1. He byini wuxaka lebyi vhanu va ku dumbeka va nga vaka na byone na Yehovha?

A NDANGU wa vagandzreli va Yehovha wu patsra Yesu, lweyi a nga ‘mativula ya hikwaswu leswi vumbiwiki’, ni tintsrumi tinyingi. (Kl 1:15; Ps 103:20) Loko Yesu a li lani misaveni, a kombise leswaku vhanu va ku dumbeka va nga kota ku vona Yehovha swanga Papayi wavu. Loko a vulavula hi Yehovha ni vadondzrisiwa vake, Yesu a te: ‘I Tatana wanga ni Tatana wenu.’ (Yh 20:17, BX) Nakone loko hi tinyiketela ka Yehovha hi tlhela hi babatisiwa, hi sungula ku hamba xiyenge xa ndangu wa vamakwezru lowu nga ni lizrandzru.​—Mr 10:29, 30.

2. I yini leswi hi taka swi kambisisa ka nhlokomhaka leyi?

² Vhanu vambeni swa va kazratela ku vona Yehovha swanga Papayi wa lizrandzru. Swi nga ha yentxeka vambeni va nga swi tivi leswaku va nga dzri kombisisa kuyini lizrandzru ka vamakwezru. Ka nhlokomhaka leyi, hi ta kambisisa ndlela leyi Yesu a nga hi pfunaka ha yone akuva hi vona Yehovha swanga Papayi lweyi a nga ni lizrandzru, lweyi hi nga tsrhindzrekelaka ku yene. Hi ta tlhela hi dondzra leswaku hi nga mu yetiselisisa kuyini Yehovha ka ndlela leyi hi va khomaka ha yone vamakwezru.

3. Xana xikhongoto xa Hosi xi hi yentxa hi tsrhindzrekela kusuhi na Yehovha hi ndlela yini?

³ Yehovha i Papayi lweyi a nga ni lizrandzru. Yesu a djula leswaku hi vona Yehovha hi ndlela leyi a mu vonaka ha yone. Swanga mupswali lweyi a nga ni lizrandzru ni lweyi swi nabyalaka ku tsrhindzrekela kwake, ku nga li mhunu wa ku kazrata lweyi o ko tsrhamela ku hi byeletela ntsena leswi hi fanelaka ku swi yentxa. Leswo swi tikombe ka ndlela leyi Yesu a byeliki vadondzrisiwa vake leswaku va khongota ha yone. A sungule xikhongoto xa Hosi hi mazritu lawa: “Papayi wezru.” (Mt 6:9) Yesu a a ta va a vitane Yehovha a ku: ‘Lwa Nga Ni Ntamu’, ‘Mutumbuluxi’ kumbe “Hosi ya Minkama” ​—hinkwawu lawa i mavitanela lawa ma fanelekaka ya Yehovha nakone ma kumekaka Matsralwini. (Gn 49:25; Eza 40:28; 1Tm 1:17) A matsrhan’wini ya leswo, Yesu a tizrise mavitanela ya xighanu lama liki ‘Papayi’.

4. Xana hi swi tivisa kuyini leswaku Yehovha a djula kuva hi tsrhindzrekela kwake?

⁴ Xana swa ku kazratela ku vona Yehovha swanga Papayi lweyi a nga ni lizrandzru? Vambeni swa va kazratela. Swi nga ha kazrata ku vona Yehovha swanga Papayi lweyi a nga ni lizrandzru loko hi kulisiwe hi vapswele lava kazrataka nakone swi va kazratelaka ku kombisa lizrandzru. Kambe swa tiyisana ku tiva leswaku Yehovha a ma tiva ha hombe matitwela yezru a tlhela a twisisa ni leswaku ha yini hi titwa hi ndlela yoleyo. Awa swi djula ku va kusuhi na hine. Hi leswi yentxaka Zritu dzrake dzri hi kutxa dzri ku: ‘Tsrhindzrekelani ka Xikwembu Nkulukumba; na yene a ta tsrhindzrekela ku n’wine.’ (Yk 4:8) Yehovha awa hi zrandzra nakone a djula ku va Papayi lwenene ku tlula hinkwavu.

5. Hi ku ya hi Luka 10:22, xana Yesu a nga hi pfunisa kuyini akuva hi tsrhindzrekela ka Yehovha?

⁵ Yesu a nga hi pfuna ku tsrhindzrekela kusuhi na Yehovha. Yesu a mu tiva ku yampswa Yehovha. A yetisele matsrhamela yake hi ndlela leyi hetisekiki. Hi kola ka leswo, te: ‘Lweyi a ndzri voniki, a voni Tatana.’ (Yh 14:9) Yesu a fana ni makwezru lwenkulu lweyi a hi dondzrisaka ndlela ya ku kombisa xitxhavu ni ku yingiseta Papayi wezru, ya kuva hi tingawula ku mu khunguvanyisa ni kuva hi yamukeleka kwake. Ku hlaya ntiyiso, a wutomi bya Yesu lani misaveni byi yi kombisi ha hombe ndlela leyi a nga ni wunene ni lizrandzru ha yone. (Dondzra Luka 10:22.) A hi kambisiseni swikombiso swa kukazri leswi taka hi pfuna ku vona leswaku Yehovha i Papayi lwenene.

6. Xana hi swi tivisisa kuyini leswaku Yehovha a a yingela swikongoto swa Yesu?

⁶ Yehovha awa va yingela vanake. Vona ndlela leyi Yehovha a yingeliki N’wanake wa mativula ha yone. Loko N’wanake a ha li lani misaveni, a khongote makhambi manyingi ka Yehovha nakone Yehovha a mu yingelile. (Lk 5:16) A yingele Yesu loko a khongota mayelanu ni swiboho swa lisima ku fana, ni loko a djula ku hlawula a vapostola va 12. (Lk 6:12, 13) Yehovha a tlhele a yingela Yesu loko a khongota na a kazrateke ngopfu. Na a li kusuhi ni ku wongiwa, Yesu a khongote hi ku hiseka ka Papayi wake mayelanu ni swikazratu leswikulu leswi a a ta kumana na  swone. Yehovha a nge yingela swikhongoto swa Yesu ntsena, kambe a tlhele a zrumela ntsrumi akuva yi mu tiyisa.—Lk 22:41-44.

7. Xana u titiwisa kuyini hi ku tiva leswaku Yehovha a yingela swikhongoto swa vhanu vake?

⁷ Ni namunhla Yehovha a ha tama a yingela swikhongoto swa malandzra yake nakone a swi hlamula hi nkama lowu faneliki ni hi ndlela leyinene. (Ps 116:1, 2) Vona xikombiso xa makwezru wa kukazri wa le Índia lweyi a swi voniki leswaku Yehovha awa hlamula swikhongoto. A a lwa ni ku hlatiyela lokukulu kutani a khongote swi phela ka Yehovha a mu byela mhaka leyi. A tsrale leswi: “A Wuhaxi bya JW bya Mayu wa 2019 lebyi a byi vulavula hi swikazratu ni ku hlatiyela byi tlhase hi nkama lowunene ku mine. A ve nhlamulo ya swikhongoto swanga.”

8. He tini tindlela leti Yehovha a kombisiki lizrandzru ka Yesu ha tone?

⁸ Yehovha a kombise lizrandzru a tlhela a hlayisa Yesu loko a lavisane ni swikazratu lani misaveni. Hi ndlela leyi fanaka, Yehovha awa hi zrandzra nakone awa hi hlayisa. (Yh 5:20) A hlayise Yesu hi tlhelo dzra moya, hi tlhelo dzra nyama ni ka matitwela yake. Nakone Yehovha a byele N’wanake leswaku awa mu zrandzra a tlhela a mu yamukela. (Mt 3:16, 17) Yesu a nga zanga a titwa wuswake hikusa minkama hinkwayu a a swi tiva leswaku Papayi wake lweyi a nga ni lizrandzru a ta va na yene.—Yh 8:16.

9. He swini swikombiso leswi hi nga na swone swa leswaku Yehovha awa hi zrandzra?

⁹ Ku fana na Yesu, hinkwezru hi ni swikombiso swinyingi leswi kombisaka leswaku Yehovha awa hi zrandzra. Yanakanya hi leswi: Yehovha a hi kokele kwake a tlhela a hi nyika vamakwezru vanyingi va lizrandzru lava hi yentxaka hi nyonxa va tlhela va hi tiyisa loko hi li ku hlatiyeleni. (Yh 6:44) Yehovha a tlhela a hi hlayisa minkama hinkwayu ni ku hi nyika swakuda swa moya leswi tiyisaka lipfumelo dzrezru. Nakone a tlhela a hi pfuna hi mintxhumu leyi hi yi vilelaka siku ni siku akuva hi tihanyisa. (Mt 6:31, 32) Loko hi yanakanyisisa hi ndlela leyi Yehovha a hi zrandzraka ha yone, na hine hi ya hi mu zrandzra.

10. I yini leswi hi nga swi dondzraka ka ndlela leyi Yehovha a khomaka ha yone vamakwezru?

¹⁰ Yehovha a zrandzra vamakwezru. Kambe ka hine a hi minkama hinkwayu swi nga ha nabyalaka ku kombisa ni ku hlaya leswaku ha va zrandzra vamakwezru. Minkama yimbeni, lexi kazratisaka mintxhumu hi leswaku hi pswaliwa ni ku kulisiwa ka mimbangu leyi hambaniki. Nakone hinkwezru hi yentxa swihoxo leswi swi nga ha khunguvanyisaka ni ku heta vambeni ntamu. Nambi tanu, hi nga ha yentxa xa kukazri akuva hi tiyisa lizrandzru dzrezru hi vamakwezru. Hi ndlela yini? Hi ku yetisela Papayi wezru loko hi kombisa lizrandzru ka vamakwezru. (Ef 5:1, 2; 1Yh 4:19) A hi voneni leswi hi nga swi dondzraka ka xikombiso xa Yehovha.

11. Xana Yesu a swi kombisise ku yini leswaku Yehovha i Xikwembu xa ‘lizrezre lolikulu’?

¹¹ Yehovha a hi komba ‘lizrezre lolikulu’. (Lk 1:78) A mhunu wa lizrezre kumbe ntwela wusiwana awa kazrateka loko a vona vambeni na va xaniseka. Leswo swi mu susumetela kuva a djula tindlela ta ku va pfuna ni ku va tiyisa. Ndlela leyi Yesu a a khoma ha yone vhanu a yi kombisa lizrezre ledzri Yehovha a nga na dzrone ha vone. (Yh 5:19) Khambi dzrimbeni, loko Yesu a vona switsrhungu, “a swi twela wusiwana, hikusa a swi xanisiwa ni ku pepetsekisiwa ku fana ni tihamba leti ngeke na mubyisi”. (Mt 9:36) Lizrezre dzra Yesu dzri mu susumetele ku yentxa xa kukazri ka ndlela leyi a a titwa ha yone. A dahe lava a va vabya a tlhela a pfuna lava a va ‘kazraliki ni lava a va bindzriwa’.​—Mt 11:28-30; 14:14.

12. Nyikela xikombiso xa ndlela leyi hi nga kombisaka ha yone lizrezre.

¹² Na hi nge si na kombisa lizrezre ka vamakwezru, hi fanela ku tiva leswaku he swini swikazratu leswi va langusanaka na swone. Hi xikombiso,  makwezru wa kukazri wa xisati a nga ha va a ni mavabyi lamakulu. Swi nga yentxeka a nga byeli mhunu hi xikazratu xake, kambe a nga nyonxa ngopfu swinene loko a nyikiwa mpfunu wa kukazri. Xana awa swi kota ku hlayisa ndangu wake hi tlhelo dzra nyama? Xana hi nga mu pfuna hi ku mu swekela ni ku mu basisela muti? Makwezru wa kukazri wa xinuna a nga ha va a heleliwe hi ntizro. Hi nga ha mu nyika mali ya kukazri swanga xihiwa na a nga swi tivi swaku i mani a mu nyikiki. Hi nga ha mu byela leswaku a hlaya loko a vilela xa kukazri akuva hi mu pfuna ku ya tlhasa lani a taka a kuma ntizro wumbeni.

13-14. Xana hi nga yetisela ku hanana ka Yehovha hi ndlela yini?

¹³ Yehovha awa hanana. (Mt 5:45) A hi fanelanga hi yimela kuva vamakwezru va kombela mpfunu wezru ku li kone hi va kombaka lizrezre kumbe ntwela wusiwana. Ku fana na Yehovha hi djula ku va nyika mpfunu na va nga si na kombela. Nambi hi nga mu kombelanga, Yehovha a hi nyika dambu siku ni siku! Ku kufumela ka dambu ku pfuna hinkwezru, nambi lava va kalaka va nga tlangeli. Xana a hi ntiyiso leswaku Yehovha a hi nyika leswi hi swi vilelaka akuva a hi komba lizrandzru ledzri a nga na dzrone ha hine? Hi mu zrandzra ngopfu Yehovha hikusa awa hanana!

¹⁴ Hi ku yetisela Papayi wavu wa le matilweni, vamakwezru vanyingi va kombisa moya wa ku hanana na va nga zanga va kombeliwa. Hi xikombiso, hi 2013, a Filipinas, xidzedze lexikulu ngopfu lexi vitaniwaka Haiyan xi honetele ngopfu swinene. Vamakwezru vanyingi va luzekeliwe hi tiyindlu ni mintxhumu yavu. Kambe a ndangu wavu wa moya, ku nga vamakwezru lava humaka a mimbangwini ya ku hambanahambana a misaveni hinkwayu, va tinyikelile hi ntsrengo lowukulu akuva va va pfuna. Vanyingi va pfunise hi mali kumbe hi ku tinyiketa a ntizrweni lowukulu wa ku yaka. Nakone leswo swi yentxe leswaku swi koteka kuva ku lulamisiwa ni ku va ku yakiwa kolomu ka 750 wa tiyindlu na ni lembe dzri nga si na hela! Hi nkama wa ntungu wa COVID-19, Timboni tinyingi ta Yehovha ti tizre hi lani ti nga kotaka ha kone akuva ti pfuna vamakwavu. Loko hi kahlula hi pfuna ndangu wezru wa moya, hi komba leswaku ha wu zrandzra.

15-16. Hi ku ya hi buku dzra Luka 6:36, he yini ndlela ya lisima leyi hi nga yetiselaka Papayi wezru wa le matilweni ha yone?

¹⁵ Yehovha a ni timpswalu nakone awa dzrivalela. (Dondzra Luka 6:36.) Siku ni siku Papayi wezru wa le matilweni a hi komba timpswalu take. (Ps 103:10-14) Valandzreli va Yesu a va  yentxa swihoxo. Nambi tanu, a a va komba timpswalu a tlhela a va dzrivalela. A a tiyimisele nambi ku nyikela hi wutomi byake akuva va dzrivaleliwa swidoho swavu. (1Yh 2:1, 2) Xana leswo a swi ku yentxi u navela ku tsrhindzrekela kusuhi na Yehovha kun’we na Yesu hi leswi va nga ni timpswalu va tlhela va dzrivalela?

¹⁶ Hi tiyisa lizrandzru hi ndangu wezru wa moya loko hi va lava ‘dzrivalelanaka [hi ku tsrhunxeka]’. (Ef 4:32) Ku hlaya ntiyiso, minkama yimbeni, swi nga ha kazrata ku dzrivalela. Kambe hi fanela ku tikazrata akuva hi swi kota. Makwezru mumbeni wa xisati a hlaya leswaku Xihondzo xo Rindza lexi nga ni nhlokomhaka leyi liki “Rivalelanani Hi Ku Ntshunxeka” xi mu pfune ku yentxa leswo *. A li: ‘Ku dondzra nhlokomhaka leyo swi ni pfune ku vona mintxhumu yimbeni leyinene. Nhlokomhaka leyo yi tlhamuxele leswaku ku tiyimisela ku dzrivalela vambeni a swi hlayi swone leswaku wa swi pfumelela swihoxo swavu kumbe leswi va swi yentxiki a swi ku khunguvanyisanga. Hi ntiyiso wa kone swi tlhamuxela ku va u nga beketeli xiviti ni ku tama u va ni ku zrula.’ Loko hi dzrivalela vamakwezru hi ku tsrhunxeka hi va komba leswaku ha va zrandzra nakone hi yetisela Papayi wezru Yehovha.

17. Hi ku ya hi Matewu 5:16, xana hi nga yentxa yini akuva vhanu va dzrumisa Papayi wezru wa le matilweni?

¹⁷ I tovoko dzrikulu ku hamba xiyenge xa ndangu wa misava hinkwayu lowu nga ni lizrandzru. Hi djula leswaku vhanu vanyingi va patsreka hi lani va nga kotaka ha kone a wugandzrelini bya Xikwembu Nkulukumba wezru. Na hi ni leswo miyanakanywini, hi fanela ku tivonela kuva hi nga yentxi ntxhumu lowu taka yentxa vhanu va pimisa ku biha hi Papayi wezru wa le matilweni ni vhanu vake. Hi tikazratela ku hanya hi ndlela leyi taka yentxa vhanu va navela ku twa madzrungula lamanene.—Dondzra Matewu 5:16.

18. I yini lexi nga hi pfunaka loko hi txhava ku zrezrela vambeni?

¹⁸ Minkama yimbeni, van’wana va nga ha hi dzrela kumbe va hi xanisa hi leswi hi hanyaka hi ku landzra milawu ya Papayi wezru wa le matilweni. Xana hi nga yentxa yini loko hi txhava ku byela vambeni mayelanu ni leswi hi swi pfumelaka? Hi nga tiyiseka leswaku Yehovha ni N’wanake va nga hi pfuna minkama hinkwayu. Yesu  a tiyisekise vandondzrisiwa vake leswaku va nga kazrateki hi leswi va taka swi hlaya kumbe ndlela leyi va taka swi hlaya ha yone. Ha yini? Yesu a te: “Hikusa leswi mi taka swi hlaya mi ta nyikiwa swone hi nkama wolowo; hikusa a mi nge ti vulavula hi ntamu wenu, kambe i moya wa Papayi wu taka mi nyika swa ku swi vulavula.”—Mt 10:19, 20.

19. Nyikela xikombiso xa mhunu wa kukazri lweyi a zrezriki hi xixixi.

¹⁹ Vona xikombiso xa Robert. A a ha ku sungula ku dondzreliwa Bibele nakone a a nga tivi swinyingi. Kutani swi djule ku va a ya a tribunali dzra wusotxha a Djoni, akuva a ya tlhamuxela mutsremi wa timhaka leswaku ha yini a yala ku patsreka a wusotxhweni. Hi xixixi, a tlhamuxele mutsremi wa timhaka leswaku a a nga djuli ku patsreka hikusa a a zrandzra vamakwavu. A a tlangela ngopfu hi ku va a hamba xiyenge xa ndangu wa Yehovha. Mutsremi wa timhaka e na suka a mu vutisa leswi: ‘I vamani vo vamakwenu volavo?’ Xivutiso lexo xi mu txhuketile Robert. Kolanu, a tekele ku dzrimuka buku dzra Matewu 12:50, ledzri a ku li tsralwa dzra siku dzroledzro: “Hikusa lweyi a yentxaka ku zrandzra ka Papayi wanga lweyi a nga matilweni, lweyo hi yene a nga makwezru ni mamana wanga.” Nambi leswi Robert a a nge na nkama wunyingi na a dondzra Bibele nakone a a nga tivi swinyingi ha dzrone, Yehovha a mu nyike moya wake wa ku xwenga akuva a kota ku hlamula xivutiso lexo ni swivutiso swimbeni leswi a hambiwiki swone leswi a a nga swi yimelanga. Handle ka ku ganaganeka, Yehovha a tikhuzi ngopfu swinene hi leswi Robert a swi yentxiki! Nakone awa tikhuza ha hine loko hi mu dumba hi tlhela hi va ni xixixi xa ku nyikela wumboni ka swiyimu leswi kazrataka.

20. I yini leswi u faneliki u tiyimisela ku swi yentxa? (Yohan 17:11, 15)

²⁰ Yana mahlweni u nyika lisima ndjombo leyi u nga na yone ya ku va xiyenge xa ndangu wa moya lowu nga ni lizrandzru. Hi ni Papayi lweyi a nga ni lizrandzru ku tlula vapapayi hinkwavu hi tlhela hi va ni vamakwezru vanyingi va ku dumbeka. Hi nga txhuki hi pimisa leswaku a hi nge zi hi phonyokile hi tsrhika ku hamba xiyenge xa ndangu wa Yehovha. Sathana ni valandzreli vake lava nga ni livengo va dzringisa ku hi yentxa hi ganaganeka leswaku Yehovha awa hi zrandzra va tlhela va dzringisa ku honetela wumun’we byezru. Kambe Yesu a khongote ka Papayi wake a kombela kuva a hi sizrelela leswaku ndangu wezru wa moya wu tama wu va ni wumun’we. (Dondzra Yohan 17:11, 15.) Nakone Yehovha a le ku xi hlamuleni xikhongoto lexo. Ku fana na Yesu, u nga txhuki u va ni ku ganaganeka ka leswaku Yehovha awa ku zrandzra. Tiyiseka leswaku a ta ku seketela minkama hinkwayu. Tama u tiyimisela ku va kusuhi na Yehovha ni vamakwezru.