Xana A Wu Swi Tiva?
I n’qolo ya muxaka muni leyi mutsrheniwa wa Muetiyopiya a a khwele ka yone loko Filipe a tsrhindzrekela kwake?
A ZRITU ledzri liki “n’qolo” ledzri tizrisiwiki ka Wundzruluteli Bya Misava Leyimpshwa dzri nga ha tizriseliwa ku vitana mixaka ya tin’qolo leti a ti tizrisiwa a nkameni wolowo. (Mint. 8:28, 29, 38) Kambe a n’qolo leyi a yi tizrisiwa hi Muetiyopiya a yi tikomba na yi li yikulu ku tlula leti a ti tizrisiwa yimpini kumbe ka mimpalisanu. A hi yanakanyisiseni hi swin’we swa swivangelo leswi hi yentxaka hi tlhasela wugamu lebyi.
Muetiyopiya a a li mutizrela mfumu lweyi a yendzriki mpfhuka wa ku leha. A a li “wanuna lweyi a a ni wulawuli a mfun’wini wa Kandake, hosi ya xisati ya Vaetiyopiya, nakone a a vonelela pfindla hinkwadzru dzra yone”. (Mint. 8:27) A Etiyopiya wa khale a a patsra lomu namunhla ku vitaniwaka Sudão ni mbangu wa kukazri wa le Sul ka Egipta. Swi tikomba na wanuna lweyi a nga tizrisanga n’qolo leyayin’we ka liyendzro dzrake hinkwadzro. Kambe swi nga yentxeka a teke mintxhumu yinyingi hikusa liyendzro dzrake a dzri lehile. Tin’we ta tin’qolo leti a ti tizrisiwa ku pakela vhanu a dzaneni dzra ku sungula a ti pfaliwe henhla nakone a ti ni mune wa maroda. Ntlhamuxelo wa kukazri wu hlaya leswi mayelanu ni buku dzra mintizro: “Muxaka lowo wa n’qolo a wu ta va ni mbangu wukulu wa ku beka mapaxta ni mintxhumu yin’wana leyi vilelekaka, ku yentxela leswaku liyendzro dzri nyonxisa nakone a swi ta koteka ku famba mpfhuka wa ku leha hi yone.”
Muetiyopiya a o dondzra nkama lowu Filipi a tsrhindzrekeliki kwake. A matimu ma hlaya leswi: “Filipi a tsrutsruma tlhelweni ka yone a yingela mutsrheniwa na a dondzra buku dzra muprofeta Ezaya.” (Mint. 8:30) Tin’qolo leti a va famba hi tone a ti nga hambeliwanga kuva va famba hi ku tsrutsruma. Akuva n’qolo yi nga fambi hi ku tsrutsruma a swi pfumelelanga kuva mutsrheniwa lweyi a dondzra ntsena, kambe swi yentxe leswaku Filipi a yi kuma na a famba hi minenge.
Muetiyopiya “a kombela Filipi leswaku a khwela a tsrhama na yene”. (Mint. 8:31) Ka tin’qolo ta mpalisanu lweyi a yi fambisaka a a yentxa hi ku yima. Kambe ka tin’qolo ta ku yendzra hi tone a ku ni mbangu lowu dzringaniki akuva mutsrheniwa na Filipi va tsrhama ka wone.
Hi ku ya hi Mintizro ndzrima 8 ni swin’wana leswi matimu ma swi hlayaka mhakeni leyi, a mabuku yezru ma kombisa wanuna wa Muetiyopiya na a khwele n’qolo ya yikulu a matsrhan’wini ya xin’qolwana kumbe tin’qolo leti a ti tizrisiwa ka mimpalisanu.
