1-2. a) Hi ku ya hi Amaproverbia 16:31, xana hi fanela ku va vonisa kuyini vamakwezru lava kuliki hi ntanga? b) He swini swivutiso leswi hi taka swi hlamula ka xidondzro lexi?

A VAYENDZRI va parque ledzri nga a Arkansas, a Estados Unidos da América, va nga kuma madiyamanti hi ku nabyala. Nambi swi li tanu, a madiyamanti lawu a ma si na politxhiwa akuva ma bekiwa a mbangwini lowu ku xavisiwaka mintxhumu ya lisima ya ku fana ni woru. Leswo swi yentxa vhanu vanyingi va vona madiyamanti wolawu va ma langusa va va va tifambela va nga na mhaka na wone.

² Hi tindlela ta kukazri, vamakwezru va ku dumbeka lava kuliki hi ntanga va fana ni madiyamanti wolawu; va ni lisima dzrikulu swinene. Zritu dzra Xikwembu Nkulukumba dzri fananisa mphahla wavu ni ngiyana. (Dondzra Amaproverbia 16:31; 20:29) Nambi tanu swi nga ha hi kazratela ku vona madiyamanti lawo ya lisima. Loko lava va nga vampshwa va kota ku xiya lisima ledzri nga kone ka lava kuliki va nga kota ku kuma mabindzru ya lisima ku tlula mintxhumu leyi vonekaka. Ka xidondzro lexi, hi ta hlamula swivutiso swizrazru: Ha yini Yehovha a vona vamakwezru va ku dumbeka lava kuliki hi ntanga na va ni lisima ledzrikulu? Ha yini vamakwezru va ku dumbeka lava kuliki hi ntanga va li va lisima a nhlengeletanwini ya Yehovha? Hi nga yentxa yini akuva hi pfuneka ka xikombiso xavu?

3. Hi ku ya hi buku dzra Amapsalma 92:12-15, ha yini vamakwezru va ku dumbeka lava kuliki hi ntanga va ni lisima ledzrikulu ka Yehovha?

³ Vamakwezru va ku dumbeka lava kuliki hi ntanga i va lisima ka Yehovha Xikwembu Nkulukumba. A vona leswi va nga xiswone hi le ndzreni nakone a tiva lisima dzravu ni matsrhamela yavu ya ku hlamalisa. A nyonxa swinene loko a vona lava kuliki va heta nkama ni lavampshwa na va va pfuna hi wutlhazri lebyi va nga nabyu lebyi va byi kumiki a wuton’wini byavu na va tizrela Yehovha hi ku dumbeka.  (Yb 12:12; Pr 1:1-4) Nakone Yehovha a nyika lisima ku tiyisela kwavu. (Mlk 3:16) Nambi leswi va kumaniki ni swikazratu a wuton’wini byavu, va tame va va ni lipfumelo ledzri tiyiki ka Yehovha. A dumbo dzravu dzri ya dzri tiya ku tlula loko va ha ku dondzra xihlayelamfuzri. Yehovha a va zrandzra swinene hi ku va va tama va zrezra vito dzrake nambi ni le ‘wuduhwatini byavu’.​—Dondzra Amapsalma 92:12-15.

4. I yini leswi swi nga tiyisaka vamakwezru lava kuliki hi ntanga?

⁴ Loko u ya u duhwala, tiyiseka leswaku Yehovha awa wu dzrimuka ntizro lowu u mu yentxeliki wone a nkameni lowu khalutiki. (Hb 6:10) U tihite ngopfu akuva u seketela ntizro wa ku zrezra nakone leswo swi nyonxisa Papayi wezru wa le matilweni. U tiyiseleli mindzringo, ku patsra ni leyi hlomulanaka mbilu. U yimeleli milawu leyi lulamiki ya Bibele, u hetisise wutiyanguleli lebyikulu a bandleni nakone u wupfise vambeni. Minkama hinkwayu u yentxa leswi u nga swi kotaka akuva u titwananisa ni ku txintxa loku nga kone a nhlengeletanwini ya Yehovha. U tlhele u seketela u va u kutxa lava nga ka ntizro wa nkama hinkwawu. A ku dumbeka kwaku ku yentxa leswaku Yehovha a ya a ku zrandzra. A dumbisa kuva a ‘nga sukeli tinsasi takwe’! (Ps 37:28) Nakone a dumbisa lava duhwaliki a ku: ‘Ndzri ta n’wi zrwala ku tlhasa mphahleni wenu.’ (Eza 46:4) Xileswo, u nga txhuki u pimisa leswaku a wu wa lisima a nhlengeletanwini ya Yehovha hi leswi kutani u duhwaliki. Ku hlaya ntiyiso u ni lisima dzrikulu swinene!

5. Xana i yini leswi lava kuliki hi ntanga va fanelaka ku swi dzrimuka?

⁵ Lava kuliki hi ntanga va ni swinyingi akuva va pfuna vambeni. A ve he na ntamu ku fana ni khale kambe va ni mfambu wukulu a wuton’wini nakone Yehovha a nga ha va tizrisa hi tindlela tinyingi. Swikombiso leswi landzrelaka swa vhanu va khale ni va masiku yezru swi ta hi komba ntiyiso lowo.

6-7. Nyikela swikombiso leswi nga Bibeleni swa vhanu lava kuliki lava tovokisiwiki hi kola ka ku dumbeka kwavu.

⁶ A Bibeleni hi nga kuma swikombiso swa malandzra ya Yehovha lama tamiki ma khomeka hi tizro wake nambi loko ma duhwalile. Hi xikombiso, Moxe a sungule ku tizra swanga muprofeta wa Yehovha ni muzrangeli wa tiko dzra Israyele na a ni 80 wa malembe. Loko Daniel a ni kolomu ka 90 wa malembe, Yehovha a tame a mu tizrisa swanga muprofeta. Nakone swi tikomba na Yohane a a ni kolomu ka 90 wa malembe loko a huhuteliwe ku tsrala a buku dzra Apfuletelo.

 ⁷ Malandzra manyingi ya Yehovha ya ku dumbeka a ma tivekanga ngopfu. Nakone a swi ta nabyala kuva vhanu vambeni va nga va hlayeli ntxhumu kumbe va va vonela hansi. Kambe Yehovha a a va nyika lisima nakone va kume hakelo hi kola ka ku dumbeka kwavu. Hi xikombiso, Bibele a dzri vulavuli ngopfu hi ‘mululami ni mukhongoti’ lweyi a vitaniwaka Simiyoni, kambe Yehovha a a tiva wumhunu byake nakone a mu nyike mukhandlu wa ku vona Yesu, ni ku profeta mayelanu na Mesiya ni mamana wake. (Lk 2:22, 25-35) Tlhela u yanakanyisisa hi xikombiso xa muprofeta wa xisati, Ana, lweyi a a kulile hi ntanga a tlhela a feliwa hi nuna. Nambi leswi a a ni 84 wa malembe, a a nga luzi nambi ntlhanganu wun’we ntsena. A Bibele dzri hlaya leswaku ‘afa a nga suki tempeleni’. Xileswo, Yehovha a mu nyike tovoko dzra ku vona ku pswaliwa ka Yesu. Swi le livaleni leswaku ka Yehovha, Simiyoni na Ana a va ni lisima ledzrikulu ngopfu swinene.​—Lk 2:36-38.

8-9. Nyikela xikombiso xin’we lexi kombisaka leswaku vamakwezru lava feliwiki va ni lisima a nhlengeletanwini ya Yehovha.

⁸ Vamakwezru va ku dumbeka lava kuliki hi ntanga i xikombiso lexinene ka lavampshwa. Vona xikombiso xa makwezru wa xisati lweyi a vitaniwaka Lois Didur. A o va ni 21 wa malembe ntsena loko a sungule ku tizra swanga phayona dzra ku hlawuleka a Canadá. Ntsrhaku ka leswo, yene ni nkatake John, va hete malembe manyingi ka ntizro wa wulaviseli. Ntsrhaku, va tizre ku tlula 20 wa malembe a Betele dzra Canadá. Loko Lois a tlhanganise 58 wa malembe, yene na John va zrambiwe kuva va ya tizrela a Ucrânia. Va xi yamukelise kuyini xizrambu lexo? Xana va pimise leswaku a swi ta va kazratela ku zruzrela a tikweni dzrimbeni swanga hi leswi a va duhwaliki? Im-him. Va yamukeli xizrambu, nakone John a yaveliwi ku tizra swanga xizro xa Xihubyana xa Zrwavi dzra le Ucrânia. Ntsrhaku ka 7 wa malembe, John a file kambe Lois a tame a tsrhama a tizrela Ucrânia. Swoswi Lois a ni 81 wa malembe kambe a ha tama a tizra hi ku dumbeka a Betele dzra Ucrânia nakone vamakwezru va hala va mu zrandzra ngopfu swinene.

⁹ Vamakwezru lava va feliwiki hi vanuna ku fana na makwezru Lois, swi nga yentxeka va nga bekisiwi ku fana ni loko vanuna vavu a va ha hanya, kambe akuva va feliwile a swi pumbi lisima ledzri va nga nadzru. Vamakwezru lavo va seketele vanuna vavu hi malembe manyingi nakone va ya mahlweni va tizrela Yehovha hi ku dumbeka. (1Tm 5:3) Leswo swi hi yentxa hi twisisa leswaku ha yini vone va li va lisima ka Yehovha nakone va va tiyisa ngopfu vampshwa.

10. He xini xikombiso lexinene lexi Tony a hi bekelaka xone?

¹⁰ Vanyingi lava va kuliki hi ntanga va tsrhamaka mimbangwini leyi ku hlayisiwaka kone swiduhwati na vone va ni lisima dzrikulu. Hi xikombiso, makwezru lweyi a vitaniwaka Tony, namunhla a tsrhama mbangwini wa ku fana ni wolowo. A babatisiwi na a ni 20 wa malembe hi Agoxto wa 1942 a Pensilvânia, a Estados Unidos da América. Na swi nga si na ya kule, swi djule kuva a lavisana ni xiyimu xa wukalatlhelo hi kola ka ku yala ku ya wusotxhweni. A pfaleliwe djele malembe mabidzri ni hamfu. Yene ni nkatake Hilda, va  wundle vana vabidzri a ntiyisweni. Ntsrhaku ka malembe ya kukazri, Tony a tizre swanga mutlhanganisi wa huvo ya vakulu ka mabandla mazrazru, nakone a a tizra swanga mulaviseli wa nhlengeletanu ya muganga. A fambise mintlhanganu a tlhela a fambisa swidondzro swa Bibele a djele ledzri lumbaka mfumu. Namunhla, Tony a ni 98 wa malembe kambe a nga pimisi ku godola ni kutsrongo. A ya mahlweni hi ku yentxa hinkwaswu leswi a nga swi kotaka akuva a tizrela Yehovha ni ku tizrisana ni vamakwezru a bandleni dzrake!

11. Hi nga swi kombisisa kuyini leswaku vamakwezru lava kuliki hi ntanga lava tsrhamaka mitini ya ku hlayisa swiduhwati va ni lisima ku hine?

¹¹ Hi nga va kombisisa kuyini xitxhavu vamakwezru lava tsrhamaka mitini ya ku hlayisa swiduhwati? Minkama hinkwayu loko swi koteka, vakulu va nga pfuna vamakwezru lavo akuva va hlalela mintlhanganu kumbe ku yi yingiseta ni kuva va hlengela ku zrezreni. Hi nga kombisa ku zron’weka loku hi nga nakone ha vone hi ku va yendzrela kumbe ku va fonela hi ku tizrisa vídeochamada. Loko hi tiva makwezru wa kukazri lweyi a kuliki hi ntanga a tsrhamaka a mutini wa ku hlayisa swiduhwati na a li kule ni bandla dzrake, hi fanela ku mu zron’wekela hi ndlela ya ku hlawuleka. Loko hi nga tivoneli hi nga ha gama hi ku va dzrivala vamakwezru lava va ku zrandzreka. Vambeni va nga ha vona na swi nga fanelanga kuva va tipfula xifuva kumbe ku swi vona na swi kazrata ku yentxa leswo. Loko hi va hamba swivutiso ni ku va yingiseta loko va hi dzrungulela ku nyonxa loku va viki na kone ndzreni ka nhlengeletanu ya Yehovha hi nga ha tiyisiwa ngopfu swinene.

12. Xana hi nga kuma vamakwezru va ku tsrhamisisa kuyini a bandleni dzrezru?

¹² Hi nga ha nyonxa loko hi kuma leswaku a bandleni dzrezru ku ni vamakwezru lava ku dumbeka lava kuliki hi ntanga lava va nga xikombiso lexinene ku hine. Makwezru wa xisati lweyi a vitaniwaka Harriette a tizrele Yehovha hi ku dumbeka ku dzringana malembe manyingi a bandleni ledzri kumekaka a Nova Jersey, Estados Unidos da América. Kutani swi djule leswaku a zruzra a ya tsrhama ni n’wanake wa xisati. Vamakwezru va bandla ledzrimpshwa ledzri a yiki ka dzrone, va tikazratele ku mu tiva ku yampswa nakone va kume leswaku a a li makwezru wa lisima ngopfu swinene. Makwezru Harriette a va dzrungulele mimfambu ya ndlela leyi nsimu a yi yentxisiwa xiswone nkameni lowu a a ha ku dondzra ntiyiso kolomu ka ma 1925. A nkameni lowo, loko a ya nsin’wini, a a fambafamba ni xikovha xa ku txhutxha matinyu akuva a xi tizrisa loko o o txhuka a khomiwa. Hi ntiyiso wa kone 1933, a khomiwile kabidzri a ya tsrhama vhiki a djele. Hi makhambi wolawo ya mabidzri, nuna wake lweyi a a nga li mukriste kambe a a mu seketela, a sale a hlayisa swivanatana swavu swa swizrazru. Ku hlaya ntiyiso, vamakwezru lava kuliki hi ntanga va ku dumbeka ku fana na Harriette, va faneliwa hi ku kombisiwa xihluwa lexikulu!

13. Xana hi dondzra yini mayelanu ni lisima ledzri vamakwezru lava kuliki va nga na dzrone a nhlengelatanwini ya Yehovha?

¹³ Vamakwezru lava kuliki hi ntanga i va lisima ngopfu swinene nhlengeletanwini ya Yehovha. Va tivonele ha wuswavu ndlela leyi Yehovha a tovokisiki nhlengeletanu yake ni ndlela leyi a va tovokisiki ha yone hi ku kongoma. Nakone va ve ni mukhandlu wa ku dondzra hi swihoxo swavu. Xileswo, vona vamakwezru lava na va li ‘nhlovo ya wutlhazri’ nakone yentxa hinkwaswu u nga swi kotaka akuva u dondzra ka mimfambu yavu. (Pr 18:4) Loko u tinyika nkama wa ku va tiva ku yampswa, a lipfumelo dzraku dzri ta ya dzri tiya nakone minkama hinkwayu leyi u vaka na vone u ta dondzra xa kukazri!

14. Xana a buku dzra Deuteronoma 32:7 dzri hi tsratsriya ku yentxa yini?

¹⁴ Tsrhindzrekela ka lava kuliki akuva u bula na vone. (Dondzra Deuteronoma 32:7.) Swi nga yentxeka va nga ha voni ha hombe, va nge he  na ntamu wa ku famba kumbe wa ku vulavula. Kambe mbilu yavu ya ha li yimpshwa nakone va tihambele ‘vito ledzrinene’ a mahlweni ka Yehovha. (Ekl 7:1) Minkama hinkwayu dzrimuka leswaku ha yini Yehovha a vona lava kuliki hi ntanga na va ni lisima ngopfu. Tama u kombisa xihluwa ka vamakwezru lava zrandzrekaka. Yetisela Elixa. A sindzrise kuva a va tlhelweni ka Eliya hi siku dzra wugamu ledzri va viki xikan’we. Ku ze ku ku kazrazru na Elixa a byela Eliya a ku: ‘Ndzri nga kala ndzri nga ku tsrhiki.’​—2Th 2:2, 4, 6.

15. Hi swini swivutiso leswi hi nga swi hambaka lava va kuliki?

¹⁵ Kombisa leswaku wa zron’weka hi lava kuliki hi ku va hamba swivutiso hi ndlela leyinene. (Pr 1:5; 20:5; 1Tm 5:1, 2) U nga ha va vutisa swa ku fana ni leswi: ‘Loko we he mumpshwa i yini lexi ku tiyisekisiki leswaku u kume ntiyiso?’ ‘Xana swiyimu leswi u khalutiki hi ka swone swi ku yentxe u titwa na u li kusuhi na Yehovha hi ndlela yini?’ ‘I yini lexi ku pfuniki ku tama u tizrela Yehovha hi ku tsrhava?’ (1Tm 6:6-8) Kutani va yingisete hi wuzron’wana loko va ku dzrungulela mimfambu yavu.

16. He dzrini bindzru ledzri nga kone loko vamakwezru lavampshwa ni lava kuliki hi tanga va bulisana?

¹⁶ Loko vamakwezru lava kuliki hi tanga ni lavampshwa va bulisana, va kota ku tiyisana. (Ro 1:12) Lavampshwa va kota ku yengesela ku dumba kwavu ka leswaku Yehovha a ta hlayisa malandzra yake ya ku dumbeka kasi lava kuliki va titwa na va zrandzriwa. Vamakwezru lavo, lava kuliki, va ta swi nyonxela ngopfu ku ku dzrungulela ndlela leyi Yehovha a va tovokisiki ha yone a wuton’wini byavu.

17. Ha yini hi nga hlayaka leswaku vamakwezru va ku dumbeka lava kuliki hi tanga va ya va xonga hi ku famba nkama?

¹⁷ Hi tolovelo loko mhunu a ya a duhwala a wuxongi bya le handle bya pumbeka, kambe lava dumbekaka ka Yehovha va ya va xonga mahlweni kwake siku dzrin’wana ni dzrin’wana. (1Te 1:2, 3) Ha yini? Hikuva a wuton’wini byavu minkama hinkwayu va pfumelele leswaku moya wa ku xwenga wa Xikwembu Nkulukumba wu va politxha kumbe xana wu va pfuna ku txutxela matsrhamela ya ku xonga. Nkama lowu hi yaka hi tiva vamakwezru lava va lisima swinene ni ku ya hi dondzra ha vone hi kota ku vona leswaku i tindzralama ta lisima ledzrikulu ledzri ngeke na ku pimanisiwa ni ntxhumu.

18. Xana hi ta bula hi yini ka xidondzro lexi landzrelaka?

¹⁸ A bandla dzri ya dzri tiya ku nga li ntsena loko vampshwa va nyika lisima lava kuliki, kambe ni hi ku va lava kuliki va nyika lisima lava ha liki vampshwa. Ka xidondzro lexi landzrelaka, hi ta vona leswaku lava kuliki va nga swi kombisa hi ndlela yini leswaku va va nyika lisima vamakwezru lava ha liki vampshwa.