Van’wana va wundliwe ka mimbangu leyi vavasati va tekeliwaka hansi. Hi xikombiso, makwezru Hans lweyi a tizraka swanga mulaviseli wa muganga a Bolivia a li: “Vavanuna van’wana va wundliwe ka mimbangu leyi vavanuna va voniwaka va tlakukile ku tlula vavasati, nakone va va yeyisa.” a Shengxian nkulu wa bandla wa le Taiwan a li: “Lani ni tsrhamaka kone ku yanakanyiwa leswaku wansati a nga na mfanelo ya ku hlaya mavonela yake. Loko wanuna a hlaya mavonelo ya kukazri lawa a ma twiki ka nsati mayelanu ni mhaka ya kukazri, vavanuna van’wana va nga ha mu hleka.” Vavanuna van’wana va va tekela hansi vavasati hi ndlela ya ku tumbela. Hi xikombiso, va nga ha hlaya mazritu ya swipoyilo lama khunguvanyisaka vavasati.

Swa nyonxisa ku tiva leswaku wanuna a nga txintxa swi nge na mhaka ni lomu a kulisiwiki kone, a nga ha txintxa vonela dzrake dzra leswaku vavanuna va tlakukile ku tlula vavasati. (Efe. 4:22-24) A nga swi kota ku yentxa leswo hi ku yetisela xikombiso xa Yehovha. Ka xidondzro lexi hi ta vona ndlela leyi Yehovha a va vonaka ha yone vavasati, leswi vamakwezru vaxinuna va nga swi yentxaka akuva va yetisela ndlela leyi Yehovha a va vonaka ha yone vaxisati ni leswaku vakulu va nga zranga va kombisa xihlonipho ka vaxisati hi ndlela yini.

NDLELA LEYI YEHOVHA A VA VONAKA HA YONE VAXISATI

Yehovha a hi bekele xikombiso lexinene xa ndlela leyi a va vonaka ha yone vaxisati. Yehovha i papayi wezru nakone a zrandzra vanake hinkwavu. (Yoh. 3:16) Nakone, vamakwezru vaxisati va ku dumbeka i vana va lisima ka Yehovha. Tindlela leti landzrelaka ti kombisa leswaku Yehovha awa va zrandzra ni ku va hlonipha vavasati.

 Yehovha a nga va kombisi xihlawuhlawu vavasati. Yehovha a vumbe vavanuna ni vavasati a xifanisweni xake. (Gen. 1:27) Yehovha a nga nyikanga wutivi byinyingi va xinuna ku tlula vavasati, nakone a nga zrandzri ngopfu vavanuna ku tlula vavasati. (2 Makr. 19:7) A vumbe vavanuna ni vavasati na va ni wuswikoti lebyi fanaka bya ku twisisa mintiyiso ya Bibele ni ku yetisela wumunhu byake bya ku xonga. Yehovha a tlhela a dzri nyika lisima lipfumelo dzra vavanuna ni vavasati, swi nge na mhaka leswaku a dumbu dzravu i dzra ku hanya hi lani ku nga helikiki a misaveni kumbe i dzra ku ya va tihosi ni ku ya tizra swanga vaprista a matilweni. (2 Pet. 1:1) Swi le livaleni leswaku Yehovha a nga na xihlawuhlawu ni vavasati.

Yehovha awa va yingiseta vavasati. Yehovha awa swi zrandzra ku tiva ndlela leyi vaxisati va titwaka ha yone nakone awa zron’weka ha vone. Hi xikombiso, a swi yingisetile a tlhela a hlamula a swikhongoto swa Raquel na Ana. (Gen. 30:22; 1 Sam. 1:10, 11, 19, 20) Yehovha a tlhele a huhutela vavanuna lava tsraliki Bibele akuva va tsrala matimu ya vavanuna lava va yingisetiki vavasati. Hi xikombiso, Yehovha a byele Abrahamu akuva a yingiseta leswi Sara a a swi hlaya. (Gen. 21:12-14) Hosi Davhida na yene a yingisete Abigayeli. Nakunene, a swi xiyile leswaku i Yehovha lwa mu zrumiki akuva a ya khanela na yene. (1 Sam. 25:32-35) Yesu lweyi a a yetisela hi lani ku heleliki wumhunu bya papayi wake, a yingisete mamana wake Mariya. (Yoh. 2:3-10) Swikombiso leswi, swi swi beka livaleni leswaku Yehovha awa va yingiseta vavasati nakone leswo swi kombisa leswaku awa va hlonipha.

Yehovha awa byi dumba a wuswikoti byavu. Hi xikombiso, Yehovha a a tiyiseka leswaku Evha a a ta swi kota ku bekisa misava hinkwayu. (Gen. 1:28) Yehovha a a nga mu voni a li ka xiyimu xa le hansi Evha, kambe a a li muhetisisi wa Adamu. Yehovha a tlhele a hlawula vaprofeta vaxisati ku nga Debora na Hulda kuva va tsratsriya vhanu vake, ku patsra ni mutsremi ni hosi. (Abaṭ. 4:4-9; 2 Tih. 22:14-20) Ni namunhla Yehovha awa tiyiseka leswaku vamakwezru vaxisati va nga swi kota ku hetisisa xiyavelo xin’wana ni xin’wana lexi va nyikiwaka xone. Vavasati lava va ku dumbeka va tizra swanga vazrezri, maphayona ni ku va vazrumiwa. Va tlhela va pfunisa ka ku dezenyara, ka ku yaka ni ku bekisa tiyindlu ta wugandzreli ni ma Betele. Van’we vavu va tizra a Betele, van’we vavu ka swikritori swa wundzruluteli. Vamakwezru lava vaxisati va fana ni khandzra ledzrikulu ledzri Yehovha a dzri tizrisaka akuva a hetisisa ku zrandzra kwake. (Amaps. 68:11) Swi le livaleni leswaku ka Yehovha vavasati a hi vhanu lava tsaniki lava kalaka va nge na wuswikoti.

VAMAKWEZRU VAXINUNA VA NGA YETISELA NDLELA LEYI YEHOVHA A VA VONAKA HA YONE VAVASATI

Akuva vamakwezru va xinuna va tiyiseka leswaku va vona vamakwezru va xisati hi ndlela leyi Yehovha a va vonaka ha yone, va fanela ku kambela ndlela leyi va yanakanyaka ni ku yentxa mintxhumu ha yone. Kambe akuva va yentxa leswo, va vilela mpfunu. Hi xikombiso, a mutxhini wa ku hamba a raio-X wu nga ha gungula mavabyi lawa ma nga ha vaka a mbilwini ya mhunu. Hi lani ku fanaka, vanghanu ni Bibele swi nga hi pfuna ku vona leswaku hi hanyisana hi ndlela leyinene ni vavasati hi lani Yehovha a djulaka ha kone. Kambe u nga xi kumisa ku yini xipfunu lexo?

Vutisa munghanu lwenene. (Amapr. 18:17) Hi nga ha kombela mpfunu ka mughanu lwenene lweyi a taka hi byela ntiyiso, hi nga ha mu vutisa leswi: “U swi vonisa ku yini, xana ni va khoma ha hombe vavasati? Xana va titwa na ni va hlonipha? Xana ku ni xa kukazri ni nga xi yampswisaka ka ndlela leyi ni va khomaka ha yone?” Loko munghanu waku a hlaya leswaku ku ni leswi u fanelaka ku swi yampswisa, u nga zami ku ti yimelela, kambe zama ku yentxa leswi u nga swi kotaka akuva u yampswisa ndlela leyi u va khomaka ha yone.

Dondzra Zritu dzra Xikwembu Nkulukumba. Ndlela leyinene ya ku tiva leswaku hi va khoma ha hombe vamakwezru va xisati i ku dzri tizrisa ha hombe Zritu dzra Xikwembu Nkulukumba kuva hi kambela miyanakanyu yezru. (Heb. 4:12) Nkama lowu hi dondzraka Bibele, hi dondzra hi matimu ya vavanuna lava va va khomiki ha hombe vavasati ni lava kalaka va nga va khomanga ha hombe. Hi nga fanisa swikombiso swavu ni ndlela leyi hine hi va khomaka ha yone vavasati. Handle ka leswo, swi tava swi hoxile ku tizrisa ndzrimana ya kukazri ya Bibele akuva hi seketela mavonela ya kukazri lama hoxiki hi vavasati. Hi xikombiso, 1 Pet. 3:7 yi hlaya leswaku vavanuna va fanela va kombisa xitxhavu ka vasati vavu hikusa “va fana ni swibya leswi kalaka swi nga tiyanga”. b Xana leswo swi hlaya leswaku a wansati a fanela  a tekeliwa hansi, a voniwa na a li mhunu lweyi a kalaka a nga na wutivi kumbe wuswikoti? Nikutsrongo! Dzringanisa mazritu ya Petro ni leswi hlayiwaka ka Vagalatiya 3:26-29. A tindzrimana leti ti swi beka livaleni leswaku Yehovha a hlawule vavanuna ku patsra ni vavasati akuva va ya fuma na Yesu a matilweni. Loko hi dondzra Bibele hi tlhela hi vutisa munghanu lwenene mayelanu ni ndlela leyi hi khomaka ha yone vavasati, hi nga ha dondzra ku kombisa vamakwezru vaxisati xitxhavu lexi va fanelaka.

XANA VAKULU VA NGA KOMBISA XIHLONIPHU KA VAMAKWEZRU VA XISATI HI NDLELA YINI?

Vamakwezru bandleni va nga kombisa xihloniphu ka vavasati hi ku landzra xikombiso lexinene xa vakulu. Xana vakulu va nga beka xikombiso lexinene hi ndlela yini a mhakeni ya ku kombisa xihloniphu ka vavasati? Vona tin’we ta tindlela ta ku yentxa leswo.

Vakulu va va kulungela vamakwezru va xisati. Muapostola Pawulo a va bekele xikombiso lexinene vakulu xa kuva va xi yetisela. Ka papela ledzri a dzri tsraleliki bandla dzra le Roma, a kulungele vamakwezru vanyingi va xisati. (Rom. 16:12) Xana wa yi yanakanya ndlela leyi vamakwezru lava va titwiki ha yone loko va twa a papela ledzri na dzri dondzriwa a bandleni? Hi lani ku fanaka, a vakulu va kulungela vamakwezru va xisati hi kola ka wumhunu lebyinene lebyi va nga na byone ni hi kola ka ntizro lowu va wu yentxelaka Yehovha. Leswo swi yentxa vamakwezru lava va titwa na va zrandzriwa ni ku hloniphiwa a bandleni. Mazritu lama kutxanaka ya nkulu ku nga ha va leswi vamakwezru va xisati va swi vilelaka akuva va tama va tizrela Yehovha hi ku dumbeka.—Amapr. 15:23

Vakulu va fanela ku kulungela vamakwezru va xisati swi pfela mbilwini. Ha yini? Makwezru lweyi a vitaniwaka Jessica a li: “Swi nyonxisa ngopfu loko makwezru a hlaya leswaku ni nyonxa na wene. Kambe swi nyonxisa hi ku tlulisa loko vamakwezru va hlaya hi ku kongoma leswi va ku tlhangelaka hi swone. Hi xikombiso, ku kulungela mamana lweyi a swi kotaka ku miyeta vana va nga hambi pongo a mintlhanganwini, kumbe makwezru lweyi a tikazrataka kuva a ya teka xidondzro a famba na xone mintlhanganwini.” Loko vakulu va kulungela vamakwezru va xisati hi mhaka ya kukazri leyi va yi yentxiki, vone va titwa va li va lisima ni ku tlhela va tizrisiwa a bandleni.

 Va yingiseta vamakwezru va xisati. Vakulu lava titsrongahataka va pfumela leswaku a hi vone ntsena lava nga ni mavonela lama pfunaka, va kombela mavonela ka vamakwezru va xisati nakone va va yingiseta loko va khanela. Hi ndlela leyo, vakulu va tiyisa vamakwezru va xisati na vone va tlhela va buyeliwa. Hi ndlela yini? Gerardo, nkulu wa bandla lweyi a tizraka Betele, a li: “Ni gungule leswaku ku kombela mavonela ka vamakwezru va xisati swa ni pfuna ku hetisisa ntizro wanga hi ndlela leyinene. Hi ntolovelo vone va ni mfambu ka mintizro ya kukazri ku tlula vamakwezru vanyingi va xinuna.” A bandleni, ku ni vamakwezru vanyingi va xisati va tizraka swanga maphayona, xileswo va tiva swinyingi hi vhanu va le ka nsimu yavu. Nkulu wa bandla lweyi a vitaniwaka Bryan a li: “Vamakwezru va xisati va nga pfuna ngopfu a nhlengeletan’wini. Xileswo hi nga londzrovota wuswikoti byavu ni matsrhamela yavu lamanene!”

Vakulu lava tlhazrihiki va swi yamukela swidzringanyeto leswi va nyikiwaka hi vamakwezru va xisati. Ha yini? Nkulu lweyi a vitaniwaka Edward a li: “Mavonela ni mfambu wa makwezru wa xisati swi nga pfuna makwezru wa xinuna kuva a twisisa mhaka ya kukazri nakone swi nga tlhela swi mu pfuna kuva a va ni ntwelawusiwana.” (Amapr. 1:5) Nambiloko swi nga koteki kuva ku tizrisiwa mavonela lawa makwezru wa xisati a ma hlayiki, makwezru wa xinuna a nga ha mu tlangela hi leswi a nyikeliki mavonela ni ku twisisa kwake.

Va wupfisa vamakwezru va xisati. Vakulu lava wupfiki va londzrovota mikhandlu hinkwayu akuva va wupfisa vamakwezru va xisati. Hi xikombiso, va nga ha komba vamakwezru va xisati ndlela ya ku fambisa ntlhanganu wa nsimu loko ku ngena makwezru wa xinuna lweyi a babatisiwiki. Va nga ha dondzrisa vamakwezru va xisati ku tizrisa switizro kumbe mitxhini ya kukazri akuva va tizra ka ku yaka kumbe ku bekisa switizro swa nhlengeletanu. A Betele vamakwezru va xinuna va wupfisa vamakwezru va xisati akuva va tizra ka swiyavelo swa ku hambanahambana, swa ku fana ni ku bekisa miyaku kumbe ku xava, kontabilidade, komputadori ni swin’wana. Loko vakulu va wupfisa vamakwezru va xisati, va kombisa leswaku vamakwezru lava va ni wuswikoti nakone va va dumba.

Vamakwezru vanyingi va xisati va tizrisa leswi va dondzrisiwiki swone hi vakulu akuva va pfuna vambeni. Hi xikombiso, vamakwezru van’wana va xisati lava wupfisiwiki ka ku yaka va tizrisa leswi va dondzrisiwiki swone akuva va pfuna lava weliwiki hi timhangu ta ntumbuluku akuva va pfuxeta tiyindlu tavu. Van’wana va tizrise leswi va dondzrisiwiki swone mayelanu ni ku nyikela wumboni bya le livaleni akuva va dondzrisa van’wana kuva na vone va patsreka ka ntizro lowu. Xana vamakwezru va xisati va va vonisa kuyini vakulu lava tinyikaka nkama wa ku va wupfisa? Makwezru lweyi a vitaniwaka Jennifer a li: “Loko ni ve ka ntizro wa ku yaka yindlu ya wugandzreli, makwezru lweyi a a lavisela ntizro a tinyike nkama wa kuva a ni dondzrisa. A a xiyisisa ntizro lowu a ni wu hamba a va a ni kulungela hi wone. A ni swi zrandzra ku tizra na yene hikusa a a ni dumba nakone a a ni vitana n’hwanyana wa lisima.”

LISIMA DZRA KU VONA VAMAKWEZRU VA XISATI SWANGA MAXAKA YEZRU

Ku fana na Yehovha hi va zrandzra ngopfu vamakwezru va xisati. Xileswo, hi fanela ku va teka swanga swizru swa ndangu wezru. (1 Tim. 5:1, 2) Hi vanyika lisima nakone hi nyonxa ngopfu hi ku tizrisana na vone. Nakone i swinene kuva va titwa nava sizrelelekile ni ku zrandzriwa. Makwezru wa kukazri lweyi a vitaniwaka Vanessa a li: “Ni mu tlangela ngopfu Yehovha hi leswi ni hambaka xiyenge xa nhlengeletanu yake leyi taliki hi vamakwezru va xinuna lava minkama hinkwayu va ni tiyisaka.” Makwezru wa kukazri wa xisati lweyi a tsrhamaka Taiwan a li: “Ni mu tlangela ngopfu Yehovha kun’nwe ni nhlengeletanu yake hikuva va zron’weka ngopfu hi hine va xisati ni kuva va hlonipha matitwela yezru. Leswo swi tiyisa lipfumelo dzranga nakone swi tlhela swi ni yentxa ni nyonxela ndjombo leyi ni nga na yone ya ku hamba xiyenge xa nhlengeletanu ya Yehovha.”

Handle ka ku ganaganeka, Yehovha a nyonxa ngopfu loko a vona vamakwezru va xinuna va ti kazratela ku hlonipha ni ku hanyisana hi ndlela leyinene ni vamakwezru va xisati! (Amapr. 27:11) Makwezru wa kukazri lweyi a vitaniwaka Banjamin a tsrhamaka a Escócia a li: “Vhanu vanyingi namunhla a va va hloniphi vavasati, kutani loko vamakwezru va xisati va nghena a ndlwini ya wugandzreli hi djula leswaku va swi xiya leswaku hine ha va zrandzra ni leswaku ha va hlonipha.” Kutani, hinkwezru hi fanela ku yentxa hinkwaswu leswi hi nga swi kotaka akuva hi nyonxisa Yehovha hi ku hanyisana hi ndlela leyinene ni vamakwezru va xisati ni ku va hlonipha hi lani swi fanelaka ha kone.—Rom. 12:10.