leswi Yesu Kriste a hi dondzrisiki swone: “Hinkwenu mi vamakwavu.” (Mt 23:8-10) Hine a hi gandzreli vhanu, swi nge na mhaka leswaku i vazrangeli a wukhongoti kumbe va politika. Handle ka leswo, a hi yi seketeli mintizro yavu. A matsrhan’wini ya leswo, hi tama hi kombise wukalatlhelo hi tlhela hi hambana ni misava leyi. Ka swiyimu leswo hinkwaswu, swi le livaleni leswaku hi hambanile ni mintlawa leyi tihlayaka leswaku i vakriste.—Yh 18:36.

8. Hi swi tivisa kuyini leswaku Yehovha a djula leswaku vito dzrake dzri twalisiwa ni ku tiviwa?

⁸ Ka khambe dzrimbeni, Yesu a khongote a ku: ‘Tatana, twalisa vito dzraku.’ Kutani Yehovha a hlamule xikhongoto lexo na a dumbisa leswaku a a ta twalisa vito dzrake. (Yh 12:28) A wutizrelini byake hikwabyu, Yesu a twalise vito dzra Papayi wake. (Yh 17:26) Xileswo, a vakriste va ntiyiso va tikhuza hi ku tizrisa vito dzra Xikwembu Nkulukumba ni ku dzri tivisa ka vambeni.

9. Xana vakriste va dzana dzra ku sungula va swi bekise kuyini a livaleni leswaku a va dzri hlonipha vito dzra Xikwembu Nkulukumba?

⁹ A dzaneni dzra ku sungula, ntsrhakunyana ka loko bandla dzra ku sungula dzri simekiwile, Yehovha a ‘yanakanye ku titekela a makazri ka vamatiko a tiko ledzri taka txhuliwa hi vito  dzrakwe’. (Min 15:14) Vakriste va nkama lowo a va tikhuza hi ku tizrisa vito dzra Xikwembu Nkulukumba ni ku pfuna vambeni akuva va dzri tiva. Va dzri tizrise swinene vito dzra Xikwembu Nkulukumba loko va zrezra ni loko va tsrala mabuku ya Bibele. * Va swi beke livaleni leswaku a ho va vone ntsena vhanu lava tivisiki vito dzra Xiwembu Nkulukumba.—Min 2:14, 21.

10. Xana he byini wumboni lebyi nga kone bya leswaku Timboni ta Yehovha ti yimela vito dzra Yehovha?

¹⁰ Xana Timboni ta Yehovha ta dzri yimela vito dzra Yehovha? Vona wumboni bya kukazri. Namunhla, vazrangeli va wukhongoti va yentxa hinkwaswu va nga swi kotaka akuva vhanu va nga tivi vito dzra Yehovha. Va patsra ni ku dzri susa ka mabibele lawa vone va ma ndzrulutelaka, hi minkama yimbeni va patsre ni ku va va tsimbisa kuva vito dzra Xikwembu Nkulukumba dzri tizrisiwa ka wukhongoti byavu. * Xana wa ganaganeka leswaku timboni ta Yehovha hi tone ntsena ti hloniphaka vito dzra Xikwembu Nkulukumba? A ku na ntlawa wumbeni lowu yentxaka vito dzra Xikwembu Nkulukumba dzri tiviwa ku fana ni Timboni ta Yehovha. Hi nga hlaya hi ku kongoma leswaku hi yentxa hinkwaswu leswi hi nga swi kotaka akuva hi hlonipha vito ledzri hi dzri yamukeliki, ku nga Timboni ta Yehovha. (Eza 43:10-12) Hi humexe ku tlula 24.000.000 wa makopiya  ya Wundzruluteli Bya Misava Leyimpshwa Bya Matsralwa Ya Ku Xwenga, ledzri tizrisaka vito dzra Yehovha ka mimbangu leyi vandzruluteli vambeni va dzri susiki. Handle ka leswo hi tlhele hi humexa mabuku lama seketeliwiki Bibeleni lama twalisaka vito dzra Yehovha, hi tindzrimi leti tlulaka 1.000!

11. Xana vakriste va ku sungula va swi kombise hi ndlela yini leswaku a va wu zrandzra ntiyiso?

¹¹ Yesu a a wu zrandzra ntiyiso, leswi liki a a zrandzra ntiyiso mayelanu na Xikwembu Nkulukumba, ni nkongometo wa Xikwembu Nkulukumba. Yesu a hanye hi ku landzra ntiyiso lowo nakone a wu tivise ka van’wana. (Yh 18:37) Valandzreli va Yesu va ku sungula navone a va wu zrandzra ntiyiso. (Yh 4: 23,24) Lakakuva mupostola Petro, a vitane mahanyela ya wukriste swanga ‘ndlela ya xihlayelamfuzri’. (2Pe 2:2) Vakriste va ku sungula a va wu zrandzra swinene ntiyiso lakakuva va yale hinkwaswu leswi fambisanaka ni wukhongoti, swihena swa ntumbuluku ni mavonela ya vhanu leswi a swi nga fambisani ni ntiyiso. (Kl 2:8) Ku yentxeka leswi fanaka ka vakriste namunhla, navone va tikazratela kuva va tama va ‘famba xihlayelamfuzrini’ nakone va yentxa leswo hi ku seketela tindondzro tavu ni mahanyela yavu, ntsena ka Zritu dzra Yehovha.—3Yh 3, 4.

12. Loko swi vilela kuva ku yampswisiwa matwisisela ya kukazri, xana vamakwezru lava nga ni wutiyanguleli va yentxa yini nakone ha yini?

¹² Timboni ta Yehovha a ti hlayi leswaku ti ni wutivi lebyi heleliki kumbe lebyi hetisekiki bya ntiyiso. Minkama yimbeni ti nga ha phazama loko ti tlhamuxela ndzrimana ya kukazri, kumbe loko ti nyikela nkongomiso wa ndlela leyi bandla dzri fanelaka ku tizra ha yone. Leswo a swi fanelanga swi hi hlamalisa. A Bibele dzri swi beka livaleni leswaku a wutivi lebyi kongomiki bya ntiyiso byi ta ya byi yandzra hi ku famba ka nkama. (Kl 1:9, 10) Yehovha a tlhamuxela ntiyiso ha katsrongokatsrongo, nakone hi fanela ku yimela leswaku a ntiyiso wu ya wu vaninga ha katsrongokatsrongo. (Pr 4:18) Loko vamakwezru lava nga ni wutiyanguleli va xiya leswaku va fanela ku yentxa ku txintxa ka kukazri ka matwisisela kumbe mayentxela ya mintxhumu. Va swi yentxa hi ku kahlula. Leswo swi hambanile ni leswi wukhongoti bya madzrimi byi swi yentxaka. Minkama yinyingi va yentxa mintxhumu akuva va nyonxisa valandzreli vavu, kumbe kuva va tiviwa a misaveni. Hi tlhelo dzrimbeni a nhlengeletanu ya Xikwembu Nkulukumba yi yentxa ku txintxa loku taka hi pfuna kuva hi tsrhindzrekela ka Xikwembu Nkulukumba ni ku landzra he kusuhi ndlela leyi Yesu Kriste a hlayiki leswaku a hi fanela ku gandzrela ha yone.

13. He dzrini tsrhamela dzra lisima ledzri vakriste va nga na dzrone, nakone Timboni ta Yehovha ti dzri kombisa hi ndlela yini tsrhamela ledzro?

¹³ A vakriste va dzana dzra ku sungula, a va ni matsrhamela manyingi lamanene kambe dzra lisima ngopfu swinene ku tlula hinkwawu a ku li lizrandzru. Yesu a te: ‘Hi laha hinkwavu va taka tiva leswaku n’wi vadondzrisiwa vanga, loko n’wi zrandzrana.’ (Yh 13:34, 35) Namunhla, Timboni ta Yehovha a misaveni hinkwayu ti ni lizrandzru ni wumun’we lebyi fanaka. Hi hambanile ni wukhongoti byimbeni, hi ndangu lowu nga ni wumun’we. Nambi leswi hi humaka ka matiko lama hambaniki, ni leswi hi nga va ntumbuluku lowu hambaniki leswo a swi hi tsravukanise. Hi nga kota ku vana lizrandzru dzra ntiyiso loko hi li mintlhanganwini yezru ni le ka tinhlengeletanu letikulu. Wumun’we lebyo byi tiyisa ku tiyiseka kwezru ka leswaku a wugandzreli byezru bya yamukeliwa ha Yehovha.

14. Hi ku ya hi Ba-le-Kolosa 3:12-14, he yini ndlela ya lisima ya ku kombisana lizrandzru?

 ¹⁴ A Bibele dzri hi byela leswi: ‘Ku tlula hinkwaswu zrandzranisani.’ (1Pe 4:8) Yin’we ya tindlela ya kuva hi kombisa lizrandzru ledzro i kuva dzrivalelanana ni ku tiyiselela ku kala ku hetiseka ka vambeni. Hi tlhela hi djuletela mikhandlu ya ku hanana ni ku kombisa malwandla ka hinkwavu a bandleni nambi ka lava va hi khunguvanyisiki. (Dondzra Ba-le-Kolosa 3:12-14.) Loko hi kombisana lizrandzru dzra ntiyiso hi kombisa leswaku hakunene hi vakriste va ntiyiso.

15. He yini mintxhumu leyi hi yi yentxaka namunhla leyi a yi yentxiwa i hi vakriste va e dzaneni dzra ku sungula?

¹⁵ Ku ni mintxhumu yimbeni leyi kombisaka leswaku hi landzra ndlela leyi vakriste va ku sungula a va gandzrela ha yone. Hi xikombiso, a nhlengeletanwini ku ni valaviseli lava fambafambaka, vakulu, ni malandzra ya wutizreli, ku nga leswi a swi li xiswone a dzaneni dzra ku sungula. (Flp 1:1; Ti 1:5) Handle ka leswo, vonela dzrezru mayelanu ni timhaka ta tinkuku, wukati, ngati ni ku sizrelela bandla ka vadohi lava nga tisolikiki dzri tiseketele ka ndlela leyi vakriste va ku sungula a va yentxa ha yone.—Min 15:28, 29; 1Ko 5:11-13; 6:9, 10; Hb 13:4.

16. Xana hi dondzra yini ka mazritu lama tsraliwiki ka Ba-le-Efesa 4:4-6?

¹⁶ Yesu a hlaye leswaku vanyingi a va ta tihlaya vadondzrisiwa vake kambe a tlhele a hlaya leswaku a hi hinkwavu lava a va ta va va ntiyiso. (Mt 7:21-23) Bibele dzri tlhele dzri hi byela na ka ha li mahlweni leswaku vhanu vanyingi a va ta vani ‘xiyimu xa wukhongoti’. (2Tm 3:1, 5) Handle ka leswo, a Bibele dzri swi beka a livaleni leswaku ko va ni ku ‘pfumela kun’we’ ntsena loko Xikwembu Nkulukumba a ku yamukelaka.—Dondzra Ba-le-Efesa 4:4-6.

17. Xana he wini ntlawa lowu namunhla wu landzraka Yesu u tlhela wu landzra wugandzreli bya ntiyiso?

¹⁷ Xana i vamani lava nga vumbaka wugandzreli bya ntiyiso namunhla? Hi byi vonile wumboni. Hi vone ndlela leyinene ya wugandzreli leyi Yesu a yi dondzrisiki leyi landzriwiki hi vakriste va ku sungula. A nhlamulo o va yin’we ntsena—i Timboni ta Yehovha. Handle ka ku ganaganeka i ndjombo yikulu ku hamba xiyenge xa ndangu wa Yehovha ni ku tiva ntiyiso mayelanu na yene kun’we ni minkongometo yake! Ingiki mun’wana ni mun’wana wezru a nga tama a tiyimisela ku tama a tiya a ntiyisweni.